Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  June 2014

Yuda Nos Ruman Hombernan Alcansa Nan Pleno Potencial

Yuda Nos Ruman Hombernan Alcansa Nan Pleno Potencial

“Lo mi conseha bo; mi wowo ta riba bo.”—SAL. 32:8.

1, 2. Con Jehova ta mira su sirbidornan riba tera?

HOPI biaha, ora mayornan ta wak nan yiunan ta hunga, nan ta keda sorprendi di mira cuanto habilidad nan yiunan tin. Probablemente bo tambe a ripara esey. Un yiu kisas ta bon den un cierto deporte mientras cu e otro podise ta gusta pinta of haci obra di man. Sea cual sea e habilidadnan di nan yiunan, e mayornan ta contento pa yuda nan alcansa nan pleno potencial.

2 Nos amoroso Tata celestial, Jehova, tambe ta masha interesa den su sirbidornan riba tera. Su sirbidornan di awe ta manera ‘tesoro’ p’e, pasobra nan ta sirbie fielmente. (Hagai [Hageo] 2:7, BPK) Kisas bo por a ripara cu bo rumannan den fe tin diferente habilidad y talento. Algun ruman homber ta excelente orador mientras cu otronan ta bon den organisa cosnan. Hopi ruman muher tin capacidad pa siña otro idioma y ta uza esaki den e trabou di predica mientras cu otronan ta un bon ehempel den yuda rumannan cu tin mester di animacion of den cuida esnan cu ta malo. (Rom. 16:1, 12) Nos ta masha contento cu nos tin tur e rumannan aki den nos congregacion.

3. Ki preguntanan nos lo trata den e articulo aki?

3 Sinembargo, tin algun ruman homber hoben of recien batisa cu kisas ainda no ta participa plenamente den e actividadnan  di congregacion. Con nos por yuda nan alcansa nan pleno potencial? Dicon nos mester imita Jehova y enfoca riba nan bon cualidadnan?

JEHOVA TA MIRA NOS BON CUALIDADNAN

4, 5. Con e relato na Huesnan 6:11-16 ta mustra cu Jehova ta mira e potencial di su sirbidornan?

4 Varios relato biblico ta mustra bon cla cu Jehova no solamente ta mira e bon cualidadnan di su sirbidornan sino tambe ki potencial nan tin. Por ehempel, ora Dios a scoge Gideon pa libra su pueblo for di nan enemigonan, e Madianitanan, Gideon a keda masha sorprendi ora e angel a bis’e: “SEÑOR ta cu bo, o guerero balente.” Dicon? Pasobra e no a sinti cu e tabata un persona “balente” ni cu e tabata capaz pa libra e pueblo di Dios. Pero Jehova si a mira Gideon su potencial. E tabata sa cu e por a uz’e pa libra Israel.—Lesa Huesnan 6:11-16.

5 Jehova tabatin pleno confianza den Gideon, pasobra e tabata sa di su potencial. Por ehempel, Jehova a mira con Gideon tabata bati trigo cu tur su forsa. Den tempo biblico, cunukeronan tabatin e custumber di bati nan trigo pafo pa biento supla e bagas y separ’e for di e trigo. Pero, Gideon tabata bati trigo den un baki di pers wendruif pa e por a sconde su cosecha pa e Madianitanan no hort’e. Esey tabata un bon strategia! Pesey den bista di Jehova, Gideon no tabata solamente un cunukero cauteloso sino tambe un homber sabi. Si, Jehova a mira su potencial y a entren’e.

6, 7. (a) Con Jehova su manera di mira Amos tabata diferente for di e manera cu algun Israelita tabata mir’e? (b) Kico ta indica cu Amos no tabata un homber sin educacion?

6 Di mes manera, Jehova a mira e potencial di su profeta Amos. Den bista di hende, kisas e tabata parce keto y insignificante. Amos tabata un wardador di carne y skerfdo di figo sicamor, un fruta cu tabata sirbi como cuminda pa hende pober. Ora Jehova a asign’e como profeta pa declara Su huicio contra e reino di dies tribu cu a bira infiel, algun Israelita a pensa cu Amos no tabata e persona adecuado pa cumpli cu e asignacion ey.—Amos 7:14, 15.

7 Amos a bin di un pueblo aisla, pero e no tabata un homber sin educacion pasobra e tabatin bon conocemento di e custumbernan den e area ey y di e gobernantenan di su tempo. Probablemente e tabata bon informa di e situacion na Israel. Kisas e tabata sa tambe loke tabata pasa na e nacionnan bisiña debi na su contacto cu comerciantenan biahero. (Amos 1:6, 9, 11, 13; 2:8; 6:4-6) Algun experto di Bijbel ta bisa cu Amos tabata un bon escritor; el a uza expresionnan simpel pero poderoso y a haci bon uzo di comparacion. Amos no tabatin miedo di condena sacerdote Amasias pa su actonan corupto. Esey a mustra bon cla cu Jehova a scoge e persona corecto pa declara su mensahe. Si, Jehova a mira e potencial di Amos cu otronan no por a mira.—Amos 7:12, 13, 16, 17.

