Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  September 2014

Corda Riba e Sirbidornan di Tempo Completo

Corda Riba e Sirbidornan di Tempo Completo

“Nos no por laga di corda boso obra fiel, boso esfuersonan motiva pa amor.”—1 TES. 1:3.

1. Kico Pablo tabata pensa di rumannan cu tabata traha duro den e sirbishi di Jehova?

APOSTEL Pablo tabatin masha hopi aprecio pa e rumannan cu a traha duro pa predica e bon noticia. El a skirbi: “Nos no por laga di corda boso obra fiel, boso esfuersonan motiva pa amor y e perseverancia cu boso tin debi na boso speransa den nos Señor Hesucristo den presencia di nos Dios y Tata.” (1 Tes. 1:3) Si, Jehova tambe ta corda, of aprecia, e esfuersonan di hende cu ta sirbie fielmente, sea cu nan circunstancianan ta permiti nan pa haci hopi of poco.—Heb. 6:10.

2. Kico nos lo trata den e articulo aki?

2 Tanto den pasado como den nos tempo, hopi di nos rumannan a haci sacrificio grandi pa sirbi Jehova den e trabou di tempo completo. * Den e articulo aki, nos lo wak prome kico algun sirbidor di prome siglo a haci pa sirbi Jehova den e trabou di tempo completo; despues, nos lo mira kico algun sirbidor di tempo completo ta haciendo den nos tempo. Tambe nos lo mira con nos por mustra aprecio pa e rumannan stima ey cu a pone nan mes disponibel pa sirbi Jehova den algun manera masha special.

 SIRBIDORNAN DI TEMPO COMPLETO DEN PROME SIGLO

3, 4. (a) Con algun cristian di prome siglo a sirbi Jehova? (b) Con nan tabata cubri nan gastonan personal?

3 Un poco despues cu Hesus a batisa, el a cuminsa cu un obra cu lo a plama rond mundo: e trabou di predica e Reino. (Luc. 3:21-23; 4:14, 15, 43) Despues di su morto, su apostelnan a haya e encargo pa dirigi e trabou ey. (Echo. 5:42; 6:7) Algun cristian a bandona nan cas pa bay sirbi como predicador di e bon noticia y como misionero. Felipe, por ehempel, a predica den diferente parti di Palestina. (Echo. 8:5, 40; 21:8) Pablo y otro discipelnan a predica e bon noticia na paisnan mas leu. (Echo. 13:2-4; 14:26; 2 Cor. 1:19) Otro cristiannan—manera Silvano (Silas), Marco y Lucas—a skirbi bukinan di Bijbel of a sirbi como secretario di e escritornan di Bijbel. (1 Ped. 5:12) Y hopi ruman muher a traha hunto cu e hombernan fiel ey. (Echo. 18:26; Rom. 16:1, 2) Den e Scritura Griego Cristian, nos ta haya e experencianan emocionante di e rumannan ey. E relatonan ey ta mustra nos cu Jehova ta aprecia e trabou di su sirbidornan y ta percura pa nan necesidadnan.

4 Awor, con sirbidornan di tempo completo den prome siglo a cubri nan gastonan personal? Nos sa cu algun di nan, manera Pablo y su compañeronan di biahe, tabata traha part-time pa yuda cubri nan gastonan personal. Nan no a exigi nada di nan rumannan, pero hopi biaha e rumannan tabata yuda nan. (1 Cor. 9:11-15) Entre otro, e rumannan tabata invita nan pa come of tabata duna nan alohamento of yuda nan den otro manera. Tanto na nivel individual como di congregacion, e rumannan kier a yuda nan.—Lesa Echonan 16:14, 15; Filipensenan 4:15-18.

