Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2014

Pregunta di Lector

Pregunta di Lector

E palabranan di David na Salmo 37:25 y loke Hesus a declara na Mateo 6:33 ta nifica cu Jehova nunca lo permiti un cristian keda sin cuminda?

David a skirbi cu e “no a mira e husto desampara, ni su descendientenan ta pidi pan.” (Sal. 37:25) Esaki tabata un declaracion general cu el a haci basa riba su propio experencia. E tabata sa bon cu Jehova semper a cuid’e. Pero e palabranan di David no ta nifica cu Dios su sirbidornan nunca a pasa ni lo pasa den necesidad.

David mes a pasa algun biaha den momentonan hopi dificil. Por ehempel, ora e tabata huy di Saul, e no tabatin casi nada di come. El a pidi pan pa su mes y pa e hombernan cu tabata hunto cu ne. (1 Sam. 21:1-6) Pues, den e situacion critico ey, aunke David no tabatin nada di come, e no tabata cana pidi pan riba caya manera un limosnero. Al contrario, e tabata sa cu Jehova lo a percura p’e.

Na Mateo 6:33, Hesus ta sigura nos cu Dios lo satisface e necesidadnan di su sirbidornan fiel cu ta pone e interesnan di Reino na prome luga den nan bida. Hesus a bisa: “Sigui busca anto prome e Reino y e husticia di Dios, y lo e duna boso tur e cosnan aki [manera cuminda, co’i bebe y paña].” Pero na un otro ocasion Hesus a indica tambe cu su “rumannan” lo por pasa hamber debi na persecucion. (Mat. 25:35, 37, 40) Esey ta loke a pasa cu apostel Pablo. Tabatin biaha cu el a pasa hamber y sed.—2 Cor. 11:27.

Jehova ta bisa nos cu nos lo ser persigui di varios manera. Podise e ta permiti nos pasa den necesidad mientras cu nos ta mustra cu e acusacionnan di Satanas no ta berdad. (Job 2:3-5) Pensa, por ehempel, riba nos rumannan cu tabata encarcela den camponan di concentracion nazi. Un di e metodonan diabolico cu e persiguidonan tabata uza pa purba di kibra nan integridad tabata door di keda sin duna nan suficiente cuminda. Pero e Testigonan fiel a keda obedecido na Jehova, y e no a bandona nan. Ta berdad cu el a permiti nan pasa door di e prueba aki, mescos cu e ta permiti tur cristian enfrenta tur sorto di prueba. Pero no tin duda cu Jehova ta sostene tur hende cu ta sufri pa causa di su nomber. (1 Cor. 10:13) Nos mester corda loke Filipensenan 1:29 ta bisa: “Boso a haya e privilegio di no solamente pone fe den Cristo, sino tambe di sufri p’e.”

Jehova a priminti cu lo e ta cu su sirbidornan. Por ehempel, na Isaias 54:17 e ta sigura nos: “Ningun arma cu wordo forma contra bo lo no prospera.” E promesa aki y otro promesanan similar ta garantisa e siguridad di e pueblo di Dios como grupo. Sinembargo, como un cristian individual, nos lo por pasa den prueba, y hasta muri.