Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  May 2014

Con Nos Mester “Contesta Cada Persona”?

Con Nos Mester “Contesta Cada Persona”?

“Laga boso palabranan semper ta cu gracia, sasona cu salo, pa boso por sa con boso mester contesta cada persona.”—COL. 4:6.

1, 2. (a) Relata un experencia cu ta mustra e balor di haci pregunta bon pensa. (Wak e prome plachi.) (b) Dicon nos no mester tin miedo di papia tocante topiconan dificil?

ALGUN aña pasa, un ruman muher tabatin un combersacion tocante Bijbel cu su casa kende no tabata testigo di Jehova. Durante nan combersacion, e esposo a bisa cu e ta kere den e doctrina di Trinidad. Realisando cu su esposo no tabata compronde bon kico e doctrina ey ta encera, cu tacto nos ruman a puntra su esposo: “Bo ta kere cu Dios ta Dios, cu Hesus ta Dios y cu spirito santo tambe ta Dios y cu nan tres ta forma un Dios?” Sorprendi, e esposo a contesta: “No. Mi no ta kere esey!” Despues di esey, a sigui un combersacion ameno tocante ken Dios ta realmente.

2 Kico nos ta siña for di e experencia aki? Di prome, si nos ta uza tacto y ta haci preguntanan bon pensa, nos por haya bon resultado. Di dos, nos no mester tin miedo di papia tocante topiconan dificil manera Trinidad, fierno di candela of e existencia di un Creador. Dicon no? Pasobra si nos ta depende riba Jehova y ta haci bon uzo di loke e ta siña nos, nos por  duna contesta convencente cu ta alcansa curason di nos oyentenan. (Col. 4:6) Den e articulo aki, nos lo trata tres metodo cu lo yuda nos pa ta mas eficaz den nos manera di siña hende. Nos lo mira (1) con pa haci pregunta cu ta anima un persona pa expresa su mes, (2) con pa rasona riba loke Bijbel ta bisa y (3) con pa uza ilustracion pa haci e punto cu nos ta trata mas cla.

HACI PREGUNTA CU TA ANIMA BO OYENTENAN PA EXPRESA NAN MES

3, 4. Dicon ta importante pa nos haci pregunta pa saca afo kico un persona ta kere? Duna un ehempel.

3 Pregunta por yuda nos saca afo kico un persona ta kere. Dicon esey ta importante? Proverbionan 18:13 ta bisa: “Esun cu responde prome cu e scucha, esey ta bobedad y berguensa p’e.” Si, ta mihor nos purba di saca afo prome kico e persona cu nos ta papia cu ne ta kere pa no sosode cu nos ta tuma hopi tempo pa refuta un siñansa cu e persona no ta ni kere den dje!—1 Cor. 9:26.

4 Supone cu nos ta papiando tocante fierno cu un persona. No ta tur hende ta kere cu fierno ta un luga literal caminda hende ta ser tormenta den candela. Pesey, kisas nos por bisa algo manera: “Hende tin varios idea tocante fierno. Mi por sa kico abo ta pensa di fierno?” Despues cu nos scucha e persona su contesta, nos lo ta den mihor posicion pa yud’e compronde loke Bijbel ta bisa tocante e topico ey.

5. Pakico nos tin cu haci pregunta pa sa dicon un persona ta kere loke e ta kere?

5 Ora nos ta haci pregunta cu tacto, nos por haya sa tambe dicon un persona ta kere loke e ta kere. Por ehempel, kico nos por haci si un persona den sirbishi bisa nos cu e no ta kere den Dios? Kisas, facilmente nos por asumi cu e persona ey ta kere den evolucion. (Sal. 10:4) Sinembargo, tin hende cu a stop di kere den Dios pa motibo di sufrimento cu nan of otronan a pasa aden. Nan tin problema pa kere cu un Creador amoroso ta permiti asina tanto sufrimento. Pesey, si un doño di cas bisa nos cu e no ta kere den Dios, ta bon pa nos puntr’e: “Ta semper bo tabata pensa asina?” Si e persona bisa “no”, nos por puntr’e si tin algo cu a pon’e cuminsa duda cu Dios ta existi. Su contesta por yuda nos determina con ta e mihor manera pa yud’e.—Lesa Proverbionan 20:5.

6. Kico nos mester haci despues di a haci un persona un pregunta?

6 Despues cu nos haci un pregunta, ta importante pa nos scucha e persona su contesta y lag’e sa cu nos ta respeta su sintimentonan. Por ehempel, supone cu un persona bisa nos cu ta un tragedia a pon’e cuminsa duda cu ta existi un Creador amoroso. Prome cu nos cuminsa splic’e dicon nos ta kere cu Dios ta existi, ta bon pa nos lag’e sa cu nos ta compronde dicon e ta pensa asina y cu no ta malo pa puntra dicon nos ta sufri. (Hab. 1:2, 3) Nos pasenshi y amor por lanta su curiosidad pa sa mas. *

RASONA RIBA LOKE BIJBEL TA BISA

Kico nos tin cu haci pa nos por tin bon resultado den sirbishi? (Wak paragraf 7)

7. Kico nos mester haci si nos kier tin bon resultado den sirbishi?

7 Laga nos wak awor con nos por rasona riba loke Bijbel ta bisa. Bijbel ta e herment principal cu nos ta uza den sirbishi y cu su yudansa nos por ta “plenamente competente, completamente prepara pa tur bon obra.” (2 Tim. 3:16, 17) Pero pa nos por tin bon resultado den sirbishi, nos tin cu haci mas cu djis lesa texto; nos tin  cu rasona a base di e textonan cu nos ta lesa y splica nan. (Lesa Echonan 17:2, 3.) Pa ilustra esaki, laga nos trata tres ehempel.

