Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2014

E Viuda di Sarepta A Ser Recompensa pa Su Fe

E Viuda di Sarepta A Ser Recompensa pa Su Fe

UN VIUDA pober ta brasa su yiu homber, su unico yiu. E no por kere su bista: Djis un rato prome, e yiu aki tabata morto den su brasa. Pero awor, e viuda ta masha contento pasobra su yiu ta na bida atrobe y ta smile cu ne. Su huesped ta bis’e: “Mira, bo yiu ta bibo.”

E resureccion aki a tuma luga casi 3.000 aña pasa. Bo por lesa e relato aki na 1 Reynan capitulo 17. E huesped tabata Elias, un profeta di Dios. E mama tabata un viuda di e pueblo di Sarepta, pero Bijbel no ta menciona su nomber. E resureccion di su yiu homber ta un suceso cu sigur a fortalece su fe. Segun cu nos ta analisa e ehempel cu e viuda aki a pone, nos lo siña algun les masha importante.

ELIAS TA BAY CERCA UN VIUDA CU FE

Jehova a determina cu lo a bay tin un periodo largo di secura durante e reinado di Acab, kende tabata un rey malbado di Israel. Despues cu Elias a anuncia esaki, Dios a sconde Elias pa Acab y a percura na un manera milagroso pa Elias haya cuminda; Jehova a uza raaf pa hiba pan y carni p’e. Despues, Jehova a bisa Elias: “Lanta, bay Sarepta, cu ta pertenece na Sidon, y keda ayanan; mira, ayanan mi a duna un viuda ordo pa duna bo di come.”1 Rey. 17:1-9.

Ora Elias a yega Sarepta, el a mira un viuda pober ta piki palo. Kisas lo el a puntra su mes: ‘Ta e señora aki mester percura cuminda pa mi? Con lo e por haci esey siendo cu e mes ta asina pober?’ A pesar di cualkier duda cu Elias por tabatin, el a cuminsa papia cu e señora. El a bis’e: “Pa fabor, busca poco awa den un butishi pa mi, pa mi bebe.” Ora e señora tabata bay busca awa, Elias a pidie “trece pida pan” tambe p’e. (1 Rey. 17:10, 11) E viuda no tabatin problema pa duna su bishita algo di bebe, pero pida pan si tabata un problema.

 E viuda a contest’e: “Manera SEÑOR [Jehova] bo Dios ta biba, mi no tin pan, solamente un man di hariña den e comchi y un tiki zeta den e butishi; y mira, mi ta piki algun pida palo pa mi bay paden y prepar’e pa mi cu mi yiu homber, pa nos com’e y muri.” (1 Rey. 17:12) Laga nos para keto un rato na e combersacion aki y wak kico e ta revela.

E viuda a reconoce cu Elias tabata un Israelita, un sirbidor di Jehova. Nos ta compronde esey for di su expresion ‘manera Jehova bo Dios ta biba.’ Ta parce cu aunke e viuda tabata conoce e Dios di Israel, e no tabata conoc’e suficientemente pa bisa ‘mi Dios’ ora el a referi na Jehova. E viuda tabata biba na Sarepta, un pueblito cu tabata “pertenece na” e stad Sidon na Fenicia of cu aparentemente tabata depende di e stad ey. Muy probablemente, tabatin masha hopi adorador di Baal ta biba na Sarepta. No obstante, Jehova a mira algo excepcional den e viuda aki.

Aunke e viuda pober di Sarepta tabata biba meymey di hende cu tabata adora idolo, su echonan a demostra cu e tabatin fe den e Dios di Israel. Jehova a manda Elias cerca e viuda aki pa beneficia tanto e viuda como e profeta mes. Nos por siña un les importante for di esaki.

No ta tur habitante di Sarepta tabata mal hende. E echo cu Jehova a manda Elias cerca e viuda a mustra cu Jehova ta tuma nota di hende di bon curason pero cu ainda no ta Su sirbidor. Si, Jehova “ta acepta tur hende di tur nacion cu ta tem’e y cu ta haci loke ta corecto.”Echo. 10:35.

Cuanto hende den bo teritorio no ta manera e viuda di Sarepta? Aunke nan por ta rondona pa hende cu ta sirbi dios falso, podise nan si ta desea algo mihor. Kisas nan no conoce Jehova mes of kisas nan sa masha poco cos di dje; pesey, nan mester di yudansa pa por acepta adoracion berdadero. Abo ta busca y yuda hende asina?

‘TRAHA UN PAN BUSCUCHI CHIKITO PA MI PROME’

Awor, laga nos para keto un rato y pensa riba loke Elias a pidi e viuda. E viuda a caba di bis’e cu despues cu e prepara cuminda pa e y su yiu, nan lo come y muri. Pero wak kico Elias a bis’e: “No tene miedo; bay, haci manera bo a bisa, ma traha un pan buscuchi chikito for di dje pa mi prome, y trec’e pa mi; y despues bo por traha un pa bo mes y pa bo yiu homber. Pasobra asina e SEÑOR Dios di Israel ta bisa: ‘E comchi di hariña lo no bira bashi, ni e butishi di zeta lo no bira bashi, te dia cu SEÑOR manda awasero riba e superficie di tera.’”1 Rey. 17:11-14.

