Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2014

Nan A Ofrece Nan Mes di Buena Gana pa Sirbi na Micronesia

Nan A Ofrece Nan Mes di Buena Gana pa Sirbi na Micronesia

KATHERINE, kende a lanta na Merca, a bira testigo di Jehova cu 16 aña di edad. E tabata traha duro den sirbishi, pero den e area caminda e tabata predica masha poco hende tabata scucha e mensahe di Reino. El a bisa: “Mi a yega di lesa experencia di varios hende cu a pidi Dios manda un persona pa yuda nan siña conoc’e. Mi tabatin hopi gana di topa un persona asina, pero nunca esey no a sosode.”

Despues cu Katherine tabatin hopi aña ta predica den e mesun teritorio ey, el a cuminsa pensa pa muda bay un area caminda hende ta mas dispuesto pa scucha e mensahe di Reino. Pero e tabata duda si e por a biba otro caminda. Ta un biaha so el a yega di separa for di su famia y tabata pa dos siman so; asina mes, tur dia e tabatin heimwee. No obstante, su deseo sincero pa experencia e goso di yuda hende cu ta busca Jehova tabata mas fuerte cu su dudanan. Despues di a analisa varios luga cu e lo por a bay, el a dicidi di skirbi sucursal di Guam, y el a haya e informacion cu e tabatin mester. Na juli 2007, cu 26 aña di edad, Katherine a muda bay Saipan, un isla den Ocean Pacifico, un 10.000 kilometer for di su cas. Anto, con a bay cu ne?

DOS ORACION TA HAYA CONTESTA

Un poco tempo despues cu Katherine a yega su congregacion nobo, el a conoce Doris. Doris tabata un señora di mas o menos 45 aña di edad, kende a acepta un estudio di Bijbel. Despues cu nan a studia e prome tres capitulonan di e buki Bijbel ta Siña, Katherine a cuminsa preocupa. El a bisa: “Doris tabata un bon studiante, y mi tabatin miedo di haci algo robes y daña cos. Tabata prome biaha cu mi tabata dirigi un estudio di Bijbel riba un base regular y mi tabata sinti cu Doris tabatin mester di un ruman muher cu mas experencia pa studia cu ne, kisas un ruman di su edad.” Catherine a haci oracion y a pidi Jehova yud’e haya un bon ruman muher cu lo por a studia cu Doris. Despues, Katherine a dicidi cu e ta bay informa Doris di e cambio cu e kier a haci.

Katherine a bisa: “Prome cu mi por a papia cu Doris tocante e asunto, el a bisa mi cu e kier a papia cu mi tocante un problema cu e tabatin. Despues di a scuch’e, mi a cont’e con Jehova a yega di yuda mi trata cu un situacion similar.” Doris a gradici Katherine y a bis’e: “Jehova ta uza abo pa yuda mi.  E prome biaha cu bo a bin na mi cas, mi tabatin oranan ta lesa Bijbel. Mi tabata yora, rogando Jehova pa manda un hende pa yuda mi compronde Bijbel. Net na e momento ey bo a bati na mi porta. Jehova a contesta mi oracion!” Awa tabata basha for di Katherine su wowo segun cu Doris tabata relata e momento emocionante ey. Katherine a bisa: “Doris su palabranan tabata contesta pa mi oracion. Jehova a laga mi compronde cu mi tin e capacidad pa sigui cu e estudio.”

Doris a batisa na 2010, y awe e mes ta dirigi varios estudio di Bijbel. Katherine a bisa: “Mi ta hopi contento cu e deseo cu mi tabata cana cu ne pa hopi tempo a bira realidad: Mi por a yuda un persona sincero bira sirbidor di Jehova.” Awe, Katherine ta feliz sirbiendo como pionero special na Kosrae, un otro isla den Ocean Pacifico.

TRES DESAFIO—Y MANERA PA TRATA CU NAN

Mas cu shen ruman for di exterior (di entre 19 pa 79 aña di edad) a yega di sirbi of ta sirbiendo na Micronesia caminda tin necesidad di mas predicador. E rumannan celoso aki ta sinti mescos cu Erica, kende a muda bay Guam cu 19 aña di edad na aña 2006. El a bisa: “Ta hopi dushi pa traha pionero den un teritorio caminda hende tin hamber pa e berdad. Mi ta hopi agradecido cu Jehova a yuda mi scoge e rasgo di sirbishi aki. Esaki ta e mihor manera di biba!” Awe, Erica tin e goso di sirbi como pionero special na Ebeye, Islanan Marshall. Ta claro cu sirbishi den un pais stranhero tin su desafionan tambe. Laga nos wak con e rumannan cu a muda bay Micronesia a trata cu tres di e desafionan aki.

