Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  July 2014

“Boso Ta Mi Testigonan”

“Boso Ta Mi Testigonan”

“‘Boso ta mi testigonan’, [Jehova] ta declara.”—ISA. 43:10.

1, 2. (a) Kico ta un testigo, y kico e medionan di comunicacion di e mundo aki no ta publica? (b) Dicon Jehova no ta depende di e medionan di comunicacion di mundo?

KICO ta un testigo? Generalmente, hende ta defini e palabra “testigo” como un hende cu a presencia algo y ta conta esaki na otro hende. Na Sur Africa, por ehempel na e stad Pietermaritzburg, pa mas cu 160 aña caba, nan ta publica un corant cu yama E Testigo. E nomber aki ta apropia pasobra meta di e corant ta pa na un manera exacto raporta sucesonan cu ta tuma luga rond mundo. E editor cu a cuminsa cu e corant a priminti cu nan lo raporta “e berdad, e berdad completo, y nada mas cu e berdad.”

2 Pero lamentablemente, hopi biaha medionan di comunicacion no ta duna noticia exacto di sucesonan cu ta tuma luga. Y sigur esey ta e caso encuanto Dios; nan no ta publica e berdad tocante Dios ni di loke el a haci. Pero Jehova, e Gobernante Todopoderoso di universo, no ta depende di e medionan di comunicacion di e mundo aki. El a declara pa medio di su profeta Ezekiel: “E nacionnan lo sa cu ami ta [Jehova].” (Eze. 39:7) Con e lo logra esaki? Jehova tin alrededor di ocho miyon testigo, kendenan ta conta hende rond mundo tocante dje. Ta e ehercito aki di testigo ta conta hende loke Dios a haci y ta haciendo pa humanidad. Ademas, nan ta proclama e cosnan maraviyoso cu Dios a priminti di haci den futuro pa hende. Na Isaias 43:10 (NW), nos ta lesa: “‘Boso ta mi testigonan’, ta e expresion  di Jehova, ‘si, mi sirbidor cu mi a scoge.’” Pues, ora nos ta duna prioridad na e trabou di predica, nos ta demostra cu realmente nos ta testigo di Jehova.

3, 4. (a) Na ki tempo e Studiantenan di Bijbel a cuminsa uza un nomber nobo, y con nan a sinti? (Wak e prome plachi.) (b) Ki preguntanan e articulo aki lo contesta?

3 Ta un honor pa carga e nomber di Dios, pasobra ta Jehova Dios ta “e Rey di eternidad”, kende a bisa: “Esaki ta mi nomber pa semper, y esaki ta mi nomber conmemorativo di generacion pa generacion”! (1 Tim. 1:17; Exo. 3:15; compara cu Eclesiastes 2:16.) Na 1931, e Studiantenan di Bijbel a keda hopi contento ora cu nan a cuminsa uza e nomber “testigonan di Jehova.” Hopi di nan a skirbi carta pa expresa nan aprecio pa e cambio aki. Un congregacion na Canada a skirbi cu e nomber nobo aki a haci nan mas determina ainda pa sigui biba na un manera cu ta duna alabanza na Jehova.

4 Awor, con abo por demostra cu ta un honor pa carga e nomber di Dios? Bo por splica dicon Jehova ta yama nos su testigonan manera e buki di Isaias ta bisa?

DIOS SU TESTIGONAN DEN PASADO

5, 6. (a) Con mayornan Israelita a duna testimonio tocante Jehova? (b) Kico mas mayornan Israelita mester a haci, y dicon mayornan awe mester haci mescos?

