Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2014

E Papel di Hende Muher den e Proposito di Jehova

E Papel di Hende Muher den e Proposito di Jehova

“Hende muher cu ta anuncia e bon noticia ta un ehercito grandi.”SAL. 68:11NW.

1, 2. (a) Ki regalonan Dios a duna Adam? (b) Dicon Dios a duna Adam un esposa? (Wak e prome plachi.)

JEHOVA a crea nos planeta cu un proposito. El “a form’e pa e wordo habita.” (Isa. 45:18) E prome hende cu Dios a crea tabata Adam. Adam tabata un homber perfecto, y Dios a dun’e e bunita Hofi di Eden pa e biba aden. Den e hofi Adam por a mira matanan impresionante, bestianan interesante y tende awa di riu basha. Pero tabata falta algo hopi importante. Jehova a indica esey ora el a declara: “No ta bon pa e homber ta so; lo mi traha un yudado p’e cu ta pas cu ne.” Jehova a laga Adam bay un soño profundo, a tuma un di su repchinan y “a traha un muher cu e repchi.” Adam a keda masha contento ora el a lanta fo’i soño. El a bisa: “Esaki ta awor weso di mi wesonan, y carni di mi carni; e lo wordo yama Muher.”—Gen. 2:18-23.

2 Dios a duna Adam un regalo hopi special: Un ayudante perfecto. E ayudante aki a haya e privilegio special di haya yiu. Bijbel ta bisa cu Adam “a duna su esposa e nomber Eva, pasobra ta e tabata mama di tur ser bibo.” (Gen. 3:20) Esta un maraviyoso regalo Dios a duna e prome pareha humano! Hunto, Adam cu Eva por a yena Tera cu hende perfecto. Asina henter Tera lo a bira un paradijs, habita pa hende perfecto, kendenan  tabatin e tarea di cuida tur otro ser bibo.—Gen. 1:27, 28.

3. (a) Kico Adam cu Eva mester a haci pa nan por a ricibi Jehova su bendicion, pero kico a sosode? (b) Ki preguntanan nos lo contesta den e articulo aki?

3 Pa Adam cu Eva por a ricibi e bendicionnan cu Jehova Dios tabatin prepara pa nan, nan mester a obedec’e y acepta su autoridad. (Gen. 2:15-17) Ta asina so nan lo por a cumpli cu e proposito cu Dios tabatin pa nan. Pero lamentablemente, nan a haci caso di “e colebra original”, cu ta Satanas, y a peca contra Dios. (Rev. 12:9; Gen. 3:1-6) Con e acto di desobediencia aki a afecta hende muher? Kico algun hende muher fiel di pasado a haci? Dicon nos por bisa cu e ruman muhernan fiel di nos tempo ta “un ehercito grandi”?—Sal. 68:11.

E CONSECUENCIA DI DESOBEDIENCIA

4. Ken Dios a tene responsabel pa e pica cu e prome pareha a comete?

4 Ora Adam mester a duna cuenta na Dios pa su desobediencia, el a bin cu un excuus. El a bisa Dios: “E muher cu bo a duna pa ta hunto cu mi, ta el a duna mi for di e palo, y mi a come.” (Gen. 3:12) Si, Adam no a acepta su fout; en bes di esey, el a culpa Eva, e muher cu Dios a dun’e, y tambe Dios, kende a crea Eva. Tanto Adam como Eva a peca, pero Dios a tene Adam responsabel pa nan mal echo. Pesey apostel Pablo a skirbi cu “pa medio di un hende [esta Adam] pica a drenta mundo, y morto pa medio di pica.”—Rom. 5:12.

5. Kico Dios a proba ora el a laga hende goberna nan mes pa un tempo?

5 Satanas a laga Adam cu Eva pensa cu nan no tabatin mester di Jehova como nan Gobernante. Esey a lanta un pregunta masha importante: Ken tin derecho di goberna humanidad? Pa contesta e pregunta ey unabes pa semper, Dios a laga hende goberna nan mes pa un tempo. Dios tabata sa cu tempo lo a mustra cu hende no por goberna cu exito sin su yudansa. A traves di siglonan, tal gobernacion a resulta den un calamidad tras di otro. Den e ultimo siglo so, alrededor di 100.000.000 hende, entre nan miyones di hende inocente, a muri den guera. Pues, ya tin hopi evidencia cu ta mustra cu “no ta keda na hende pa dirigi su pasonan.” (Jer. 10:23) Pesey, cristiannan berdadero ta acepta Jehova como nan Gobernante.—Lesa Proverbionan 3:5, 6.

