Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2014

“Boso Lo Ta Mi Testigonan”

“Boso Lo Ta Mi Testigonan”

“[Hesus] a bisa nan: ‘... Boso lo ta mi testigonan ... te na e parti mas leu di Tera.’”—ECHO. 1:7, 8.

1, 2. (a) Ken ta e testigo di Jehova mas sobresaliente? (b) Kico e nomber “Hesus” ta nifica, y con e Yiu di Dios a cumpli cu su nomber?

“PA ESAKI mi a nace y pa esaki mi a bin na mundo: pa mi duna testimonio di e berdad.” (Lesa Juan 18:33-37.) Esaki ta loke Hesucristo a bisa Poncio Pilato, e gobernador Romano di Judea, ora e tabata den corte. Añanan despues, apostel Pablo a referi na e ehempel di curashi aki di Hesus y a bisa cu Hesus “a duna Poncio Pilato un excelente testimonio.” (1 Tim. 6:13) Awe, nos ta biba den un mundo yen di odio y domina pa Satanas. Pues, pa nos por ta un “testigo fiel y berdadero” manera Hesus, nos mester di hopi curashi.—Rev. 3:14.

2 Como cu Hesus tabata forma parti di e nacion Hudiu, e tabata testigo di Jehova for di dia cu el a nace. (Isa. 43:10) Y Hesus a resulta di ta e testigo di mas grandi cu Dios tabatin pa defende Su nomber. Ademas, Hesus a tuma nificacion di su propio nomber hopi na serio. Ora un angel a bisa Jose, e tata di crianza di Hesus, cu Maria lo concebi un yiu cu yudansa di spirito santo, el a bis’e tambe: “Bo mester yam’e Hesus, pasobra lo e salba su pueblo di nan picanan.” (Mat. 1:20, 21) Mayoria di experto riba tereno di Bijbel ta di acuerdo cu e nomber Hesus ta deriva for di e nomber Hebreo Yeshua, y cu e ta contene e forma abrevia di e nomber divino. E nomber Hebreo pa Hesus ta nifica “Jehova Ta Salbacion.” Cumpliendo cu e nificacion di  su nomber, Hesus a yuda “e carnenan perdi di e cas di Israel” pa nan arepenti di nan picanan pa nan por a haya Jehova su aprobacion atrobe. (Mat. 10:6; 15:24; Luc. 19:10) Pesey, cu celo Hesus a predica tocante e Reino di Dios. Marco, un escritor di evangelio, a bisa: “Hesus a bay Galilea y tabata predica e bon noticia di Dios y tabata bisa: ‘Awor ta e tempo, y e Reino di Dios a yega cerca. Arepenti y pone fe den e bon noticia.’” (Mar. 1:14, 15) Ademas, cu curashi Hesus a desenmascara e lidernan religioso Hudiu; esey tabata un di e motibonan pakico nan a laga mat’e.—Mar. 11:17, 18; 15:1-15.

“E OBRANAN MAGNIFICO DI DIOS”

3. Kico a pasa riba e di tres dia despues di Hesus su morto?

3 Tres dia despues di e morto cruel di Hesus, algo asombroso a sosode! Jehova a resucita Hesus, no como ser humano, pero como un spirito inmortal. (1 Ped. 3:18) Y pa proba na su discipelnan cu di berdad el a lanta for di morto, Hesus a tuma curpa humano y a aparece na nan. Riba e mesun dia cu el a ser resucita, el a aparece por lo menos cinco biaha, pero na varios discipel.—Mat. 28:8-10; Luc. 24:13-16, 30-36; Juan 20:11-18.

