Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2014

Obedece e Bos di Jehova Unda cu Bo Ta

Obedece e Bos di Jehova Unda cu Bo Ta

“Bo horea lo tende un palabra tras di bo ta bisa: ‘Esaki ta e caminda.’”ISA. 30:21.

1, 2. Con Jehova ta comunica cu su sirbidornan?

A TRAVES di historia, Jehova a uza diferente manera pa guia su pueblo. Den pasado, Jehova tabata uza angel, vision of soño pa revela na su sirbidornan loke lo a pasa den futuro of pa duna nan cierto asignacion specifico. (Num. 7:89; Eze. 1:1; Dan. 2:19) Tabatin ocasion cu Jehova a scoge cierto hende pa represent’e y pa guia su pueblo. Sea loke sea e medio cu Jehova a uza pa guia su pueblo, ta esnan cu a sigui su instruccionnan a ser bendiciona.

2 Awe, Jehova ta uza su Palabra, su spirito santo y e congregacion cristian pa guia nos. (Echo. 9:31; 15:28; 2 Tim. 3:16, 17) Y Jehova su guia ta asina cla cu ta comosifuera nos ta tend’e bisa nos: “Esaki ta e caminda, cana den dje.” (Isa. 30:21) Jehova ta uza Hesus tambe pa guia nos. Con asina? Wel, el a nombra Hesus pa guia e congregacion cristian pa medio di “e esclavo fiel y prudente.” (Mat. 24:45) Nos mester tuma e instruccionnan y guia cu nos ta haya di Jehova na serio, pasobra nos salbacion eterno ta depende di nos obediencia.—Heb. 5:9.

3. Kico por pone nos desobedece Jehova? (Wak e prome plachi.)

3 Satanas e Diabel tambe sa cu Jehova su guia ta nifica bida pa nos, pesey e ta purba di stroba nos di scucha, of obedece,  Jehova. Nos curason tambe por engaña nos y stroba nos di obedece Jehova. (Jer. 17:9) Pesey, laga nos wak con nos por evita cualkier obstaculo cu por stroba nos di obedece e bos di Dios. Nos lo mira tambe con bon comunicacion cu Jehova lo yuda nos keda bon amigo di dje a pesar di cualkier situacion cu nos por confronta.

E TRAMPANAN DI SATANAS

4. Con Satanas ta purba di influencia hende su manera di pensa?

4 Satanas ta uza ideanan di su mundo y informacion robes pa purba di influencia hende su manera di pensa. (Lesa 1 Juan 5:19.) Corant, buki, revista, radio, television y Internet ta plama informacion rond mundo. Aunke e medionan di comunicacion aki por ta util, mayoria di biaha nan ta promove conducta y estilo di bida cu no ta cuadra cu Jehova su normanan. (Jer. 2:13) Por ehempel, nan ta papia di matrimonio di mesun sexo comosifuera esaki ta algo masha normal. Y esey ta pone hopi hende pensa cu loke Bijbel ta bisa tocante homosexualidad ta exagera.—1 Cor. 6:9, 10.

5. Con nos por evita cu Satanas su ideanan engañoso ta influencia nos?

5 Awor, con hende cu ta stima Jehova su normanan por evita cu e gran cantidad di ideanan mundano y satanico ta influencia nan? Con nan por distingui loke ta bon for di loke ta malo? Manera Salmo 119:9 ta bisa, nos tin cu ‘mantene nos mes segun e palabra’ di Dios. Esey ta nifica cu nos mester keda alerta y haci caso di loke Dios ta bisa. E Palabra di Dios ta un guia confiabel cu ta yuda nos distingui berdad for di falsedad. (Prov. 23:23) Citando for di e Scritura, Hesus a bisa cu ‘hende mester biba di tur palabra cu ta sali for di boca di Jehova.’ (Mat. 4:4) Esey ta nifica cu nos mester siña con pa aplica principionan biblico den nos bida. Por ehempel, hopi tempo prome cu Jehova a laga Moises skirbi su ley cu ta condena adulterio den Bijbel, Jozef, kende e tempo ey tabata hoben, tabata sa cu tal conducta ta un pica contra Dios. Ora e esposa di Potifar a purba di seducie pa e tene relacion sexual cu ne, ningun momento el a pensa di desobedece Jehova. (Lesa Genesis 39:7-9.) Aunke e esposa di Potifar a sigui presiona Jozef durante un temporada, Jozef no a scuch’e; el a obedece e bos di Jehova. Ki les nos por siña for di esaki? Pa nos por distingui bon for di malo, nos mester scucha e bos di Jehova y cera nos horea pa e boroto constante di Satanas su ideanan engañoso.