8, 9. (a) Con nos por rasona cu un persona cu ta kere cu Hesus ta igual cu Dios? (b) Con abo a yuda hende rasona riba e topico aki?

8 Ehempel 1: Den sirbishi, nos ta topa un persona cu ta kere cu Hesus ta igual cu Dios. Ki texto di Bijbel nos por uza pa rasona riba e topico aki? Wel, nos por pidi e persona pa lesa Juan 6:38, caminda Hesus a bisa: “Mi no a baha for di cielo pa haci mi boluntad, ma pa haci boluntad di esun cu a manda mi.” Despues di a lesa e texto, nos por puntra e persona: “Si Hesus mes ta Dios, ta ken a dun’e e mandato pa baha for di cielo? Lo no ta un Persona cu ta mas cu Hesus? Pa un persona por manda un otro haci algo, e mester tin mas autoridad cu esun cu el a manda, no ta berdad?”

9 Nos por lesa Filipensenan 2:9 tambe; eynan, apostel Pablo ta describi loke Dios a haci despues cu Hesus a muri y a ser resucita. E versiculo ey ta bisa: “Dios a hals’e [esta, Hesus] na un puesto mas halto y bondadosamente a dun’e e nomber cu ta riba tur otro nomber.” Pa yuda e persona rasona riba e texto ey, nos por puntr’e: “Si Hesus tabata igual cu Dios prome cu el a muri y Dios a hals’e despues na un posicion mas halto, esey no ta nifica cu Hesus lo a haya un posicion mas halto cu Dios? Pero, por tin un persona mas halto cu Dios?” Si e persona cu nos ta papia cu ne ta sincero y ta respeta e Palabra di Dios, e manera di rasona aki lo motiv’e pa analisa e topico mas aleu.—Echo. 17:11.

10. (a) Con nos por rasona cu un persona cu ta kere den fierno di candela? (b) Con abo a yuda hende rasona riba e topico aki?

10 Ehempel 2: Un doño di cas hopi religioso tin problema pa kere cu hende malbado lo no ser tormenta pa semper den fierno di candela. Kisas e ta kere den fierno di candela pasobra e kier pa hende malbado haya castigo pa nan mal echonan. Con nos lo por rasona cu un persona cu ta pensa asina? Prome, nos por sigur’e cu e malbadonan lo haya nan castigo. (2 Tes. 1:9) Despues, nos por lag’e lesa Genesis 2:16 y 17, cu ta mustra cu e castigo pa pica ta morto. Y nos por bis’e tambe cu Dios no a bisa cu hende lo haya castigo den fierno di candela. Despues, nos por lesa Genesis 3:19 cu ta mustra cu e castigo pa Adam tabata cu lo el a bolbe na stof. Anto nos lo por puntra e doño di cas: “Bo ta kere cu lo tabata husto pa bisa Adam cu lo el a bolbe na stof siendo cu ta den fierno  di candela lo el a bay?” E pregunta ey por yuda un persona sincero pensa mas aleu riba e topico aki.

11. (a) Con nos por rasona cu un persona cu ta kere cu tur bon hende ta bay cielo? (b) Con abo a yega di rasona cu un hende riba e topico aki?

11 Ehempel 3: Den sirbishi, nos ta topa un persona cu ta kere cu tur bon hende ta bay cielo. E creencia ey por tin influencia riba e manera cu e doño di cas ta compronde Bijbel. Por ehempel, supone cu nos ta lesa Revelacion 21:4. (Les’e.) E persona ey por asumi cu e texto aki ta papia di bida den cielo. Con nos lo por rasona cu ne? En bes di lesa mas texto di Bijbel, nos lo por hala su atencion riba algo cu e texto ey mes ta bisa, esta, cu “lo no tin morto mas.” Nos lo por puntr’e: “Bo ta di acuerdo cu pa Bijbel bisa cu ‘lo no tin morto mas’, morto lo mester tabata existi prome?” Probablemente lo e bay di acuerdo cu nos. Despues, nos lo por hala su atencion na e echo cu nunca no tabatin morto den cielo y cu ta aki riba Tera so hende sa muri. Ta logico anto cu Revelacion 21:4 mester ta referi na e futuro bendicionnan cu lo tin aki riba Tera.—Sal. 37:29.

