Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  March 2014

Loke Bo Ta Bisa Ta “Si y na Mes Momento No”?

Loke Bo Ta Bisa Ta “Si y na Mes Momento No”?

Visualisa e siguiente situacion: Un anciano cu ta miembro di un Comite di Contacto cu Hospital a traha afspraak cu un ruman homber hoben pa nan ­traha den sirbishi diadomingo mainta. Pero net riba e mainta ey, e anciano ta haya un yamada urgente di un ruman homber kende su esposa a caba di haya un accidente di auto y ta na hospital. E ruman homber ta pidi e anciano si e por yud’e haya un dokter cu lo ta dispuesto pa opera su casa sin sanger. E situacion ey ta pone cu e ­anciano ta cancela su afspraak cu e hoben y ta bay sostene e pareha cu ta den un situacion dificil.

Ata aki un otro situacion: Un pareha casa ta invita un mama soltero di nan congregacion cu su dos yiu muhernan pa bin come cerca nan y pasa un rato hunto cu nan. E muchanan ta bira masha contento ora nan mama bisa nan y ta cuminsa anhela pa e dia yega. Sinembargo, un dia prome cu e fecha, e pareha ta bisa e mama cu algo inespera a presenta y cu nan tin cu cancela e afspraak. Pero despues, e mama ta haya sa e motibo pakico e pareha a cancela nan afspraak: Despues cu e pareha a caba di invita nan, e pareha a haya un invitacion pa bay cerca algun otro ruman e mesun atardi ey y nan a acepta e invitacion.

Ta claro cu, como cristian, nos mester cumpli cu nos palabra. Nunca nos lo kier pa loke nos ta bisa ta “Si y na mes momento No.” (2 Cor. 1:18) Pero, manera e dos ehempelnan ey ta mustra, cada situacion ta diferente. Por sosode cu nos tin cu cancela un afspraak. Apostel Pablo tambe a yega di hay’e den un situacion asina.

PABLO A KEDA SIN CUMPLI CU SU PALABRA?

Na aña 55 despues di Cristo, Pablo tabata na Efeso pa su di tres biahe como misionero. Su intencion tabata pa crusa Lama Egeo y bay Corinto y for di eynan biaha bay Macedonia. Y ora e tabata bay bek Jerusalem, e tabatin intencion di bishita e congregacion di Corinto pa di dos biaha, kisas pa tuma e contribucion generoso cu e rumannan na Corinto tabatin pa e rumannan na Jerusalem. (1 Cor. 16:3) Nos ta compronde esey for di su palabranan na 2 Corintionan 1:15 y 16, cu ta bisa: “Ta cu e confianza aki mi tabatin intencion di bin cerca boso mas prome pa di dos biaha, pa asina boso por tabata contento atrobe; y despues di un bishita breve cerca boso lo mi a bay Macedonia, y di Macedonia bin bek cerca boso, pa boso compaña mi pida caminda riba mi biahe pa Judea.”

Ta parce cu Pablo a skirbi e rumannan di Corinto un carta pa informa nan kico tabata su plan. (1 Cor. 5:9) Pero un poco despues cu  el a skirbi nan e carta ey, el a tende di e hendenan di e cas di Cloe cu tabatin desacuerdo serio entre e rumannan den congregacion na Corinto. (1 Cor. 1:10, 11) E ora ey, Pablo a dicidi di cambia su plan y a skirbi nan e carta cu awe nos conoce como Prome Corintionan. Den e carta ey, Pablo a conseha y corigi e rumannan na Corinto bondadosamente. Den e carta ey, el a menciona tambe cu lo e cambia su ruta, esta, cu lo e bay Macedonia prome y despues lo e bay Corinto.1 Cor. 16:5, 6. *

Ta parce cu ora e rumannan na Corinto a ricibi Pablo su carta, algun di e “superapostelnan” den e congregacion ey a acusa Pablo di ta inconfiabel, un homber cu no ta cumpli cu su palabra. Pa defende su mes, Pablo a puntra nan: “Acaso mi no a tuma e asunto aki na serio ora mi tabatin e intencion ey? Of loke mi ta plania pa haci, mi ta plania nan a base di motibonan egoista, di manera cu mi ta bisa: ‘Si, claro cu si’ y despues: ‘No, absolutamente cu no?’”—2 Cor. 1:17; 11:5.

Awor, ta berdad cu apostel Pablo “no a tuma e asunto na serio”? Claro cu no! E palabra cu a ser traduci como ‘no tuma na serio’ en berdad ta duna e idea di ta inconfiabel, referiendo na un persona cu no ta cumpli cu su palabra. Pero Pablo a puntra e cristiannan na Corinto den un forma retorico: ‘Mi ta plania a base di motibonan egoista?’ E pregunta aki mester a laga nan compronde bon cla cu e echo cu el a cambia su plannan no tabata pasobra e ta inconfiabel.