6, 7. Con nos por evita cu Satanas ta gaña nos?

6 Mundo ta asina satura cu siñansa religioso contradictorio cu hopi hende ta pensa cu no ta bale la pena pa busca e religion berdadero. Pero Jehova a percura pa ken cu kier sirbie por haya e berdad facilmente. Ta nos mester scoge ken nos  kier scucha. Y como cu ta practicamente imposibel pa enfoca riba dos stem pareu, nos mester ‘conoce e stem di Hesus’ y scuch’e. E ta esun cu Jehova a nombra pa guia Su carnenan.—Lesa Juan 10:3-5.

7 Hesus a bisa: “Presta atencion na loke boso ta tende.” (Mar. 4:24) Jehova su consehonan ta cla y bon pa nos; ta nos mester ta dispuesto pa cumpli cu nan. Si nos no tene cuidou, nos por cuminsa haci caso di Satanas su mal consehonan en bes di sigui Jehova su guia amoroso. Nunca nos mester laga ideanan di e mundo aki—cu ta ser promovi via di musica, pelicula, programanan di television, buki, compañeronan, educadornan of supuesto expertonan—controla nos bida.—Col. 2:8.

8. (a) Con nos curason por pone nos cay den trampa di Satanas? (b) Kico por pasa ora nos ta ignora señalnan di advertencia?

8 Satanas sa cu nos ta imperfecto, pesey e ta purba di uza nos debilidadnan contra nos. Ora Satanas ta haci esey, por ta dificil pa nos keda fiel na Jehova. (Juan 8:44-47) Supone cu un persona ta core asina tanto tras di placer cu e ta comete un mal echo cu nunca el a pensa di haci. (Rom. 7:15) Con bin el a hay’e den e situacion tristo ey? Probablemente e persona ey pocopoco a stop di scucha Jehova. Por ehempel, e ta stop di haci oracion, ta mengua den su sirbishi di veld y ta falta reunion regularmente. Eseynan ta señalnan di advertencia cu sea e no a tuma nota di dje of cu el a scoge pa ignora. Pesey cu tempo, el a laga su deseonan domin’e y a haci loke e tabata sa cu ta malo. Con nos por evita di comete un eror catastrofico asina? Nos tin cu keda alerta y haci caso di señalnan di advertencia y tuma medida di biaha pa corigi e asunto. Un otro manera cu nos por demostra cu nos ta scucha e bos di Jehova ta door di rechasa tur idea apostata.—Prov. 11:9.

9. Dicon ta importante pa for di trempan nos detecta cualkier deseo- of pensamento robes cu nos por tin?

9 Si un persona enfermo descubri trempan ki maleza e tin, e tin mas chens di scapa. Di mes manera, si nos ripara cu nos tin deseo- of pensamentonan robes, nos mester actua di biaha pa ‘Satanas no gara nos den su trampa pa nos haci su boluntad.’ (2 Tim. 2:26) Pero, kico nos mester haci ora nos ripara cu nos manera di pensa y nos deseonan no ta na harmonia mas cu Jehova su boluntad? Di biaha nos mester dal paso pa bolbe cerca Jehova, nos mester habri nos curason pa acepta su conseho y haci caso di loke e ta bisa. (Isa.  44:22) Nos mester corda cu un solo mal decision por tin consecuencianan teribel pa nos y laga nos cu cicatriz pa e resto di nos bida den e mundo malbado aki. Pues, ta sabi pa semper nos actua di biaha pa nunca nos cay den trampa di Satanas.

