Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2014

 FOR DI NOS ARCHIVO

E “Drama Eureka” A Yuda Hopi Hende Haya e Berdad

E “Drama Eureka” A Yuda Hopi Hende Haya e Berdad

“EUREKA!” E palabra aki ta nifica: “Mi a hay’e!” Hopi biaha bo tabata tende e palabra aki ora un minero haya oro. Esaki sigur tabata e caso durante e temporada di siglo 19 cu hopi hende tabata bay California, Merca, en busca di oro. Pero Charles Taze Russell y otro Studiantenan di Bijbel a haya algo mucho mas valioso cu oro: e berdad biblico. Y nan tabata ansioso pa comparti esaki cu otro hende.

Durante zomer di aña 1914, ya caba miyones di hende den ciudadnan grandi a wak e “Foto-Drama di Creacion”, un bunita obra di ocho ora cu e Asociacion Internacional di Studiantenan di Bijbel (I.B.S.A.) a produci. E drama aki—cu su peliculanan impresionante, slidesnan color bibo, naracion fascinante y bunita musica clasico—a hiba su publico riba un biahe den historia, for di creacion te na fin di Hesucristo su Reinado di Mil Aña.—Rev. 20:4. *

Pero kico di e hendenan cu tabata biba den pueblitonan y den cunucu? Pa haci sigur cu ningun hende cu ta biba den e areanan ey y cu ta en busca di e berdad no perde e “Foto-Drama”, I.B.S.A. a cuminsa presenta na augustus 1914 e “Drama Eureka”—un version sin pelicula di e “Foto-Drama.” E version aki tabata facil pa transporta. Tabatin tres version di e “Drama Eureka”, na varios idioma: “Eureka X”, cu a consisti di naracion y musica; “Eureka Y”, cu a consisti di grabacion di zonido y bunita slides na color y “Eureka pa Famia”, specialmente pa uza na cas, cu tabata consisti di algun naracion y cantica. Via I.B.S.A. mes hende por a cumpra tocadisco y algun ekipo di proyeccion barata.

E Studiantenan di Bijbel tabata uza un projector pa pasa e slidesnan na color

Como cu e Studiantenan di Bijbel no tabatin mester di un projector pa pelicula of un pantaya grandi pa presenta e “Drama Eureka”, nan por a hiba e mensahe di Reino na hendenan cu tabata biba den cunucu tambe y asina alcansa teritorionan nobo. “Eureka X” tabata consisti di zonido so, pues nan por a present’e cualkier ora di dia. E projector pa slides cu nan tabata uza pa presenta “Eureka Y” no tabata traha cu coriente sino cu lampi di gas (na Ingles: carbide lamp). Un articulo den E Toren di Vigilancia Finlandes a bisa: “Nos por presenta e slidesnan casi tur caminda.” Y asina nan a haci tambe.

En bes di huur teaternan grandi, e Studiantenan di Bijbel tabata haci esfuerso pa haya luganan cu nan por a uza gratis, manera scol, sala di corte, stacion di trein y hasta cas priva pa presenta e “Drama Eureka.” Hopi di e presentacionnan a tuma luga den aire liber. Como pantaya, nan tabata uza un laken blanco grandi cu nan tabata colga na muraya di mangashina. Anthony Hambuch a bisa: “Pa hende por a disfruta di e programa,  cunukeronan tabata traha un teater chikito den nan cunucu door di uza tronconnan poni den rij tras di otro pa hende sinta ariba.” Anthony Hambuch y su team, kendenan tabata presenta e “Drama Eureka”, tabata uza vehiculo di motor pa transporta nan ekipo, ekipahe y cosnan di kampeer y cushina.

E cantidad di hende cu tabata bin wak e “Drama Eureka” tabata varia. Tin biaha un par di hende tabata bin y tin biaha tabata cientos di hende. Na Merca, den un pueblito di 150 habitante, un total di 400 persona a asisti na e presentacionnan cu a tuma luga na un scol. Na otro luganan, algun hende a cana 8 kilometer, ida y buelta, pa bay wak e “Drama Eureka.” Na Suecia, Charlotte Ahlberg su bisiñanan, kendenan a reuni na Charlotte su casita, a keda echt impresiona ora nan a scucha e grabacionnan. Un 1.500 persona a bay wak un presentacion na un stad cu ta keda te den chocamata na Australia caminda tin hopi hende cu ta traha den mina. E Toren di Vigilancia (na Ingles) a informa cu na scolnan y universidadnan, ‘maestro- y studiantenan a keda encanta cu e imagennan, e musica y e bunita naracion.’ E “Drama Eureka” tabata popular hasta na luganan cu tabatin teater.

MUHANDO SIMIA DI E BERDAD

E “Drama Eureka” tabata un instrumento util den e “trabou di expansion di klasnan”, of congregacionnan. Con asina? E Studiantenan di Bijbel tabata manda oradornan na diferente area pa duna discurso y presenta e “Drama Eureka.” Y si tabatin suficiente hende interesa, nan tabata lanta congregacionnan nobo. Ta dificil pa calcula cuanto hende realmente a wak e “Drama Eureka.” Constantemente nan tabata uza e ekipo di e drama ey. Pero, na 1915 ta 14 di e 86 teamnan so tabata manda informe regularmente na sede mundial. Segun e informe di e aña ey, lastimamente e cifranan tabata incompleto. Ademas, el a indica cu mas cu un miyon hende a wak e drama y cu alrededor di 30.000 persona a pidi literatura biblico.

Kisas e “Drama Eureka” no a echt marca historia, pero, manera nos a compronde, miyones di hende—di Australia te Argentina, di Sur Africa te na e Islanan Britanico, na India y den Caribe—a wak e presentacion unico aki. Hopi di e hendenan aki a haya e berdad di Bijbel—cu ta mas valioso cu oro—y nan por a grita: “Eureka!”

^ par. 4 Wak “For di Nos Archivo—Un Pelicula Edificante di 100 Aña Bieu” den E Toren di Vigilancia di 15 di februari 2014, pagina 30-32.