5 Den tempo di Isaias, Jehova a scoge e nacion di Israel pa ser su ‘testigo.’ Cada Israelita tabatin e responsabilidad di duna testimonio tocante Jehova. (Isa. 43:10) Por ehempel, mayornan tabata duna testimonio na nan yiunan siñando nan tocante e cosnan cu Jehova a haci den pasado. Jehova a instrui e mayornan pa papia cu nan yiunan tocante e Pasco Hudiu. El a bisa nan: “Ora boso yiunan bisa boso: ‘Kico e sirbishi aki ta nifica pa boso?’ cu boso mester bisa: ‘Ta un sacrificio di Pasco na SEÑOR, kende a pasa e casnan di e yiunan di Israel na Egipto voorbij ora cu el a mata e Egipcionan, ma a libra nos casnan.’” (Exo. 12:26, 27) Si, probablemente  e mayornan a conta nan yiunan con Farao, e gobernante di Egipto, a nenga di laga e Israelitanan bay den desierto pa adora Jehova ora cu Moises a bay cerca dje pa prome biaha. Na e ocasion ey, Farao a bisa: “Ken ta Jehova, pa mi obedece su bos pa manda Israel bay?” (Exo. 5:2NW) Y sin duda, mayornan lo a conta nan yiunan con Jehova a contesta Farao su pregunta y con Jehova a laga tur hende mira cu E ta e Dios Todopoderoso: Jehova a manda dies plaga riba Egipto y a salba e Israelitanan for di e ehercito Egipcio na Lama Cora. Asina, e nacion di Israel a mira cu nan propio wowo cu Jehova ta e Dios berdadero y cu semper e ta cumpli cu su promesanan.

6 E Israelitanan a balora e privilegio di por a carga e nomber di Dios, cu ta Jehova. Pesey, siguramente nan lo a conta tanto nan yiunan como e stranheronan cu a sirbi como esclavo na nan cas tocante e cosnan maraviyoso cu Jehova a haci. E Israelitanan tabata sa tambe cu nan mester tabata santo y cu nan mester a siña nan yiunan pa nan tambe ta santo, pa nan cumpli cu e normanan di Dios. Jehova a bisa nan: “Boso sea santo, pasobra ami SEÑOR boso Dios ta santo.” (Lev. 19:2; Deu. 6:6, 7) Esaki ta un bon ehempel pa mayornan cristian awe. Si, awe tambe mayornan mester siña nan yiunan con pa biba na un manera cu ta trece honor na e glorioso nomber di Dios!—Lesa Proverbionan 1:8; Efesionan 6:4.

Ora nos ta siña nos yiunan tocante Jehova, nos ta duna honor na Dios su nomber (Wak paragraf 5, 6)

7. (a) Ora Israel tabata fiel na Jehova, ki efecto esaki tabatin riba e nacionnan bisiña? (b) Ki responsabilidad tur hende cu ta carga e nomber di Dios tin?

7 Tanten cu e Israelitanan tabata fiel na Jehova, nan a duna bon testimonio encuanto e nomber di Dios. Jehova a laga bisa nan: “Tur e pueblonan di mundo lo mira cu bo ta wordo yama na e nomber di [Jehova], y nan lo tin temor pa bo.” (Deu. 28:10) Pero lamentablemente, mayoria di biaha e Israelitanan tabata infiel na Jehova. Bes tras bes, nan tabata adora idolo. Y nan a bira cruel mescos cu e diosnan Cananeo cu nan tabata adora. Con asina? Wel, nan tabata sacrifica nan yiunan y oprimi hende pober. Nan mal conducta ta siña nos un les importante: Nos mester haci esfuerso pa imita Jehova Dios, e Santisimo, y pa nos ta santo den su bista pasobra ta su nomber nos ta carga.

“MIRA, MI TA BAY HACI ALGO NOBO”

8. Ki asignacion Jehova a duna Isaias, y con Isaias a reacciona?

8 Pa medio di Isaias, Jehova a spierta e Israelitanan cu E  lo bay destrui Jerusalem, e capital di Israel, y permiti Su pueblo ser hiba den cautiverio. Pero Jehova a profetisa tambe cu e lo “haci algo nobo” y libra su pueblo na un manera maraviyoso for di cautiverio. (Isa. 43:19) Jehova, kende por lesa curason perfectamente, tabata sa cu e Israelitanan lo no a arepenti. Toch el a urgi Isaias pa sigui spierta nan. Pesey, gran parti di e prome seis capitulonan di e buki di Isaias ta contene spiertamento tocante e calamidad cu lo a bin riba Jerusalem y e stadnan den cercania. Isaias kier a sa pa cuanto tempo e nacion di Israel lo a sigui desobedece Jehova. Dios a bis’e: “Te ora stadnan keda ruina y sin habitante, casnan keda sin hende, y e tera keda completamente desola.”—Lesa Isaias 6:8-11.

