Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2014

Sirbidornan di Jehova Ta “Distancia Nan Mes for di Inhusticia”

Sirbidornan di Jehova Ta “Distancia Nan Mes for di Inhusticia”

“Laga tur cu ta menciona e nomber di Jehova distancia nan mes for di inhusticia.”—2 TIM. 2:19.

1. Kico tin un luga hopi special den nos adoracion?

BO A yega di mira e nomber Jehova graba riba un edificio publico of riba un obheto den un museo? Si esey tabata e caso, sin duda como testigo di Jehova, lo bo a keda hopi emociona pasobra e nomber di Dios tin un luga hopi special den nos adoracion. No tin ningun otro organisacion na mundo cu ta uza e nomber di Dios manera nos ta uz’e. Pero e privilegio di por carga e nomber di Dios ta trece responsabilidad cu ne.

2. Ki responsabilidad e privilegio di por carga Dios su nomber ta trece cu ne?

2 Pa nos por tin Jehova su aprobacion, nos tin cu haci mas cu djis uza su nomber. Nos tin cu biba na harmonia cu Su normanan moral. Pesey, Bijbel ta recorda nos cu sirbidornan di Jehova mester ‘aparta nan mes for di maldad.’ (Sal. 34:14) Apostel Pablo tambe a mustra esaki bon cla ora el a skirbi: “Laga tur cu ta menciona e nomber di Jehova distancia nan mes for di inhusticia.” (Lesa 2 Timoteo 2:19.) Como testigonan di Jehova, en berdad nos ta conoci pa e echo cu nos ta  menciona of uza e nomber di Dios. Pero con nos mester distancia nos mes for di inhusticia, of maldad?

‘KITA FOR DI’ MALDAD

3, 4. Ki declaracion di Pablo algun hende tin problema pa compronde, y dicon?

3 Na 2 Timoteo 2:19, Pablo ta papia di un ‘fundeshi solido cu Dios a pone.’ Riba e fundeshi ey tin dos mensahe graba. Esun di prome ta bisa cu “Jehova conoce esnan cu ta pertenece na dje;” e mensahe aki ta tuma for di Numbernan 16:5. (Wak e articulo anterior.) Pero kico di e di dos mensahe cu ta bisa “laga tur cu ta menciona e nomber di Jehova distancia nan mes for di inhusticia”? Algun hende tin problema pa compronde e palabranan aki. Dicon?

4 Aunke ta parce cu Pablo su palabranan ta cita for di un otro parti di e Scritura Hebreo, no tin ningun texto cu ta cuadra cu e declaracion aki di Pablo. Pesey anto, na kico Pablo a referi ora el a bisa “laga tur cu ta menciona e nomber di Jehova distancia nan mes for di inhusticia”? Poco prome cu Pablo a haci e declaracion ey, el a cita for di Numbernan capitulo 16, cu ta contene e relato di e rebelion di Core. Awor, kico di e di dos declaracion? Esaki tambe ta referi na sucesonan cu tin di haber cu e rebelion ey?

5-7. Na ki sucesonan den tempo di Moises Pablo a referi ora el a expresa e palabranan na 2 Timoteo 2:19? (Wak e prome plachi.)

5 Bijbel ta bisa cu Datan y Abiram, e yiu hombernan di Eliab, a join Core y hunto nan a dirigi e rebelion contra Moises y Aaron. (Num. 16:1-5) Nan a mustra falta di respet pa Moises y no a reconoce e autoridad cu Dios a dun’e. Como cu e hombernan rebelde aki a sigui biba entre e pueblo di Dios, nan tabata un peliger pa e Israelitanan cu si a keda fiel. Ora e dia a yega pa Jehova demostra ken ta su sirbidornan leal y ken ta e rebeldenan, el a duna un mandato cla.