SIRBIDORNAN DI TEMPO COMPLETO AWE

5. Kico un pareha casa a bisa tocante nan bida den sirbishi di tempo completo?

5 Awe tambe tin hopi ruman ta traha duro den sirbishi di tempo completo den diferente manera. (Wak e cuadro “ Diferente Tipo di Sirbishi di Tempo Completo.”) Kico nan ta pensa di e bida ey cu nan a scoge? Dicon bo no ta puntra nan esey? Sin duda, nan contesta lo anima bo hopi. Wak un ehempel. Un ruman homber cu a yega di sirbi como pionero regular, pionero special, misionero y cu awor ta un miembro di e famia di Betel den un otro pais, a bisa: “Mi ta haya cu un di e mihor decisionnan cu mi a tuma den mi bida tabata di drenta sirbishi di tempo completo. Tempo mi tabatin 18 aña, mi no tabata sa si mi mester a bay universidad, bay traha ocho ora of bira pionero. Tabata dificil pa mi scoge. Pero experencia a siña mi cu Jehova no ta lubida e sacrificionan cu bo haci pa sirbie den e trabou di tempo completo. Mi a haya chens di uza e talentonan cu Jehova a duna mi den algun manera cu nunca lo tabata posibel si mi a scoge un carera profesional den mundo.” Su esposa a bisa: “Cada asignacion cu nos a haya a yuda mi crece spiritualmente. Bes tras bes, nos a sinti con Jehova a proteha nos y guia nos den formanan cu nunca nos lo a experencia si nos a keda hiba un bida comodo, haciendo solamente loke nos a custumbra cu ne. Tur dia mi ta gradici Jehova pa e bida cu nos tin den sirbishi di tempo completo.” Abo lo kier tin un bida asina?

6. Kico Jehova ta pensa di nos sirbishi na dje?

6 Claro cu e circunstancianan di algun ruman no ta permiti nan pa participa den sirbishi di tempo completo na e momentonan aki. Pero nos por ta sigur cu Jehova ta aprecia loke nan ta haci di henter nan alma p’e. Por ehempel, tuma nota cu Pablo a manda cumindamento pa tur e rumannan den e congregacion na Colosas, y hasta a menciona nomber di algun di nan. (Lesa Filemon 1-3.) Ta bisto cu Pablo a aprecia e bon trabou cu nan tabata haci. Y Jehova tambe tabata sinti mescos. Di igual manera, nos Tata celestial ta aprecia bo sirbishi. Pero, con bo por apoya e rumannan cu awe ta sirbi Jehova den e trabou di tempo completo?

 CON NOS POR YUDA E PIONERONAN?

7, 8. (a) Kico e sirbishi di pionero ta encera? (b) Con e rumannan den congregacion por yuda e pioneronan?

7 Mescos cu e predicadornan diligente di e prome siglo, pioneronan awe ta un gran animacion pa e congregacion. Hopi pionero ta dedica 70 ora pa luna na e trabou di predica. Con nos por yuda nan?

8 Un ruman muher pionero cu yama Shari a bisa: “Como cu tur dia pioneronan ta den sirbishi, nan por parce fuerte. Toch nan tin mester di animacion.” (Rom. 1:11, 12) Un otro ruman muher, cu a traha pionero pa varios aña, a bisa di e pioneronan di su congregacion: “Tur ora nan ta traha duro. Nan ta keda agradecido ora bo ofrece pa uza bo auto den sirbishi, of bo invita nan pa come of bo duna nan algo pa gasolin of pa cubri otro gasto. Esey ta laga nan mira cu di berdad bo ta interesa den nan.”

9, 10. Kico algun ruman a haci pa yuda e pioneronan di nan congregacion?

9 Un otro manera cu nos por yuda e pioneronan ta door di sali cu nan den sirbishi. Un ruman muher pionero cu yama Bobbi a bisa: “Nos mester di mas apoyo durante siman.” Un otro pionero di su congregacion a agrega: “Ta masha dificil pa haya un hende pa compaña bo parti atardi.” Anto un ruman muher cu awor ta sirbi na Betel di Brooklyn tin grato recuerdo di su sirbishi di pionero. El a conta: “Un ruman muher cu tin auto a bisa mi: ‘Ki ora cu bo no tin hende pa sali cu ne, yama mi, y mi ta compaña bo.’ Ta el a pone cu mi por a sigui traha pionero.” Anto Shari a bisa esaki: “Despues di sirbishi, pioneronan cu ta soltero hopi biaha ta keda nan so. Bo por invita nan de bes en cuando na bo Adoracion Como Famia. Un otro manera pa laga nan sinti nan bon ta door di inclui nan den otro actividadnan tambe.”

10 Un ruman muher cu tin casi 50 aña den sirbishi di tempo completo ta corda e tempo cu el a traha pionero hunto cu otro ruman muhernan soltera. El a conta: “Nos ancianonan tabata bishita e pioneronan cada tanto luna. Nan tabata puntra nos con ta bay cu nos salud, cu trabou y tabata kier sa si nos tabatin cualkier preocupacion. Nan tabata realmente interesa den nos. Nan tabata bishita nos na cas pa wak si nos tabatin mester di yudansa cu algo.” Esaki kisas ta pone nos corda riba e  palabranan di aprecio cu Pablo a skirbi tocante un cristian di Efeso cu a atende e necesidadnan di Pablo a pesar di su obligacionnan familiar.—2 Tim. 1:18.