6. Con hende muher ta ser trata den hopi pais?

6 Tanto hende homber como hende muher ta sufri den e mundo malbado aki, goberna pa Satanas. (Ecl. 8:9; 1 Juan 5:19) Vooral hende muher a bira victima di algun di e pio crimennan. Rond mundo, alrededor di 30 porciento di hende muher ta ser maltrata fisicamente of abusa sexualmente pa nan mes esposo of partner. Den algun pais, hende ta faborece yiu homber, pasobra nan ta pensa cu yiu homber por preserva nomber di e famia y percura pa mayornan of welonan. Y tin caminda, hende ta considera yiu muher indeseabel, pesey nan ta comete abortus mas lihe si ta trata di un yiu muher.

7. Ki comienso Dios a duna tanto e homber como e muher?

7 Dios ta odia maltrato di hende muher. E ta trata hende muher na un manera husto y cu dignidad. Por ehempel, ora Jehova a crea Eva, e no a cre’e pa e ta esclavo di Adam. El a crea Eva perfecto y cu hopi cualidad cu a hacie un bon ayudante pa su esposo. Esey ta un di e motibonan pakico Bijbel ta bisa cu, na final di e di seis dia di creacion, Dios “a mira tur loke el a traha, y ata, tur cos tabata masha bon.” (Gen. 1:31) Si, “tur loke” Jehova a crea tabata “masha bon.” El a duna tanto e homber como e muher un bon comienso!

 HENDE MUHER CU TABATIN JEHOVA SU APOYO

8. (a) Con mayoria di hende ta comporta nan mes? (b) Ken Jehova a yuda a traves di historia?

8 Despues di e rebelion den Eden, hende a sigui desobedece Jehova. Den e ultimo shen añanan, comportacion di hende a bira mas malo cu nunca. Sin duda, manera Bijbel a profetisa, nos ta bibando den “e ultimo dianan”, un tempo “dificil pa trata cu ne.” (2 Tim. 3:1-5) Toch semper tabatin hende homber y muher cu a confia den Jehova, a obedece su leynan y a acept’e como nan Gobernante. Y Señor Soberano Jehova, na su turno, a yuda nan y a apoya nan.—Lesa Salmo 71:5.

9. Cuanto hende a sobrevivi e Diluvio, y dicon?

9 Ora Jehova a destrui e mundo malbado den tempo di Noe pa medio di un Diluvio, masha poco hende a sobrevivi. Si Noe su ruman hombernan y ruman muhernan tabata na bida e tempo ey, nan tambe lo a muri den e Diluvio. (Gen. 5:30) Ta Noe cu su esposa y nan tres yiu hombernan cu nan esposa so a sobrevivi. Pues, mes tanto hende homber cu hende muher a sobrevivi e Diluvio. Nan a sobrevivi pasobra nan a obedece Jehova y a haci su boluntad. Tur e miles di miyones di hendenan cu ta na bida awe ta descendiente di e ocho personanan ey, kendenan tabatin Dios su apoyo.—Gen. 7:7; 1 Ped. 3:20.

10. Dicon esposanan di patriarcanan fiel tabatin Jehova su apoyo?

10 Añanan despues tambe tabatin esposanan di patriarcanan fiel cu tabatin Dios su apoyo. Esey lo no tabata e caso si nan tabata cana keha tocante nan circunstancianan di bida. (Judas 16) Tuma por ehempel Sara, esposa di Abraham. Ora nan tabatin cu bandona nan bida comodo na Ur pa bay biba den tent na un otro pais, Sara no a keha. Mas bien, Sara “a obedece Abraham y a yam’e ‘señor.’” (1 Ped. 3:6) Rebeca, e esposa di Isaak, ta un otro ehempel. E tabata un excelente esposa, un regalo di Jehova. Pesey no ta un sorpresa cu Isaak a ‘stima’ Rebeca y asina “a haya consuelo despues di morto di su mama.” (Gen. 24:67) Awe, nos tambe ta masha contento cu den e pueblo di Dios tin hopi ruman muher fiel, manera Sara y Rebeca.

11. Con dos partera Hebreo a demostra curashi?

11 Durante e añanan cu e Israelitanan tabata esclavo na Egipto, nan a bira un nacion hopi grandi. Pesey Farao a saca un decreto pa mata tur yiu homber Hebreo recien naci. Pero e parteranan Hebreo Sifra y Pua, kendenan probablemente tabata supervisa e otro parteranan, cu curashi a nenga di sigui Farao su instruccion. Dicon? Nan tabatin temor pa Jehova. Y Jehova, na su turno, a bendiciona nan dunando nan un famia.—Exo. 1:15-21.