8. (a) Kico Jehova a priminti David? (b) Dicon Salmo 32:8 por ta un animacion pa rumannan cu ta duda cu nan por logra cierto metanan?

8 Jehova ta mira capacidad- y habilidadnan di tur su sirbidornan, y e kier yuda cada un di nos alcansa nos pleno potencial. Por ehempel, el a priminti Rey David cu semper lo e gui’e y cu su ‘wowo lo ta riba dje.’ (Lesa Salmo 32:8.) Dicon esaki ta un animacion pa nos? Wel, kisas nos ta duda cu nos por logra cierto metanan, pero Jehova por yuda nos haci  mas di loke nos por imagina. Mescos cu un bon maestro gradualmente ta guia un studiante cu falta experencia, asina Jehova ta guia nos pa nos por alcansa nos pleno potencial. Tin biaha, Jehova por uza nos compañeronan den fe tambe pa yuda nos. Con asina?

BUSCA LOKE TA BON DEN OTRO HENDE

9. Con nos mester “busca” interes di nos rumannan?

9 Pablo a anima tur cristian pa “busca” interes di nan rumannan. (Lesa Filipensenan 2:3, 4.) Kico e conseho aki ta encera? Nos mester tuma nota di habilidadnan y e bon cualidadnan di nos rumannan y elogia nan pa esakinan. Con lo bo sinti ora un hende ta tuma nota di bo progreso? Esaki no ta anima bo pa haci bo maximo esfuerso pa sigui progresa? Di mes manera, ora nos ta elogia nos rumannan, nan ta sigui haci esfuerso pa progresa den nan sirbishi na Jehova.

10. Ken specialmente tin mester di atencion?

10 Ken specialmente tin mester di atencion? Claro cu nos tur tin mester di atencion de bes en cuando. Pero specialmente ruman hombernan hoben of recien batisa mester ser envolvi den actividadnan di congregacion. Esaki ta yuda nan sinti cu nan ta parti di e congregacion. Bijbel ta anima e ruman hombernan aki pa haci esfuerso pa nan por ricibi mas responsabilidad den congregacion. (1 Tim. 3:1) Pero, si nan ta sinti cu nos no ta aprecia nan trabou, nan no ta haya gana di sigui haci esfuerso pa ricibi mas responsabilidad.

11. (a) Con un anciano a yuda un yoncuman vence su timidez? (b) Kico e experencia di Julien ta siña nos?

11 Ludovic, un anciano cu rumannan a mustra interes den dje tempo cu e tabata jong, a bisa: “Ora mi mustra interes sincero den un ruman homber, e ta progresa mas lihe.” Papiando di Julien, un yoncuman cu tabata masha timido, Ludovic a bisa: “Como cu Julien no tabata sigur di su mes, e tabata comporta su mes un poco straño. Pero mi a ripara cu e tabata masha cariñoso y cla pa yuda otronan den congregacion. Pesey, en bes di critic’e, mi a enfoca riba su bon cualidadnan y a purba di anim’e.” Cu tempo, Julien a cualifica pa bira sirbidor ministerial, y despues el a bira pionero regular.

YUDA NAN ALCANSA NAN PLENO POTENCIAL

12. Kico nos tin cu haci si nos kier yuda nos ruman hombernan alcansa nan pleno potencial? Duna un ehempel.

12 Si nos kier yuda nos ruman hombernan alcansa nan pleno potencial, nos mester ta atento. Manera e experencia di Julien ta mustra, nos no mester enfoca riba e persona su puntonan debil, pero riba su bon cualidad- y habilidadnan cu por ser desaroya aun mas. Hesus a haci esaki den caso di Pedro. Aunke tin biaha a parce cu Pedro tabata desbalansa, Hesus a profetisa cu lo el a bira firme manera un baranca.—Juan 1:42, nota.

13, 14. (a) Con Barnabas a trata Marco? (b) Con un anciano a yuda un ruman homber mescos cu Barnabas a yuda Marco? (Wak e prome plachi.)

13 Laga nos repasa e ehempel di Barnabas y Juan, kende tabata ser yama Marco. (Echo. 12:25) Durante Pablo su prome biahe como misionero hunto cu Barnabas, Marco tabata “yuda nan”, kisas percurando pa nan necesidadnan fisico. Pero, ora nan a yega Pamfilia, diripiente Marco a bandona su compañeronan. Pablo y Barnabas mester a sigui biaha nan  so a traves di un teritorio yen di bandido. (Echo. 13:5, 13) Kico Barnabas a haci despues? E no a enfoca riba Marco su debilidadnan sino riba su bon cualidadnan y a sigui entren’e. Esey a yuda Marco bira un cristian madura. (Echo. 15:37-39) Algun aña despues, Marco tabata na Roma hunto cu Pablo, kende tabata preso. Y ora Pablo a skirbi un carta pa e cristiannan na Colosas, el a papia bon di Marco. (Col. 4:10) Barnabas lo a keda masha contento ora Pablo a pidi pa Marco bin yud’e.—2 Tim. 4:11.

