Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2014

Ningun Hende No Por Sirbi Dos Doño

Ningun Hende No Por Sirbi Dos Doño

“Ningun hende no por ta esclavo di dos doño ... Boso no por ta esclavo di Dios y di Rikesa.”—MAT. 6:24.

1-3. (a) Ki problema financiero hopi famia tin awe, y con algun ta purba di soluciona esaki? (Wak e prome plachi.) (b) Si un mayor ta pensa di bay traha afo, ki preocupacion esaki por trece encuanto crianza di yiu?

“JAMES, mi casa, semper tabata bin cas bek for di trabou morto cansa, pero apenas su salario tabata yega pa cubri nos gastonan di tur dia”, Marilyn a bisa. * “Mi kier a alivia su carga y yuda cu un poco placa pa nos yiu homber Jimmy por a haya e mesun cosnan leuk cu otro mucha di su scol tabatin.” Tambe Marilyn kier a yuda su otro famianan y spaar pa futuro. Hopi di su amiganan a bay traha den otro pais pa por a gana mas placa. Pero ora e mes a pensa di dal un paso asina, e tabatin sintimentonan mixto. Dicon?

2 E idea di bay laga un famia stima atras y di no por sigui cu nan rutina di actividad spiritual tabatin Marilyn tur preocupa. Toch, na mes momento e tabata mira cu otronan a bay traha afo pa un tempo, y ta parce cu nan famia a sobrevivi den sentido spiritual. Pero el a puntra su mes con e lo por lanta Jimmy bibando leu for di dje. E lo por lanta su yiu “den e disciplina di Jehova y inculca su manera di pensa” den dje via Internet?—Efe. 6:4.

3 Marilyn a dicidi di pidi conseho. Su casa no tabata kier pa e bay afo, aunke el a bis’e cu e lo no strob’e si esey tabata su deseo. E ancianonan y algun otro ruman di su congregacion a  conseh’e pa e keda; pero varios ruman muher a anim’e pa e bay. Nan a bis’e: “Si di berdad bo ta stima bo famia, bo ta bay. Afo tambe bo por sirbi Jehova.” A pesar di su dudanan, Marilyn a despedi di James cu Jimmy y a bay na un otro pais pa busca trabou. Anto el a priminti nan cu e lo no bay pa hopi tempo.

RESPONSABILIDADNAN DI FAMIA Y PRINCIPIONAN DI BIJBEL

4. Pakico hopi hende ta bay biba afo, y ken hopi biaha ta keda na encargo di nan yiunan?

4 Claro cu Jehova no kier pa su sirbidornan biba den miseria, y den pasado su pueblo a muda bay otro caminda pa sali for di pobreza. (Sal. 37:25; Prov. 30:8) Pa evita di muri di hamber, e patriarca Jacob a manda su yiunan Egipto pa cumpra cuminda. * (Gen. 42:1, 2) Awe, mayoria di hende cu ta opta pa bay traha afo no ta bandona nan hogar pa motibo cu nan ta pasa hamber. Pero kisas nan ta yen di debe of simplemente nan ta desea pa nan famia tin un bida mas comodo. Pa logra nan metanan den un economia cu ta bay atras, hopi di nan ta bay biba leu for di nan famia, sea den nan mes pais of den un otro pais. Hopi biaha nan ta bay laga nan yiunan menor di edad na encargo di e casa cu a keda atras, un ruman mas grandi, wela cu welo, otro famia of amigo. Aunke ta duel nan pa bay laga nan casa of yiu, hopi ta bay pasobra nan ta sinti cu nan no tin otro opcion.

5, 6. (a) Kico Hesus a siña hende tocante felicidad y siguridad? (b) Kico ta e cosnan material cu Hesus a siña su siguidornan pidi p’e? (c) Con Jehova ta bendiciona nos?

5 Den tempo di Hesus tambe tabatin hopi hende pober, y kisas nan lo a pensa cu si nan tabatin mas placa, nan lo a sinti nan mas feliz y mas sigur. (Mar. 14:7) Pero Hesus no tabata kier pa hende pone nan confianza den rikesa pasahero, sino den Jehova, e Fuente di rikesa permanente. Den Hesus su Sermon Riba Sero, el a splica cu berdadero felicidad y siguridad no ta depende di cos material, ni di nos mes esfuersonan, sino di nos amistad cu nos Tata celestial.