12. Kico nos por bisa di Debora y Jael?

12 Den tempo di e huesnan di Israel, profeta Debora tabata un di e hende muhernan cu tabatin Dios su apoyo. Debora a encurasha hues Barak y a hunga un papel importante den liberacion di e Israelitanan for di man di nan enemigonan. Pero Debora a profetisa cu ta ‘un hende muher’ lo a ricibi merito pa e derota di e Cananeonan, y no Barak. Esaki a sosode ora Jael, kende no tabata un Israelita, a mata Sisara, e oficial di e ehercito Cananeo.—Hues. 4:4-9, 17-22.

13. Kico Bijbel ta conta nos di Abigail?

13 Un otro hende muher sobresaliente tabata Abigail, kende a biba un 11 siglo prome cu Cristo. E tabata un persona cu hopi discernimento, pero su esposo, Nabal, tabata un homber bruto, inutil y di mala fe. (1 Sam. 25:2, 3, 25) Pa un tempo, David y su hombernan a proteha Nabal su sirbidornan y su tou di bestia. Pero ora David a manda pidi Nabal yudansa, Nabal a  insulta David su sirbidornan y “desprecia nan” y no a duna nan nada. David a rabia asina tanto cu e kier a elimina Nabal y su hombernan. Ora Abigail a haya sa esaki, el a hiba cos di come y bebe pa David y su hombernan y asina a evita dramamento di sanger. (1 Sam. 25:8-18) Despues David a bisa Abigail: “Bendiciona sea e SEÑOR Dios di Israel, kende a manda bo e dia aki pa contra cu mi.” (1 Sam. 25:32) Despues cu Nabal a muri, David a casa cu Abigail.—1 Sam. 25:37-42.

14. Ki tipo di trabou e yiu muhernan di Salum a haci, y con nos ruman muhernan awe ta haci trabounan similar?

14 Hopi hende homber, muher y mucha a muri na aña 607 prome cu Cristo ora cu e Babilonionan a destrui Jerusalem y su tempel. Pero na aña 455 prome cu Cristo, e murayanan di e stad a ser reconstrui bou di guia di Nehemias. Entre e personanan cu a yuda reconstrui e murayanan aki tabatin e yiu muhernan di Salum, un prins di mitar di e districto di Jerusalem. (Neh. 3:12, NW) Maske nan tabata yiu di un prins, toch nan a ofrece nan mes di buena gana pa haci trabou humilde. Esaki ta laga nos corda riba e cantidad di ruman muhernan rond mundo cu gososamente ta apoya varios proyecto di construccion awe, y nos ta aprecia nan trabou.

HENDE MUHERNAN LEAL DI PROME SIGLO

15. Ki privilegio Dios a duna Maria?

15 Algun tempo prome cu Cristo y durante e prome siglo, Jehova a bendiciona varios hende muher cu privilegionan hopi special. Un di e hende muhernan aki tabata e birgen Maria. Ora e tabata comprometi pa casa cu Jose, milagrosamente el a sali na estado pa medio di Jehova su spirito santo. Dicon Jehova Dios a scoge Maria pa bira mama di Hesus? Sin duda esey tabata pasobra Maria tabatin e cualidadnan spiritual necesario pa cria e yiu homber perfecto cu e tabata bay haya. Y tabata un gran privilegio pa bira mama di e homber di mas importante cu a biba riba Tera.—Mat. 1:18-25.

16. Duna un ehempel cu ta mustra con Hesus a trata hende muher.

16 Hesus tabata trata hende muher na un manera masha bondadoso. Tuma por ehempel e señora cu 12 aña largo tabatin sangramento. Den un multitud di hende, el a bin di patras y a mishi cu Hesus su paña. Kico Hesus a haci? E no a rabia cu ne; al contrario, bondadosamente Hesus a bis’e: “Mi yiu, bo fe a cura bo. Bay na paz, sea salud y cu e maleza penoso aki no molestia bo mas.”—Mar. 5:25-34.