9. (a) Na ki tempo e profecia di Isaias tocante Jerusalem a cumpli? (b) Na ki spiertamento nos tin cu presta atencion awe?

9 Pa mas cu 45 aña, Isaias a spierta e Israelitanan tocante e binidero destruccion di Jerusalem. El a cuminsa su sirbishi como profeta den e ultimo aña di e reinado di Rey Uzias, alrededor di aña 778 prome cu Cristo, y a sigui te cu mas o menos aña 732 prome cu Cristo, durante e reinado di Rey Ezekias. Despues di esey, Jehova a sigui spierta su pueblo pa 125 aña mas, prome cu e destruccion di Jerusalem na aña 607 prome cu Cristo. Pues, hopi aña adelanta e Israelitanan a haya spiertamento di  loke lo a bay pasa den futuro. Awe tambe, Jehova ta uza su pueblo pa spierta hende adelanta di loke lo bay pasa den futuro. Pa 135 aña caba, for di su prome edicion, E Toren di Vigilancia ta spierta hende cu pronto e gobernacion malbado di Satanas lo yega su fin y cu e lo ser reemplasa pa Hesucristo su Reinado di Mil Aña.—Rev. 20:1-3, 6.

10, 11. E Israelitanan cu tabata na Babilonia tabata testigo di e cumplimento di cua profecia di Isaias?

10 Hopi Hudiu a sobrevivi e destruccion di Jerusalem. Con bin? Nan a obedece Jehova y a entrega nan mes na e Babilonionan y a ser hiba como preso na Babilonia. (Jer. 27:11, 12) Ta eynan, 70 aña despues, e pueblo di Dios a mira cumplimento di un otro maraviyoso profecia di Isaias cu ta bisa: “Esaki ta loke Jehova a bisa, boso Recomprador, e Santo di Israel: ‘Pa causa di boso lo mi manda un hende Babilonia y laga baha e baranan dje prizonnan.’”—Isa. 43:14NW.

11 Jehova a cumpli cu e profecia aki na un manera hopi maraviyoso. Tabata un anochi den october di aña 539 prome cu Cristo, y e rey di Babilonia y su noblenan tabatin un fiesta na honor di nan diosnan. Durante e celebracion ey, nan tabata bebe for di e copanan cu nan a horta for di e tempel di Jehova. Pero e mesun anochi ey, Rey Ciro y su ehercito a invadi Babilonia y a captura e stad. Na aña 538 of 537 prome cu Cristo, Ciro a ordena e Hudiunan pa bay Jerusalem bek pa reconstrui e tempel di Dios. Y Jehova a haci sigur cu nada no a sosode cu nan durante nan biahe. Tur esaki a sosode precies manera Isaias a profetisa. Ora e reconstruccion di e tempel na Jerusalem a termina, Dios su pueblo cu a presencia tur e cosnan aki a bira testigo di e echo cu Jehova ta e Dios berdadero y cu semper e ta haci loke e priminti. Y Dios a referi na e Hudiunan aki cu a regresa Jerusalem como ‘e pueblo cu mi a forma pa mi mes pa declara mi alabanza.’—Isa. 43:21; 44:26-28.

12, 13. (a) Ken a uni cu e Israelitanan cu a regresa Jerusalem pa reconstrui e tempel? (b) Kico e ‘otro carnenan’ tin cu haci awor, y ki oportunidad nan lo tin den futuro?

12 Miles di persona cu no tabata Hudiu a uni cu e Israelitanan pa adora Jehova y a bay Jerusalem hunto cu nan ora nan a regresa pa reconstrui e tempel. Y mas despues, hasta mas stranhero a uni cu nan. (Esd. 2:58, 64, 65; Est. 8:17) Awe, ta e cristiannan ungi ta e nacion di Dios, esta, “e Israel di Dios.” Y e “multitud grandi” di Hesus su ‘otro carnenan’ ta uni cu nan pa adora Jehova. (Gal. 6:16; Rev. 7:9, 10; Juan 10:16) Tanto e unginan como e otro carnenan tin e honor di carga e nomber “testigonan di Jehova.”

