Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2014

Kico Ta Convence Abo Cu Bo Tin e Berdad?

Kico Ta Convence Abo Cu Bo Tin e Berdad?

“Comproba pa boso mes kico ta e boluntad di Dios, cu ta bon, agradabel y perfecto.”—ROM. 12:2.

1. Kico lidernan religioso di cristiandad a haci den tempo di guera?

TA E boluntad di Dios pa cristiannan berdadero bay guera y mata hende di otro pais? Esaki ta loke hopi hende cu ta yama nan mes cristian a haci durante e ultimo 100 añanan. Catolico a mata catolico, y protestant a mata protestant. Anto nan lidernan religioso a hasta bendiciona e ehercitonan y nan armanan. E Segundo Guera Mundial ta mustra claramente kico tabata e consecuencia di esey.

2, 3. Ki posicion testigonan di Jehova a tuma durante Segundo Guera Mundial y otro gueranan despues di esey, y dicon?

2 Kico testigonan di Jehova a haci durante Segundo Guera Mundial? Historia ta mustra cu nan a keda neutral; nan no a mete den e guera ey. Dicon nan a haci esey? Pasobra nan kier a imita e ehempel di Hesus y obedece su siñansanan. Hesus a bisa: “Na esaki tur hende lo sa cu boso ta mi discipelnan, esta, si boso ta stima otro.” (Juan 13:35) Nan a tuma na pecho tambe e principionan cu apostel Pablo a skirbi den su carta na e cristiannan na Corinto y a aplica esakinan na nan situacion.—Lesa 2 Corintionan 10:3, 4.

3 Cristiannan berdadero ta laga Bijbel guia nan consenshi, y pesey nan no ta bay dienst ni nan no ta bay guera. Miles di  testigo di Jehova—hoben y bieu, homber y muher—a ser persigui pasobra nan ta mantene e posicion cristian aki. Hopi di nan a sufri den prizon y den campo di trabou forsa. Durante di e era nazi na Alemania, algun hasta a ser asesina. Pero a pesar cu nos rumannan na Europa a haya nan cu persecucion feroz, nunca nan no a lubida nan encargo di predica e bon noticia di e Reino di Jehova. Nan a predica fielmente den prizon y campo di concentracion y hasta si nan tabata den un otro pais pa motibo cu nan a ser saca for di nan propio pais. * Añanan despues, na 1994, testigonan di Jehova no a participa den e masacre etnico cu a tuma luga na Ruanda. Nan a keda neutral tambe ora cu tabatin un conflicto sangriento na paisnan di Balkan durante separacion di ex-Yugoslavia.

4. Ki efecto e posicion neutral di testigonan di Jehova tabatin riba otro hende?

4 E posicion neutral estricto cu testigonan di Jehova tin a convence miles di hende rond mundo cu e Testigonan di berdad ta stima Dios y nan prohimo. Cu otro palabra, nan ta practica berdadero cristianismo. Ki otro aspectonan mas di nos adoracion a convence hopi hende cu testigonan di Jehova ta cristiannan berdadero?

E TRABOU EDUCATIVO DI MAS GRANDI DEN HISTORIA

5. Ki cambio e prome discipelnan di Hesus mester a haci?

5 Hesus a indica bon cla for di cuminsamento di su sirbishi cu predicacion di e bon noticia di e Reino di Dios ta e trabou di mas importante riba Tera. El a scoge 12 discipel pa cuminsa cu e trabou di predica cu lo a bira un obra mundial; despues el a entrena un grupo di 70 discipel mas. (Luc. 6:13; 10:1) El a prepara nan pa hiba e bon noticia na otro hende. Prome, nan mester a predica na otro Hudiu. Pero despues a bin un cambio cu a sorprende nan: Nan mester a predica na hende di otro nacion tambe. Pa e discipelnan Hudiu, esey tabata un cambio hopi grandi.—Echo. 1:8.