6 Den e Oracion di Nos Tata, Hesus a siña nos pidi, no pa siguridad financiero, sino pa nos necesidadnan di tur dia, pa “nos pan di cada dia.” El a bisa su oyentenan bon cla: “Stop di montona tesoro riba tera ... Mas bien, montona tesoro den cielo.” (Mat. 6:9, 11, 19, 20) Nos por tin e confianza cu Jehova lo bendiciona nos, manera el a priminti. Su bendicion no ta djis e sensacion cu nos tin su aprobacion, sino cu di berdad e lo duna nos tur loke nos tin mester pa biba. Si, e unico manera pa nos haya berdadero felicidad y siguridad ta pa confia den nos Tata amoroso, y no den placa.—Lesa Mateo 6:24, 25, 31-34.

7. (a) Ken Jehova a encarga cu e responsabilidad di educa yiu? (b) Pakico ambos mayor mester ta envolvi den crianza di nan yiunan?

7 ‘Busca prome e husticia di Dios’ ta encera mira responsabilidadnan di famia manera Jehova ta mira nan. E Ley di Moises a bisa cu mayornan mester a educa nan yiunan den sentido spiritual, y e principio ey ta conta pa mayornan cristian tambe. (Lesa Deuteronomio 6:6, 7.) Dios a encarga mayornan cu e responsabilidad aki, no wela of welo ni ningun otro hende. Rey Salomon a declara: “Mi yiu, tende e instruccion di bo tata, y no bandona e siñansa di bo mama.” (Prov. 1:8) Jehova kier pa ambos mayor t’ey presente pa yuda guia y educa nan yiunan. (Prov. 31:10, 27, 28) Hopi di loke un yiu ta siña di su mayornan, vooral den asuntonan  spiritual, ta bin di tende nan combersa tocante Jehova dia aden dia afo y di observa con nan ta sirbie.

CONSECUENCIANAN INESPERA

8, 9. (a) Ki cambionan sa tuma luga ora un mayor ta biba leu for di su famia? (b) Ora mayornan y yiunan no ta biba hunto, con esey por perhudica e famia?

8 Prome cu hende bay traha afo y laga nan famia atras, nan ta purba di calcula e risico- y sacrificionan cu esey ta encera, pero poco di nan por premira tur e consecuencianan cu esaki ta trece cu ne. (Prov. 22:3) * Ora Marilyn a bay laga su famia, tanto e como su casa y yiu a cuminsa sufri e dolor emocional cu e separacion a causa. E tempo ey su yiu Jimmy tabata chikito ainda y tabata blo puntr’e: “Dicon Mami a bay laga mi?” Marilyn a plania pa traha afo pa un par di luna so, pero ora e lunanan a para bira añanan, el a nota cambionan den su famia cu a preocup’e. Jimmy a cuminsa cera den su mes y aleha for di dje. Cu tristeza, Marilyn a bisa: “E no tabata stima mi mas.”

9 Ora mayornan y yiunan no ta biba hunto como un famia, nan por sufri emocionalmente y perde nan balornan moral. * Mas chikito e yiunan ta y mas tanto tempo nan pasa sin nan mayornan, mas afecta nan ta keda. Marilyn a splica Jimmy cu tur e sacrificionan cu e tabata haci tabata pa Jimmy su mes bon. Pero Jimmy a sinti cu su mama a bandon’e. Na principio, e tabata sinti falta di su mama. Ma despues, ora Marilyn tabata bishita nan, e no por a soporta di mir’e. Manera sa pasa cu mucha cu ta keda atras, Jimmy a sinti cu su mama no a merece mas pa e stim’e y obedec’e.—Lesa Proverbionan 29:15.

Bo no por brasa bo yiu via Internet (Wak paragraf 10)

10. (a) Ora mayornan ta purba di compensa nan ausencia cu regalo, con esey por afecta nan yiunan? (b) Kico un yiu ta sinti falta di dje ora un mayor ta purba di cri’e for di un distancia?

