Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  June 2014

“Stima Jehova Bo Dios”

“Stima Jehova Bo Dios”

“Stima Jehova bo Dios cu henter bo curason, cu henter bo alma y cu henter bo mente.”—MAT. 22:37.

1. Pakico e amor entre Dios y su Yiu a crece?

HESUCRISTO, Yiu di Jehova, a declara: “Mi ta stima e Tata.” (Juan 14:31) Tambe el a bisa: “E Tata tin cariño pa e Yiu.” (Juan 5:20) Esey no mester sorprende nos, pasobra prome cu Hesus a bin na tera, el a traha miyones y miyones di aña cu su Tata den cielo. E tabata Dios su “trahador experto.” (Prov. 8:30) Durante e tempo ey, el a siña hopi tocante e cualidadnan di su Tata, y e amor cu nan tabatin pa otro tabata crece mas y mas.

2. (a) Kico ta amor? (b) Ki preguntanan nos lo bay contesta?

2 Amor ta entre otro un sintimento di cariño profundo pa un persona. Bijbel ta bisa nos: “Jehova tin masha cariño.” (Sant. 5:11) Como cu Dios tin e cariño ey pa nos, nos tambe mester tin e mesun cariño ey p’e. Si nos ta obedece Jehova, lo e demostra su amor na nos. (Lesa Deuteronomio 7:12, 13.) Pero con nos por stima un persona cu nos no ta mira? Kico ta nifica stima Dios? Ki motibonan nos tin pa stim’e? Y con nos por demostra nos amor p’e?

 DICON NOS POR STIMA DIOS?

3, 4. Dicon nos por stima Jehova?

3 “Dios ta un Spirito”; esey ta nifica cu nos no por mir’e. (Juan 4:24) Toch nos por stim’e, y Bijbel ta anima nos pa haci esey. Por ehempel, Moises a bisa e Israelitanan: “Stima SEÑOR bo Dios cu henter bo curason, cu henter bo alma y cu tur bo forsa.”—Deu. 6:5.

4 Dicon nos por stima Dios? Pasobra el a crea nos cu un necesidad pa ador’e y cu e capacidad pa demostra amor. Ora nos ta satisface e necesidad ey, nos amor pa Dios ta crece y esey ta haci nos feliz. Esey ta loke Hesus tabata kiermen ora el a bisa: “Feliz ta esnan cu ta consciente di nan necesidad spiritual, ya cu e Reino di cielo ta di nan.” (Mat. 5:3) Hopi hende ta di acuerdo cu di naturaleza e ser humano tin e deseo di adora Dios. E escritor A. C. Morrison a bisa: ‘E idea cu semper hende a busca Dios y kier kere den un ser supremo ta laga nos keda asombra.’—Man Does Not Stand Alone.

5. Con nos por sa cu tin sentido pa busca Dios?

5 Tin sentido pa busca Dios? Ta posibel pa hay’e? Si, pasobra e mes kier pa nos hay’e. Apostel Pablo a confirma esaki ora el a papia cu un grupo di hende den e Areopago di Atenas di antiguedad. Hopi di e hendenan ey tabata pensa cu nan mester a bay Partenon, cu tabata un tempel, pa adora e diosa Atenea. Pero Pablo a bisa nan cu nan por haya e Dios berdadero “cu a traha mundo y tur loke tin den dje” y a splica cu Dios “no ta biba den tempel cu man di hende a traha.” Pues, no ta importa unda un persona ta biba; si e busca Dios, e por hay’e. Despues, e apostel a bisa cu Dios “no ta masha leu for di cada un di nos.” (Echo. 17:24-27) Si, hende por haya Dios. Mas cu shete miyon y mei di testigo di Jehova a “hay’e” y ta stim’e di curason.

KICO TA NIFICA STIMA DIOS?

6. Kico Hesus a bisa ta “e mandamento di mas grandi y esun di prome”?

6 Nos tin cu stima Jehova di curason. Ora un fariseo a puntra Hesus cua ta e mandamento di mas grandi di Ley, Hesus a contest’e: “‘Stima Jehova bo Dios cu henter bo curason, cu henter bo alma y cu henter bo mente.’ Esaki ta e mandamento di mas grandi y esun di prome.”—Mat. 22:34-38.

