Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2014

Con Jehova Ta Hala Cerca Nos?

Con Jehova Ta Hala Cerca Nos?

“Hala cerca Dios, y lo e hala cerca boso.”SANT. 4:8.

1. Ki necesidad hende en general tin, y ken ta satisface e necesidad ey?

NOS no por sin hende. Nos ta sinti nos feliz ora nos tin famia y amigonan cu di berdad ta stima, balora y compronde nos. Pero e Persona cu mester ta nos mihor amigo ta nos Creador, Jehova Dios.—Ecl. 12:1.

2. Kico Jehova ta priminti nos, y dicon hopi hende no ta kere e promesa ey?

2 Mediante su Palabra, Jehova ta urgi nos pa “hala cerca” dje, esta, pa bira su amigo. Y e ta priminti cu si nos hala cerca dje, e lo “hala cerca” nos. (Sant. 4:8) Esey ta un bunita promesa! Pero toch tin hopi hende cu no por kere cu Dios kier ta nan amigo; nan ta sinti cu nan no ta digno di acerca Dios y cu Dios ta mucho leu for di nan. Pero, di berdad nos por hala cerca Jehova?

3. Kico nos mester sa tocante Jehova?

3 Nos por hala cerca Jehova pasobra e “no ta leu” for di ningun persona cu kier siña conoc’e. (Lesa Echonan 17:26, 27; Salmo 145:18.) Jehova ta cla y dispuesto pa acepta nos como su bon amigonan aunke nos ta imperfecto. (Isa. 41:8; 55:6) Di experencia, e salmista a skirbi di Jehova: “Abo cu ta scucha oracion, cerca bo tur hende ta bin. Bendiciona  ta esun cu bo ta scoge y ta hala cerca bo.” (Sal. 65:2, 4) Rey Asa di Juda tabata un bon ehempel den esaki. Laga nos wak con el a hala cerca Dios y con Jehova a reacciona. *

SIÑA FOR DI UN EHEMPEL DI PASADO

4. Ki ehempel Rey Asa a pone pa e pueblo di Juda?

4 Rey Asa tabatin hopi celo pa adoracion berdadero. El a elimina tanto prostitucion como idolatria for di tempel, practicanan cu tabata hopi comun den e pais. (1 Rey. 15:9-13NW) Como cu Asa mes tabatin un bon relacion cu Jehova Dios y tabata obedece Su mandamentonan, e por a urgi e pueblo pa “busca e SEÑOR Dios di nan tatanan y pa warda e ley y e mandamento.” Jehova, na su turno, a bendiciona e prome dies añanan di Asa su reinado, di manera cu tabatin paz den e pais. Kico a contribui na e trankilidad ey? Asa a bisa e pueblo: ‘Nos a busca SEÑOR nos Dios, y el a duna nos sosiego na tur banda.’ (2 Cro. 14:1-7) Pero kico a sosode despues?

5. Ki situacion a pone Asa su confianza den Jehova na prueba, y kico tabata e resultado?

5 Awor, imagina bo cu abo ta Rey Asa. Zera, e Etiope, ta sali pa bringa contra bo nacion cu un ehercito di 1.000.000 homber y 300 garoshi. (2 Cro. 14:8-10) Con lo bo reacciona ora bo mira e ehercito grandi ey marcha bin invadi bo reino? Zera su ehercito ta dos biaha mas grandi cu esun di bo (cu ta consisti di solamente 580.000 persona). Kico lo bo haci? Lo bo puntra bo mes ta dicon Dios ta permiti e invasion aki? Lo bo purba di soluciona e problema aki riba bo mes? E manera cu Asa a reacciona ta mustra cu e tabatin pleno confianza den Jehova y cu e tabatin un bon relacion cu ne. Asa a sclama: “Yuda nos, o SEÑOR nos Dios, pasobra ta den bo nos ta confia, y den bo nomber nos a bin contra e multitud aki. O SEÑOR, abo ta nos Dios; no laga hende prevalece contra bo.” Con Dios a reacciona na Asa su rogamento sincero? Jehova “a derota e Etiopenan.” Ni un persona di e nacion enemigo no a sobrevivi!—2 Cro. 14:11-13.