6 Bijbel ta bisa: “SEÑOR a papia cu Moises, bisando: ‘Papia cu e congregacion, bisando: “Retira for di rond di e tentnan di Core, Datan y Abiram.”’ E ora ey Moises a lanta y a bay cerca Datan y Abiram, y e ancianonan di Israel a siguie. Y el a papia cu e congregacion, bisando: ‘Kita awor for di e tentnan di e hombernan malbado aki, y no mishi cu nada cu ta pertenece na nan, pa boso no perece pa causa di tur nan pica.’ Asina nan a retira for di rond di e tentnan di Core, Datan y Abiram.” (Num. 16:23-27) Despues, Jehova a mata tur e rebeldenan. Pero e adoradornan leal di Jehova si a sobrevivi. Dicon? Pasobra nan a “distancia nan mes for di inhusticia”, alehando nan mes for di e rebeldenan.

7 No tin duda, Jehova por mira kico tin den curason di hende! Pues, e sa ken ta esnan cu ta pertenece na dje. No obstante, su sirbidornan leal mester a tuma accion decisivo: Nan mester a distancia nan mes for di e malbadonan. Pesey, ta posibel cu Pablo tabata referi na e relato na Numbernan 16:5, 23-27 ora el a skirbi: “Laga tur cu ta menciona e nomber di Jehova distancia nan mes for di inhusticia.” E conclusion ey ta parce logico ya cu ta for di Numbernan 16:5 Pablo a cita ora el a bisa: “Jehova conoce esnan cu ta pertenece na dje.”—2 Tim. 2:19.

“EVITA DEBATENAN BOBO Y SIN PIA SIN CABES”

8. Dicon nos tin cu haci mas cu djis uza e nomber di Dios of djis forma parti di e congregacion cristian?

8 Pablo a uza e sucesonan den tempo di Moises pa corda Timoteo cu e mester a dal pasonan decisivo pa proteha su relacion precioso cu Jehova. Mescos cu e  adoradornan fiel di Jehova den tempo di Moises mester a haci mas cu djis menciona e nomber di Dios, cristiannan fiel den prome siglo tabatin cu haci mas cu djis forma parti di e congregacion cristian. Si, tur sirbidor di Jehova tin cu dal pasonan decisivo pa distancia nan mes di inhusticia. Kico esaki a nifica pa Timoteo? Y kico adoradornan di Jehova por siña for di e conseho inspira di Pablo awe?

9. Ki efecto “debatenan bobo y sin pia sin cabes” tabatin riba e congregacion cristian den prome siglo?

9 E Palabra di Dios ta mustra bon cla con nos por distancia nos mes for di inhusticia, of maldad. Por ehempel, den e mesun capitulo 2 di Segundo Timoteo, nos ta mira cu Pablo a bisa Timoteo cu no ta bon pa “pleita tocante palabra” y cu nos mester “evita papiamento di palabra bashi.” (Lesa 2 Timoteo 2:14, 16, 23.) Dicon Pablo a bis’e esey? Pasobra tabatin algun hende den congregacion cu tabata promove siñansanan apostata. Ademas, tabatin otronan cu tabata plama ideanan controversial. Y aunke algun di e ideanan aki riba nan mes no tabata contra siñansa di Bijbel, nan tabata causa desunion; nan tabata pone hende debati y pleita tocante palabra, creando asina un ambiente insaludabel entre e cristiannan. Pesey Pablo a enfatisa e importancia di “evita debatenan bobo y sin pia sin cabes.”

10. Con nos mester reacciona ora nos haya nos confronta cu apostasia?

10 Awe, no ta usual cu adoradornan di Jehova ta haya nan confronta cu apostasia den congregacion. Pero ora nos haya nos cu siñansanan cu ta bay contra di loke Bijbel ta siña, sin importa di unda nan ta bin, nos mester rechasa nan categoricamente. No ta sabi pa nos comunica cu hende apostata, sea ta personalmente, via Internet of otro medionan di comunicacion. Hasta si nos intencion ta pa yuda un persona asina, nos ta desobedece Jehova pasobra su adoradornan mester rechasa, si, distancia nan mes completamente for di apostasia.