7. Kico ta nifica stima Dios cu (a) ‘henter nos curason’? (b) ‘henter nos alma’? (c) ‘henter nos mente’?

7 Kico Hesus tabata kiermen ora el a bisa cu nos tin cu stima Dios cu ‘henter nos curason’? E tabata kiermen cu nos tin cu stima Jehova cu henter nos curason simbolico, loke ta inclui nos deseonan, emocionnan y sintimentonan. El a bisa tambe cu nos tin cu stim’e cu ‘henter nos alma’, es decir, cu henter nos ser: e hende cu nos ta y loke nos ta haci den nos bida. Ademas, Hesus a bisa cu nos tin cu stima Dios cu ‘henter nos mente’, esta, cu nos manera di pensa. Di e manera aki Hesus a enfatisa cu nos tin cu stima Jehova completamente y cu tur loke nos tin.

8. Si nos ta stima Jehova completamente, kico nos lo sinti nos motiva pa haci?

8 Si nos ta stima Dios cu henter nos curason, alma y mente, nos lo studia su Palabra na un manera diligente, cumpli cu su boluntad cu entusiasmo y declara e bon noticia di e Reino cu celo. (Mat. 24:14; Rom. 12:1, 2) Berdadero amor pa Jehova lo hala nos mas y mas cerca dje. (Sant. 4:8) Ta claro cu no ta posibel pa traha un lista di tur e motibonan pakico nos tin cu stima Dios. Pero laga nos analisa algun di nan.

KI MOTIBONAN NOS TIN PA STIMA JEHOVA?

9. Dicon abo ta stima Jehova?

9 Jehova ta nos Creador, y e ta duna nos tur loke nos tin mester. Pablo a bisa: “Ta  pa medio di dje nos tin bida y ta move y ta existi.” (Echo. 17:28) Jehova a duna nos e planeta precioso aki. (Sal. 115:16) Tambe e ta duna nos alimento y otro cos cu nos tin mester pa biba. Pesey Pablo por a bisa e habitantenan di Listra cu “e Dios bibo ... no a laga di duna prueba ta ken e ta, ya cu el a haci bon, dunando boso awasero for di cielo y tempo di bon cosecha, y asina a laga boso haya cuminda na abundancia y a yena boso curason cu alegria.” (Echo. 14:15-17) Esey no ta un motibo pa nos stima nos Gran Creador?—Ecl. 12:1.

10. Ora bo pensa riba kico Dios a haci pa kita pica y morto, ki sintimento esey ta duna bo?

10 Dios a percura pa un dia nos keda libra di e pica y morto cu nos a hereda for di Adam. (Rom. 5:12) Bijbel ta bisa: “Dios a demostra su amor pa nos di e manera aki: Cristo a muri pa nos mientras cu nos tabata pecador ainda.” (Rom. 5:8) Si nos arepenti di curason y demostra fe den e sacrificio di rescate di Hesus, Dios lo pordona nos picanan. Esey no ta pone nos stima Jehova mas y mas? Y nos no ta agradecido na dje cu el a manda su Yiu bin muri pa nos?—Juan 3:16.

11, 12. Ki speransa Jehova a duna nos?

11 Jehova a duna nos un speransa cu ta yena nos cu goso y paz. (Rom. 15:13) E speransa di biba pa semper ta yuda nos soporta prueba di fe. Cristiannan ungi cu muri fiel lo “haya e corona di bida” den cielo. (Rev. 2:10) E otro fiel sirbidornan di Jehova tin e speransa di biba aki riba tera y disfruta di bendicionnan eterno den Paradijs. (Luc. 23:43) Ki sintimento e promesanan aki ta duna nos? Nan no ta yena nos cu goso, paz y amor pa Esun cu ta duna nos “tur don cu ta bon y tur regalo perfecto”?—Sant. 1:17.

12 Dios a duna nos e speransa emocionante di resureccion. (Echo. 24:15) Sin duda, e morto di un ser keri ta causa hopi dolor. Pero pa motibo di e speransa di resureccion, ‘nos no ta tristo manera e hendenan cu no tin speransa.’ (1 Tes. 4:13) Jehova Dios ta anhela pa resucita e mortonan, specialmente hende cu a sirbie fielmente, manera e homber husto Job. (Job 14:15) Imagina bo e goso cu lo reina ora hende por topa bek nan sernan keri cu a resucita, y amigonan intimo por ta hunto atrobe aki riba tera! Esey no ta yena nos curason cu un gran amor pa nos Tata celestial, kende a duna nos e speransa maraviyoso di resureccion?