6. Kico a yuda Pedro compronde cu Jehova no ta haci distincion di persona?

6 E prome persona cu no tabata Hudiu cu a bira cristian tabata Cornelio. Jehova a manda apostel Pedro bay na cas di Cornelio pa predica na dje. E ora ey Pedro a compronde cu Dios no ta haci distincion di persona. Cornelio y e hendenan di su cas a ser batisa. For di e momento ey, e cristiannan a haya un teritorio nobo y inmenso: henter mundo. Si, for di e momento ey padilanti hende di tur nacion por a tende e berdad y acept’e.—Echo. 10:9-48.

7, 8. Kico e organisacion di Jehova a haci pa yuda mas tanto hende posibel tende e bon noticia? (Wak e prome plachi.)

7 Den nos tempo, cu hopi entusiasmo e rumannan cu ta dirigi e organisacion di Jehova ta apoya y organisa e trabou di predica y siña hende e bon noticia den henter e mundo. Awe, casi ocho miyon testigo di Jehova ta haci nan best pa plama e mensahe di Cristo na mas cu 600 idioma. Y pronto nan lo haci esey na mas idioma. Hende ta reconoce testigonan di Jehova claramente pasobra nan ta predica di cas pa cas y riba caya. Tin biaha nan ta uza mesa y stand portatil pa presenta nan publicacionnan.

8 E organisacion di Jehova a entrena mas cu 2.900 ruman pa traduci Bijbel y publicacionnan biblico. Anto nan no ta traduci solamente na idiomanan bon conoci. Nan ta traduci tambe na cientos di idioma cu no ta mucho conoci pero cu toch miyones di hende ta papia. Por ehempel, na Spaña, miyones di Catalan ta papia nan  idioma materno, Catalan, tur dia. Principalmente den ultimo añanan, hopi mas hende a cuminsa papia Catalan y otro variantenan di e idioma na e stadnan Alicante y Valencia, na Islanan Baleares y na e pais Andorra. Awor testigonan di Jehova ta produci publicacionnan biblico y tin reunionnan cristian na Catalan, e idioma cu ta touch curason di e hendenan cu ta papia Catalan.

9, 10. Kico ta mustra cu e organisacion di Dios ta interesa den e necesidad spiritual di tur hende?

9 Rond mundo nos ta traduci publicacionnan biblico y siña hende den nan propio idioma. Mexico, por ehempel, ta un pais di habla Spaño, pero eynan tin gruponan indigena basta grandi cu ta papia otro idioma. Un di e gruponan ey ta Maya. Recientemente, e sucursal di Mexico a manda e team di traduccion di Maya bay biba na un region di e pais caminda nan por papia y tende e idioma tur dia. Awor e publicacionnan ta ser traduci na un manera cu ta facil pa e pueblo Maya compronde. Un otro ehempel ta Nepal, un pais caminda tin mas cu 29 miyon habitante. Eynan hende ta papia rond di 120 idioma. Pero mas cu dies miyon hende ta papia Nepales, y pa hopi otro hende, esaki ta nan di dos idioma. Nos ta produci literatura biblico na e idioma ey tambe.

10 Dicon e organisacion di Jehova tin asina tanto team di traduccion rond mundo? Pasobra e ta tuma na serio e encargo di predica e bon noticia di Reino den tur nacion. Testigonan di Jehova a parti miyones y miyones di tratado, foyeto y revista gratis den campañanan cu ta tuma luga tur parti di mundo. Nan ta cubri e gastonan di e trabou aki cu nan donacionnan boluntario, siguiendo e instruccion aki di Hesus: “Boso a ricibi pornada, duna pornada.”—Mat. 10:8.

Un team di traduccion ta prepara publicacionnan na Baho Aleman (Plautdietsch) (Wak paragraf 10)

Publicacionnan na Baho Aleman ta util na Paraguay (Wak tambe e prome plachi)

11, 12. Ki bon efecto e obra mundial di predica cu testigonan di Jehova ta haci tabatin riba otro hende?