Pablo a refuta e acusacion enfaticamente, bisando: “Mescos cu Dios ta confiabel, asina tambe loke nos ta bisa boso no ta Si y na mes momento No.” (2 Cor. 1:18) Sin duda, Pablo a cambia su plannan pasobra e tabatin e bienestar di su rumannan na Corinto na pecho. Na 2 Corintionan 1:23 nos ta lesa cu el a cambia su plan di bay Corinto “pa spaar” e rumannan di mas tristeza. Si, el a duna nan chens di drecha nan asuntonan prome cu e bay personalmente cerca nan. Y e rumannan a haci esey pasobra ora Pablo tabata na Macedonia, el a tende di Tito cu su carta en berdad a motiva e rumannan na Corinto pa arepenti, y esey a haci Pablo masha contento.2 Cor. 6:11; 7:5-7.

HESUS TA E GARANTIA

Ora e “superapostelnan” a acusa Pablo di ta un persona cu no ta cumpli cu su palabra, nan lo por tabata kiermen tambe cu e mensahe cu e tabata predica tambe tabata inconfiabel. Pero Pablo a recorda e Corintionan cu ta e mensahe encuanto Hesucristo el a predica na nan. El a bisa nan: “E Yiu di Dios, Cristo Hesus, kende nos, esta, ami, Silvano y Timoteo, a predica na boso, no a bira Si y na mes momento No, sino cu den su caso Si ta Si.” (2 Cor. 1:19) Acaso Hesucristo, esun cu Pablo a imita, tabata un homber inconfiabel? No! Hesus semper a papia berdad, durante henter su bida y su sirbishi na Dios. ( Juan 14:6; 18:37) Si loke Hesus a predica tabata berdad absoluto y fidedigno, apostel Pablo su predicacion tambe tabata confiabel pasobra ta e mesun mensahe el a predica.

No tin ningun duda cu Jehova ta “e Dios di berdad.” (Sal. 31:5, NW) Nos por deduci esey for di loke Pablo a skirbi despues. El a bisa: “Maske cuanto promesa tin di Dios, nan tur a bira Si pa medio di dje”, esta, pa medio di Cristo. Si, debi cu Hesus a keda fiel na Dios tempo cu e tabata riba tera, nos por tin sigur cu Jehova su promesanan ta confiabel. Pablo a sigui bisa: “Pesey ta pa medio di dje [Hesus] tambe nos ta bisa ‘Amen’ pa nos por duna gloria na Dios.” (2 Cor. 1:20) Pues, Hesus ta e “Amen”, of e garantia, cu tur Jehova su promesanan lo cumpli sigur!

Mescos cu Jehova Dios y Hesucristo semper ta papia berdad, Pablo tambe su “si” tabata “si” di berdad. (2 Cor. 1:19) Pues Pablo no tabata un persona inconfiabel, un persona cu tabata haci promesa cu “motibonan egoista.”  (2 Cor. 1:17) Al contrario, Pablo tabata un persona cu a laga Dios su spirito gui’e. (Gal. 5:16) Semper el a trata otro hende bon; semper e tabatin otro hende su bienestar na ­bista. Semper su “si” tabata “si”!

BO “SI” TA “SI”?

Awendia, ta masha normal pa hende cu no ta biba segun normanan biblico priminti algo y despues keda sin cumpli cu ne ora cualkier contratiempo surgi of ora nan haya un opcion mas atractivo. Den e mundo di comercio, no ta tur ora hende su “si” ta “si”, tin biaha ni sikiera ora nan acuerdonan ta preto riba blanco. Hopi hende no ta mira matrimonio, un acuerdo palpabel entre dos persona, como un compromiso di bida largo mas. Al contrario, e cantidad di divorcio cu ta aumentando drasticamente ta mustra bon cla cu hopi hende ta considera voto matrimonial como un promesa di poco importancia cu facilmente bo por kibra.2 Tim. 3:1, 2.

Pero kico di abo? Bo “si” ta “si”? Manera e articulo aki a mustra na cuminsamento, tin biaha nos por haya nos ta cancela un ­afspraak, no pasobra nos ta hende inconfiabel pero debi na un situacion fuera di nos control. Pero, como cristian, nos mester haci nos best pa cumpli cu nos compromiso- of promesanan. (Sal. 15:4; Mat. 5:37) Si bo tin custumber di haci esey, lo bo bira conoci como un persona confiabel, un persona di palabra y cu semper ta papia berdad. (Efe. 4:15, 25; Sant. 5:12) Ora hende realisa cu bo ta un persona confiabel, nan lo ta mas dispuesto pa scucha bo ora bo ta papia cu nan di e berdad tocante Dios su Reino. Pues, laga nos haci sigur pa semper nos “si” ta “si”!

^ par. 7 Un poco tempo despues cu Pablo a skirbi Prome Corintionan, berdad el a biaha bay Macedonia, via Troas. Y ta na Macedonia el a skirbi Segundo Corintionan. (2 Cor. 2:12; 7:5) Y mas despues, el a bay Corinto.