6. Ki ehempel di Asa nos mester sigui?

6 Kico a yuda Asa confia plenamente cu Jehova lo gui’e y proteh’e? Bijbel ta bisa cu “Asa a haci loke tabata corecto den bista di SEÑOR” y cu su curason “tabata completamente dedica na SEÑOR.” (1 Rey. 15:11, 14) Nos tambe mester sirbi Dios cu un curason completo. Esey ta esencial pa nos por tin un bon relacion cu ne, tanto awor como den futuro. Nos ta masha contento cu Jehova a tuma iniciativa pa hala nos cerca dje y pa yuda nos cultiva y keda cu un amistad intimo cu ne. Awor, laga nos wak dos manera cu Dios ta haci esey.

JEHOVA TA HALA NOS CERCA DJE PA MEDIO DI E RESCATE

7. (a) Kico Jehova a haci y ta haciendo pa hala nos cerca dje? (b) Cua ta e manera principal cu Jehova ta hala nos cerca dje?

7 Jehova a demostra su amor pa humanidad ora el a crea e bunita Tera aki como nos hogar. Y e ta sigui demostra su amor percurando loke nos tin mester diariamente pa nos por keda na bida. (Echo. 17:28; Rev. 4:11) Loke ta mas importante ainda ta cu Jehova ta percura pa nos necesidad spiritual. (Luc. 12:42) Ademas, e ta garantisa nos cu e ta scucha nos oracionnan. (1 Juan 5:14) Pero e  manera principal cu Dios ta hala nos cerca dje y ta demostra su amor na nos ta mediante e rescate. Y ta pa medio di e rescate nos por hala cerca Jehova. (Lesa 1 Juan 4:9, 10, 19.) Si, Jehova a manda su “Yiu unigenito” na mundo pa libra nos di pica y morto.—Juan 3:16.

8, 9. Ki papel Hesus ta hunga den e proposito di Jehova?

8 Jehova a percura e rescate pa beneficia tur hende, hasta hende cu a biba prome cu Cristo. Con esey por ta posibel? Wel, for di momento cu Jehova a profetisa tocante nos futuro Salbador, p’e tabata comosifuera e rescate a ser paga caba, pasobra e tabata sa cu su proposito pa humanidad lo no faya. (Gen. 3:15) Siglonan despues, apostel Pablo a gradici Jehova pa e “liberacion cu ta basa riba e rescate cu Cristo Hesus a paga.” Ademas, Pablo a splica cu Dios ‘a tene pasenshi cu [hende] y a pordona e picanan cu nan a comete den pasado.’ (Rom. 3:21-26) Pues, si no ta pa Hesus, nos lo no por a hala cerca Dios.

9 Ta mediante Hesus so hende humilde por siña conoce Jehova y disfruta di un relacion intimo cu ne. Con e Scritura ta enfatisa e berdad aki? Pablo a skirbi: “Dios a demostra su amor pa nos di e manera aki: Cristo a muri pa nos mientras cu nos tabata pecador ainda.” (Rom. 5:6-8) Hesus a paga e sacrificio di rescate no pasobra nos ta merece esey sino pasobra tanto e como Jehova ta stima nos. Hesus a bisa: “Ningun hende no por bin cerca mi a menos cu e Tata, cu a manda mi, hal’e cerca mi.” Na un otro ocasion, Hesus a bisa: “Ningun hende no ta yega cerca e Tata si no ta pa medio di mi.” (Juan 6:44; 14:6) Awor, con Jehova ta hala hende cerca dje mediante Hesus? Pa medio di spirito santo. Si, pa medio di spirito santo, e ta hala nos cerca dje y ta yuda nos keda cu un bon relacion cu ne pa nos por biba pa semper. (Lesa Judas 20, 21.) Awor, laga nos trata un otro manera cu Jehova ta hala nos cerca dje.