Con un bon rutina spiritual por proteha nos contra e trampanan di Satanas? (Wak paragraf 4-9)

ORGUYO Y GOLOSIDAD

10, 11. (a) Con orguyo por manifesta su mes? (b) Ki les nos por saca for di e rebeldia di Core, Datan y Abiram?

10 Nos mester reconoce cu nos curason por aleha nos di Jehova. Tuma por ehempel orguyo y golosidad. E caracteristicanan aki por stroba un persona di obedece e bos di Jehova y pon’e comete erornan grave. Un persona orguyoso ta pensa demasiado di su mes. Podise e ta sinti cu e tin derecho di haci loke e kier y cu niun hende no tin nada di bis’e, ni su compañeronan cristian ni e ancianonan ni e organisacion di Dios. Un persona asina kisas a aleha su mes asina tanto for di Jehova cu casi e no ta scucha e bos di Jehova mas.

11 Tempo cu e Israelitanan tabata den desierto, Core, Datan y Abiram a rebela contra e autoridad di Moises y Aaron. Orguyo a pone nan cuminsa adora Jehova na nan manera. Con Jehova a reacciona? Jehova a mata nan tur. (Num. 26:8-10) E relato aki ta siña nos un les importante: Rebeldia contra Jehova ta hiba na desaster. Ta manera Bijbel ta bisa: “Orguyo ta bin prome cu destruccion.”—Prov. 16:18; Isa. 13:11.

12, 13. (a) Duna un ehempel cu ta mustra con golosidad por hiba na calamidad. (b) Splica con golosidad por cuminsa domina nos.

12 Laga nos papia awor di golosidad. Un persona golos hopi biaha ta tuma mucho libertad y ta comporta su mes na un manera inapropia. Tuma por ehempel Gehazi, sirbidor di Eliseo. Despues cu Naaman, hefe di e ehercito Sirio, a cura di lepra, e kier a duna profeta Eliseo algun regalo, pero Eliseo no a acepta nan. Pero Gehazi si tabata kier e regalonan aki. El a bisa den su mes: “Manera SEÑOR ta biba, lo mi core bay [Naaman] su tras y tuma algo for di dje.” Y sin cu Eliseo tabata sa, Gehazi a core bay cerca Naaman y a gañ’e pa e haya “un talento di plata y dos set di paña.” Kico a pasa cu e homber golos Gehazi? Wel, el a haya e lepra cu Naaman tabatin.—2 Rey. 5:20-27.

13 Golosidad por cuminsa cu deseonan simpel. Pero si nos no controla esaki, e por bira mas fuerte te cu e por cuminsa domina nos. E relato biblico tocante Acan ta ilustra esaki bon cla. Acan a bisa: “Ora mi a mira entre e botin un bunita mantel for di Sinar y dos shen ciclo di plata y un bara di oro di un peso di cincuenta ciclo, mi a cudisha nan y a coge nan.” Acan no a rechasa su mal deseo. En bes di esey, el a horta e articulonan y a sconde nan den su tent. Jehova a saca Acan su mal echo na cla y, riba e mesun dia ey, nan a piedra Acan y su famia mata. (Jos. 7:11, 21, 24, 25) Mescos cu Acan, nos tur por cay den e trampa di golosidad. Ta pesey Bijbel ta bisa pa nos ‘warda nos mes di tur sorto di golosidad.’ (Luc. 12:15) Si de bes en cuando nos haya nos cu pensamentonan robes of ta cuminsa pensa riba cosnan inmoral, ta masha importante pa nos controla nos pensamentonan pa deseonan robes no hiba nos na pica.—Lesa Santiago 1:14, 15.