UZA ILUSTRACION PA HACI UN PUNTO MAS CLA

12. Dicon Hesus a uza ilustracion?

12 Ademas di uza pregunta, Hesus a uza ilustracion durante su trabou di predica. (Lesa Mateo 13:34, 35.) E ilustracionnan aki a yuda revela si su oyentenan tabata sincero of no. (Mat. 13:10-15) Ademas, Hesus su ilustracionnan a pone cu hende tabata scuch’e cu smaak y a keda corda loke e tabata siña nan. Con nos por uza ilustracion ora nos ta siña hende?

13. Ki ilustracion nos por uza pa mustra cu Dios tin mas autoridad cu Hesus?

13 Hopi bes, ilustracionnan simpel ta duna mihor resultado. Por ehempel, pa splica cu Dios ta mas cu Hesus kisas nos por uza e siguiente ilustracion: Nos por mustra e doño di cas cu tanto Dios como Hesus a compara nan relacion cu e relacion entre un tata y un yiu. (Luc. 3:21, 22; Juan 14:28) Despues, nos por puntr’e: “Si bo kier a convence mi cu dos persona ta igual, ki relacion di famia lo bo a uza pa ilustra e punto ey?” Kisas e persona lo bisa e relacion cu tin entre dos ruman of hasta un morocho. Si e contesta asina, nos por bis’e cu esey ta un bon ilustracion. Despues, nos lo por puntr’e: “Si ami cu bo por a pensa mesora riba e ilustracion aki, bo no ta kere cu Hesus—e Gran Maestro—tambe lo por a hacie? Pero, e no a uza e relacion entre dos ruman; Hesus a papia di Dios como su Tata. Di e manera ey, Hesus a yuda nos compronde bon cla cu Dios tabat’ey prome cu ne y cu Dios tin mas autoridad cu ne.”

14. Ki ilustracion nos por uza pa mustra cu no ta logico pa pensa cu Dios ta laga Diabel tormenta hende den fierno di candela?

14 Ata aki un otro ehempel: Algun hende ta kere cu Satanas tin fierno di candela na su encargo. Con nos por yuda un mayor compronde cu lo no ta logico pa pensa cu Dios ta laga Diabel tormenta hende den fierno di candela? Nos por rasona cu ne asin’aki: “Imagina bo cu bo yiu a bira hopi rebelde y ta haci hopi cos malo. Kico lo bo haci?” Probablemente e mayor lo bisa cu lo e corigi su yiu. Y kisas bes tras bes, lo e purba di yuda su yiu p’e stop di haci loke ta malo. (Prov. 22:15) E ora ey, nos por puntra e mayor: “Kico lo bo haci si bo yiu no kier stop di haci malo?” Mayoria di mayor lo bisa cu e ora ey si nan lo tin cu straf nan yiu. Despues, nos lo por puntra e mayor: “Con lo bo sinti si bo haya sa cu ta un persona malbado a influencia bo yiu y  pone cu e ta haci malo?” Sin duda e mayor lo no keda contento cu e persona ey. Finalmente, pa haci e punto di e ilustracion cla, nos lo por puntra e mayor: “Sabiendo cu ta e persona malbado ey a influencia bo yiu, lo bo pidi e mes pa straf bo yiu?” Ta claro cu su contesta lo ta no. Pues, ta bisto anto cu no ta logico pa pensa cu Dios lo uza Satanas e Diabel pa castiga e personanan cu Diabel mes a influencia pa haci loke ta malo.

SEA BALANSA

15, 16. (a) Dicon nos no mester spera cu tur hende cu nos predica na dje lo acepta e mensahe di Reino? (b) Nos mester ta un super bon maestro pa nos por tin exito den sirbishi? Splica. (Wak tambe e cuadro “ Un Serie Cu Ta Yuda Nos Duna Contesta.”)

15 Nos ta consciente cu no ta tur hende cu nos predica na dje lo acepta e mensahe di Reino. (Mat. 10:11-14) Esey ta asina hasta si nos haci e preguntanan corecto y uza e mihor rasonamento y ilustracionnan cu tin. Corda cu ta algun hende so a acepta e siñansanan di Hesus, e mihor Maestro cu a yega di biba riba Tera!—Juan 6:66; 7:45-48.

16 Di otro banda, hasta si nos ta sinti cu nos no ta un super bon maestro, nos por tin bon resultado den sirbishi. (Lesa Echonan 4:13.) Dios su Palabra ta duna nos bon motibo pa kere cu ‘tur esnan cu ta dispuesto pa acepta e berdad cu ta hiba na bida eterno’ lo acepta e bon noticia. (Echo. 13:48) Pesey, laga nos desaroya y keda cu un punto di bista balansa. Nos mester haci nos best pa mehora nos metodonan di siña hende, pero nos no mester sinti nos desanima ora hende rechasa e mensahe di Reino. Si nos ta depende riba Jehova y ta probecha plenamente di e entrenamento cu e ta percura pa nos, nos lo bira mihor maestro y esaki lo beneficia tanto nos como e personanan cu ta scucha nos. (1 Tim. 4:16) Si, Jehova por yuda nos “contesta cada persona.” Y manera e siguiente articulo ta mustra, si nos ta trata hende manera nos kier pa nan trata nos, nos lo tin exito den sirbishi.

^ par. 6 Wak e articulo “¿Hay razones para creer en Dios?” den La Atalaya di 1 di october 2009.