Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  March 2014

Con Nos Por Keda cu un Spirito di Sacrificio Propio?

Con Nos Por Keda cu un Spirito di Sacrificio Propio?

“Si un hende kier sigui mi, lag’e nenga su mes.”—MAT. 16:24.

1. Con Hesus a pone un ehempel perfecto di sacrificio propio?

TEMPO cu Hesus tabata riba tera, el a pone un ehempel perfecto di sacrificio propio. Con asina? Wel, el a pone e boluntad di Dios prome cu su mes deseonan y comodidad. (Juan 5:30) Kedando fiel te na morto, el a demostra cu no tabatin limite na loke e tabata dispuesto pa sacrifica na beneficio di otronan.—Flp. 2:8.

2. Con nos por demostra cu nos ta cla pa desplega un spirito di sacrificio propio, y dicon nos mester haci esey?

2 Como siguidornan di Hesus, nos tambe mester ta dispuesto pa hiba un bida di sacrificio propio. Kico esey ta encera? Cu poco palabra, ser altruista, esta, ta dispuesto pa pone interesnan di otro hende prome cu esnan di nos. Un persona cu ta cla pa haci esey ta contrario di un persona egoista. (Lesa Mateo 16:24.) Si, ora nos no ta egoista, nos ta pone sintimento- y preferencianan di otro hende prome cu esnan di nos. (Flp. 2:3, 4) En realidad, Hesus a siña hende cu altruismo ta indispensabel pa adora Jehova corectamente. Con asina? Wel, ta amor cristian, esta, e amor cu ta identifica e berdadero discipelnan di Hesus, ta motiva nos pa ta semper cla pa haci sacrificio pa sirbi otronan. (Juan 13:34, 35) Y como cu nos ta forma parti di un hermandad mundial cu ta cla pa demostra un spirito di  sacrificio propio, nos ta disfruta di hopi bendicion.

3. Kico por debilita nos determinacion pa desplega un spirito di sacrificio propio?

3 Sinembargo, nos tin un enemigo cu pocopoco por debilita nos determinacion pa desplega un spirito di sacrificio propio. E enemigo ey ta nos tendencia di ta egoista. Corda con Adam cu Eva a desplega egoismo. Eva a desea di ta mescos cu Dios, y Adam a prefera di complace Eva en bes di agrada Jehova. (Gen. 3:5, 6) Despues cu Diabel a kita Adam cu Eva for di adoracion berdadero, el a sigui uza e trampa di egoismo pa gaña hende. El a hasta purba di uza e trampa aki pa desvia Hesus. (Mat. 4:1-9) Awendia tambe Satanas ta logra gaña mayoria di hende y pone nan desplega un actitud egoista den varios manera. Y si nos no tene cuidou, e actitud egoista di e mundo aki por influencia nos tambe.—Efe. 2:2.

4. (a) Nos por elimina nos tendencianan egoista awe? Splica. (b) Ki preguntanan nos lo trata?

4 Nos por compara egoismo cu frusto. Ora hero ser expone na awasero y solo, e ta cuminsa frustia. Si nos no haci nada pa stop e hero di frustia, nos por haya nos cu un daño ireparabel. Cu egoismo ta mescos. Maske actualmente nos no por elimina nos tendencianan egoista y nos imperfeccion, nos mester haci tur loke nos por pa resisti tendencianan egoista. (1 Cor. 9:26, 27) Con nos por detecta rasgonan di egoismo cerca nos mes? Y con nos por mehora den e manera cu nos ta haci sacrificio na bienestar di otronan?

UZA BIJBEL PA WAK SI NOS TIN RASGONAN DI EGOISMO

5. (a) Den ki sentido Bijbel ta manera un spiel? (Wak e prome plachi.) (b) Ora nos ta wak si nos tin rasgonan di egoismo, kico nos mester evita?

5 Mescos cu nos por uza un spiel pa wak nos apariencia, nos por uza Bijbel pa analisa nos personalidad y drecha cualkier defecto cu nos por haya. (Lesa Santiago 1:22-25.) Sinembargo, ta solamente si nos ta uza un spiel corectamente, e por yuda nos drecha nos apariencia. Si nos ta djis wak lihe lihe den spiel, nos lo por keda sin wak un defecto na nos apariencia. Of si nos ta wak den spiel for di un angulo cu ta otro hende nos ta mira, nos lo no mira nos mes. Di mes manera, si nos kier uza Bijbel pa detecta un defecto manera egoismo, nos no mester les’e aribariba ni uz’e pa wak fayo di otro hende.