4. Kico a pasa ora Hesus a aparece na su discipelnan, y kico el a laga nan compronde bon cla?

4 E di cinco biaha cu Hesus a aparece tabata na su apostelnan y na e hendenan cu tabata hunto cu nan. Na e ocasion memorabel ey, Hesus a tene, na moda di papia, un estudio di Bijbel cu nan. Hesus “a habri nan mente completamente pa nan capta nificacion di e Scritura.” Pues, el a yuda su oyentenan compronde cu su morto na man di su enemigonan y su resureccion milagroso tabata sucesonan cu a ser profetisa den e Scritura. Na final di e reunion importante ey, Hesus a laga su oyentenan compronde bon cla kico nan mester a haci. El a bisa nan cu “a base di su nomber, e mensahe cu hende mester arepenti pa haya pordon di pica lo ser predica den tur nacion, cuminsando for di Jerusalem.” Despues el a bisa nan: “Boso lo mester ta testigo di e cosnan aki.”Luc. 24:44-48.

5, 6. (a) Dicon Hesus a bisa: “Boso lo ta mi testigonan”? (b) Ki rasgo nobo di Jehova su proposito e discipelnan di Hesus mester a cuminsa siña hende?

5 Pues, 40 dia despues, ora Hesus a aparece pa e ultimo biaha, su apostelnan lo mester a compronde kico e tabata kiermen cu e mandato simpel pero poderoso aki: “Boso lo ta mi testigonan na Jerusalem, den henter Judea y Samaria, y te na e parti mas leu di Tera.” (Echo. 1:8) Dicon Hesus a bisa nan: “Boso lo ta mi testigonan” y no di Jehova? Hesus por a bisa cu nan lo ta testigo di Jehova, pero e personanan cu e tabata papia cu ne tabata Israelita; pues, nan tabata testigo di Jehova caba.

Mescos cu e discipelnan di Hesus, nos ta sigui conta hende di Jehova su proposito pa futuro (Wak paragrafnan 5, 6)

6 Awor, e discipelnan di Hesus mester a cuminsa siña hende un rasgo nobo di Jehova su proposito—algo mucho mas grandi cu Israel su liberacion for di sclavitud na Egipto y for di cautiverio na Babilonia. Nan mester a cuminsa siña hende cu e morto y resureccion di Hesucristo a habri caminda pa hende haya libertad for di sclavitud na pica y morto, e sclavitud di mas malo cu ta existi. Despues cu Hesus su discipelnan a ser ungi cu spirito santo na Pentecoste di aña 33 di prome siglo, nan a cuminsa conta hende tocante e “obranan magnifico di Dios.” Hopi hende cu a tende e mensahe a arepenti, a pone fe den Hesus su sacrificio y a batisa. Hesus, kende ta sinta na man drechi di su Tata den cielo, por a mira con su nomber a haya mas nificacion segun cu miles di hende tabata pone fe den e medio cu Jehova a percura pa hende haya salbacion.—Echo. 2:5, 11, 37-41.

 UN “RESCATE A CAMBIO DI HOPI HENDE”

7. Kico e sucesonan cu a tuma luga dia di Pentecoste di aña 33 a proba?

7 E sucesonan cu a tuma luga riba Pentecoste di aña 33 a duna prueba cu Jehova a acepta e sacrificio perfecto di Hesus como rescate pa libra humanidad di pica. (Heb. 9:11, 12, 24) Hesus mes a splica cu el a bin “pa duna su alma como rescate a cambio di hopi hende.” (Mat. 20:28) No ta e Hudiunan cu a arepenti so lo a beneficia di e rescate di Hesus. Dios su boluntad ta pa “tur sorto di hende ser salba”, y e rescate “ta kita pica di mundo!”1 Tim. 2:4-6; Juan 1:29.

8. Con bin e discipelnan di Hesus por a sigui duna testimonio tocante dje, y kico nan a logra?

8 E prome discipelnan di Hesus a sigui duna testimonio tocante Hesus cu curashi. Con esey por tabata posibel? Wel, nan no a haci esey riba nan mes forsa. Jehova su spirito santo poderoso a duna nan forsa y curashi pa sigui duna testimonio. (Lesa Echonan 5:30-32.) Nos por bisa cu un 27 aña despues di Pentecoste di aña 33 “e mensahe di e berdad, esta, e bon noticia” a ser predica den “henter e creacion bou di cielo”, tanto na Hudiu como na personanan no Hudiu.—Col. 1:5, 23.

