Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2014

Imita e Fe di Moises

Imita e Fe di Moises

“Pa medio di fe Moises, ora el a bira grandi, a nenga di ser yama yiu di e yiu muher di Farao.”—HEB. 11:24.

1, 2. (a) Ki decision Moises a tuma tempo cu e tabatin 40 aña di edad? (Wak e prome plachi.) (b) Dicon Moises a scoge pa biba como un esclavo?

MOISES tabata sa kico Egipto por a ofrec’e. E tabata pertenece na e cas real y tabata conoce e mansionnan di hende rico. El a ricibi instruccion den “tur e sabiduria di e Egipcionan”, cu probablemente a inclui arte, astronomia, matematica y otro ramonan di ciencia. (Echo. 7:22) E por a yega facilmente na rikesa, poder y privilegio cu un Egipcio comun y coriente no por a ni soña cu ne!

2 A pesar di esey, tempo cu Moises tabatin 40 aña di edad, el a tuma un decision cu lo mester a sorprende e famia real di Egipto cu a adopt’e. El a bira lomba pa tur e oportunidadnan cu Egipto a brind’e. Ta manera un Egipcio comun e kier a biba? No. El a prefera di biba como un esclavo! Dicon? Pasobra Moises tabatin fe. (Lesa Hebreonan 11:24-26.) Su fe a permitie mira mas aya di loke mundo tin di ofrece. Como un homber spiritual, Moises tabatin fe den Jehova, “Esun cu ta invisibel”, y den e cumplimento di Dios su promesanan.—Heb. 11:27.

3. Cua tres pregunta e articulo aki lo contesta?

3 Nos tambe mester wak mas aya di loke nos ta mira cu nos wowonan literal. Nos mester ta “e tipo di hende cu tin fe.” (Heb. 10:38, 39) Pa nos fortalece nos fe, laga nos analisa loke Hebreonan 11:24-26 ta bisa di Moises y purba di haya contesta pa e  siguiente preguntanan: Con e fe di Moises a motiv’e pa rechasa deseonan carnal? Ora otro hende a rechas’e, con fe a yud’e balora su privilegio di sirbi Jehova? Y dicon Moises “tabatin su bista fiha riba e recompensa”?

EL A RECHASA DESEONAN CARNAL

4. Kico Moises a compronde tocante ‘e placernan di pica’?

4 Cu wowo di fe, Moises a mira cu e ‘placernan di pica’, esta, e supuesto bentahanan cu pica ta trece cu ne, ta pasahero. Kisas otro hende a rasona cu maske e Egipcionan tabata practica tur sorto di idolatria y spiritismo, toch nan nacion a crece y bira un potencia mundial, mientras cu e pueblo di Jehova tabata esclavo! Sinembargo, Moises tabata sa cu Dios por a trece un cambio den e situacion ey. Maske por a parce cu cos tabata bay bon pa esnan cu tabata biba pa placer, Moises tabatin fe cu hende malbado lo bay perdi. Pesey, e no a cay den e trampa di “gosa di e placernan pasahero di pica.”

5. Con nos por evita di cay den e trampa di “gosa di e placernan pasahero di pica”?

5 Con bo por evita di cay den e trampa di “gosa di e placernan pasahero di pica”? Wel, corda cu placer pecaminoso no ta cos cu ta dura. Cu wowo di fe, realisa cu “mundo ta pasa bay y tambe su deseonan.” (1 Juan 2:15-17) Medita riba kico lo para di pecadornan cu no arepenti. Nan ta manera riba vloer “cu ta slip”, y nan fin lo ta desastroso. (Sal. 73:18, 19) Ora bo sinti bo tenta pa comete pica, puntra bo mes: ‘Ki futuro mi kier?’

6. (a) Dicon Moises a nenga “di ser yama yiu di e yiu muher di Farao”? (b) Dicon bo ta kere cu Moises a tuma e decision corecto?

6 E fe cu Moises tabatin tambe a yud’e den e carera cu el a scoge. “Pa medio di fe Moises, ora el a bira grandi, a nenga di ser yama yiu di e yiu muher di Farao.” (Heb. 11:24) Moises no a rasona cu e lo por a sirbi Dios como parti di e famia real anto uza su rikesa y poder pa yuda su rumannan Israelita. Mas bien, Moises a stima Jehova asina tanto cu e tabata determina pa sirbie cu henter su curason y alma, y cu tur su forsa. (Deu. 6:5) Y su decision a scap’e di hopi sufrimento. Gran parti di e tesoronan di Egipto cu Moises a rechasa a bin cay den man di e Israelitanan mes, despues cu nan a plunder e Egipcionan! (Exo. 12:35, 36) Jehova a humilia Farao y a caba cu ne. (Sal. 136:15) En cambio, Moises si a keda na bida y Dios a uz’e pa guia y salba henter un nacion. Su bida tabatin un berdadero proposito.