11. Kico e sirbishi di pionero special ta encera?

11 Algun congregacion tin e privilegio di tin pioneronan special hunto cu nan. Hopi di e rumannan aki ta dedica 130 ora pa luna na sirbishi di veld y tambe ta yuda e congregacion den otro maneranan mas. Esaki ta pone cu ta resta masha poco tempo pa nan haci trabou secular. Pesey, pa nan por concentra riba e trabou di predica, sucursal ta duna nan un yudansa financiero chikito mensualmente.

12. Con e ancianonan y otro rumannan por yuda e pioneronan special?

12 Con nos por yuda e pioneronan special? Un anciano cu ta sirbi na Betel y cu tin hopi contacto cu nan a splica: “E ancianonan mester papia cu e pioneronan special pa haya sa kico ta nan circunstancianan, despues nan mester wak con por yuda nan. Tin Testigo ta kere cu pasobra pioneronan special ta haya un yudansa financiero nan no tin mester di nada. Pero echo ta cu e rumannan di congregacion por yuda nan den hopi manera.” Mescos cu e pioneronan regular, pioneronan special tambe ta keda contento ora nan por haya rumannan pa traha hunto cu nan den sirbishi. Abo por yuda nan den e manera ey?

CON NOS POR YUDA SUPERINTENDENTENAN DI CIRCUITO?

13, 14. (a) Kico nos mester tene na mente relaciona cu superintendentenan di circuito? (b) Kico bo por haci pa yuda e rumannan cu ta den trabou di circuito?

13 Hopi biaha, e rumannan ta mira superintendentenan di circuito y nan esposa como hende cu ta spiritualmente fuerte y ta anima nos. Esey ta berdad, pero nan tambe tin mester di animacion y di compaño den sirbishi. Ademas, nan gusta diberti hunto cu e rumannan y pasa un rato ameno cu nan. Kico si nan bira malo of tin cu bay hospital, y podise mester opera of haya tratamento? Ta un gran animacion pa nan si e rumannan local yuda nan cu nan necesidadnan y mustra interes personal den nan. Nos por imagina con bon Lucas, “e dokter stima” y escritor di e buki di Echonan, a cuida Pablo y su compañeronan di biahe.—Col. 4:14; Echo. 20:5–21:18.

14 Di otro banda, superintendentenan di circuito y nan esposanan tin mester di e amor y animacion di bon amigo. Un superintendente di circuito a skirbi: “Ta parce cu mi amigonan sa ki ora mi tin mester di animacion. Nan ta haci exactamente e preguntanan cu ta yuda mi desahoga mi mes. Ora nan djis scucha mi, ya mi ta sinti mi mihor.” Superintendentenan di circuito y nan esposa ta keda masha agradecido ora e rumannan ta mustra interes personal den nan.

APOYA E BETELITANAN

15, 16. (a) Ki trabou e rumannan cu ta sirbi na Betel y na Salonnan di Asamblea ta haci? (b) Con nos por apoya e rumannan ey?

15 Rond mundo, e rumannan cu ta sirbi na Betel of na Salonnan di Asamblea ta haci trabou importante cu ta apoya e obra di Reino den e teritorio cu nan sucursal ta supervisa. Tin betelita den bo congregacion of circuito? Con bo por mustra cu bo ta corda riba nan?

16 Ora nan ta nobo na Betel, kisas nan ta sinti falta di nan famia y amigonan cu nan a laga atras. Pues, nan lo keda masha agradecido si otro betelita y e rumannan di nan congregacion nobo bira nan amigo. (Mar. 10:29, 30) Nan orario normal di trabou ta permiti nan asisti na reunion y sali den sirbishi tur siman. Pero tin cierto periodo cu e betelitanan ta haya trabou adicional pa haci. Ta bon si e congregacionnan tin comprension pa esaki y mustra cu nan ta aprecia e betelitanan y e trabou cu nan ta haci.—Lesa 1 Tesalonicensenan 2:9.

APOYA SIRBIDORNAN DI TEMPO COMPLETO CU TA SIRBI DEN OTRO PAIS

17, 18. Menciona algun asignacion di sirbidornan di tempo completo cu ta sirbi den otro pais.