9. Kico a sosode cu e congregacion cristian manera a ser profetisa?

9 Pero lamentablemente, segun cu tempo tabata pasa, algun miembro di e congregacion cristian a cuminsa troce e berdad y siña hende mentira. (Echo. 20:29, 30; 2 Ped. 2:2, 3; Judas 3, 4) Hesus a profetisa di tal apostasia, instiga pa Satanas, “e Malbado”, y a bisa cu apostasia lo a sigui existi te na “conclusion di e era.” (Mat. 13:37-43) Awor, kico a indica comienso di e conclusion, of “e ultimo dianan”, di e mundo malbado aki di Satanas? Entronisacion di Hesus como Rey riba humanidad na october 1914.—2 Tim. 3:1.

10. (a) Na ki fecha historico e cristiannan ungi di tempo moderno a señala? (b) Kico a sosode na october di aña 1914, y con esey a bira bisto pa tur hende?

10 Mas cu 30 aña di antemano, cristiannan ungi tabata proclama cu october 1914 lo tabata un fecha historico. Nan a basa nan comprondemento riba Daniel su profecia tocante un palo grandi cu lo a ser gekap y cu lo a crece bek despues di “shete tempo.” (Dan. 4:16NW) Hesus a referi  na e mesun periodo aki como “e tempo stipula di e nacionnan” den su profecia tocante e señal di su presencia y “e conclusion di e era aki.” Anto desde 1914, “e señal di [Cristo su] presencia” como Rey di humanidad a bira bisto pa tur hende. (Mat. 24:3, 7, 14; Luc. 21:24) “E obranan magnifico di Dios” cu nos ta predica tocante dje awe ta encera tambe e echo cu Jehova a entronisa Hesus na 1914 como Rey di humanidad.

11, 12. (a) Kico Hesus a cuminsa haci asina cu el a bira Rey, y kico a sosode algun aña despues? (b) Kico a bira bisto na aña 1935? (Wak e prome plachi.)

11 Ora cu na 1914 Hesucristo a bira e Rey nobo pa goberna Tera, mesora el a cuminsa libra su siguidornan ungi for di “Babilonia e Grandi.” (Rev. 18:2, 4) Na 1919, e aña despues cu Prome Guera Mundial a termina, porta a habri pa Cristo su siguidornan ungi predica rond mundo. Nan a probecha di e oportunidad aki pa predica tocante Dios su medio pa salbacion, esta e rescate, y e bon noticia di Reino. Como resultado di esey, miles di persona mas a haya e berdad y a ser ungi pa reina hunto cu Cristo den cielo.

12 Na 1935 a bira bisto cu Cristo a cuminsa reuni miyones di su ‘otro carnenan’, kendenan lo forma un “multitud grandi” di hende di tur nacion. Hunto cu e rumannan ungi, e multitud grandi aki tambe ta sigui e ehempel di curashi cu Hesus a pone y ta duna di conoce publicamente cu nan debe nan salbacion na Dios y Cristo. Nan sa cu si nan persevera den e trabou di predica y sigui pone fe den e sacrificio di rescate di Cristo, nan lo tin e privilegio di sobrevivi “e tribulacion grandi” y biba den Dios su mundo nobo.—Juan 10:16; Rev. 7:9, 10, 14.

‘TUMA CURASHI PA CONTA E BON NOTICIA’

13. Kico ta nos determinacion como testigo di Jehova, y con nos por logra esey?

13 Nos tin e gran privilegio di por conta hende tocante “e obranan magnifico” di Jehova Dios y tocante su promesanan pa futuro. Ta berdad si cu no ta semper facil pa haci esaki. Hende sa rechasa nos mensahe, haci bofon di nos of hasta persigui nos. Sinembargo, nos por imita apostel Pablo y su compañeronan. Pablo a bisa: “Nos a tuma un curashi cu yudansa di nos Dios pa conta boso e bon noticia di Dios meymey di hopi oposicion.” (1 Tes. 2:2) Pues, laga nos nunca entrega. Mas bien, laga nos ta determina pa sigui cumpli cu nos dedicacion na Jehova segun cu Satanas su mundo ta yegando su fin. (Isa. 6:11) Ta claro cu nos no por haci esey riba nos mes forsa. Pesey, mescos cu cristiannan di prome siglo, nos mester pidi Jehova duna nos su spirito santo pa nos por tin “e poder cu ta surpasa esun di hende.”—Lesa 2 Corintionan 4:1, 7; Luc. 11:13.