Evita comunicacion cu hende apostata (Wak paragraf 10)

11. Kico por hiba na “debatenan bobo”, y con ancianonan cristian por pone un bon ehempel?

11 Fuera di apostasia, tin otro cosnan cu por perturba e paz di un congregacion. Por ehempel, diferencia di opinion relaciona cu entretenimento tambe por resulta den “debatenan bobo y sin pia sin cabes.” Pero kico si un miembro di congregacion ta promove entretenimento cu ta viola Jehova su normanan moral? Ta claro cu ancianonan mester haci algo y no tolera esaki djis pa evita discusion. (Sal. 11:5; Efe. 5:3-5) No obstante, nan mester tene cuidou pa nan no impone nan gusto personal riba otronan. Mas bien, nan ta sigui e conseho cu Bijbel ta duna superintendentenan cristian. Bijbel ta bisa: “Pastorea e tou di Dios cu ta bou di boso cuido, ... no manera hende cu ta manda riba esnan cu ta propiedad di Dios, sino mas bien, bira ehempel pa e tou.”—1 Ped. 5:2, 3; lesa 2 Corintionan 1:24.

12, 13. (a) Con testigonan di Jehova ta scoge entretenimento, y ki principionan nan ta uza pa haci esey? (b) Con nos por uza e principionan cu paragraf 12 ta trata den caso di varios asunto personal?

12 Nos organisacion no ta analisa pelicula, wega di video, buki of cantica pa bisa nos kico nos mester evita. Dicon no? Pasobra Bijbel ta anima nos cada un pa entrena nos ‘capacidad di compronde pa nos mes por distingui loke ta bon for di loke ta malo.’ (Heb. 5:14) Bijbel ta duna nos principionan basico cu por yuda nos ora di scoge entretenimento. Tur biaha cu nos ta tuma decision, nos mester “sigui haci sigur di loke ta agrada Señor.” (Efe. 5:10) Bijbel ta mustra cu un cabes di famia tin cierto grado di autoridad, pues e por dicidi cu su  famia no ta participa na cierto entretenimento. *1 Cor. 11:3; Efe. 6:1-4.

13 E principionan di Bijbel cu nos a caba di trata no ta conta solamente na momento di scoge entretenimento. Opinion tocante nos forma di bisti y nos apariencia, salud y nutricion y otro asuntonan personal tambe por lanta controversia. Pesey, si no tin principio di Bijbel cu ta ser viola, adoradornan di Jehova ta evita di papia riba e asunto, pasobra Bijbel ta bisa cu “un esclavo di Señor no tin nodo di pleita, pero e mester ta amabel [discreto; yen di tacto] cu tur hende.”—2 Tim. 2:24, wak nota.

EVITA MAL COMPANIA!

14. Ki ilustracion Pablo a uza pa mustra cu cristiannan mester evita mal compania?

14 Den cua otro manera esnan cu “ta menciona e nomber di Jehova” tin cu “distancia nan mes for di inhusticia”? Nan mester evita mal compania, esta, asociacion estrecho cu hende cu ta practica inhusticia. Con Pablo a ilustra esaki? Despues di e ilustracion tocante e ‘fundeshi solido cu Dios a pone’, el a conta un otro ilustracion. El a skirbi tocante un “cas grandi” cu tin “no solamente wea di oro y di plata, sino tambe di palo y di klei, y algun pa un proposito honorabel, pero otronan pa un proposito sin honor.” (2 Tim. 2:20, 21) Despues, el a conseha cristiannan pa aparta nan mes, of “keda leu”, for di e weanan cu ta pa un proposito “sin honor.”

15, 16. Kico nos por siña for di e ilustracion di “un cas grandi”?

15 Kico ta e splicacion di e ilustracion aki? Pablo a compara e congregacion cristian cu “un cas grandi” y e miembronan di e congregacion cu “wea” of artefactonan di cas. Tin artefactonan den un cas cu por ser contamina si nan bin den contacto cu substancianan peligroso of si nan ta den un ambiente cu no ta higienico. Ora esey sosode, e doño di cas tin cu separa e artefactonan  contamina ey for di su artefactonan limpi, manera esnan cu e ta uza pa cushina.

