Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  June 2014

Pregunta di Lector

Pregunta di Lector

Cristiannan tin mag di crema nan difunto?

Bijbel no tin nada contra di cremacion.

Algun relato biblico ta mustra cu hende a yega di kima curpa of weso di hende morto. (Jos. 7:25; 2 Cro. 34:4, 5) Esey kisas tabata un indicacion cu e hendenan ey no a merece un entiero digno. Pero no ta pa e motibo ey so nan tabata crema cadaver.

Nos por compronde esey for di e relato tocante e morto di Rey Saul y su tres yiu hombernan. Tur cuater a muri den guera contra e Filisteonan. Un di e yiunan ey tabata Jonatan, amigo leal di David. Ora algun Israelita balente cu tabata biba na Jabes-galaad a tende loke a pasa, nan a bay busca e cuater cadavernan, kima nan y dera e wesonan. Despues, David a elogia e Israelitanan ey pa loke nan a haci.—1 Sam. 31:2, 8-13; 2 Sam. 2:4-6.

E speransa di Bijbel pa hende morto ta resureccion, esta, cu Dios ta restaura e persona bek na bida. Sea cu su cadaver a ser crema of no, esey no ta stroba Jehova di resucita e persona cu un curpa nobo. Pensa riba e tres Hebreonan fiel cu a enfrenta morto den un forno di candela, riba ordo di Rey Nabucodonosor. Nan no tabatin nodo di tin miedo cu Dios lo no por a resucita nan si acaso nan curpa a caba na nada den e candela. (Dan. 3:16-18) Mescos ta conta tambe pa e cristiannan fiel cu a muri y ser crema den camponan di concentracion Nazi. Ademas, tin varios sirbidor leal di Dios cu a perde nan bida den explosionnan of otro accidentenan sin cu a keda lastro di nan curpa atras. Toch nan resureccion ta garantisa.—Rev. 20:13.

Pa Jehova resucita un hende, e no tin nodo di form’e bek uzando restonan di e curpa cu e hende tabatin. Prueba di esey ta resureccion di cristiannan ungi pa bida celestial. Mescos cu Hesus, kende “a haya bida bek den spirito”, cristiannan ungi tambe ta ser resucita como e mesun persona, pero cu un curpa spiritual. Nan no ta bay cielo cu ningun parti di nan curpa fisico.—1 Ped. 3:18; 1 Cor. 15:42-53; 1 Juan 3:2.

Nos speransa den e resureccion no ta basa riba kico lo pasa cu nos curpa despues di morto sino riba fe den e capacidad y deseo di Dios pa cumpli cu su promesanan. (Echo. 24:15) Kisas nos no ta compronde completamente con Dios a haci e milager di resureccion den pasado of con lo e haci esey den futuro. Sinembargo, nos ta pone nos confianza den Jehova, kende a duna nos “un garantia” ora el a resucita Hesus.—Echo. 17:31; Luc. 24:2, 3.

Ora cristiannan tin cu dicidi kico pa haci cu e curpa di nan difunto, ta bon pa nan tene cuenta cu custumbernan local, sintimento di hende y tambe e rekisitonan legal. (2 Cor. 6:3, 4) Ta keda na e persona mes of su famia pa dicidi si mester crema su curpa despues cu e fayece of no.