6. Fuera di ‘wak cuidadosamente den e ley perfecto’, kico mas nos tin cu haci?

6 Por sosode cu nos ta lesa e Palabra di Dios regularmente, of tur dia, sin ripara cu rasgonan di egoismo ta desaroyando den nos. Con esey ta posibel? Wel, ripara cu den e ehempel di spiel cu Santiago a uza, e persona su problema no tabata cu e no a wak bon den spiel. Santiago a skirbi cu e persona “ta wak su mes.” Aki Santiago a uza un palabra Griego cu ta nifica wak cuidadosamente. Pues, kico tabata e persona su problema? Santiago a splica: “[E persona] ta bira bay, y mesora e ta lubida ki sorto di hende e ta.” Si, e ta bira bay sin haci nada cu loke el a mira den spiel. Di otro banda, e hende cu ta cumpli cu e palabra no solamente “ta wak cuidadosamente den e ley perfecto” pero “ta persisti den haci esey” tambe. En bes di ignora e Palabra di Dios, e ta persisti den su siñansanan. Hesus a declara algo similar ora el a bisa: “Si boso keda fiel na mi palabranan, boso realmente ta mi discipelnan.”—Juan 8:31

7. Con nos por uza Bijbel pa detecta rasgonan di egoismo?

7 Pesey, pa bo por resisti tendencianan egoista cu exito, e prome cos cu bo tin cu haci ta lesa e Palabra di Dios cuidadosamente. Esey por yuda bo identifica  areanan cu mester di atencion. Pero, bo tin cu haci mas cu esey. Bo tin cu haci investigacion. Ora bo ta lesa un relato di Bijbel, hinca bo mes den e situacion y puntra bo mes: ‘Kico ami lo a haci den e situacion aki? Lo mi a haci loke ta corecto?’ Mas importante ainda, despues di a medita riba loke bo a lesa, haci esfuerso pa aplica loke bo a siña. (Mat. 7:24, 25) Awor, laga nos ban wak con e relatonan tocante Rey Saul y apostel Pedro por yuda nos keda cu un spirito di sacrificio propio.

REY SAUL—UN EHEMPEL PA SPIERTA NOS

8. Ki tipo di persona Saul tabata ora el a cuminsa reina, y con el a demostra esaki?

8 E ehempel di Rey Saul ta un spiertamento pa nos; e ta mustra con egoismo por stroba nos di demostra un actitud di sacrificio propio. Tempo cu Saul a cuminsa reina, e tabata un homber modesto y humilde. (1 Sam. 9:21) Por ehempel, e no a castiga e Israelitanan cu a menospreci’e como rey aunke lo e por a sinti pa haci esey ya cu ta Dios mes a nombr’e como rey. (1 Sam. 10:27) Rey Saul a sigui guia di Dios su spirito santo y a yuda e pueblo di Israel vence e Amonitanan. Despues, humildemente el a duna Jehova tur merito pa e victoria.—1 Sam. 11:6, 11-13.

9. Con bin Saul a bira egoista?

9 Pero mas despues, Saul a permiti egoismo y orguyo desaroya den su curason, mescos cu frusto ta afecta hero. Ora el a derota e Amalekitanan den bataya, el a cumpli cu su mes deseonan en bes di obedece Jehova. Saul tabata golos; el a coge di e botin en bes di destrui tur cos manera Dios a manda. Y e tabata asina orguyoso cu el a lanta un monumento pa su mes. (1 Sam. 15:3, 9, 12) Ora cu profeta Samuel a bis’e cu Jehova no a keda contento cu ne, Saul a purba di hustifica su mes: El a enfoca riba e parti di Dios su mandamento cu si el a cumpli cu ne y a culpa otronan pa su eror. (1 Sam. 15:16-21) Saul su orguyo a pone cu e tabata mas preocupa cu loke hende tabata pensa di dje cu e tabata preocupa cu su amistad cu Dios. (1 Sam. 15:30) Con nos por uza e relato tocante Saul manera un spiel pa yuda nos keda cu un spirito di sacrificio propio?