14. Kico nos mester haci si nos ripara cu nos tin inclinacion di ta orguyoso of golos?

14 Tanto orguyo como golosidad por hiba na desaster. Pesey, pa nos por sigui obedece e bos di Jehova, nos mester pensa riba e consecuencianan di e mal inclinacionnan ey. (Deu. 32:29) Den su Palabra, Jehova ta bisa nos kico ta corecto pa  haci y kico ta e beneficionan di esey. Ademas, Jehova ta bisa nos kico ta e consecuencianan di mal conducta. Pesey, si orguyo of golosidad ta impulsa nos pa haci loke ta malo, ta bon pa nos pensa con esey lo afecta nos, nos sernan keri y nos relacion cu Jehova.

MANTENE UN BON COMUNICACION CU JEHOVA

15. Kico nos por siña for di e ehempel di Hesus?

15 Jehova kier lo mihor pa nos. (Sal. 1:1-3) E ta duna nos e guia cu nos tin mester na e momento apropia. (Lesa Hebreonan 4:16.) Aunke Hesus tabata un homber perfecto, tur ora e tabata comunica cu Jehova. Constantemente e tabata haci oracion. Y Jehova, na su turno, a sosten’e y a gui’e na maneranan extraordinario. Jehova a manda su angelnan pa sirbi Hesus, el a duna Hesus su spirito santo y a guia Hesus na momento cu e tabata bay scoge e 12 apostelnan. Jehova a hasta papia for di cielo pa mustra cu su Yiu tabatin su apoyo y aprobacion. (Mat. 3:17; 17:5; Mar. 1:12, 13; Luc. 6:12, 13; Juan 12:28) Nos tambe mester haci oracion sincero y riba un base regular, manera Hesus tabata haci. (Sal. 62:7, 8; Heb. 5:7) Oracion ta yuda nos mantene un bon comunicacion cu Jehova y sigui biba na un manera cu ta duna honor na dje.

16. Con Jehova ta yuda nos obedece su bos?

16 Jehova su guia ta na alcance di tur hende cu kier siguie, pero e no ta obliga nos pa haci esey. Si nos kier sigui su guia, nos tin cu pidie su spirito santo y e lo duna nos esaki generosamente. (Lesa Lucas 11:10-13.) Pero ta masha importante pa nos ‘presta atencion na e manera cu nos ta scucha.’ (Luc. 8:18) Dicon? Pasobra nos lo ta hipocrita si nos ta pidi Jehova yuda nos vence un deseo inmoral y toch nos ta sigui wak pornografia of peliculanan inmoral. Pa Jehova yuda nos, nos mester percura pa nos ta den un ambiente of na un sitio caminda Jehova su spirito santo por obra, manera por ehempel na nos reunionnan di congregacion. Despues di a scucha e bos di Jehova na reunionnan di congregacion, hopi sirbidor di Jehova a ripara cu nan tabatin mal deseo. Pesey, di biaha nan a dal paso pa corigi e asunto y asina evita hopi dolor.—Sal. 73:12-17; 143:10.

SIGUI OBEDECE E BOS DI JEHOVA

17. Dicon ta peligroso pa nos depende riba nos mes?

17 Awor, kico nos por siña for di e ehempel di Rey David di Israel di antiguedad? Tempo cu e tabata confia completamente den Jehova, el a logra cosnan maraviyoso den su bida. Como hoben, el a vence e Filisteo gigante Goliat. Cu tempo, David a bira soldaat y tambe rey. Y su tarea tabata pa proteha e nacion di Israel y tuma decision pa nan. Pero ora David a cuminsa depende riba su mes, su curason a traicion’e y a pon’e comete un pica grave cu Betsabe. El a hasta laga mata Urias, e esposo di Betsabe. Pero ora el a haya coreccion di Jehova, humildemente el a admiti su eror y a drecha su relacion cu Jehova.—Sal. 51:4, 6, 10, 11.

18. Kico por yuda nos sigui obedece e bos di Jehova?

18 Bijbel ta siña nos na 1 Corintionan 10:12 cu nos no mester confia demasiado den nos mes. Y como cu nos no por ‘dirigi nos pasonan’, sea nos lo obedece e bos di Jehova of e bos di su Adversario. (Jer. 10:23) Pesey, ta masha importante pa sigui haci oracion constantemente, sigui guia di Dios su spirito santo y semper obedece e bos di Jehova.