Erica

Estilo di Bida. Simon di 22 aña di edad a muda bay e isla Palau na aña 2007. Y no a dura mucho cu el a haya sa cu loke e por a gana na Palau ta masha tiki compara cu loke e tabata gana na Inglatera, su pais natal. Simon a bisa: “Mi mester a siña domina mi mes pasobra mi no por cumpra tur loke mi kier mas. Mi ta wak bon ki cuminda mi ta cumpra y, prome cu mi cumpra algo, mi ta cana wak unda mi por hay’e mas barata. Ora algo di mi daña, mi ta busca pieza segunda mano y wak si mi ta haya un hende cu por yuda mi drech’e.” Ki efecto e estilo di bida simpel aki tabatin riba Simon? El a bisa: “Esaki a siña mi mira loke ta realmente necesario den bida y con pa biba cu menos. Na varios ocasion, mi a mira bon cla con Jehova ta percura pa mi. Durante tur e shete añanan cu mi ta sirbiendo akinan, semper mi tabatin co’i come y un luga pa drumi.” No tin duda, Jehova ta sostene su sirbidornan cu ta hiba un bida simpel pasobra nan kier pone e Reino na prome luga den nan bida.—Mat. 6:32, 33.

Heimwee. Erica a bisa: “Mi ta hopi pega cu mi famia, y mi tabatin miedo cu heimwee lo a afecta mi sirbishi.” Kico el a haci pa prepara su mes emocionalmente? “Prome cu mi a muda, mi a lesa articulonan tocante heimwee den E Toren di Vigilancia.  Den un di e articulonan, un mama a motiva su yiu muher pa confia den Jehova. El a bisa e yiu: ‘Jehova por cuida bo mihor cu mi.’ E palabranan aki a fortalece mi hopi.” Hannah cu su esposo, Patrick, ta sirbi na Majuro, Islanan Marshall. Pa trata cu heimwee, Hannah ta enfoca su atencion riba su rumannan den congregacion. Hannah a bisa: “Constantemente mi ta gradici Jehova pa nos hermandad mundial pasobra mi rumannan tambe ta mi famia. Sin nan sosten amoroso, nunca lo mi por a sirbi caminda tin mester di mas predicador.”

Simon

Cera amistad. Simon a bisa: “Ora bo yega un luga nobo, casi tur cos ta diferente. Tin biaha mi tin gana di por conta un chiste cu tur hende ta compronde mesora.” Erica a bisa: “Na comienso, mi tabata sinti mi mi so y tristo, pero esey a motiva mi pa medita riba e motibo pakico mi a muda. Mi no a muda pa mi mes beneficio pero pa haci mas pa Jehova.” El a sigui bisa: “Cu tempo mi a cera bunita amistadnan cu mi ta balora hopi.” Simon a traha duro pa siña Palauano, y esaki a yud’e ‘habri su curason hancho’ pa e rumannan local. (2 Cor. 6:13) Y e echo cu el a haci esfuerso pa siña e idioma a pone cu e rumannan a haya hopi aprecio p’e. Si, ora e rumannan cu a caba di yega traha hunto cu rumannan local, nan tur ta gosa di un dushi amistad cu otro. Ki otro bendicion rumannan cu ta ofrece nan mes boluntariamente ta haya?

NAN TA ‘COSECHA NA ABUNDANCIA’

Apostel Pablo a bisa: “Esun cu ta sembra na abundancia, lo cosecha tambe na abundancia.” (2 Cor. 9:6) E principio tras di e palabranan aki sigur ta conta pa rumannan cu kier haci mas den sirbishi. Ki fruta nan ta ‘cosecha na abundancia’ na Micronesia?

Patrick cu Hannah

Na Micronesia, ainda tin hopi oportunidad pa cuminsa estudio di Bijbel y mira con e studiantenan ta progresa spiritualmente segun cu nan ta aplica e berdadnan di e Palabra di Dios den nan bida. Patrick cu Hannah a predica tambe na Angaur, un isla chikito di 320 habitante. Despues cu nan tabatin dos luna ta predica eynan, nan a topa cu un mama soltero. Mesora el a acepta un estudio di Bijbel. El a tuma e berdad hopi na serio y a haci cambionan grandi den su bida. Hannah a conta: “Cada biaha cu nos caba di studia cu ne y ta bayendo cas riba nos bais, nos tabata wak otro y bisa: ‘Danki Jehova!’” Hannah a sigui bisa: “Mi sa cu, di un manera of otro, Jehova lo a hala e señora aki cerca dje, pero como cu nos a bin sirbi caminda tin mas necesidad nos por a haya e persona semehante na carne aki y yud’e siña conoce Jehova. Esaki ta un di e experencianan cu mas a anima nos!” Ta manera Erica a bisa: “Ora bo yuda un hende siña conoce Jehova, bo ta sinti un goso cu bo no por describi!”

ABO TAMBE POR SIRBI CAMINDA TIN MAS NECESIDAD?

Hopi pais tin necesidad di mas predicador di Reino. Abo tambe por muda bay caminda tin mester di mas yudansa? Wel, pidi Jehova fortalece bo deseo pa haci mas den su sirbishi. Papia di e asunto aki cu e ancianonan di bo congregacion, e superintendente di circuito of cu rumannan cu tin of tabatin e privilegio di sirbi caminda tin necesidad di mas predicador di Reino. Si bo tin plan di muda, skirbi e sucursal cu ta supervisa e teritorio caminda lo bo tin gana di sirbi y pidi pa mas informacion. * Kisas bo tambe por uni cu e miles di rumannan—hoben y di edad, soltero of casa—kendenan a ofrece nan mes di buena gana pa sirbi caminda tin mas necesidad y cu a sinti e goso di ‘cosecha na abundancia.’

^ par. 17 Wak e articulo “Bo Por ‘Bini Macedonia?” den Nos Ministerio di Reino di augustus 2011.