JEHOVA TA HALA NOS CERCA DJE PA MEDIO DI SU PALABRA

10. Con Bijbel ta yuda nos hala mas cerca Dios?

10 Te asina leu, nos a menciona of cita varios texto for di 14 buki di Bijbel. Si nos no tabatin Bijbel, con nos por a haya sa cu nos por hala cerca nos Creador? Con nos por a siña di e rescate y haya sa cu nos por hala cerca Jehova mediante Hesus? Ta Bijbel ta revela na nos Jehova su bunita personalidad y su proposito pa humanidad. Por ehempel, na Exodo 34:6 y 7, Jehova a describi su mes como un Dios “yen di compasion y gracia, kende no ta rabia lihe y kende ta abunda den misericordia y berdad; kende ta mantene misericordia pa milnan, kende ta pordona inikidad, transgresion y pica.” Ken lo no sinti nan atrai na un persona asina? Jehova sa cu, mas nos siña tocante dje pa medio di Bijbel, mas real e lo bira pa nos y mas cerca dje nos lo sinti nos.

11. Dicon nos mester haci esfuerso pa siña tocante Jehova? (Wak e prome plachi.)

11 E prologo di e buki Hala Serca Yehova ta mustra cu segun cu nos ta forma un amistad cu un persona, nos ta siña conoc’e y admira su cualidadnan. Pues, pa nos por tin un bon amistad cu Dios, nos mester siña conoc’e y haya sa ken e ta realmente. Pa logra esey, ta importante pa studia loke Bijbel ta revela tocante Dios su cualidadnan. Pesey, nos mester  ta hopi agradecido cu Jehova a laga skirbi su Palabra na un manera cu ta facil pa nos compronde.

12. Dicon Jehova a uza hende pa skirbi Bijbel?

12 Jehova por a laga e angelnan skirbi Bijbel. Al fin y al cabo, nan ta hopi interesa den nos y den nos actividadnan. (1 Ped. 1:12) Y no tin duda cu e angelnan por a skirbi Dios su mensahe pa humanidad. Pero, nan lo no por a relata cosnan for di un punto di bista humano. Nan no tin e sintimentonan, necesidadnan y debilidadnan cu nos tin. Jehova sa cu e angelnan ta hopi diferente for di nos, pesey el a laga hende skirbi Bijbel. Asina nos por compronde pensamento- y sintimentonan di e escritornan di Bijbel y otro personahenan cu tin den Bijbel. Nos por compronde nan dolor, decepcion, duda, miedo y fayonan. Nos ta compronde kico nan a sinti den nan momentonan di goso. Y mescos cu profeta Elias, tur e escritornan di Bijbel tabatin “e mesun sintimentonan cu nos.”—Sant. 5:17.

Dicon e manera cu Jehova a trata cu Jonas y Pedro ta conmove bo pa hala mas cerca dje? (Wak paragrafnan 13, 15)

13. Con Jonas su oracion ta laga bo sinti?

13 Laga nos analisa, por ehempel, e relato di Jonas. Jehova a duna profeta Jonas un asignacion importante, pero Jonas a core pa su asignacion. Si un angel a skirbi e relato aki, lo e no por a duna un bon descripcion di e sintimentonan di Jonas. Sin duda, tabata bon cu Jehova a laga Jonas mes skirbi su storia, incluso e oracion cu el a haci na Dios ora e tabata den fondo di lama. Jonas a bisa: “Ora mi a sinti ku rosea di bida tabata kaba pa mi, mi a kòrda riba bo, SEÑOR.” (BPK)—Jonas 1:3, 10; 2:1-9.

14. Dicon nos por compronde loke Isaias a skirbi tocante su mes?

14 Wak tambe kico Jehova a inspira  profeta Isaias pa skirbi tocante su mes. Despues cu Isaias a mira e gloria di Dios den un vision, el a realisa con imperfecto e tabata y a bisa: “Ay di mi, pasobra mi ta ruina! Pasobra mi ta un homber di lip impuro, y mi ta biba meymey di un pueblo di lip impuro; pasobra mi wowo a mira e Rey, e SEÑOR di ehercitonan.” (Isa. 6:5) Un angel lo no por a expresa e palabranan ey, pero Isaias si. Y nos por compronde con Isaias lo a sintie.