11 Testigonan di Jehova ta dedica na nan obra di predica y siña otro hende. Nan ta asina convenci cu nan a haya e berdad cu nan ta haci sacrificio grandi pa por predica e mensahe na hende di tur nacion y cultura. Hopi di nan a simplifica nan bida, siña un otro idioma y adapta nan mes na un cultura hopi diferente pa nan por participa den e trabou sumamente importante aki. E obra di predica y siña hende rond mundo ta un otro aspecto cu ta convence hopi  hende cu testigonan di Jehova ta e berdadero siguidornan di Cristo Hesus.

12 E Testigonan ta haci tur esaki pasobra nan ta convenci cu nan a haya e berdad. Pero kico mas a convence e rumannan cu nan tin e berdad?—Lesa Romanonan 14:17, 18.

LOKE A CONVENCE NAN

13. Con testigonan di Jehova ta logra tene nan organisacion limpi?

13 Nos por beneficia di e comentarionan di cristiannan fiel di nos tempo cu ta convenci cu nan tin e berdad. Un ruman homber cu tin hopi tempo ta sirbi Jehova a bisa: “Tur esfuerso ta ser haci pa tene e organisacion di Jehova moralmente limpi y sin mancha, sin importa ken mester haya conseho of disciplina.” Con e pueblo di Jehova ta logra mantene e nivel moral halto aki? Wel, cada ruman ta haci su best pa sigui e principionan cu tin den e Palabra di Dios y imita Hesus y su discipelnan. Debi na esey, durante e historia moderno di testigonan di Jehova ta un cantidad relativamente chikito mester a ser expulsa for di e congregacion pasobra nan a nenga di sigui e principionan di Dios. E gran mayoria di testigo di Jehova ta hiba un bida limpi y ehemplar, y esey ta inclui hopi hende cu anteriormente tabata biba na un manera cu Dios no tabata aproba pero cu a haci cambio.—Lesa 1 Corintionan 6:9-11.

14. Ki cambio hopi hende expulsa a haci, y cu ki resultado?

14 Con a bay cu e personanan cu a ser expulsa for di e congregacion na harmonia cu e instruccion di Bijbel? Miles di nan despues a arepenti di nan practicanan malo y e congregacion a ricibi nan brasa habri bek. (Lesa 2 Corintionan 2:6-8.) Como cu testigonan di Jehova ta sigui e principionan eleva di Bijbel, nan congregacionnan ta keda limpi y esey ta duna nan e confianza y siguransa cu nan organisacion ta esun cu Dios ta aproba. Maske hopi religion ta laga nan miembronan haci kico cu nan kier, nos ta pega firmemente na e normanan di Dios. Esaki a convence hopi hende cu testigonan di Jehova tin e berdad.

15. Kico a convence un ruman homber cu e tin e berdad?

15 Dicon otro testigonan cu experencia ta sigur cu nan tin e berdad? Un ruman homber di 54 aña cu ta sirbi Jehova for di tempo cu e tabata teenager a bisa cu su fe ta basa riba tres pilar of creencia importante: (1) Dios ta existi, (2) Bijbel ta inspira pa Dios y (3) e congregacion cristian di testigonan di Jehova ta e grupo cu Dios ta uza y bendiciona. El a bisa: “Segun cu mi tabata studia Bijbel a traves di añanan, semper mi a purba di test e pilarnan ey pa wak si realmente nan tin un fundeshi firme. Aña tras aña, tabata bin mas y mas evidencia cu a apoya cada un di nan, y esey a fortalece mi fe y convence mi mas ainda cu realmente nos tin e berdad.”