 13 Durante Cristo su Reinado di Mil Aña, e multitud grandi lo tin e maraviyoso oportunidad di splica e hendenan cu resucita kico ser un testigo di Jehova a nifica pa nan durante e ultimo dianan den e mundo di Satanas. Pero pa nos por tin e privilegio ey den futuro, nos mester keda santo. Pesey, diariamente nos mester pidi Jehova pordona nos pasobra, maske nos ta haci nos best pa biba na harmonia cu Jehova su normanan, nos ta comete eror tur dia. Si, si nos keda santo, nos ta demostra cu nos ta masha contento mes cu Jehova a permiti nos e gran honor di represent’e, of carga su nomber.—Lesa 1 Juan 1:8, 9.

LOKE E NOMBER DI DIOS TA NIFICA

14. Kico e nomber “Jehova” ta nifica?

14 Pa nos por aumenta nos aprecio pa e gran honor di por carga e nomber di Dios, nos mester medita riba e nificacion di Dios su nomber. E nomber “Jehova” ta bin di un palabra Hebreo cu por ser traduci como “bira” y ta duna e idea di tuma accion. Por lo general, hende ta compronde cu e nomber “Jehova” ta nifica “E Ta Causa pa Bira.” E nomber aki ta yuda nos compronde ken Jehova ta. Jehova ta Esun cu a crea tur cos. Y ora Jehova bisa cu e ta bay haci algo, no tin ningun persona cu por strob’e, ni Satanas.

15. Kico nos por siña tocante Dios su nomber for di loke el a bisa Moises? (Wak e cuadro “ Un Nomber Yen di Nificacion.”)

15 Ora Jehova a manda Moises pa libra Su pueblo for di Egipto, Jehova a duna Moises mas detaye encuanto nificacion di Su nomber. El a bisa Moises: “Lo Mi Bira Loke Lo Mi Kier Bira.” Y Jehova a agrega: “Esaki ta loke bo tin cu bisa e yiunan di Israel: ‘Lo Mi Bira a manda mi cerca boso.’” (Exo. 3:14NW; nota.) Pues, Jehova por bira loke ta necesario pa e cumpli cu su proposito. Den tempo di e Israelitanan, Jehova a bira nan Libertador, Protector, Guia y Percurador, loke tabata necesario pa yuda nan den sentido spiritual y material.

CON NOS POR MUSTRA NOS APRECIO?

16, 17. (a) Con nos por mustra nos aprecio pa e privilegio di por carga e nomber di Dios? (b) Ki pregunta e siguiente articulo lo contesta?

16 Jehova no a cambia. Su nomber ta recorda nos cu e por y ta bira loke ta necesario pa percura pa su pueblo, tanto spiritualmente como materialmente. No obstante, Jehova su nomber ta siña nos algo mas. Kico asina? Wel, cu Jehova por pone su creacion haci loke sea ta necesario pa cumpli cu Su proposito. Por ehempel, Jehova ta uza su testigonan pa haci e trabou di predica. E echo cu nos sa esey mester motiva nos pa represent’e bon. Kåre di Noruega, un ruman homber di 84 aña di edad, kende pa 70 aña caba ta un testigo di Jehova celoso, a bisa: “Ta un gran honor pa sirbi Jehova, e Rey di eternidad, y pa forma parti di e pueblo cu ta carga su nomber. Semper ta un gran privilegio pa splica berdadnan biblico na hende y pa mira con nan wowo ta briya di alegria ora nan compronde loke Bijbel ta siña. Por ehempel, mi ta sinti un gran satisfaccion ora mi ta splica hende con e sacrificio di rescate di Cristo ta funciona y con, pa medio di esaki, nan por haya bida eterno den un mundo pacifico y husto.”

17 Nos tin cu admiti si cu, na algun pais, ta birando mas y mas dificil pa haya hende cu kier siña tocante Dios. No obstante, mescos cu Kåre, nos ta sinti un goso profundo ora nos haya sikiera un hende cu kier scucha y siña tocante Dios su nomber. Pero awor, con nos por ta un testigo di Jehova y na mes momento testigo di Hesus? E siguiente articulo lo contesta e pregunta aki.