Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2014

Bo Ta “Haci Esfuerso” pa Haya “un Trabou Excelente”?

Bo Ta “Haci Esfuerso” pa Haya “un Trabou Excelente”?

FERNANDO * tabata nervioso. Dos anciano a bis’e cu nan kier papia cu ne den priva. Ultimo tempo, despues di cada bishita di e superintendente di circuito, e ancianonan tabata splic’e kico e tin cu haci pa e por bin na remarca pa haya mas privilegio di sirbishi den congregacion. Pero segun cu tempo a pasa, Fernando a cuminsa puntra su mes si hamas lo e ser nombra como anciano. E congregacion a caba di haya bishita di e superintendente di circuito atrobe. Kico e ancianonan lo bis’e e biaha aki?

Un di e ancianonan a cuminsa papia cu ne y a cita 1 Timoteo 3:1. El a bisa Fernando cu e cuerpo di anciano a haya su nombramento como anciano. Sorprendi, Fernando a sinta stret y a puntr’e: “Kico ruman a bisa?” E ruman a ripiti loke el a bisa y nan por a mira na e sonrisa riba Fernando su cara cu e tabata hopi contento. Despues, ora nan a anuncia na e congregacion cu el a bira anciano, tur hende tabata contento.

Ta malo pa un ruman desea privilegio di sirbi den congregacion? Claro cu no. Segun 1 Timoteo 3:1: “Si un homber ta haci esfuerso pa bira un superintendente, e ta desea un trabou excelente.” E animacion ey a motiva hopi homber cristian pa haci progreso spiritual pa nan por cualifica pa haya privilegio den congregacion. Como resultado, Dios a bendiciona su pueblo cu mas cu shen mil anciano y sirbidor ministerial capacita. Pero como cu e congregacionnan ta sigui crece, nos tin mester di mas ruman homber cu ta haci esfuerso pa haya privilegio. Con ta e manera apropia pa haci esey? Acaso e rumannan cu ta desea di bira anciano mester ta constantemente pendiente di e asunto aki, manera Fernando tabata?

“HACI ESFUERSO” DEN KI SENTIDO?

E expresion biblico “haci esfuerso”, cu nos a lesa na 1 Timoteo 3:1, ta un traduccion di un verbo Griego cu ta transmiti e idea di anhela algo of rek pa alcansa algo. Kisas e ta pone bo pensa riba un persona cu ta rek pa coy un fruta dushi cu ta colga na un palo. Sinembargo, e expresion “haci esfuerso” no kiermen cu un ruman ta purba di haya e privilegio  di “bira un superintendente” na un manera haragan. Dicon no? Pasobra e meta di esnan cu di curason ta desea di sirbi como anciano ta pa haci “un trabou excelente”, no djis pa haya un posicion of un titulo.

Hopi di e cualidadnan cu un hende mester tin pa cumpli cu e trabou excelente aki ta ser menciona na 1 Timoteo 3:2-7 y Tito 1:5-9. Raymond, un ruman cu tin hopi aña como anciano, a comenta lo siguiente tocante e normanan halto ey: “Pa mi, loke ta mas importante ta ki tipo di hende nos ta. Un hende su manera di papia y di siña ta importante, pero nan no ta mas importante cu ser ireprochabel, modera den bo custumbernan, di sano huicio, ordena, hospitalario y rasonabel.”

Si bo ta desea di haya privilegio di sirbi, participa plenamente den e actividadnan di congregacion

Un ruman cu ta desea di sirbi como anciano y cu tin un actitud corecto ta evita tur tipo di deshonestidad y impureza moral y asina ta demostra cu e ta ireprochabel. E ta un persona modera den su custumbernan, di sano huicio, rasonabel y ta hiba un bida ordena; pesey, e rumannan lo tin e confianza cu lo e dirigi e congregacion bon y yuda e rumannan cu nan problemanan. Como cu e ta hospitalario, e ta un animacion pa hobennan y hende nobo den e berdad. Y como cu e gusta haci loke ta bon, e ta duna consuelo y yudansa na rumannan malo y na esnan di edad avansa. E ta cultiva e cualidadnan aki pa beneficia e rumannan, no djis pa e tin mas chens di ser nombra como anciano. *

