Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  May 2014

Bo Ta Canando Pareu cu e Organisacion di Jehova?

Bo Ta Canando Pareu cu e Organisacion di Jehova?

“Jehova su wowo ta riba e hustonan.”—1 PED. 3:12.

1. Cua organisacion a reemplasa Israel apostata? (Wak e prome plachi.)

JEHOVA ta esun cu a establece e congregacion cristian den prome siglo y ta e mes tambe a restaura adoracion berdadero den nos tempo. Manera e articulo anterior a mustra, e congregacion cristian a reemplasa e nacion di Israel cu a bira apostata. E organisacion nobo aki, cu a consisti di Cristo su prome siguidornan, a bira e organisacion cu mester a carga Dios su nomber. Si, nan a representa Jehova riba Tera. Y como cu e organisacion nobo aki tabatin Jehova su aprobacion, e no a ser destrui na aña 70 di prome siglo ora cu Jerusalem a ser destrui. (Luc. 21:20, 21) Den e ultimo dianan aki, lo ta mescos. E organisacion di Jehova lo no ser destrui ora e mundo di Satanas ser elimina pa semper. (2 Tim. 3:1) Con nos por ta sigur di esaki?

2. Kico Hesus a bisa tocante e “tribulacion grandi”, y con esaki lo cuminsa?

2 Relaciona cu e conclusion di e era aki, Hesus a profetisa: “Lo tin un tribulacion grandi manera no a yega di sosode nunca, for di principio di mundo te awor, y cu lo no sosode  nunca mas tampoco.” (Mat. 24:3, 21) E tribulacion aki lo cuminsa ora Jehova uza podernan politico pa destrui “Babilonia e Grandi”, e imperio mundial di religion falso. (Rev. 17:3-5, 16) Kico lo sosode despues?

UN ATAKE DI SATANAS TA HIBA NA ARMAGEDON

3. Kico lo pasa cu e pueblo di Jehova despues cu religion falso ser destrui?

3 Despues cu religion falso ser destrui, Satanas y su mundo lo ataca Jehova su sirbidornan. Relaciona cu “Gog di tera di Magog”, Bijbel ta bisa: “Lo bo subi bin manera un tempestad. Lo bo ta manera un nubia cu ta tapa e Tera, abo cu tur bo trupanan y hopi pueblo hunto cu bo.” Como cu Jehova su sirbidornan no tin ehercito militar y ta e hendenan mas pacifico na mundo, nan lo parce di ta un blanco facil. Pero e atake ey lo ta un fayo grave.—Eze. 38:1, 2, 9-12.

4, 5. Con Jehova lo reacciona ora Satanas y su compinchinan ataca Su pueblo?

4 Con Jehova lo reacciona ora Satanas y su compinchinan ataca Su pueblo? E Soberano di Universo lo sali mesora na nan defensa, pasobra Jehova ta considera e atake ey como un atake contra su persona. (Lesa Zacarias 2:8.) Pesey, mesora nos Tata celestial lo dal paso pa rescata nos, y lo e destrui e mundo di Satanas na Armagedon, “e guera cu lo tuma luga riba e gran dia di Dios, e Todopoderoso.”—Rev. 16:14, 16.

5 Profeta Jeremias a bisa cu Jehova mes lo bringa contra e nacionnan na Armagedon. El a bisa: “‘[SEÑOR] ta drenta den huicio cu tur carni; pa loke ta e malbadonan, el a entrega nan na spada’, SEÑOR ta declara. Asina e SEÑOR di ehercitonan ta bisa: ‘Ata, maldad ta bay di nacion pa nacion, y un gran tempestad lo wordo lanta for di e partinan mas aleha di mundo. Y esnan cu SEÑOR mata riba e dia ey lo keda benta tur caminda, for di esun extremo di mundo te na e otro. Hende lo no lamenta pa nan ni recoge nan, ni dera nan; nan lo ta manera mest riba superficie di Tera.’” (Jer. 25:31-33) Si, Armagedon lo pone un fin na e mundo di Satanas, pero e parti terenal di Jehova su organisacion si lo sobrevivi.

