Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  April 2014

Bo Ta Contento Cu e Wowonan di Jehova Ta Riba Bo?

Bo Ta Contento Cu e Wowonan di Jehova Ta Riba Bo?

“E wowonan di SEÑOR ta tur caminda, vigilando malo y bon.”—PROV. 15:3.

1, 2. Ki diferencia tin entre camara di siguridad y e wowonan di Jehova?

DEN HOPI pais, autoridadnan a instala camara pa controla fluho di trafico y graba accidente. Si un camara capta un auto cu a dal un hende canto di caminda y core bay, e imagennan graba por yuda autoridadnan haya e chauffeur y arest’e. Cu e ‘wowonan’ electronico aki tur caminda, ta bira mas y mas dificil pa hende scapa di e consecuencianan di nan accionnan.

2 Pero, nos por compara e camaranan di vigilancia aki cu e wowonan di Jehova, nos Tata amoroso? Bijbel ta bisa cu su wowonan “ta tur caminda.” (Prov. 15:3) Pero esey ta nifica cu e ta vigila constantemente tur loke nos ta haci? E ta observa nos djis pa wak unda nos ta faya cu su leynan pa e castiga nos? (Jer. 16:17; Heb. 4:13) Claro cu no! Jehova ta wak nos na prome luga pasobra e ta stima nos y e ta interesa den nos bienestar.—1 Ped. 3:12.

3. Menciona cinco manera den cua Jehova ta demostra cu e ta stima nos.

3 Con nos por sa cu ta debi na amor Dios ta observa nos? Wel, e ta demostra esey den cinco manera cu nos lo bay analisa: (1) e ta spierta nos prome cu nos haci algo malo,  (2) e ta corigi nos ora nos faya, (3) e ta guia nos pa medio di principionan biblico, (4) e ta yuda nos ora nos ta enfrenta prueba, y (5) e ta recompensa nos ora nos haci loke ta corecto.

JEHOVA TA SPIERTA NOS

4. Cu ki intencion Jehova a spierta Cain prome cu Cain a comete un pica?

4 Laga nos mira con Dios ta spierta nos prome cu nos haci algo malo. (1 Cro. 28:9) Pa nos por compronde e aspecto aki di e manera cu Dios ta wak nos, pensa riba kico el a bisa Cain, kende a “rabia masha pisa” ora Dios no a aproba su comportacion. (Lesa Genesis 4:3-7.) Jehova a spierta Cain pa e ‘haci loke ta bon’, sino, e lo a comete un pica. Ta comosifuera ‘pica tabata loer na porta.’ Dios a bis’e: “Abo mester domin’e.” E tabata kier pa Cain haci caso di e spiertamento y ricibi su aprobacion. Esey lo a yuda Cain mantene un bon relacion cu Dios.

5. Den ki maneranan Jehova ta spierta nos tocante un mal tendencia cu nos por tin?

5 Kico di nos awe? E wowonan di Jehova ta mira tur loke ta den nos curason; nos no por sconde nada for di dje. E sa kico ta nos tendencianan y motivacionnan. E ta stima nos y e kier pa nos haci loke ta corecto, pero e no ta obliga nos cambia di rumbo. Pesey, si e mira cu nos ta bayendo den un mal direccion, e ta spierta nos pa medio di su Palabra. Con asina? Wel, ora nos ta lesa Bijbel tur dia, hopi biaha nos ta topa un pasashi cu ta yuda nos vence un mal tendencia. Ademas, kisas un di nos publicacionnan cristian ta hala nos atencion net riba un problema cu nos ta luchando cu ne y ta mustra nos con nos por venc’e. Y den nos reunionnan di congregacion, nos tur ta ­ricibi conseho cu ta bin net na ora!

6, 7. (a) Aunke e spiertamentonan di Dios ta dirigi na miyones di hende, ki prueba nos tin cu e ta interesa den cada un di nos? (b) Con bo por beneficia di e interes personal cu Jehova tin den bo?