Gustosamente e cuerpo di anciano ta duna conseho y animacion na ruman hombernan cu ta desea di sirbi como anciano. Pero ta e rumannan cu kier sirbi mes tin cu cumpli cu e rekisitonan biblico. Henry, un superintendente cu experencia, a bisa: “Si bo ta desea di haya privilegio di sirbi, bo tin cu traha duro pa demostra cu bo ta cualifica.” Citando Eclesiastes 9:10, el a splica: “‘Tur loke bo man haya pa haci, hacie cu tur bo forsa.’ Haci bo best ora e ancianonan duna bo un asignacion. Stima tur e trabounan cu bo haya pa haci den congregacion, hasta si ta pa bari salon. E rumannan lo no keda sin tuma nota di bo trabou y di bo esfuerso.” Si bo ta  desea di sirbi como anciano algun dia, sea diligente y confiabel den tur aspecto di sirbishi sagrado. Loke mester caracterisa bo bida ta humildad, no ambicion ni orguyo.—Mat. 23:8-12.

RECHASA IDEA- Y ACCIONNAN ROBES

Algun ruman cu ta desea di haya privilegio den congregacion kisas ta sinti e tentacion pa laga e ancianonan sa indirectamente di nan deseo, of podise nan ta purba di influencia e cuerpo di anciano. Otronan ta keda malcontento ora e ancianonan duna nan conseho. Ta bon pa e rumannan aki puntra nan mes: Ta kico mi kier? Promove mi propio interes of cuida e carnenan di Jehova humildemente?

E rumannan cu ta haci esfuerso pa bira superintendente mester corda cu ancianonan mester ta un “ehempel pa e tou.” (1 Ped. 5:1-3) Un ruman cu ta un ehempel pa e congregacion ta evita di pensa y haci cos fraudulento of bou di man. E ta cultiva pasenshi y perseverancia, sea cu e ser nombra of no. Claro cu ora un ruman bira anciano, esey no ta libr’e milagrosamente di su defectonan. (Num. 12:3; Sal. 106:32, 33) Ademas, un ruman homber por sinti cu su “consenshi ta limpi”, pero podise e otro rumannan tin motibo pa pensa malo di dje. (1 Cor. 4:4) Pues, si e ancianonan ta duna bo conseho sincero, basa riba Bijbel, purba di scucha nan sin rabia. Y despues trata di pone nan conseho na practica.

KICO SI BO TIN CU WARDA HOPI PA SER NOMBRA COMO ANCIANO?

Varios ruman ta haya cu nan mester warda mucho tempo prome cu nan ser nombra. Si bo tin varios aña ta “haci esfuerso pa bira un superintendente”, acaso bo tin e tendencia di bira impaciente of un poco preocupa cu e asunto? Si ta asina, corda riba e proverbio inspira aki: “Speransa posponi ta haci e curason sinti malo, ma deseo cumpli ta un palo di bida.”—Prov. 13:12.

Un persona por sintie hopi desanima si un meta cu e kier logra ta parce inalcansabel. Esey a pasa cu Abraham. Jehova a primintie un yiu homber, pero añanan a pasa sin cu e cu Sara a haya yiu. (Gen. 12:1-3, 7) Ora e tabata basta grandi caba, el a sclama na Jehova: “O Señor DIOS, kico lo bo duna mi, siendo cu mi no tin yiu ... Bo no a duna mi descendencia.” Jehova a sigur’e cu lo el a cumpli cu su promesa di dun’e un yiu. Pero a dura 14 aña mas prome cu Dios a cumpli cu su palabra.—Gen. 15:2-4; 16:16; 21:5.