17 Sirbidornan di tempo completo cu ta acepta un asignacion pa sirbi den un otro  pais, por haya nan cu un idioma nobo, cuminda diferente y custumbernan nobo y tambe condicionnan di bida cu ta completamente otro for di loke nan a custumbra. Kico ta motiva nan pa acepta e reto ey?

18 Algun di nan ta misionero y ta pasa gran parti di nan tempo den sirbishi di veld. E congregacionnan ta beneficia hopi di nan experencia y di e entrenamento specialisa cu nan a ricibi. Sucursal ta percura pa nan haya un cas simpel y un yudansa chikito pa cubri nan gastonan basico. Otro sirbidornan di tempo completo ta bay sirbi na Betel of yuda traha sucursal, oficina di traduccion, Salon di Asamblea of Salon di Reino. E sucursal di e pais of e rumannan local ta percura pa nan necesidadnan, entre otro, cuminda y alohamento. Mescos cu e betelitanan, boluntarionan di construccion ta asisti regularmente na reunion y sali den sirbishi di veld. Pues, den hopi manera nan ta un bendicion pa e congregacion.

19. Kico nos mester tene cuenta cu ne ora sirbidornan di tempo completo bin sirbi na nos pais?

19 Con bo por tene cuenta cu sirbidornan di tempo completo cu a bin sirbi den bo pais? Wel, vooral ora nan caba di yega, kisas nan no a custumbra di come cierto cuminda. Tene cuenta cu esey ora bo ta invita nan pa bin come cerca bo. Kisas bo por puntra nan si nan lo tin gana di purba un plato nobo of si tin algo cu nan ta prefera di no come. Ademas, tene pasenshi cu nan mientras cu nan ta purba di siña bo idioma y adapta nan mes na e custumbernan di bo pais. Lo tuma un poco tempo prome cu nan por compronde tur cos cu bo ta bisa, pero kisas lo bo por yuda nan na un manera bondadoso cu nan pronunciacion. Corda cu nan kier siña.

20. Con nos por yuda sirbidornan di tempo completo y nan mayornan?

20 Sirbidornan di tempo completo cu tempo ta bira grandi y nan mayornan tambe. Ora e mayornan ta testigo di Jehova, probablemente nan kier pa nan yiunan keda den nan asignacion. (3 Juan 4) Claro cu nan yiunan lo haci nan best pa cuida nan y lo bishita nan mas tanto posibel. Pero e rumannan cu ta biba cerca di e mayornan tambe por yuda e sirbidornan di tempo completo. Nan por ofrece pa yuda e mayornan ora esaki ta necesario. No lubida cu e sirbidornan di tempo completo tin responsabilidadnan grandi den e obra di mas importante di tur tempo. (Mat. 28:19, 20) Abo of bo congregacion lo por duna un man si e mayornan di sirbidornan di tempo completo tin mester di yudansa?

21. Con e sirbidornan di tempo completo ta sinti nan mes ora e rumannan ta yuda nan y anima nan?

21 Rumannan cu scoge pa sirbishi di tempo completo no ta haci esey pa saca beneficio financiero, sino pa duna lo mihor di nan mes na Jehova y pa yuda otro hende. Nan ta keda masha agradecido cu cualkier yudansa cu nos por duna nan. Un ruman muher cu a bay sirbi den un otro pais a bisa: “Un simpel nota di gradicimento ta suficiente pa mustra cu otronan ta pensa riba bo y cu nan ta contento cu loke bo ta haciendo.”

22. Kico abo ta pensa di sirbishi di tempo completo?

22 Sirbidornan di tempo completo a scoge e mihor manera di biba cu tin awe. Nan bida ta emocionante y ta duna nan satisfaccion. Ademas, e bida aki ta siña nan lesnan importante y ta yuda nan haya e cualidadnan cu nan tin mester pa e sirbishi gososo y duradero cu ta spera tur fiel sirbidor di Jehova bou di e Reino di Dios. Pesey, laga nos tur sigui apoya e sirbidornan di tempo completo y asina demostra cu nos ta ‘corda nan obra fiel y nan esfuersonan motiva pa amor.’—1 Tes. 1:3.

^ par. 2 Ora nos uza expresionnan manera “sirbidornan di Dios di tempo completo”, nos ta referi na rumannan cu di antemano ta bay di acuerdo pa dedica un cierto cantidad di tempo pa luna sea na e trabou di predica of na otro trabou cu ta apoya predicacion di e bon noticia.