DICON E ORGANISACION DI JEHOVA TA SIGUI CRECE?

6, 7. (a) Di unda e hendenan cu ta forma e “multitud grandi” ta bin? (b) Ki aumento tabatin e ultimo añanan?

6 Awe, e parti terenal di Jehova su organisacion ta sigui crece pasobra e ta abunda cu hende cu tin Jehova su aprobacion. Bijbel ta sigura nos cu “Jehova su wowo ta riba e hustonan, y [cu] su horea ta habri pa nan suplica.” (1 Ped. 3:12) Entre e hustonan tin “un multitud grandi” di hende cu lo “sobrevivi e tribulacion grandi.” (Rev. 7:9, 14) E sobrevivientenan aki no ta djis “un multitud” pero “un multitud grandi”, pues un cantidad inmenso di hende. Bo ta mira bo mes entre e sobrevivientenan di “e tribulacion grandi”?

7 Awor, di unda e hendenan cu ta forma e multitud grandi ta bin? Hesus a profetisa: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.” (Mat. 24:14) Pues, nan ta bin di rond parti di mundo; nan ta ser reuni pa medio di e trabou di predica, e trabou principal di e organisacion di Dios. Debi na e trabou mundial aki, miyones di hende a siña adora Dios “cu spirito y  cu berdad.” (Juan 4:23, 24) Por ehempel, durante e añanan di sirbishi di 2003 pa 2012, mas cu 2.707.000 hende a batisa pa simbolisa nan dedicacion na Dios. Aworaki tin mas cu 7.900.000 testigo di Jehova rond mundo. Y tin miyones di hende mas ta asocia cu nos, specialmente durante Memorial, e conmemoracion anual di e morto di Hesus. Nos no ta blof cu e cifranan aki, pasobra ta Dios ta pone cu su organisacion ta sigui crece. (1 Cor. 3:5-7) Sinembargo, nos ta hopi contento cu tur aña e multitud grandi ta bira mas y mas grandi.

8. Dicon e organisacion di Jehova ta sigui crece considerablemente?

8 E cantidad di sirbidor di Jehova ta aumenta considerablemente pasobra ta Jehova mes ta sostene su Testigonan. (Lesa Isaias 43:10-12.) Isaias a papia di e aumento aki ora el a profetisa: ‘Esun di mas chikito lo bira un tribu, y esun di mas menos lo bira un nacion poderoso. Na su debido tempo, SEÑOR lo pura haci esaki.’ (Isa. 60:22) Un tempo, e resto di cristiannan ungi, “e Israel di Dios”, tabata “esun di mas chikito”, pero Jehova a bendiciona nan trabou di predica. Nan a sigui aumenta segun cu mas ruman ungi tabata bin den e organisacion di Jehova. (Gal. 6:16) Y a traves di añanan, miyones di hende ta acepta e berdad y bira parti di e multitud grandi.

LOKE JEHOVA TA REKERI DI NOS

9. Kico nos mester haci si nos kier disfruta di e maraviyoso futuro cu Jehova a priminti nos?

9 Sea cu nos ta cristian ungi of ta forma parti di e multitud grandi, nos tur por disfruta di e maraviyoso futuro cu Dios a priminti. Pero pa nos por logra esey, nos mester cumpli cu e rekisitonan di Jehova. (Isa. 48:17, 18) Tuma por ehempel e Israelitanan. Jehova su boluntad tabata pa nan obedece e Ley di Moises. E ley ey lo a proteha nan y siña nan entre otro con pa logra un bida di famia feliz, haya berdadero amigo, haci negoshi na un manera honesto y trata otro hende cu bondad. (Exo. 20:14; Lev. 19:18, 35-37; Deu. 6:6-9) Awe ta mescos. Jehova su rekisitonan ta beneficia nos tur, y nan no ta dificil pa cumpli cu ne. (Lesa 1 Juan 5:3.) Si nos ta biba na harmonia cu Dios su mandamentonan y su principionan, nos lo ta feliz y, mas importante ainda, nos lo tin “un fe firme.”—Tito 1:13.