15, 16. (a) Dicon nos por compronde loke otro hende ta sinti? Duna algun ehempel. (b) Kico lo yuda nos hala mas cerca Jehova?

15 Acaso e angelnan por a bisa encuanto nan mes cu nan “no ta digno”, manera Jacob a bisa di su mes, of cu nan ta “pecador”, manera Pedro a expresa di su mes? (Gen. 32:10; Luc. 5:8) Of, un angel lo a “haya miedo”, manera algun discipel di Hesus? Si un angel a hay’e cu persecucion, lo e mester “a tuma curashi” pa predica e bon noticia manera Pablo y otronan mester a haci? (Juan 6:19; 1 Tes. 2:2) No, pasobra e angelnan ta perfecto den tur sentido y nan ta poderoso. Pero e personanan cu Jehova a uza pa skirbi Bijbel tabata imperfecto mescos cu nos awe; pues nos ta compronde nan sintimentonan. Si, ora nos ta lesa e Palabra di Dios, di berdad nos por ‘alegra cu esnan cu ta alegra y yora cu esnan cu ta yora.’—Rom. 12:15.

16 Ora nos ta medita riba e manera cu Jehova a trata su sirbidornan fiel di pasado, nos lo haya sa hopi cos maraviyoso di nos Dios, kende cu pasenshi y amor a hala hende imperfecto cerca dje. Di e manera ey, nos lo siña conoce Jehova hopi bon y stim’e masha hopi mes. Como resultado, nos lo hala mas cerca dje.—Lesa Salmo 25:14.

CON NOS POR TIN UN AMISTAD INKEBRANTABEL CU DIOS?

17. (a) Ki spiertamento sabi Azarias a duna Asa? (b) Dicon nos por bisa cu Asa no a haci caso di Azarias su spiertamento, y kico tabata e consecuencia?

17 Despues cu Rey Asa a gana e bataya contra e ehercito Etiope, profeta Azarias a bisa Asa y e pueblo: “SEÑOR ta cu boso ora boso ta cu ne. Y si boso busc’e, e lo laga boso hay’e; ma si boso bandon’e, e lo bandona boso.” (2 Cro. 15:1, 2) Pero lamentablemente, mas despues, Asa no a haci caso di Azarias su spiertamento. Ora e reino di Israel a bin bringa contra Juda, Asa a haya miedo. Y en bes di bolbe acudi na Jehova pa yudansa, Asa a cera alianza cu e Sirionan, kendenan tabata pagano. Jehova a bis’e: “Bo a actua cu bobedad den esaki. Di berdad, for di awor padilanti siguramente lo bo tin guera.” Y en berdad, durante e ultimo añanan di Asa su gobernacion tabatin guera continuamente. (2 Cro. 16:1-9) Kico nos por siña for di esaki?

18, 19. (a) Kico nos mester haci si nos a distancia nos mes for di Dios? (b) Con nos por hala mas cerca Jehova?

18 Nunca nos mester aleha for di Jehova. Si nos a distancia nos mes for di Jehova Dios, tuma paso mesora y haci loke Oseas 12:6 ta bisa: “Bolbe cerca bo Dios, tene misericordia y haci husticia, y spera continuamente riba bo Dios.” Pues anto, laga nos sigui hala mas y mas cerca Jehova. Con? Nos mester sigui medita cu aprecio riba e rescate y studia e Palabra di Dios diligentemente.—Lesa Deuteronomio 13:4.

19 E salmista a skirbi: “Ta bon pa mi keda cerca di Dios.” (Sal. 73:28) Esaki ta bon pa nos tambe. Laga nos pone como meta pa sigui siña mas cos nobo tocante Jehova; asina nos ta haya mas motibo pa stim’e. Y mas nos hala cerca Jehova, mas e lo hala cerca nos, awor y pa semper!

^ par. 3 Wak e articulo tocante Asa titula “Existe un galardón para su actividad”, den La Atalaya di 15 di augustus 2012.