10 Aunke Marilyn a purba di compensa su ausencia mandando placa y regalo, el a ripara cu e tabata alehando for di su yiu y, sin cu e tabata kier, e tabata siñ’e pa pone cos material riba balornan spiritual y lasonan familiar. (Prov. 22:6) Por ehempel, Jimmy tabata bis’e: “Mami no tin nodo di bin bek; djis sigui manda regalo.” Marilyn a cuminsa realisa cu e lo no por cria su yiu via carta, yamada di telefon of pantaya di computer. E di: “Bo no por brasa bo yiu of dun’e un sunchi prome cu e bay drumi via Internet.”

Si bo ta biba leu for di bo casa, ki peliger bo por haya bo cu ne? (Wak paragraf 11)

11. (a) Ora un pareha casa ta biba leu for di otro pa motibo di trabou, con esey ta afecta nan matrimonio? (b) Ki ora Marilyn a bin realisa cu e mester a bay bek cerca su famia?

 11 Marilyn su relacion cu Jehova y cu su casa James tambe a bay atras. Su asociacion cu su rumannan y su actividad di sirbishi a keda limita na un dia so pa siman of hasta menos, y tambe e tabatin cu resisti e intimidacion sexual di su doño di trabou. Como cu Marilyn y James no tabatin otro pa steun riba dje ora nan a haya nan cu problema, nan a hera di cay den inmoralidad sexual. Marilyn a bin realisa cu aunke e cu su casa no a comete adulterio, nan no por a sigui e instruccion di Bijbel pa satisface otro su necesidad emocional y sexual ya cu nan tabata leu for di otro. Nan no por a comparti un cos cu a bin na nan mente espontaneamente, un mirada, un sonrisa of un caricia; ni nan no por a tene otro su man, brasa otro, expresa palabranan di cariño y cumpli cu e “deber” matrimonial. (Cant. 1:2; 1 Cor. 7:3, 5) Tampoco nan no por a adora Jehova completamente hunto cu nan yiu. Marilyn a bisa: “Ora mi a siña na un congreso cu adoracion regular como famia ta vital pa sobrevivi e dia grandi di Jehova, mi a compronde cu mi mester bay cas bek. Mi mester a cuminsa traha di nobo riba mi relacion cu Jehova y mi bida di famia.”

BON CONSEHO Y MAL CONSEHO

12. Ki conseho biblico nos por duna esnan cu ta biba leu for di nan famia?

12 Ora Marilyn a tuma e decision pa bay cas bek, e reaccionnan tabata dividi. E ancianonan di su congregacion di e otro pais a elogi’e pa su fe y curashi. Pero algun otro ruman cu tambe tabata biba leu for di nan famia si no a haya esey un bon idea. En bes di sigui su ehempel, nan a purba di convenc’e pa e keda. Nan a bis’e: “Pronto lo bo ta bek. Ora bo bay, di kico bo ta bay biba?” Na luga di desanima otronan cu e tipo di comentarionan ey, cristiannan mester siña “e muhernan mas jong pa stima nan esposo, pa stima nan yiunan, pa nan ta ... ama di cas diligente”, esta, di nan mes cas, pa ‘hende no papia malo di e palabra di Dios.’—Lesa Tito 2:3-5.

13, 14. Pakico nos mester tin fe pa no sede na loke famia ta verwacht di nos? Duna un ehempel.

13 Hopi inmigrante a lanta den cultura cu ta pone tradicion y compromiso cu famia, specialmente cu mayornan, riba tur otro cos. Pa un cristian bay contra custumbernan estableci of e expectativanan di famia pa por agrada Jehova, e mester tin un fe fuerte.

14 Un ruman muher cu yama Carin a splica: “Ora mi yiu homber Don a nace, ami cu mi casa tabata traha afo, y ami a  caba di cuminsa studia Bijbel. Tur mi famianan a verwacht cu mi ta manda Don bek pa mi mayornan pa nan cri’e te ora nos tabata bon para.” Ora Carin a insisti cu e mes ta cria Don en bes di bay traha, su famianan, incluso su casa, a yam’e floho y a haci mofa di dje. Carin a bisa: “Pa ta franco, e tempo ey, mi no por a compronde completamente dicon no tabata bon pa laga Don cerca mi mayornan un par di aña. Pero un cos cu mi tabata sa ta cu Jehova a duna nos cu ta su mayornan e tarea di cri’e.” Ora Carin a bolbe sali na estado, su casa cu no tabata creyente a exigi pa e comete abortus. Pero e bon decision cu Carin a tuma anteriormente a fortalece su fe, y atrobe el a para firme y a scoge e banda di Jehova. Awe, tanto e como cu su casa y nan yiunan ta contento cu nan tur a keda hunto. Si Carin a manda un of tur su dos yiunan pa otro hende cria, e resultado lo por tabata masha diferente.