10. Dicon nos mester aparta tempo pa studia Bijbel y tene nos Adoracion Como Famia tur siman?

10 E parti terenal di Jehova su organisacion ta progresando den varios aspecto. Por ehempel, nos comprondemento di berdadnan biblico ta bira mas y mas cla. Y esaki ta loke Bijbel ta priminti, pasobra e ta bisa cu “e berea di e husto ta manera luz di aurora, cu ta briya mas y mas te ora cu bira di dia cla.” (Prov. 4:18) Pero kico di cada un di nos? Nos mester puntra nos mes: ‘Mi ta keda al dia cu splicacionnan nobo di berdadnan biblico? Mi tin custumber di lesa e Palabra di Dios tur dia? Mi ta lesa tur nos publicacionnan nobo? Ami cu mi sernan keri tin un anochi di Adoracion Como Famia?’ Mayoria di nos ta di acuerdo cu e cosnan aki no ta dificil pa haci. Hopi bes ta un cuestion di aparta tempo pa haci nan. Y specialmente awor cu e tribulacion grandi ta yegando mas y mas cerca, ta hopi importante pa nos sigui studia e Palabra di Dios, aplic’e den nos bida y sigui progresa spiritualmente.

11. Dicon e pueblo di Jehova ta bay nan reunion-, asamblea- y congresonan?

 11 E organisacion di Jehova ta anima nos pa sigui e conseho aki di Pablo: “Laga nos presta atencion na otro pa nos por stimula otro pa mustra amor y haci bon obra, y no keda sin bay e reunionnan, manera algun a tuma pa custumber, sino mas bien anima otro, y mucho mas ainda cu boso ta mira e dia ta yega cerca.” (Heb. 10:24, 25) Den Israel di antiguedad, e Israelitanan tabata reuni regularmente pa adora Jehova y pa ricibi su instruccion. Un di e ocasionnan gososo aki tabata e Fiesta di Recogemento, of Tabernakel, cu e Israelitanan tabata celebra den tempo di Nehemias. (Exo. 23:15, 16; Neh. 8:9-18) Awe, nos tambe tin nos reunionnan, asamblea- y congresonan. Nos mester haci nos maximo esfuerso pa asisti na tur e ocasionnan aki pasobra nan ta yuda nos mantene un bon relacion cu Jehova y keda gososo den nos sirbishi na dje.—Tito 2:2.

12. Con nos mester mira e trabou di predica e Reino?

12 Como miembro di e organisacion di Jehova, ta un goso pa nos participa den “e trabou santo di declara e bon noticia di Dios.” (Rom. 15:16) Haciendo esaki, nos ta bira “compañero di trabou” di Jehova, “Esun Santo.” (1 Cor. 3:9; 1 Ped. 1:15) Y ora nos ta predica e bon noticia, nos ta santifica Dios su nomber santo. Ademas, ta un gran privilegio cu nos por predica “e glorioso bon noticia di e Dios feliz.”—1 Tim. 1:11.

13. Di kico nos bida y amistad cu Jehova ta depende?

13 Jehova kier lo mihor pa nos tur. Pesey, e kier pa nos keda pega na dje y na su organisacion. Pues, nos tin cu haci un escogencia mescos cu e Israelitanan, kendenan Moises a bisa: “Mi ta yama cielo y tera como testigo contra boso awe, cu mi a pone bida y morto boso dilanti, e bendicion y e maldicion. Pesey, scoge bida pa bo biba, abo y bo descendientenan, door di stima SEÑOR bo Dios, door di obedece su bos y door di tene duro na dje; pasobra esaki ta bo bida y e largura di bo dianan, pa bo biba na e tera cu SEÑOR a hura na bo tatanan, na Abraham, Isaak y Jacob, pa duna nan.” (Deu. 30:19, 20) Pues, laga nos scoge bida. Si, laga nos stima Jehova y semper keda leal na dje y na su organisacion.