16 Di mes manera, adoradornan di Jehova awe cu ta haci esfuerso pa ta limpi den tur sentido mester evita contacto estrecho cu personanan den congregacion cu conscientemente ta nenga di sigui e principionan di Jehova. (Lesa 1 Corintionan 15:33.) Si den congregacion mes nos tin cu evita mal compania, nos tin mucho mas motibo ainda pa haci esey pafo di e congregacion cristian. Dicon? Pasobra hopi hende cu no ta parti di e congregacion ta ‘stima placa, ta desobediente na mayornan, desleal, calumniador, feroz, sin amor pa loke ta bon, traidor y ta stima placer en bes di stima Dios.’—2 Tim. 3:1-5.

JEHOVA TA BENDICIONA NOS LEALTAD

17. Con e Israelitanan fiel a demostra cu nan a tuma un posicion firme contra inhusticia?

17 Bijbel ta bisa cu ora Jehova a duna e mandato pa “retira for di rond di e tentnan di Core, Datan y Abiram”, e Israelitanan fiel “a retira [mesora, NW].” (Num. 16:24, 27) Nan no a vacila ni tarda. Bijbel ta bisa cu nan “a retira for di rond di e tentnan.” E adoradornan fiel di Jehova no a tuma ningun risico; nan a obedece Jehova di henter nan curason. Nan a tuma un posicion cla na banda di Jehova y contra di inhusticia. Kico nos por siña for di nan ehempel?

18. Kico Pablo tabata kiermen ora el a bisa Timoteo pa “huy for di e deseonan di hubentud”?

18 Nos relacion cu Jehova ta hopi valioso. Pesey, nos mester dal pasonan mesora y decisivo pa proteh’e. Ta esey Pablo tabata kiermen ora el a conseha Timoteo pa “huy for di e deseonan di hubentud.” (2 Tim. 2:22) E tempo ey Timoteo tabata un adulto caba, kisas den su 30 y pico aña. Pero hasta un adulto por tin deseonan bobo di hubentud. Ora Timoteo a hay’e cu e deseonan ey, e mester a “huy” for di nan. Cu otro palabra, Timoteo mester a ‘distancia su mes di inhusticia.’ Hesus a declara algo similar ora el a bisa: “Si bo wowo ta pone bo trompica, sac’e benta afo.” (Mat. 18:9) Cristiannan di awe cu ta tuma e conseho ey na pecho ta actua mesora y na un manera dicidido pa proteha nan relacion cu Dios.

19. Ki pasonan decisivo algun ruman a dal pa proteha nan relacion cu Jehova?

19 Algun ruman cu tabatin problema cu alcohol prome cu nan a bira testigo di Jehova a tuma e decision pa abstene nan mes completamente for di bibida alcoholico. Otronan cu tin un of otro debilidad ta evita cierto tipo di entretenimento, cu riba nan mes no ta malo pero, cu por lanta mal deseo den nan. (Sal. 101:3) Por ehempel, prome cu un ruman homber a bira testigo di Jehova, e tabata gusta bay fiesta caminda inmoralidad tabata tuma luga. Desde e tempo cu el a conoce e berdad, el a dicidi cu e no ta balia mes mas, ni na fiesta di testigonan di Jehova, pa su mal deseo- of pensamentonan di pasado no lanta. Claro cu esey no ta nifica cu cristiannan no tin mag di balia ni uza alcohol of haci otro cosnan cu riba nan mes no ta malo. No obstante, nos tur mester tene cuidou y dal pasonan decisivo pa proteha nos relacion cu Jehova.

20. Aunke kisas no ta facil pa “distancia nos mes for di inhusticia”, ki consuelo nos tin?

20 E privilegio di por carga e nomber di Dios ta trece responsabilidad cu ne. Nos tin cu ‘distancia nos mes for di inhusticia’ y ‘aparta nos mes for di maldad.’ (Sal. 34:14) Ta berdad cu no ta tur biaha ta facil pa haci esey. Pero nos tin e consuelo cu Jehova semper lo stima “esnan cu ta pertenece na dje” y cu ta pega na su norma- y principionan husto.—2 Tim. 2:19; lesa 2 Cronicanan 16:9a.

^ par. 12 Wak e articulo Do You Ban Certain Movies, Books, or Songs?riba nos site jw.org (na Ingles); bay na “ABOUT US >FREQUENTLY ASKED QUESTIONS.”