7. (a) Segun Mateo 6:19-21, pakico nos mester wak mas aya di e futuro cercano? (b) Conta un experencia cu ta resalta e diferencia entre tesoro material y tesoro spiritual.

7 Si bo ta un hoben cu ta sirbi Jehova, con bo fe por yuda bo scoge loke bo ta bay haci cu bo bida? No tin nada malo pa pensa riba futuro. Pero laga e fe cu bo tin den Dios su promesanan motiva bo pa plania pa un futuro eterno y no un futuro cu ta pasahero. (Lesa Mateo 6:19-21.) Tuma por ehempel, Sophie, un bailarina talentoso di ballet. Gruponan di ballet rond Merca a ofrec’e beca y oportunidad unico pa forma un carera den nan grupo. El a admiti: “Mi a keda encanta cu otro hende tabata admira mi. Eigenlijk, mi a sinti cu mi tabata mihor cu mi pareunan. Pero mi no tabata feliz.” Despues Sophie a wak e video Hobennan Sa Puntra—Kico Lo Mi Haci cu Mi Bida? anto el a bisa: “Mi a realisa cu mundo a duna mi exito y admiracion di fanatico a cambio di mi devocion completo na Jehova. Mi a haci oracion di curason na dje, anto pone un punto final na mi carera di baile.” Kico Sophie ta pensa awor di su decision? El a bisa: “Mi no ta sinti falta di mi estilo di bida di antes. Awe, mi ta 100 porciento feliz. Mi ta traha pionero hunto cu mi esposo.  Nos no tin fama, ni nos no tin mucho cos material. Pero nos tin Jehova, varios studiante di Bijbel y metanan spiritual. No ta duel mi niun tiki.”

8. Ki conseho biblico por yuda un hoben dicidi kico pa haci cu su bida?

8 Jehova sa kico ta mihor pa bo. Moises a puntra: “Kico SEÑOR bo Dios ta pidi di bo, si no ta pa teme SEÑOR bo Dios, pa cana den tur su camindanan y stim’e, y pa sirbi SEÑOR bo Dios cu henter bo curason y cu henter bo alma, y pa warda e mandamentonan di SEÑOR y su statutonan cu mi ta ordena bo awe pa bo mes bon?” (Deu. 10:12, 13) Si bo ta jong ainda, scoge un carera cu lo permiti bo stima Jehova y sirbie “cu henter bo curason y cu henter bo alma.” Bo por tin sigur cu esey lo ta “pa bo mes bon.”

EL A BALORA SU PRIVILEGIO DI SIRBI JEHOVA

9. Splica dicon lo tabata dificil pa Moises cumpli cu su mision.

9 Moises “a considera e deshonor cu el a sufri como Ungi como rikesa mas grandi cu e tesoronan di Egipto.” (Heb. 11:26) Aki Bijbel ta referi na Moises como e “Ungi”, den sentido cu Jehova a scoge e pa saca Israel for di Egipto. Moises tabata sa cu esaki lo tabata un mision dificil p’e, y cu hasta e lo a sufri e “deshonor” of rechaso di parti di otro hende. Un biaha caba un Israelita a puntr’e den forma di mofa: “Ta ken a haci bo prins of hues riba nos?” (Exo. 2:13, 14) Mas despues, Moises mes a puntra Jehova: “Con anto Farao lo scucha mi?” (Exo. 6:12) Pa Moises por a prepara su mes y soporta rechaso, el a papia cu Jehova di su miedo y preocupacionnan. Con Jehova a yuda Moises cumpli cu su mision?

10. Con Jehova a capacita Moises pa cumpli cu su mision?

10 Na prome luga, Jehova a duna Moises e garantia aki: “Lo mi ta cu bo.” (Exo. 3:12) Na di dos luga, Jehova a dun’e confianza door di splic’e un aspecto di e nificacion di su nomber: “Lo Mi Bira Loke Mi Kier Bira.” * (Exo. 3:14, NW) Na di tres luga, el a duna Moises poder pa haci milager, locual a demostra cu en berdad ta Dios a mand’e. (Exo. 4:2-5) Na di cuater luga, el a duna Moises un compañero y vocero, esta, Aaron, pa yud’e cumpli cu su mision. (Exo. 4:14-16) Na final di Moises su bida, e tabata asina convenci cu Dios ta capacita su sirbidornan pa cumpli cu cualkier asignacion cu E duna nan, cu e por a bisa su sucesor Josue: “SEÑOR ta esun cu ta bay bo dilanti, e lo ta cu bo. E lo no faya bo ni bandona bo. No tene miedo ni desmaya.”—Deu. 31:8.