14. Kico un ruman homber a bisa di e organisacion di Jehova?

14 Ruman Pryce Hughes, kende a haya e berdad prome cu 1914, semper a keda leal na Jehova y na Su organisacion. El a bisa cu e les di mas importante cu el a siña tabata cu e mester keda pega na Jehova su organisacion y no depende riba pensamento humano. Di e manera ey, e por a soporta prueba durante henter su bida. Ruman Hughes a bisa tambe cu e unico manera pa haya Jehova su aprobacion y bendicion ta di sigui e guia di Su organisacion.

SIGUI CANA PAREU CU DIOS SU ORGANISACION

15. Duna un ehempel biblico cu ta mustra con nos mester reacciona ora bin ahuste relaciona cu nos comprondemento di berdadnan biblico.

15 Si nos kier tin Jehova su aprobacion y bendicion, nos mester apoya su organisacion y acepta ahustenan relaciona cu nos comprondemento di e Scritura. Pa ilustra esaki, laga nos trata un ehempel biblico: Despues di Hesus su morto, miles di cristian Hudiu, kendenan tabata yen di celo pa e Ley di Moises, tabatin dificultad pa kita for di esaki. (Echo.  21:17-20) Pero apostel Pablo a corigi nan y a yuda nan compronde cu nan a ser santifica, no pa medio di sacrificionan “ofreci segun Ley” pero, “pa medio di e ofrenda di e curpa di Hesucristo un biaha y pa semper.” (Heb. 10:5-10) Hopi di e cristiannan Hudiu aki a cambia nan manera di pensa y a progresa spiritualmente. Pesey, nos tin cu studia Bijbel y nos publicacionnan diligentemente. Y ora bin ahuste relaciona cu nos comprondemento di e Palabra di Dios of nos trabou di predica, nos mester ta cla pa acepta esaki.

16. (a) Ki bendicionnan lo haci bida placentero den e mundo nobo? (b) Kico bo ta anhela di experencia den e mundo nobo?

16 Tur hende cu keda leal na Jehova y na su organisacion lo sigui disfruta di su bendicion. E rumannan ungi lo tin e gran privilegio di ta heredero hunto cu Cristo den cielo. (Rom. 8:16, 17) Y si nos tin e speransa di biba riba Tera, nos por cuminsa imagina nos mes con dushi lo ta pa biba pa semper den Paradijs. Y nos tur awe tin e placer di por conta otro hende tocante Dios su mundo nobo priminti. (2 Ped. 3:13) Salmo 37:11 ta bisa: “E humildenan lo hereda e Tera, y lo deleita nan mes den paz abundante.” Hende “lo traha cas y biba den nan” y nan lo disfruta “di e obra di nan mannan.” (Isa. 65:21, 22) Lo no tin opresion, pobreza ni hamber mas. (Sal. 72:13-16) Lo no tin religion falso mas pa gaña hende. (Rev. 18:8, 21) E mortonan lo haya resureccion y e oportunidad di biba pa semper riba Tera. (Isa. 25:8; Echo. 24:15) Esta un futuro maraviyoso ta spera e miyones di hendenan cu a dedica nan bida na Jehova! Pero pa nos por disfruta di e maraviyoso bendicionnan ey, nos mester sigui fortalece nos relacion cu Jehova y cana pareu cu su organisacion.

Bo por imagina bo mes den Paradijs? (Wak paragraf 16)

17. Ki deseo nos tur mester tin relaciona cu Jehova y su organisacion?

17 Satanas su mundo ta casi yega na su fin. Pa nos por sobrevivi, nos mester keda cu un fe firme y sigui adora Jehova lealmente hunto cu su organisacion. Nos mester tin e mesun deseo cu e salmista David, kende a canta: “Un cos mi a desea di SEÑOR, esey lo mi busca: cu mi por keda den e cas di SEÑOR tur e dianan di mi bida, pa contempla e bunitesa di SEÑOR, y pa medita den su tempel.” (Sal. 27:4) Laga nos cada un keda leal na Jehova y sigui cana pareu cu su organisacion.