Awor, Abraham a perde su goso di sirbi Jehova mientras cu e tabata warda? No. E no a duda niun momento den e promesa di Dios. El a sigui warda ansiosamente riba cumplimento di e promesa. Apostel Pablo a skirbi: “Despues cu Abraham a warda cu pasenshi, el a haya e promesa.” (Heb. 6:15) Finalmente, e manera cu Dios a bendiciona e homber fiel ey a surpasa tur su expectativanan. Kico nos por siña for di e ehempel di Abraham?

Si bo tin deseo di sirbi como anciano pero añanan a pasa y ainda esey no a sosode, no entrega. Sigui confia den Jehova. No perde bo goso di sirbie. Warren, kende a yuda hopi ruman homber haci progreso spiritual, a splica dicon: “Un ruman  homber ta bin na remarca pa nombramento despues cu e haci progreso. A traves di tempo su actitud y su habilidadnan ta sali na cla na e manera cu e ta comporta su mes y ta cumpli cu su asignacionnan. Tin ruman ta kere cu ta solamente si nan haya un cierto privilegio of nombramento nan por sinti nan bon. Pero esey ta un idea robes, y esaki por bira un obsesion. Echo ta cu sin importa unda bo ta of kico bo ta haci, basta bo ta sirbi Jehova fielmente, bo por sinti bo bon.”

Un ruman, cu a warda mas cu 10 aña prome cu el a bira anciano, a conta kico ta e les cu el a siña. El a referi na un descripcion bon conoci den capitulo 1 di e buki di Ezekiel y a bisa: “Ta Jehova ta core su garoshi, esta, su organisacion; y ta e ta dicidi na ki velocidad e ta cor’e. Cosnan no ta sosode ora cu nos kier, sino ora cu Jehova ta haya cu ta e momento oportuno. Den e asunto di kier sirbi como anciano, loke ta importante no ta kico ami kier of kico ami lo tin gana di ta. Loke ami kier kisas no ta loke Jehova sa cu mi mester.”

Si bo ta spera algun dia di haci e trabou excelente di un superintendente cristian, haci esfuerso pa contribui na e felicidad di e congregacion. Si ta parce cu tempo ta pasa pocopoco, lucha pa bo no perde pasenshi y cuminsa preocupa of ansha. Raymond, menciona anteriormente, a bisa: “Un hende ambicioso nunca no ta keda satisfecho. Hende cu tur ora bay ta ansha pa logra algo ta perde e goso cu ta bin di sirbi Jehova.” Pues, cultiva e fruta di e spirito di Dios mas plenamente, specialmente pasenshi. Haci esfuerso pa mehora bo spiritualidad mediante estudio personal di e Scritura. Dedica mas tempo na predica e bon noticia y na studia Bijbel cu hende interesa. Dirigi bo famia den actividadnan spiritual y den Adoracion Como Famia. Disfruta di cada ocasion cu bo ta hunto cu bo rumannan. Di e manera ey, lo bo disfruta di bo sirbishi na Jehova segun cu bo ta progresa pa logra bo meta.

Jehova ta duna ruman hombernan un oportunidad maraviyoso di por traha riba nan cualidadnan cristian y yuda e congregacion. Ni Jehova ni su organisacion no kier pa e rumannan cu ta haci esfuerso pa cualifica pa un privilegio bira frustra of malcontento den su sirbishi. Dios ta apoya y bendiciona tur cu ta sirbie cu motibonan puro. Y corda cu Jehova “no ta agrega tristeza” na niun di su bendicionnan.—Prov. 10:22.

Hasta si bo tin basta tempo ta warda pa bira anciano, bo por sigui haci bon progreso spiritual. Jehova lo no lubida si bo ta haci bo best pa cultiva e cualidadnan necesario y ta traha duro den congregacion, sin neglisha bo famia. Sirbi Jehova semper cu alegria, sin importa ki asignacion bo haya.

^ par. 2 A cambia e nombernan den e articulo aki.

^ par. 8 E principionan cu e articulo aki ta trata ta conta tambe pa e rumannan cu ta desea di sirbi como sirbidor ministerial. Na 1 Timoteo 3:8-10, 12 y 13, Bijbel ta menciona e rekisitonan cu nan mester cumpli cu ne.