15, 16. (a) Ki experencia un ruman muher cu a crece separa di su mayornan tabatin? (b) Pakico el a dicidi di no haci mescos cu su mes yiu muher?

15 Un otro ruman muher cu yama Vicky a conta: “Pa un par di aña mi wela a cria mi, mientras cu mi ruman muher mas chikito a keda biba cerca mi mayornan. Tempo cu mi a bay bek cerca mi mayornan, mi no tabata sinti e mesun cariño mas pa nan. Mi ruman muher si tabata sinti su mes liber pa papia cu nan y pa brasa nan; y e tabata gusta pa ta den nan compania. Ami tabata sinti mi aleha for di mi mayornan, y hasta ora mi a bira grandi, mi a haya cu tabata dificil pa mustra nan mi berdadero sintimentonan. Ami cu mi ruman muher a priminti nos mayornan cu nos lo cuida nan ora nan bira grandi. Pero ami lo haci esey puramente pa motibo di deber, mientras cu mi ruman muher lo cuida nan pa motibo di amor.”

16 Vicky a bisa: “Awor mi mama kier pa mi manda mi yiu muher pa e cri’e, mescos cu el a manda mi pa su mama. Pero, na un manera fini mi a neng’e. Ami cu mi casa mes kier lanta nos yiu y siñ’e e camindanan di Jehova. Y mi no kier daña mi futuro relacion cu mi yiu muher.” Vicky a mira cu e unico caminda cu por hiba na bon resultado ta esun di pone Jehova y su principionan prome cu metanan financiero y expectativanan di famia. Hesus a bisa bon cla: “Ningun hende no por ta esclavo di dos doño”, esta, di Dios y di Rikesa.—Mat. 6:24; Exo. 23:2.

JEHOVA TA BENDICIONA NOS ESFUERSONAN

17, 18. (a) Ki alternativa cristiannan tin semper? (b) Ki preguntanan nos lo trata den e siguiente articulo?

17 Nos Tata, Jehova, a priminti di yuda nos haya tur loke nos di berdad tin mester di dje si nos pone su Reino y su husticia na prome luga den nos bida. (Mat. 6:33) Pues, cristiannan berdadero semper tin un alternativa. Maske ki prueba nos haya nos cu ne, Jehova a priminti di duna nos un “salida” cu no ta pone nos bay contra principionan di Bijbel. (Lesa 1 Corintionan 10:13.) Ora nos “warda cu pasenshi” riba Jehova, ora nos ‘confia den dje’, pidie su sabiduria y su guia, y sigui su mandamento- y principionan, e lo actua na nos fabor. (Sal. 37:5, 7) E lo bendiciona nos esfuersonan pa sirbi E como nos unico Doño. Si nos pone Jehova na prome luga, e lo percura pa cos bay bon cu nos.—Compara cu Genesis 39:3.

18 Pero awor, kico nos por haci pa drecha e daño cu un separacion a causa? Ki medidanan practico nos por tuma pa percura pa nos famia sin cu nos tin cu bay laga nan? Y con nos por anima otro hende pa nan keda cu nan famia? E siguiente articulo lo contesta e preguntanan aki.

^ par. 1 A cambia e nombernan.

^ par. 4 Ta parce cu cada bes cu e yiunan di Jacob a bay Egipto, nan no a keda mas cu tres siman for di nan famia. Y ora Jacob cu su yiu hombernan a muda bay Egipto mas despues, nan a bay cu nan casanan y nan yiunan.—Gen. 46:6, 7.

^ par. 8 Mira e articulo “E Soño- y Realidadnan di Bay Biba Afo” den e ¡Despertad! di februari 2013.

^ par. 9 Informenan di varios pais ta indica cu ora un hende ta biba leu for di su casa of yiunan pa motibo di trabou, esey por causa problemanan serio. Esakinan ta inclui adulterio, homosexualidad of incesto. Yiunan ta haya problema cu comportacion y prestacion na scol, nan ta sinti rabia, miedo, depresion of hasta tendencia pa comete suicidio.