6 Tur e spiertamentonan ey ta un prueba innegabel di e atencion cu Jehova tin pa nos y di e manera amoroso cu e ta wak cada un di nos. Ta berdad cu Bijbel ta existi pa cientos di aña caba, cu e publicacionnan cu nos organisacion ta produci ta pa miyones di hende y cu e conseho cu nos ta ricibi na nos reunionnan ta pa henter e congregacion. Toch, den cada caso, Jehova a dirigi bo atencion na su Palabra pa bo por corigi cualkier mal tendencia cu abo por tin. Pesey nos por bisa cu esaki ta un prueba di e amor cu Jehova tin pa bo y di e manera cu e ta mustra interes personal den bo.

Nos consenshi entrena pa Bijbel ta yuda nos evita peliger (Wak paragraf 6 y 7)

7 Pa nos por beneficia di e spiertamentonan di Dios, nos tin cu realisa na prome luga cu di berdad e ta interesa den nos. Despues, nos mester aplica e conseho di su Palabra y haci esfuerso pa elimina cualkier pensamento cu ta desagrad’e. (Lesa Isaias 55:6, 7.) Si nos haci caso di e spiertamentonan cu nos ta haya, nos lo spaar nos mes di hopi dolor di cabes. Pero, supone awor cu nos a haci algo malo caba. Ki yudansa nos Tata amoroso ta duna nos e ora ey?

JEHOVA TA CORIGI NOS

8, 9. Ora un ruman duna nos conseho basa riba Bijbel, con esey ta demostra e interes profundo cu Jehova tin den nos? Duna un ehempel.

8 Kisas nos ta bira mas consciente ainda di Jehova su interes den nos ora e corigi nos. (Lesa Hebreonan 12:5, 6.) Ta berdad cu ningun di nos no ta gusta ricibi conseho of disciplina. (Heb. 12:11) Pero, pensa riba kico un ruman cu ta duna nos un conseho mester tene cuenta cu ne. E mester ta na haltura cu loke nos ta haciendo  por daña nos relacion cu Jehova, e mester tin interes den nos sintimentonan y e mester ta dispuesto pa dedica e tempo y esfuerso necesario pa mustra nos for di Bijbel con nos por haci cambio pa agrada Dios. Nos ta respeta e conseho aki pasobra e ta un refleho di e interes cu Jehova tin den nos.

9 Laga nos wak un ehempel di esaki. Un ruman, prome cu el a bin den e berdad, tabata wak pornografia regularmente. Aunke el a vence e custumber ey, ainda e tabatin e tendencia di wak loke ta incorecto, manera carbon cu ainda tabata cendi den su curason. Dia el a haya un telefon ­celular nobo, e ‘vlamnan’ a bolbe lanta y el a cay bek den e custumber bieu di wak pornografia riba Internet. (Sant. 1:14, 15) Na un ocasion, mientras e cu algun ruman ­tabata duna testimonio via telefon, el a fia un anciano su telefon pa lag’e busca algun adres. Ora e anciano a cuminsa uza e telefon, algun website pornografico a aparece riba e pantaya. Ta bon cu esey a pasa ya cu esaki a duna e anciano chens pa conseha e ruman, kende a acepta e coreccion oportuno, a beneficia di dje y cu tempo a vence su mal tendencia. Nos por ta hopi agradecido na nos Tata celestial, kende ta mira hasta nos picanan scondi y ta corigi nos prome cu ta laat!

JEHOVA TA GUIA NOS PA MEDIO DI PRINCIPIONAN DI BIJBEL

10, 11. (a) Den ki manera bo por busca e guia di Dios? (b) Con un famia a comproba cu ta sabi pa sigui e guia di Jehova?

10 Un salmista a canta na Jehova: “Cu bo conseho lo bo guia mi.” (Sal. 73:24) Ki ora cu nos tin mester di guia, nos por consulta cu Jehova su Palabra pa haya sa kico ta su punto di bista. Ora nos aplica principionan di Bijbel, nos ta haya un bon relacion cu ne, y tin biaha esey ta yuda nos tambe pa percura pa nos necesidadnan material.—Prov. 3:6.