17. Ki suceso milagroso a tuma luga na Pentecoste di aña 33 di prome siglo?

17 Entre e discipelnan di Hesus tabatin algun hende muher cu tabata uza nan pertenencianan pa sirbi Hesus y e apostelnan. (Luc. 8:1-3) Na Pentecoste di aña 33 di prome siglo, alrededor di 120 hende homber y hende muher a ricibi Dios su spirito santo na un manera milagroso. (Lesa Echonan 2:1-4.) Hopi aña di antemano, Jehova a bisa cu ‘lo e basha su spirito riba henter humanidad y cu yiu hombernan y yiu muhernan lo profetisa.’ El a bisa tambe cu ‘lo e basha su spirito riba sirbidornan homber y muher.’ (Joel 2:28, 29) E suceso milagroso ey a mustra bon cla cu Jehova a rechasa Israel apostata y cu desde e tempo ey padilanti ta “e Israel di Dios”, cu ta consisti di tanto hende homber como hende muher, tin su apoyo. (Gal. 3:28; 6:15, 16) Entre e hende muhernan cu a predica e bon noticia den prome siglo tabatin e cuater yiu muhernan di Felipe, e predicador di e bon noticia.—Echo. 21:8, 9.

 “UN EHERCITO GRANDI” DI HENDE MUHER

18, 19. (a) Ki privilegio Dios a duna tanto hende homber como hende muher? (b) Con e salmista ta referi na e hende muhernan cu ta predica e bon noticia?

18 Den e decada di 1870, un par di hende homber y muher a mustra un interes profundo den adoracion berdadero. Ta nan a prepara e caminda pa esnan cu awe ta cumpliendo cu e profecia di Hesus cu ta bisa: “Y e bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”—Mat. 24:14.

19 Awe, e grupo chikito ey di Studiantenan di Bijbel a aumenta y a bira casi 8.000.000 testigo di Jehova. Banda di esey, mas cu 11.000.000 persona, kendenan no ta Testigo, a asisti na e Conmemoracion anual di e morto di Hesus na aña 2013. Mayoria di e personanan aki tabata hende muher. Ademas, mas cu 1.000.000 Testigo ta traha den sirbishi di tempo completo mundialmente y mayoria di nan ta hende muher. Pues, nos ta mira cu Dios a duna hende muher tambe e gran privilegio di por represent’e. Y no tin duda cu e siguiente palabranan di e salmista a cumpli: “Jehova mes ta duna e mandato; hende muher cu ta anuncia e bon noticia ta un ehercito grandi.”—Sal. 68:11NW.

E hende muhernan cu ta predica e bon noticia ta realmente “un ehercito grandi” (Wak paragraf 18, 19)

HOPI BENDICION TA SPERA HENDE MUHER FIEL

20. Kico ta algun topico cu nos por studia durante nos Adoracion Como Famia of estudio personal?

20 Ta imposibel pa den e articulo aki nos papia di tur e hende muhernan fiel cu Bijbel ta menciona. Pero nos tur por lesa di nan den Bijbel y den nos literatura. Por ehempel, nos por medita riba e lealtad di Ruth. (Ruth 1:16, 17) Nos por lesa e buki di Bijbel tocante Reina Ester y articulonan tocante dje pa fortalece nos fe. Nos por studia informacion tocante e hende muhernan aki y otronan durante nos Adoracion Como Famia. Si nos ta biba nos so, nos por haci esaki durante nos estudio personal.

21. Con ruman muhernan fiel a demostra nan lealtad na Jehova den tempo dificil?

21 No tin ningun duda cu Jehova ta bendiciona e predicacion di ruman muhernan fiel y ta sostene nan den tempo dificil. Por ehempel, bou di e regimen nazi y comunista, Jehova a yuda nos ruman muhernan fiel keda leal na dje. Hopi di e ruman muhernan aki a sufri masha hopi y algun a hasta perde nan bida pa motibo cu nan a keda obedecido na Dios. (Echo. 5:29) Mescos cu den pasado, nos ruman muhernan awe y otro sirbidornan di Dios tambe a scoge Jehova como nan Gobernante. Y Jehova, na su turno, ta haci cu nan mescos cu el a haci cu e Israelitanan di antiguedad. Na moda di papia, e ta tene nan man drechi y bisa: “No tene miedo, lo mi yuda bo.”—Isa. 41:10-13.

22. Ki privilegionan ta spera nos den futuro?

22 Pronto, Jehova su fiel sirbidornan, tanto hende homber como muher, lo yuda transforma nos Tera den un paradijs, y nan lo yuda miyones di persona cu resucita siña tocante Jehova su propositonan. Mientrastanto, sea cu nos ta hende homber of hende muher, laga nos tur balora nos privilegio di sirbi Jehova “den un acuerdo [of, uni].”—Sof. 3:9.