Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2014

Pregunta di Lector

Pregunta di Lector

Hesus a bisa e saduceonan cu hende cu resucita “no ta casa.” (Luc. 20:34-36) Na ken e tabata referi? Na hende cu lo resucita pa biba riba Tera?

Esakinan ta preguntanan importante, specialmente pa esnan cu a perde nan casa stima den morto y cu ta anhela di casa cu ne atrobe ora e resucita den e mundo nobo. Un ruman homber cu a perde su casa a bisa: “No ta ami cu mi esposa a dicidi di termina nos matrimonio. Nos tabata desea di henter nos curason pa sigui sirbi Jehova hunto pa semper. Y ainda mi ta sinti asina.” Awor, personanan cu resucita por casa? Nos no sa.

Pa hopi aña, nos publicacionnan tabata duna di compronde cu (1) loke Hesus a bisa encuanto resureccion y casamento probablemente tabata referi na e resureccion terenal y (2) cu esnan cu resucita pa biba riba Tera lo no casa. * (Mat. 22:29, 30; Mar. 12:24, 25; Luc. 20:34-36) Nos no kier ta dogmatico, pero por ta posibel cu Hesus tabata referi na e resureccion celestial? Laga nos analisa loke Hesus a bisa.

Prome cu tur cos, laga nos wak bou di ki circunstancia Hesus a haci e declaracion aki tocante resureccion. (Lesa Lucas 20:27-33.) Hesus tabata papia cu e saduceonan, un grupo religioso cu no tabata kere den resureccion. Pa gara Hesus den trampa, nan a hacie un pregunta tocante resureccion y casamento di sua. * Hesus a contesta nan: “Hende di e mundo aki ta casa, ma esnan cu ta digno di gana bida den e mundo cu ta bin y den e resureccion for di morto no ta casa. De echo, nan no por muri mas tampoco, pasobra nan lo ta manera e angelnan, y nan lo ta yiu di Dios pasobra Dios lo resucita nan.”—Luc. 20:34-36.

Pero, dicon nos publicacionnan tabata bisa cu probablemente Hesus tabata papia di e resureccion terenal? E conclusion ey tabata basa principalmente riba dos argumento. E prome, como cu Hesus tabata papia cu e saduceonan, kendenan probablemente tabatin e resureccion terenal na mente, a parce logico cu Hesus su contesta tabatin di haber cu esey. E di dos, Hesus a termina su contesta referiendo na Abraham, Isaak y Jacob—patriarcanan fiel cu lo resucita pa biba aki riba Tera.—Luc. 20:37, 38.

No obstante, por ta posibel cu Hesus tabata papia di e resureccion celestial. Dicon nos ta bisa asina? Laga nos analisa dos frase importante di su contesta.

“Esnan cu ta digno di gana ... e resureccion for di morto.” E rumannan ungi cu keda fiel ta ser considera “digno di ricibi e Reino di Dios.” (2 Tes. 1:5, 11) A base di e rescate, nan ta ser declara husto, esta, digno pa biba pa semper. Pues, nan ta muri como personanan husto, liber di pica, den bista di Jehova. (Rom. 5:1, 18; 8:1) Bijbel ta yama e rumannan ungi “feliz y santo” y nan ta ser considera digno di ricibi un resureccion pa biba den cielo. (Rev. 20:5, 6) En cambio, entre e personanan cu resucita  pa biba riba Tera tin hende “inhusto” tambe. (Echo. 24:15) Awor, nos por bisa cu e personanan ey ta “digno” di haya resureccion?

“Nan no por muri mas tampoco.” Hesus no a bisa cu “nan lo no muri mas.” Mas bien, Hesus a bisa: “Nan no por muri mas.” Rumannan ungi cu keda fiel te na morto lo ser resucita pa biba den cielo y ricibi inmortalidad, esta, bida cu lo no caba nunca y cu lo no ser destrui. (1 Cor. 15:53, 54) Pues, morto no tin ningun poder mas riba e personanan cu ricibi resureccion celestial. *

Awor, mirando loke nos a caba di analisa, na ki conclusion nos por yega? Wel, ta posibel cu Hesus tabata referi na e resureccion celestial ora el a papia di matrimonio y resureccion. Si ta asina, nos ta compronde tres cos tocante e personanan cu resucita pa biba den cielo: (1) Nan lo no casa, (2) nan no por muri y (3) den algun aspecto, nan ta manera e angelnan den cielo. Sinembargo, e conclusion aki ta lanta varios pregunta.