11 Nos por haya un ehempel di e manera cu Jehova ta guia nos den e experencia di un ruman homber cunukero cu tabata biba hunto cu su famia grandi riba un tereno cu nan a huur den un region di sero riba e isla di Masbate, Filipinas. Tanto e como su casa tabata pionero regular. Riba un dia doño di e cunucu a notifica nan cu nan tabatin cu bandona e cunucu. Nan a keda geshock y a haya sa despues cu un hende a acusa nan falsamente di ladronicia. Aunke e ruman a keda preocupa  tocante unda e lo haya un luga di biba p’e cu su famia, el a bisa: “Jehova lo percura pa nos. Maske kico cu pasa, semper e ta duna nos loke nos tin mester.” Dicho echo. Algun dia despues, e famia a haya un gran alivio ora doño di e tereno a notifica nan cu nan no tabatin nodo di bandona e luga. Kico a pon’e cambia di idea? Wel, el a ripara cu a pesar di e acusacion, e famia, guia pa principionan di Bijbel, a keda cu un actitud respetuoso y pacifico. Esey a impresion’e asina tanto cu no solamente el a permiti nan keda, sino tambe el a duna nan mas tereno pa cultiva. (Lesa 1 Pedro 2:12.) Si, Jehova ta guia nos pa medio di su Palabra pa yuda nos enfrenta e dificultadnan di bida.

JEHOVA TA YUDA NOS WANTA PRUEBA

12, 13. Den ki situacionnan un ruman por puntra su mes si Dios ta tuma nota di su sufrimento?

12 Tin biaha, un prueba por dura largo. Kisas nos tin hopi tempo ta lucha cu un enfermedad, ta wanta oposicion di parti di famia of ta soporta persecucion. Ademas, nos por haya nos cu un desacuerdo serio cu un persona den congregacion.

13 Supone cu un ruman ta bisa algo cu ta hurt bo. Bo ta pensa talbes: ‘Con un cos asina por pasa den e organisacion di Dios?’ Y comosifuera no ta basta, e ruman ta ricibi mas privilegio den congregacion, y e rumannan ta papia bon di dje. Bo ta puntra bo mes: ‘Con ta posibel? Acaso Jehova no ta mira kico ta pasando? E no ta bay haci nada?’—Sal. 13:1, 2; Hab. 1:2, 3.

14. Kico por ta un motibo pakico Dios no ta interveni den un cierto situacion?

14 Jehova ta mira mas aleu y por tin bon motibo pa no interveni den un situacion. Por ehempel, aunke bo por haya cu e fout ta principalmente cerca e otro persona, kisas Dios ta mira e asunto un poco diferente. For di su punto di bista, podise e fout ta mas bien cerca bo, kisas mas di loke bo ta kere. Talbes e comentario cu a hurt bo asina tanto tabata net e conseho cu bo tabatin mester y cu bo tin cu pensa seriamente riba dje. Ruman Karl Klein, kende a sirbi den e Cuerpo Gobernante, a conta di un ocasion cu Ruman J. F. Rutherford tabatin cu reprend’e. Mas despues, Ruman Rutherford a cumind’e den un forma amabel: “Con a bay, Karl!” pero apenas Ruman Klein a cumind’e bek. Mirando cu Ruman Klein a keda carga un poco rencor pa motibo di e reprendemento cu el a ricibi, Rutherford a spiert’e pa e tene cuidou pa e no bira victima di Diabel. Ruman Klein a skirbi despues: “Ora nos carga rencor contra un ruman, vooral ora el a bisa nos algo cu e tin derecho di bisa como parti di su deber, nos ta expone nos mes na e trampanan di Diabel.” *

15. Dicon bo no tin cu perde pasenshi ora bo ta pasa den un situacion dificil?

15 Toch, ora ta parce cu nos no por sali for di un situacion dificil, nos por perde pasenshi. Kico por yuda nos wanta? Wel, supone cu bo ta coriendo un auto riba caminda grandi y na un dado momento bo ta keda pega den un fila. Bo no sa cuanto tempo lo bo tin cu warda pa e trafico cuminsa move atrobe. Si bo cunsumi y purba di pasa via un otro ruta, bo tin hasta chens di perde caminda. Bo por haya bo ta tarda mas pa yega bo destino cu si bo warda cu pasenshi. Mescos tambe, si bo keda riba e caminda cu e Palabra di Dios ta indica, cu tempo lo bo yega bo destino.