11. Dicon Moises a balora su asignacion asina tanto?

11 Cu e apoyo di Jehova, Moises a balora su mision dificil y a consider’e “mas grandi cu e tesoronan di Egipto.” Na final di cuenta, e tarea di sirbi Farao no tabata nada na comparacion cu e asignacion di sirbi e Dios Haltisimo. Y kico ser un prins na Egipto tabata na comparacion cu ser e ungi di Jehova? Moises a haya un gran recompensa pa su bon actitud. E tabatin un relacion masha special cu Jehova, kende a dun’e “gran poder” pa dirigi e Israelitanan na e Tera Priminti.—Deu. 34:10-12.

12. Ki privilegionan Jehova a duna nos?

12 Nos tambe tin un asignacion. Pa medio di Hesus, Jehova a encarga nos cu un sirbishi, mescos cu el a haci cu apostel Pablo y otro cristiannan. (Lesa 1 Timoteo 1:12-14.) Nos tur tin e privilegio di predica e bon noticia. (Mat. 24:14; 28:19, 20) Algun ta den e sirbishi di tempo completo. Ruman hombernan maduro ta sirbi otronan den congregacion como sirbidor ministerial y anciano. Sinembargo, bo famianan cu no ta  testigo di Jehova y otro hende por cuestiona e balor di e privilegionan aki of hasta critica bo pa e sacrificionan cu bo ta haci. (Mat. 10:34-37) Si nan logra desanima bo, lo bo por cuminsa puntra bo mes si ta bale la pena pa haci tanto esfuerso asina of si di berdad lo bo por cumpli cu bo asignacion. Si esey pasa cu bo, con fe por yuda bo persevera?

13. Con Jehova ta capacita nos pa cumpli cu e asignacionnan cu e ta duna nos?

13 Cu fe, roga Jehova pa su sosten. Cont’e di bo miedo y di bo preocupacionnan. Al fin y al cabo, ta Jehova ta esun cu a duna bo un asignacion y e lo yuda bo cumpli cu ne. Con e ta haci esey? Den e mesun manera cu el a yuda Moises. Na prome luga, e ta garantisa bo: “Lo mi fortalece bo, si, lo mi yuda bo, si, lo mi sostene bo cu mi man drechi di husticia.” (Isa. 41:10) Na di dos luga, e ta recorda bo cu su promesanan ta confiabel: “Di berdad mi a papia; di berdad lo mi cumpli cu ne. Mi a plania esaki, siguramente lo mi hacie.” (Isa. 46:11) Na di tres luga, e ta duna bo e “poder cu ta surpasa esun di hende” pa bo cumpli cu bo asignacion. (2 Cor. 4:7) Y na di cuater luga, pa yuda bo persevera den bo asignacion, nos Tata amoroso ta duna bo un hermandad mundial di hende cu ta ador’e y cu ta “sigui anima otro y fortalece otro.” (1 Tes. 5:11) Segun cu Jehova ta capacita bo pa bo cumpli cu bo asignacionnan, bo fe den dje lo crece y lo bo compronde cu bo privilegionan den su sirbishi ta tesoronan mas valioso cu cualkier tesoro di e mundo aki.

“E TABATIN SU BISTA FIHA RIBA E RECOMPENSA”

14. Dicon Moises tabata sigur cu e lo a haya un recompensa?

14 Moises “tabatin su bista fiha riba e recompensa.” (Heb. 11:26) Aunke su conocemento di futuro tabata limita, el a laga loke e tabata sa di futuro gui’e den su decisionnan. Mescos cu su antepasado Abraham, e tabata sigur cu Jehova por resucita morto. (Luc. 20:37, 38; Heb. 11:17-19) E speransa di ricibi bendicion den futuro a yuda Moises pa e no mira e 40 añanan cu el a pasa como fugitivo y e 40 añanan cu el a pasa den desierto como perdemento di tempo. Maske e no tabata sa en detaye con e promesanan di Dios lo a cumpli, cu wowo di fe e por a mira e recompensa.

15, 16. (a) Dicon nos tin cu enfoca riba nos recompensa? (b) Ki bendicion bou di e Reino di Dios bo ta anhela pa ricibi?