13. Con nos por sa cu Jehova di berdad ta interesa den nos?

13 Jehova ta interesa den nos. (Lesa Salmo 34:6, 18, 19; 1 Pedro 5:6, 7.) Nos sa cu Dios ta semper cla pa yuda hende cu ta fiel na dje; pesey nos ta sinti nos proteha como parti di ‘e carnenan cu e ta pastorea.’ (Sal. 79:13) Y loke Dios a priminti di haci den futuro ta confirma mas ainda e amor cu e tin pa nos. Pa medio di Hesucristo, Rey di e Reino di Dios, lo e caba cu tur maldad y opresion for di riba tera, y hende obediente lo disfruta di paz y prosperidad permanente. (Sal. 72:7, 12-14, 16) Bo no ta haya cu e promesanan aki ta motiva nos pa stima Jehova cu henter nos curason, alma, forsa y mente?—Luc. 10:27.

14. Ki gran privilegio Dios a duna nos?

14 Jehova a duna nos e gran privilegio di por sirbi como su Testigonan. (Isa. 43:10-12) Nos ta stima Dios pasobra el a duna nos e oportunidad di apoya su Reino y pa hiba un mensahe di consuelo pa tur hende cu ta sufri den e mundo yen di problema aki. Nos por papia cu fe y conviccion, pasobra nos mensahe ta basa riba e Palabra di e Dios berdadero, kende semper ta cumpli cu loke e priminti. (Lesa Josue 21:45; 23:14.) Manera nos por mira anto,  nos tin hopi motibo pa stima Jehova. Pero con nos por demostra nos amor p’e?

CON NOS POR DEMOSTRA NOS AMOR PA DIOS?

15. Con estudio y aplicacion di e Palabra di Dios por yuda nos?

15 Studia e Palabra di Dios regularmente y pon’e na practica. Ora nos ta haci esaki, nos ta demostra cu nos ta stima Jehova y cu nos kier pa su palabra ta un ‘luz pa nos caminda.’ (Sal. 119:105) Si nos ta pasando den un situacion dificil, e siguiente expresionnan lo duna nos un gran consuelo: “Un curason arepenti y kibra, o Dios, bo no ta desprecia.” “Bo misericordia, o SEÑOR, lo sostene mi. Den e multitud di mi preocupacionnan den mi, bo consuelonan ta alegra mi alma.” (Sal. 51:17; 94:18, 19) Tanto Jehova como Hesus ta mustra compasion pa hende cu ta sufri. (Isa. 49:13; Mat. 15:32) Ora nos ta studia Bijbel, nos por mira cla cuanto interes amoroso Jehova tin den nos. Anto esey ta motiva nos pa nos demostra nos amor profundo p’e.

16. Con oracion regular por pone nos amor pa Dios crece?

16 Haci oracion regularmente. Nos oracionnan ta hala nos mas y mas cerca Esun “cu ta scucha oracion.” (Sal. 65:2) Ora nos mira con Dios ta contesta nos oracionnan, nos amor p’e ta crece. Por ehempel, kisas nos mes por a comproba cu e no ta laga nos pasa den tentacion cu nos no por soporta. (1 Cor. 10:13) Kisas den momentonan di angustia nos a suplica Jehova p’e yuda nos, anto nos a sinti con “e paz [incomparabel] di Dios” a proteha nos curason. (Flp. 4:6, 7) Kisas na varios ocasion nos a haci un oracion den silencio, manera esun cu Nehemias a haci, y a ripara despues con Jehova a contesta nos. (Neh. 2:1-6) Segun cu nos ta “persevera den oracion” y mira con Jehova ta contesta nos peticionnan, nos amor p’e ta crece y nos confianza cu lo e yuda nos sigui enfrenta mas prueba di fe tambe ta crece.—Rom. 12:12.