16. Pa ki otro motibo Jehova por keda sin interveni mesora den nos pruebanan?

16 Kisas Jehova no ta interveni mesora pasobra e kier pa nos saca un les for di  nos pruebanan. (Lesa 1 Pedro 5:6-10.) Claro cu no ta Dios ta causa prueba. (Sant. 1:13) Ta ‘nos adversario, Diabel’, ta esun cu ta causa mayoria di nos problemanan. Sinembargo, Dios por uza un situacion dificil pa yuda nos crece spiritualmente. E ta mira nos sufrimento y pa motibo cu “e ta interesa” den nos, e lo no permiti nos pruebanan dura demasiado tempo. Bo no ta contento cu e wowonan di Jehova ta riba bo ora bo ta pasa den prueba, y cu e lo percura un salida na su debido tempo?2 Cor. 4:7-9.

JEHOVA TA RECOMPENSA NOS

17. Dicon Jehova ta examina curason di hende?

17 Finalmente, Jehova ta examina nos pa un motibo hopi alentador: e kier recompensa hende cu ta stim’e di curason. Pa medio di profeta Hanani, el a bisa Rey Asa: “Wowo di SEÑOR ta move bay bin door di henter tera, pa e por sostene fuertemente esnan cu nan curason ta completamente di dje.” (2 Cro. 16:9) E curason di Asa mes no a resulta di ta completo pa Jehova. Pero si abo sigui haci loke ta corecto, e lo ‘sostene bo fuertemente.’

18. Ora bo ta sinti cu hende no ta aprecia e bon cu bo ta haci, kico ta bon pa bo corda? (Wak e prome plachi.)

18 Dios kier pa nos ‘busca loke ta bon’, ‘stima loke ta bon’ y “haci loke ta bon” pa e duna nos su aprobacion. (Amos 5:14, 15; 1 Ped. 3:11, 12) E tin atencion pa hende husto y ta bendiciona nan. (Sal. 34:15) Pensa por ehempel riba con el a trata e parteranan Sifra y Pua. Tempo cu e Israelitanan tabata esclavo na Egipto, e Farao a manda nan mata tur mucha homber Hebreo cu nace. Pero e dos muhernan aki a teme Dios mas cu nan a teme Farao, y motiva pa nan consenshi entrena pa Dios, nan a salba bida di e babynan. Jehova no a keda sin tuma nota di e bon cu Sifra y Pua a haci y a recompensa nan despues cu yiu di nan mes. (Exo. 1:15-17, 20, 21) De bes en cuando, nos por sinti cu niun hende no ta ripara e bon cosnan cu nos ta haci. Pero Jehova si ta tuma nota di tur loke nos ta haci y e lo recompensa nos debidamente pa nos bon obranan.—Mat. 6:4, 6; 1 Tim. 5:25; Heb. 6:10.

19. Con un ruman muher a haya sa cu Jehova ta mira nos bon obranan?

19 Un ruman muher di Austria a comproba cu Jehova ta mira nos bon obranan. Como cu e ta originalmente di Hungria, el a ricibi adres di un persona cu ta papia Hungaro pa e bay predica na dje. Mesora el a bay busc’e, pero e no a haya niun hende na cas. El a bay busc’e varios biaha mas. Tin biaha, e tabata sinti cu tin hende na cas, pero niun hende no tabata sali. E tabata laga literatura, carta, su mes datonan personal pa e persona por a tuma contacto cu ne, pero nada. Despues di a bay busca e persona pa un aña y mei largo, porfin e porta di cas a habri! Un señora masha amabel a invita e ruman muher pa drenta, anto a bis’e: “Mi a lesa tur loke bo a trece pa mi y mi tabata warda riba bo.” E señora tabata haya quimioterapia y pesey e no por a atende bishita. Pero awor el a acepta un estudio di Bijbel. Si, Jehova a recompensa nos ruman muher pa su esfuersonan diligente!

20. Con bo ta sinti bo awor cu bo sa cu Jehova ta wak bo pa motibo di su interes den bo?

20 Manera nos a siña den e articulo aki, Jehova ta wak tur loke nos ta haci. Pero hamas nos mester sinti manera cos cu e ta vigila nos pa busca y graba tur e fayonan cu nos ta comete. Al contrario, su wowonan ta riba nos pasobra e ta interesa den nos y kier recompensa nos pa e bon cosnan cu nos ta haci. No ta berdad cu esey ta hala nos mas cerca di nos Tata amoroso?

^ par. 14 Ruman Klein su biografia a aparece den e Atalaya di 1 di maart 1985.