 15 Y kico di abo? Bo ta ‘fiha bo bista riba bo recompensa’? Mescos cu Moises, ainda nos no sa exactamente con e promesanan di Dios lo cumpli. Por ehempel, nos “no sa ki ora [ta] e tempo stipula” pa e tribulacion grandi dal aden. (Mar. 13:32, 33) Sinembargo, nos sa hopi mas cu Moises tocante e futuro Paradijs. Aunke nos no tin tur e detayenan, e promesanan di Dios tocante con bida lo ta bou di e Reino di Dios ta suficiente pa nos ‘fiha nos bista riba e recompensa.’ E echo cu nos tin un imagen mental cla di e mundo nobo lo motiva nos pa busca e Reino ey prome. Dicon? Pensa riba esaki: Lo bo cumpra un cas si bo no sa casi nada di dje? Claro cu no! Mescos tambe, nos lo no dedica nos bida pa core tras di un speransa cu no ta real pa nos. Nos fe mester yuda nos haya un bista cla di con bida bou di gobernacion di e Reino lo ta.

Lo ta emocionante pa papia cu sirbidornan fiel manera Moises (Wak paragraf 16)

16 Pa bo por haya un imagen mas cla ainda di e Reino di Dios, ‘fiha bo bista’ riba bo bida den Paradijs. Uza bo imaginacion. Por ehempel, ora bo ta studia e bida di personahenan biblico cu a biba prome cu Cristo, pensa kico lo bo por puntra nan ora cu nan resucita. Imagina bo kico nan lo por puntra bo tocante bo bida durante e ultimo dianan. Purba visualisa con emociona lo bo ta ora bo topa bo antepasadonan di hopi siglo pasa y con lo bo siña nan tocante tur loke Dios a haci pa nan. Imagina bo con fascina lo bo keda segun cu bo ta siña tocante hopi bestia salbahe door di observa nan den un ambiente pacifico. Medita riba con lo bo haya un relacion mas intimo cu Jehova segun cu bo ta alcansa perfeccion.

17. Con un bista cla di nos futuro recompensa ta yuda nos awe?

17 Un bista cla di nos recompensa ta yuda nos pa sigui padilanti, pa mantene nos goso y pa tuma decisionnan cu mira riba nos futuro eterno. Pablo a bisa: “Si nos ta spera riba loke nos no ta mira, nos ta sigui warda ansiosamente riba dje cu perseverancia.” (Rom. 8:25) E palabranan aki ta dirigi na e unginan, pero en principio nan ta aplica na tur cristian cu tin e speransa di biba pa semper. Aunke nos no a ricibi nos “recompensa” ainda, nos fe ta asina fuerte cu nos ta sigui warda cu pasenshi riba e premio di bida eterno. Mescos cu Moises, nos no ta mira e añanan cu nos tin ta sirbi Jehova como tempo perdi. Mas bien, nos ta convenci di cu “e cosnan cu hende ta mira ta temporal, ma e cosnan cu hende no ta mira ta eterno.”—Lesa 2 Corintionan 4:16-18.

18, 19. (a) Pakico nos tin cu lucha pa mantene nos fe fuerte? (b) Kico nos lo analisa den e siguiente articulo?

18 Fe ta permiti nos mira “evidencia convencente di realidadnan cu [hende] no ta mira.” (Heb. 11:1; nota) Un hende cu ta bay tras di e cosnan di mundo no ta balora e oportunidad di por sirbi Jehova. Pa un persona asina, tesoronan spiritual “ta bobedad.” (1 Cor. 2:14) Nos, sinembargo, ta spera di disfruta di bida eterno y presencia e resureccion, cosnan cu mundo no ta mira. Mescos cu e filosofonan di e tempo di Pablo cu a bisa cu e ta ‘papia coy loco’ y cu e no sa nada, awe mayoria di hende ta pensa cu e speransa cu nos ta predica ta puro fantasia.—Echo. 17:18.

19 Pa motibo cu nos ta biba den un mundo sin fe, nos tin cu lucha pa mantene nos fe fuerte. Roga Jehova pa “bo fe no debilita.” (Luc. 22:32) Mescos cu Moises, no cera wowo pa e consecuencianan di pica. Di otro banda, pensa riba e gran privilegio cu bo tin di sirbi Jehova y riba e speransa di biba pa semper. Pero, tin algo mas cu nos por siña for di e fe di Moises? Claro cu si. Den e siguiente articulo, nos lo analisa con su fe a yud’e mira “Esun cu ta invisibel.”—Heb. 11:27.

^ par. 10 Un experto riba tereno di Bijbel a bisa di Exodo 3:14: “Nada no por strob’e di cumpli cu su boluntad ... E nomber aki [Jehova] mester a bira e bastion of fortaleza di Israel, un fuente inagotabel di speransa y consuelo.”