16. Kico a convence un ruman muher cu e tin e berdad?

 16 Un ruman muher casa cu ta sirbi na nos sede mundial, na New York, a comenta riba loke ta convenc’e cu e tin e berdad. El a bisa cu e organisacion di Jehova ta e unico cu realmente ta bisa hende cu e nomber di Dios, cu ta aparece un 7.000 biaha den Bijbel, ta Jehova. Otro cos cu ta anim’e hopi ta e texto di 2 Cronicanan 16:9, cu ta bisa: “Wowo di SEÑOR ta move bay bin door di henter Tera, pa e por sostene fuertemente esnan cu nan curason ta completamente di dje.” El a bisa tambe: “E berdad a mustra mi con mi por tin un curason completo pa asina Jehova por sostene mi libremente. Mi amistad cu Jehova ta e cos di mas valioso pa mi. Y mi ta aprecia con Hesus a yuda nos siña conoce Dios. E conocemento ey ta sostene mi.”

17. Di kico un ruman homber cu antes tabata ateo ta convenci, y na ki conclusion el a yega?

17 Un ruman homber cu antes tabata ateo a bisa: “Ora mi observa creacion, mi ta ripara cu Dios kier pa hende gosa di bida; pesey mi sa cu e lo no permiti sufrimento pa semper. Ademas, segun cu mundo ta bira mas y mas malo, e pueblo di Jehova tin mas fe, mas entusiasmo y mas amor. Ta e spirito di Jehova so por haci e milager moderno aki.”—Lesa 1 Pedro 4:1-4.

18. Kico dos ruman a bisa cu ta convence nan cu nan tin e berdad? Y kico abo ta pensa di esey?

18 Un otro ruman homber cu tin hopi tempo ta sirbi Jehova a bisa pakico e ta kere cu e ta den e berdad: “Loke mi a studia a traves di añanan a convenci mi cu e Testigonan di curason ta haci esfuerso pa sigui e ehempel di cristianismo di prome siglo. Mi a biaha rond mundo, y mi a mira cu mi mes wowo e union cu tin entre e testigonan di Jehova. E berdad cu tin den Bijbel a duna mi satisfaccion y felicidad.” Ora nan a puntra un ruman homber cu tin mas cu 60 aña kico a convenc’e cu el a haya e berdad, el a bisa cu testigonan di Jehova realmente ta imita Hesus. El a splica: “Nos a studia e bida y sirbishi di Hesus cu hopi atencion y a compronde e importancia di sigui su ehempel. Debi na e ehempel di Cristo Hesus, nos a haci cambio den nos bida pa hala mas cerca Dios. Nos ta reconoce Cristo su sacrificio di rescate como e base pa salbacion. Y nos sa cu el a ser resucita for di morto, pasobra nos tin testimonio di hende confiabel cu tabata testigo ocular di esey.”—Lesa 1 Corintionan 15:3-8.

NO TENE E BERDAD PA BO SO

19, 20. (a) Tocante ki responsabilidad Pablo a recorda e cristiannan na Roma? (b) Como cristian dedica, ki privilegio nos tin?

19 Cristiannan berdadero realmente ta stima nan prohimo. Pesey nos no por keda cu e conocemento precioso di e berdad pa nos so. Pablo a bisa e rumannan di e congregacion na Roma cu berdadero siguidornan di Hesus tin e responsabilidad di predica. El a skirbi: “Si bo ta declara publicamente e ‘palabra den bo mes boca’, esta, cu Hesus ta Señor, y den bo curason bo tin fe cu Dios a lant’e for di morto, lo bo ser salba. Pasobra den bo curason bo mester tin fe pa haya un posicion husto dilanti di Dios, ma cu bo boca bo ta haci declaracion publico di bo fe pa haya salbacion.”—Rom. 10:9, 10.

20 Como testigo di Jehova dedica, nos ta convenci cu nos tin e berdad y nos sa cu nos tin e privilegio di siña otro hende e bon noticia di e Reino di Dios. Pues, ora nos ta cumpli cu nos encargo di predica, nos meta ta pa no solamente siña hende tocante Bijbel, sino tambe pa mustra nan na e manera cu nos ta hiba nos bida cu nos ta convenci cu nos tin e berdad.

^ par. 3 Wak e buki Los testigos de Jehová proclamadores del Reino de Dios, pagina 191-198, 448-454.