14 Alexandre, un anciano recien nombra, a conta con un ruman homber a yud’e: “Ora mi tabata jong, mi tabatin masha problema pa haci oracion den publico. Un anciano a mustra mi con pa prepara y con pa keda calmo. En bes di keda sin pidi mi pa haci oracion, regularmente e tabata duna mi oportunidad di haci oracion na reunion pa sirbishi di veld. Cu tempo, mi a haya mas confianza den mi mes.”

15. Con Pablo a mustra cu el a balora su rumannan?

15 Ora bo mira cu un ruman tin bon cualidad, bo ta elogi’e? Den Romanonan capitulo 16, Pablo a elogia mas cu 20 ruman pa nan bon cualidadnan cu el a aprecia. (Rom. 16:3-7, 13) Por ehempel, Pablo a reconoce cu Andronico y Junias tabatin mas tanto tempo cu ne ta sigui Cristo y el a elogia nan pa nan perseverancia. Ademas, Pablo a menciona e mama di Rufo, kende tabata manera un mama p’e.

Frédéric (na man robes) a anima Rico pa sigui sirbi Jehova fielmente (Wak paragraf 16)

16. Ki efecto elogio sincero tabatin riba un hoben?

16 Awe tambe, elogio sincero por duna bon resultado. Laga nos tuma por ehempel e caso di Rico, un hoben na Francia kende su tata no tabata Testigo. Rico a sintie masha desanima pasobra su tata no tabata kier pa e batisa. Rico a pensa cu e tabatin cu warda te ora e bira mayor di edad pa e por a batisa. E tabata tristo tambe pasobra na scol e muchanan tabata tent’e pa motibo di su creencianan. Frédéric, un anciano cu tabata studia cu ne a bisa: “Mi a elogia Rico pasobra e echo cu e tabata hay’e cu oposicion a indica cu e tabatin curashi pa duna testimonio.” E palabranan di elogio aki a fortalece Rico su determinacion pa keda fiel y a yud’e drecha su relacion cu su tata. Finalmente, Rico a batisa cu 12 aña.

Jérôme (na man drechi) a yuda Ryan traha riba e meta pa bira misionero (Wak paragraf 17)

17. (a) Con nos por yuda nos ruman hombernan progresa? (b) Con un misionero a yuda algun ruman homber hoben, y kico tabata e resultado?

17 Cada bes cu nos elogia un ruman pa algo bon cu el a haci, e ta sintie mas motiva pa sigui haci su best pa sirbi Jehova. Sylvie, * kende tin hopi aña ta sirbi na  Betel na Francia, a bisa cu ruman muhernan tambe por elogia ruman hombernan. Hopi biaha ruman muhernan ta ripara detayenan cu kisas ruman hombernan no ta ripara. Pues, “nan palabranan di animacion por complementa loke ruman hombernan experencia ta bisa.” Ademas, el a bisa: “Ami ta pensa cu ta mi deber pa elogia mi rumannan.” (Prov. 3:27) Jérôme, un misionero na Guyana Frances, a yuda hopi ruman homber hoben traha riba e meta pa bira misionero. El a bisa: “Mi a ripara cu ora mi elogia ruman hombernan hoben pa algo specifico cu nan a haci den sirbishi of pa nan bon comentarionan, nan ta haya mas confianza den nan mes. Esey ta pone cu nan ta sigui mehora nan habilidadnan.”

18. Dicon ta bon pa traha hunto cu ruman hombernan hoben?

18 Un otro manera pa stimula nos ruman hombernan pa sigui progresa ta di anima nan pa traha hunto cu nos. Por ehempel, si un hoben sa bon con pa uza computer, un anciano por pidie pa print informacion for di e website jw.org pa e rumannan di edad avansa cu no tin computer. Si bo ta haci trabou di limpieza of mantencion na Salon di Reino, pakico no invita un hoben pa yuda bo? Ora bo haci esey, bo ta haya chens di observa e hoben, elogi’e pa su bon trabou y lo bo mira e bon resultado cu esaki lo trece.—Prov. 15:23.

TRAHA PA FUTURO

19, 20. Dicon nos mester yuda nos rumannan progresa?

19 Ora Jehova a nombra Josue como lider di e pueblo di Israel, El a manda Moises ‘encurasha y fortalece’ Josue. (Lesa Deuteronomio 3:28.) Mas y mas hende rond mundo ta cuminsa sirbi Jehova hunto cu nos. Tur cristian madura, no solamente e ancianonan, por yuda ruman hombernan hoben y esnan recien batisa alcansa nan pleno potencial. Di e manera ey, mas ruman homber lo drenta e trabou di tempo completo y lo ta “capacita pa siña” otronan.—2 Tim. 2:2.

20 Sea cu nos ta pertenece na un congregacion of na un grupo chikito cu ta progresando pa bira un congregacion, laga nos tur traha pa futuro. Y un factor importante pa logra esaki ta: Imita Jehova, kende semper ta enfoca riba e bon cualidadnan di su sirbidornan.

^ par. 17 A cambia e nomber.