Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  August 2014

‘Arepenti y Fortalece Bo Rumannan’

‘Arepenti y Fortalece Bo Rumannan’

PEDRO a yora amargamente despues cu el a nenga cu e conoce Hesus. Y maske e tabatin cu lucha pa fortalece su mes spiritualmente atrobe, Hesus tabata kier uz’e pa yuda e otro discipelnan. Pesey Hesus a bis’e: “Unabes bo arepenti, fortalece bo rumannan.” (Luc. 22:32, 54-62) Cu tempo, Pedro a bira un pilar di e congregacion cristian di prome siglo. (Gal. 2:9) Awe tambe nos por haya nos cu casonan similar: Un ruman homber cu un tempo tabata sirbi como anciano por bolbe asumi e responsabilidad ey y sinti e goso di por fortalece su rumannan den congregacion.

Algun cristian cu a perde nan privilegio di sirbi como superintendente talbes ta sinti cu nan a fracasa. Julio, * por ehempel, kende pa mas cu 20 aña tabata anciano na Sur America a bisa: “Mi a dedica gran parti di mi bida na prepara discurso, bishita mi rumannan y pastorea nan. Diripiente mi a perde tur e privilegionan aki y mi a keda cu un bashi enorme. Tabata un periodo hopi dificil.” Awe, Julio ta sirbi atrobe como anciano.

‘ALEGRA ORA BOSO TA CONFRONTA PRUEBA’

Discipel Santiago a skirbi: “Mi rumannan, alegra ora boso ta confronta varios prueba.” (Sant. 1:2) E tabata referi na pruebanan cu nos por haya nos cu ne debi na persecucion y nos imperfeccion. Santiago a papia di entre otro deseonan egoista y faboritismo. (Sant. 1:14; 2:1; 4:1, 2, 11) Y ora Jehova disciplina nos, esaki tambe por ta doloroso. Pero nos no mester laga e pruebanan aki pone nos perde nos goso.—Heb. 12:11.

Maske nos a perde un puesto di responsabilidad den congregacion, semper nos tin oportunidad di demostra con fuerte nos fe ta y cu nos ta stima  Jehova. Ademas, nos por medita riba e motibonan pakico nos kier a sirbi den e puesto ey. Acaso tabata pa motibonan egoista? Of tabata pasobra nos ta stima Jehova y ta convenci cu e congregacion cristian ta di dje y cu nos mester trata su carnenan cu ternura? (Echo. 20:28-30) Rumannan cu un tempo tabata anciano y cu ta sigui sirbi Jehova fielmente ta duna prueba na tur persona, incluso Satanas, cu nan amor pa Jehova ta sincero.

Ora Rey David a haya disciplina debi na e picanan grave cu el a comete, el a acepta coreccion y a haya pordon. David a canta: “Bendiciona ta esun, kende su transgresion ta pordona, kende su pica ta tapa! Bendiciona ta e hende, kende su inikidad SEÑOR no ta tuma na cuenta, y den kende su spirito no tin engaño!” (Sal. 32:1, 2) E disciplina cu David a haya a hacie un mihor persona y sin duda un mihor wardador di e pueblo di Dios.

Den mayoria di caso, ruman hombernan cu bolbe cuminsa sirbi como anciano ta bira mihor wardador. Un anciano cu a pasa den e situacion ey a bisa: “Awor mi sa mihor con pa yuda e rumannan cu comete un eror.” Un otro anciano a bisa: “Awor mi ta balora mi privilegio di sirbi e rumannan mas.”

BO POR SIRBI ATROBE COMO ANCIANO?

E salmista a skirbi cu Jehova ‘no ta sigui akusá nos ketu bai.’ (Sal. 103:9BPK) Pues, nos no mester pensa cu nunca mas Jehova lo confia un persona cu comete un eror grave. Ricardo, kende a perde su privilegionan despues di a sirbi hopi aña como anciano, a bisa: “Mi a keda sumamente desapunta cu mi a faya. Pa hopi tempo, sintimentonan di inutilidad a stroba mi di bolbe sirbi como anciano. Mi tabatin miedo cu e rumannan lo no confia mi mas. Pero como cu mi ta gusta yuda hende, mi por a dirigi estudionan di Bijbel, anima e rumannan na Salon di Reino y traha hunto cu nan den sirbishi. Esey a kita mi temornan y awor mi ta sirbi atrobe como anciano.”

Jehova a yuda varios ruman homber haya nan goso bek y sinti e deseo di sirbi atrobe

Rencor ta un otro sintimento cu por stroba un ruman homber di sirbi como anciano atrobe.  Pesey, ta mucho mas mihor pa imita David, kende a huy di e Rey jaloers Saul. David a haya varios oportunidad pa tuma venganza contra Saul, toch e no a haci esey. (1 Sam. 24:4-7; 26:8-12) Ora Saul a muri den bataya, David a yora y a bisa cu tanto Saul como Saul su yiu Jonatan tabata hombernan “stima y amabel.” (2 Sam. 1:21-23) Pues, David no a carga rencor.

Si bo ta sinti cu bo a bira victima di un mal comprondemento of inhusticia, no laga rencor domina bo pensamentonan. William, kende a sirbi 30 aña como anciano na Gran Britania, a keda carga rencor contra algun anciano despues cu el a perde su privilegio. Kico a yuda William recobra su stabilidad spiritual? El a bisa: “E buki di Job a anima mi hopi. Si Jehova por a yuda Job drecha asunto cu su tres compañeronan, e por yuda ami tambe haci esey cu e ancianonan.”—Job 42:7-9.

JEHOVA TA BENDICIONA ESNAN CU CUMINSA SIRBI ATROBE COMO WARDADOR

Si bo a dicidi di stop di pastorea e tou di Dios, ta bon pa bo puntra bo mes ta dicon bo a tuma e decision ey. Tabata pa motibo di hopi problema personal? Of otro cosnan kisas a bira mas importante den bo bida? Of ta imperfeccion di bo rumannan a decepciona bo? Sea loke sea e motibo, corda cu tempo bo tabata anciano bo por a sirbi bo rumannan mas. Bo discursonan tabata fortalece nan, bo ehempel tabata anima nan y bo bishitanan di pastoreo tabata yuda nan soporta prueba. Y e trabounan cu bo tabata haci como un anciano fiel tabata alegra tanto Jehova su curason como di bo.—Prov. 27:11.

Bo por demostra bo amor na Jehova sirbiend’e cu goso

Jehova a yuda varios ruman homber haya nan goso bek y sinti e deseo di bolbe sirbi como anciano den congregacion. Si bo a dicidi di stop di sirbi como anciano den congregacion of a perde e privilegio ey, bo por “haci esfuerso pa bira un superintendente” atrobe. (1 Tim. 3:1) Pablo nunca “a stop di haci oracion” pa e rumannan na Colosas haya conocemento exacto di Dios su boluntad. Dicon? Pa nan ‘por a cana na un manera digno di Jehova a fin di agrad’e plenamente.’ (Col. 1:9, 10) Si bo a haya e privilegio di sirbi atrobe como anciano, pidi Jehova duna bo forsa, pasenshi y goso. Den e ultimo dianan aki, e pueblo di Dios mester di e sosten spiritual di wardadornan amoroso. Abo por fortalece bo rumannan? Bo ta dispuesto pa haci esey?

^ par. 3 A cambia algun nomber.