10, 11. (a) Kico e mal ehempel di Saul ta siña nos? (b) Con nos por evita di sigui Saul su mal ehempel?

10 Di prome, Saul su experencia ta mustra cu nos no mester tin demasiado confianza den nos mes. Nos no mester asumi cu unabes nos cuminsa demostra un spirito di sacrificio propio cu automaticamente nos lo sigui haci esey. (1 Tim. 4:10) Corda cu un tempo Saul tabata humilde y tabata disfruta di Dios su aprobacion, pero e no a elimina e rasgonan di egoismo cu a cuminsa desaroya den su curason. Finalmente, Jehova a rechasa Saul pa motibo di su desobediencia.

11 Di dos, nos mester tene cuidou pa no enfoca solamente riba areanan di nos bida cu ta bon y ignora aspectonan cu nos tin cu drecha. Pasobra si nos ta haci esey, nos lo ta mescos cu un persona cu ta wak den spiel, admira su paña nobo sin ripara cu su cara ta sushi. Hasta si nos no ta orguyoso of no tin demasiado confianza den nos mes, manera tabata e caso cu Saul, nos mester traha duro pa resisti cualkier tendencia cu por pone nos imita su mal ehempel. Si nos haya conseho, laga nos tene cuidou pa nos no hustifica nos mes, minimisa e problema of culpa otronan. Pues, en bes di imita Saul, laga nos ta cla pa tuma conseho.—Lesa Salmo 141:5.

12. Con un spirito di sacrificio propio por yuda nos si nos comete un pica serio?

 12 Pero, kico si nos a comete un pica serio? Como cu Saul tabata mas preocupa cu su reputacion, e no por a drecha su relacion cu Jehova. No sigui su mal ehempel! Si nos tin e spirito di sacrificio propio, nos lo guli nos orguyo y humilia nos mes; asina nos ta vence berguensa y busca yudansa. (Prov. 28:13; Sant. 5:14-16) Por ehempel, un ruman homber a cuminsa wak pornografia for di ora e tabatin 12 aña y a sigui haci esey den secreto pa mas cu un decada. Despues el a conta: “Mi tabatin masha dificultad pa bisa mi casa y e ancianonan loke mi tabata haciendo. Pero awor cu mi a confesa, mi ta sinti cu un peso enorme a kita for di riba mi. Algun di mi amigonan a keda desapunta ora mi a perde mi privilegio como sirbidor ministerial; nan a sinti comosifuera mi a laga nan na caya. Pero mi sa cu awor Jehova ta mas contento cu mi sirbishi cu tempo mi tabata wak pornografia, y ta su punto di bista ta esun di mas importante.”

PEDRO A VENCE EGOISMO

13, 14. Con Pedro a desplega egoismo?

13 Apostel Pedro a demostra cu e tabata dispuesto pa sacrifica su propio interesnan tempo cu Hesus tabata entren’e. (Luc. 5:3-11) Asina mes, e tabatin cu lucha contra di tendencianan egoista. Por ehempel, el a rabia ora Santiago y Juan a purba di haya puestonan prominente banda di Hesus den e Reino di Dios. Podise Pedro a pensa cu ta e mester a haya un di e puestonan ey pasobra Hesus a bis’e caba cu lo el a haya un asignacion special. (Mat. 16:18, 19) En todo caso, Hesus a spierta tanto Santiago, Juan y Pedro como e otro apostelnan pa nan no ta egoista y pa nan no “domina” nan rumannan.—Mar. 10:35-45.

14 Hasta despues cu Hesus a purba di corigi Pedro su manera di pensa, Pedro a sigui desplega egoismo. Ora Hesus a bisa e apostelnan cu nan lo a bandon’e pa un tempo, Pedro a halsa su mes riba e otro apostelnan y a pretende cu e so lo a keda fiel. (Mat. 26:31-33) Pero e tabatin demasiado confianza den su mes y ta esey  a pone cu e mesun anochi ey e no tabata cla pa demostra un spirito di sacrificio propio. Pa proteha su mes, Pedro a nenga Hesus tres biaha.—Mat. 26:69-75.