14, 15. (a) Con hopi hende tabata trata e cristiannan den prome siglo, y con apostel Pedro a anima e rumannan? (b) Kico nos mester corda ora hende ta trata nos malo pasobra nos ta testigo di Jehova?

 14 Awe, tin miyones di hende cu ta bisa cu nan ta cristian pero cu ‘ta nenga Dios cu nan obranan;’ nan ta haci loke Dios ta odia y esey ta pone cu nan no tin su aprobacion. (Tito 1:16) Ta bon pa nos corda cu den prome siglo hopi hende—si no ta e mayoria—tabata odia e cristiannan berdadero. Pesey, pa encurasha e rumannan ey, apostel Pedro a bisa: ‘Si nan ta insulta boso pa motibo di e nomber di Cristo, boso ta feliz, pasobra e spirito di Dios ta riba boso.’—1 Ped. 4:14.

15 Kico di awe? Testigonan di Jehova ta ser ‘insulta pa motibo di e nomber di Cristo’? Sigur cu si, pasobra ora nos ta predica nos no ta duna testimonio solamente tocante Jehova sino tambe tocante Hesus y e echo cu Hesus ta Rey di e Reino di Dios. Pues, e echo cu hende ta odia nos pasobra nos ta carga e nomber di Jehova ta mescos cu ser ‘insulta pa motibo di e nomber di [Hesus] Cristo.’ Hesus tambe a ser persigui pasobra e tabata un testigo di Jehova. Hesus a bisa su persiguidonan: “Mi a bin den nomber di mi Tata, ma boso no ta acepta mi.” (Juan 5:43) Pesey, e siguiente biaha cu bo haya bo cu oposicion den sirbishi, tuma curashi. Corda cu esey ta un prueba cu bo tin Dios su aprobacion y cu su spirito santo ‘ta riba bo.’

16, 17. (a) Con e pueblo di Jehova ta sinti tocante e trabou di predica? (b) Kico abo ta determina pa haci?

16 Ta bon pa nos corda tambe cu, na hopi parti di mundo, hopi hende ta sigui bin den e berdad. Hasta den teritorionan cu ta ser traha cu hopi frecuencia, nos ta haya hende cu ta dispuesto pa scucha nos maraviyoso mensahe di salbacion. Pues, laga nos ta diligente y rebishita e hendenan cu mustra interes y, si ta posibel, cuminsa un estudio di Bijbel cu nan. Asina nos por yuda nan siña conoce Jehova, dedica nan bida na dje y batisa. Kico bo ta pensa di e trabou di predica y di siña hende? Probablemente bo ta sinti mescos cu Sarie di Sur Africa, kende tin mas cu 60 aña ta predica activamente. El a bisa: “Mi ta masha agradecido mes cu, debi na e sacrificio di rescate di Hesus, mi por tin un bon relacion cu Jehova, e Soberano di universo. Y mi ta contento cu mi por haci su glorioso nomber conoci.” Sarie cu su esposo, Martinus, a yuda hopi hende, incluso nan tres yiunan, bira adorador di Jehova. Sarie a sigui bisa: “Niun otro trabou no ta duna mas satisfaccion cu esaki, y pa medio di su spirito santo Jehova ta duna nos e forsa cu nos tin mester pa sigui haci e trabou di salba bida aki.”

17 Sea cu nos ta batisa caba of nos ta trahando cu e meta ey na mente, nos tin tur motibo pa ta agradecido cu nos tin e privilegio di por forma parti di e congregacion mundial di testigonan di Jehova. Pesey, laga nos sigui duna testimonio cabal hunto cu Jehova su pueblo y haci esfuerso pa keda leu for di e mundo di Satanas. Haciendo esey, lo bo duna honor na esun cu bo ta representa, nos amoroso Tata celestial, Jehova.