17. Si nos ta stima Dios, con nos lo mira asistencia na reunion?

17 Asisti sin falta na reunion di congregacion, asamblea- y congresonan. (Heb.  10:24, 25) E Israelitanan tabata bin hunto pa scucha y siña tocante Jehova pa nan por a ador’e cu respet profundo y obedece su Ley. (Deu. 31:12) Si di berdad nos ta stima Jehova, lo no ta dificil pa cumpli cu su boluntad. (Lesa 1 Juan 5:3.) Pesey, laga nos haci tur loke ta posibel pa asisti na tur nos reunionnan. Nos no kier pa nada pone nos perde e amor cu nos tabatin na principio, ora nos a conoce Jehova.—Rev. 2:4.

18. Kico amor pa Dios ta motiva nos pa haci?

18 Predica cu entusiasmo tocante “e berdad cu ta pertenece na e bon noticia.” (Gal. 2:5) Nos amor pa Dios ta motiva nos pa papia cu otro hende tocante e Reino di Dios. Su yiu stima, kende lo ta Rey di e Reino ey, lo ‘sali bay bringa victoriosamente pa causa di berdad y husticia’ na Armagedon. (Sal. 45:4; Rev. 16:14, 16) E echo cu nos por yuda hende siña tocante e amor di Dios y e mundo nobo cu el a priminti y haci discipel ta duna nos un gran alegria!—Mat. 28:19, 20.

19. Pakico nos mester gradici Jehova pa e ancianonan di congregacion?

19 Mustra gratitud pa e ancianonan di congregacion. (Echo. 20:28) Jehova tin nos bienestar na pecho; pesey el a duna nos anciano. E hombernan aki ta “manera un refugio contra biento, y un proteccion contra tempestad, manera coridanan di awa den un tera seco, manera sombra di un baranca masha grandi mes den un tera cu tin sed di awa.” (Isa. 32:1, 2) Pensa con contento nos lo keda ora nos haya un luga di sconde pa un biento fuerte of sombra di un baranca na momento cu nos ta den higra di solo. E comparacionnan aki ta yuda nos mira con e ancianonan ta yuda nos y anima nos den sentido spiritual ora nos ta pasa den problema. Si nos ta obedece e ‘regalonan aki den forma di hende’, nos ta mustra con agradecido nos ta y nos ta duna prueba di e amor cu nos tin pa Dios y pa Cristo, e Cabes di e congregacion cristian.—Efe. 4:8; 5:23; Heb. 13:17.

Jehova a duna nos wardadornan cu ta mustra interes sincero den e tou (Wak paragraf 19)

LAGA NOS AMOR PA DIOS SIGUI CRECE

20. Si nos ta stima Dios, con nos lo cumpli cu e palabranan di Santiago 1:22-25?

20 Si nos tin un relacion estrecho cu Jehova, nos lo ta ‘hende cu ta cumpli cu e palabra y no un cu ta tend’e so.’ (Lesa Santiago 1:22-25.) Un hende cu ta “cumpli” cu e palabra tin e fe cu ta motiv’e na accion; por ehempel, e ta predica e bon noticia cu entusiasmo y participa den e reunionnan. Nos ta stima Dios di curason y pesey nos ta obedece su ‘ley perfecto’, cu ta abarca tur loke e ta rekeri di nos.—Sal. 19:7-11.

21. Cu kico nos por compara nos oracionnan?

21 Amor pa Jehova ta motiva nos pa acudi na dje den oracion tur ora bay. Den Israel di antiguedad, tur dia e sacerdotenan tabatin cu kima sencia pa Jehova. Y ta interesante cu Rey David a compara su oracionnan cu e sencia aki ora el a canta: “Laga mi oracion wordo poni bo dilanti manera sencia; e halsamento di mi mannan manera e sacrificio di atardi.” (Sal. 141:2; Exo. 30:7, 8) Jehova a scucha e oracionnan di David. Si nos ta haci oracion den un forma humilde, sincero y agradecido, nos oracionnan tambe lo ta manera sencia y lo agrada Jehova.—Rev. 5:8.

22. Kico nos lo mira den e siguiente articulo?

22 Hesus a bisa cu nos tin cu stima Dios, pero el a bisa tambe cu nos tin cu stima nos prohimo. (Mat. 22:37-39) Manera nos lo bay mira den e siguiente articulo, ora nos ta stima Jehova y su principionan, ta bira mas facil pa nos stima nos prohimo tambe.