E prome, dicon Hesus a referi na e resureccion celestial ora el a contesta e saduceonan, kendenan probablemente tabatin e resureccion terenal na mente? Tene cuenta cu no ta tur biaha Hesus a contesta su enemigonan conforme loke nan tabatin na mente. Por ehempel, ora e Hudiunan a pidi Hesus un señal, el a bisa nan: “Basha e tempel aki abou, y den tres dia lo mi lant’e bek.” Probablemente, Hesus tabata sa cu nan tabata referi na e tempel literal, pero e tempel cu Hesus “tabata papia di dje tabata su curpa.” (Juan 2:18-21) Kisas Hesus no a haya cu tabata necesario pa contesta e saduceonan hipocrita ey, kendenan no tabata kere den resureccion ni den existencia di angel. (Prov. 23:9; Mat. 7:6; Echo. 23:8) Kisas Hesus tabata kier revela algun detaye interesante tocante e resureccion celestial ya cu esey lo a beneficia su discipelnan fiel, kendenan despues lo a ser resucita pa biba den cielo.

E di dos, dicon na final di Hesus su combersacion, el a referi na Abraham, Isaak y Jacob, kendenan lo ser resucita pa biba riba Tera? (Lesa Mateo 22:31, 32.) Ripara cu prome cu Hesus a menciona e patriarcanan fiel aki, el a uza e expresion “pa loke ta.” Esaki kisas ta indica cu Hesus tabata bay papia riba un otro topico, esta, di resureccion terenal. Hesus tabata sa cu e saduceonan tabata acepta loke Moises a skirbi, pesey el a cita loke Dios a bisa Moises den un mata na candela. Hesus tabata kier proba e saduceonan cu resureccion terenal tabata parti di Jehova su proposito y cu esaki lo cumpli sigur.—Exo. 3:1-6.

E di tres, si Hesus tabata referi na e resureccion celestial, esaki ta nifica cu hende cu resucita pa biba riba Tera por casa? E Palabra di Dios no ta duna un contesta specifico riba e pregunta ey. Si Hesus tabata papia di e resureccion celestial, nos no por conclui for di su palabranan cu esnan cu resucita pa biba riba Tera por casa of no.

Loke si nos sa ta cu e Palabra di Dios ta bisa cu morto ta pone fin na matrimonio. Pues, si un viudo of viuda dicidi di casa atrobe, e no mester sintie malo. Esey ta un decision personal, y ningun hende no mag di critica esnan cu ta busca compañerismo di un casa.—Rom. 7:2, 3; 1 Cor. 7:39.

Ta di compronde cu nos tin hopi pregunta tocante bida den e mundo nobo. Pero en bes di sinta specula tocante e posibel contestanan, ta mihor pa nos warda y mira kico lo pasa. Pero un cos si nos por ta sigur di dje: Tur hende cu obedece Jehova lo ta feliz, pasobra Jehova lo satisface tur nan deseo- y necesidadnan lo mihor posibel.—Sal. 145:16.

^ par. 4 Wak La Atalaya di 1 di juni 1987, pagina 30-31.

^ par. 5 Den tempo biblico, matrimonio di sua tabata algo normal. Si un homber muri sin laga yiu atras, su ruman homber por a casa cu su esposa cu a keda viuda. Di e manera ey, nan por a haya yiu y asina preserva nomber di e ruman homber cu a fayece.—Gen. 38:8; Deu. 25:5, 6.

^ par. 9 Hende cu ser resucita pa biba riba Tera por haya bida eterno y no inmortalidad. Pa un splicacion di e diferencia entre bida eterno y inmortalidad, wak Perspicacia para comprender las Escrituras, volumen 1, pagina 1229-1230.