15. Dicon Pedro su ehempel ta un animacion pa nos?

15 A pesar di Pedro su lucha y fayonan, su ehempel ta un animacion pa nos. Haciendo esfuerso y cu yudansa di spirito santo, Pedro a logra vence tendencianan egoista y desplega dominio propio y un amor abnega, of sin egoismo. (Gal. 5:22, 23) El a soporta pruebanan cu por a parce mas grandi cu esnan cu el a confronta prome. El a reacciona na un manera humilde ora Pablo a corigie publicamente. (Gal. 2:11-14) Y e no a carga rencor pensando cu Pablo a daña su reputacion. Pedro a sigui expresa su amor pa Pablo. (2 Ped. 3:15) Sin duda, Pedro su ehempel por yuda nos keda cu un spirito di sacrificio propio.

Con Pedro a reacciona despues di a haya coreccion? Abo lo a reacciona mescos? (Wak paragraf 15)

16. Con nos por demostra un spirito di sacrificio propio den situacionnan dificil?

16 Con abo ta reacciona den situacionnan dificil? Ora Pedro y e otro apostelnan a ser encarcela y suta pasobra nan tabata predica, nan a keda contento cu “Dios a considera nan digno di ser deshonra pa causa di Hesus su nomber.” (Echo. 5:41) Abo tambe por mira persecucion como un oportunidad pa imita Pedro y sigui Hesus su pasonan. (Lesa 1 Pedro 2:20, 21.) Si bo ta cla pa haci esey, ta bira mas facil pa bo acepta disciplina for di e ancianonan. En bes di rabia, imita Pedro su ehempel.—Ecl. 7:9.

17, 18. (a) Ki preguntanan nos mester haci nos mes encuanto nos metanan spiritual? (b) Kico nos mester haci si nos detecta cierto rasgo(nan) di egoismo den nos curason?

17 E ehempel di Pedro por yuda nos ora di pone meta spiritual tambe. Bo mester ta cla pa haci sacrificio segun cu bo ta traha pa logra e metanan aki. Pero tene cuidou pa bo no ta buscando prominencia. Pesey, puntra bo mes: ‘Dicon mi kier progresa of haci mas pa Jehova? Ta pasobra mi kier elogio of mas autoridad, manera Santiago y Juan tabata kier?’

18 Si bo detecta cierto rasgo(nan) di egoismo den bo curason, pidi Jehova yuda bo corigi bo manera di pensa y sinti; caba, traha duro pa glorifica Jehova y no bo mes. (Sal. 86:11) Ademas, bo por pone metanan cu no ta pone bo den spotlight. Por ehempel, bo por pone meta pa mehora den desplega cierto aspecto di fruta di spirito cu bo no ta asina bon den dje. Of si bo ta prepara diligentemente pa bo reunionnan pero no ta masha interesa den limpia Salon di Reino, bo por pone como meta pa aplica e conseho cu nos ta haya na Romanonan 12:16.—Les’e.

19. Kico nos por haci pa nos no bira desanima ora nos wak den e spiel di e Palabra di Dios?

19 Ora nos wak nos mes cuidadosamente den e spiel di e Palabra di Dios y nos mira cierto defecto, hasta señal di egoismo, nos por desanima. Si esey pasa cu bo, medita riba e cumplido di e palabra den e ilustracion di Santiago. Santiago no a bisa con lihe e persona aki a soluciona su problemanan ni cu e por a soluciona tur; mas bien, el a bisa cu e persona aki ‘a persisti den e ley perfecto.’ (Sant. 1:25) E persona aki a corda loke el a mira den spiel y a sigui traha pa mehora. Pues, keda cu un punto di bista positivo y balansa di bo mes y corda cu nos tur ta imperfecto. (Lesa Eclesiastes 7:20.) Sigui wak cuidadosamente den e ley perfecto y sigui haci esfuerso pa keda cu un spirito di sacrificio propio. Jehova ta dispuesto pa yuda bo, mescos cu e ta yuda hopi di bo rumannan, kendenan tambe ta imperfecto. Pues, maske nos ta imperfecto, nos por tin Jehova su aprobacion y bendicion.