Den un situacion asina, algun hende lo por a reacciona y bisa: ‘Ablif, duna bo nos ultimo cos di come? Mi mester ta loco!’ Pero e viuda no a reacciona asina. Aunke e no tabata conoce Jehova bon, el a kere Elias y a haci loke el a pidie. Esey si tabata un prueba grandi! Pero, e viuda a tuma un bon decision.

Debi cu e viuda a pone fe den Jehova, e Dios di Elias, Jehova a preserva su bida y esun di su yiu homber

Y Dios no a laga e viuda pober aki desampara. Manera Elias a primintie, Jehova a rende e tiki hariña y zeta cu e tabatin pa asina Elias, e viuda y e viuda su yiu homber por a come te ora e tempo di secura a termina. Si, manera Jehova a bisa mediante profeta Elias, ‘ni e comchi di hariña ni e butishi di zeta no a bira bashi.’ (1 Rey. 17:16; 18:1) Si  e viuda no a haci manera Elias a bis’e, e pan cu el a traha cu e tiki hariña y zeta cu e tabatin sigur lo a resulta di ta su ultimo cuminda. Pero e viuda a desplega fe, a confia den Jehova y a duna Elias cuminda prome.

Un les cu nos por siña for di e relato aki ta cu Dios ta bendiciona hende cu ta pone fe den dje. Pues, si bo pone fe den Jehova ora bo integridad y fe ta ser poni na prueba, Jehova lo yuda bo. Lo e percura pa bo, proteha bo y lo e ta un Amigo cu lo yuda bo trata cu bo prueba.Exo. 3:13-15.

Na 1898, Zion’s Watch Tower a saca e siguiente les for di e relato aki: ‘Como cu e señora tabatin e fe cu a motiv’e pa obedece Dios, el a ser considera digno di haya yudansa di Señor mediante e profeta. Pero si e no a pone fe den Dios, Jehova lo a haya un otro viuda cu si lo kier a haci esey. Esaki ta conta pa nos tambe: Na varios etapa di bida, tin momento cu Señor ta permiti nos pasa den prueba. Si nos pone fe den Dios, lo e bendiciona nos sigur. Pero si nos no hacie, nos lo perde su bendicion.’

Ora nos ta haya nos cu prueba, nos mester busca Dios su guia den e Scritura y den nos publicacionnan basa riba Bijbel. Despues, nos mester actua na harmonia cu e guia cu Jehova ta duna nos maske con dificil esey por ta pa acepta. Jehova sigur lo bendiciona nos ricamente si nos ta actua na harmonia cu e proverbio sabi aki: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”—Prov. 3:5, 6.

‘BO A BIN PA MATA MI YIU?’

E viuda tabata a punto di pasa den un otro prueba di fe. E relato biblico ta bisa: “Despues di e cosnan aki, e yiu homber di e muher, e ama di cas, a bira malo; y su maleza tabata asina grave cu no a keda rosea den dje.” Buscando motibo pa e tragedia aki, e viuda tristo a bisa Elias: “Ta kico mi tin di haci cu bo, o homber di Dios? Bo a bin cerca mi pa trece mi inikidad na memoria y pa mata mi yiu!” (1 Rey. 17:17, 18) Kico e viuda kier a bisa cu e palabranan amargo ey?

Acaso el a corda riba un pica cu el a comete y cu tabata molestia su consenshi? Acaso el a pensa cu morto di su yiu homber tabata castigo di Dios y cu ta Elias a trece morto pa su yiu? Bijbel no ta bisa, pero un cos ta sigur: E viuda no a culpa Dios di ningun inhusticia.

Ora Elias a tende cu e yiu homber di e viuda a muri y cu e viuda tabata pensa cu ta e a causa morto di e yiu, esey lo mester a shock e. Elias a carga e curpa sin bida di e mucha homber y a hib’e den e camber ariba. Y Elias a sclama: “O SEÑOR mi Dios, bo a trece calamidad tambe riba e viuda cerca ken mi ta keda, door di laga su yiu muri?” E profeta lo no por a soporta e pensamento di cu hende lo por a reprocha Jehova su nomber si El a permiti e viuda bondadoso y hospitalario aki sigui sufri. Pesey Elias a suplica Jehova: “O SEÑOR mi Dios, mi ta roga bo, laga bida di e mucha aki bolbe den dje.”1 Rey. 17:20, 21.

“MIRA, BO YIU TA BIBO”

Jehova a scucha Elias su oracion. E viuda a percura pa Su profeta y a pone fe den Dios. Aparentemente, Jehova a permiti e maleza di e mucha homber sigui desaroya, pasobra e tabata sa cu lo e bay resucita e hoben aki—e prome resureccion registra den e Scritura—y cu esaki lo a duna futuro generacionnan speransa. Pesey, ora Elias a roga Jehova, Jehova a lanta e mucha for di morto. Bo por imagina bo con contento e viuda lo a bira ora cu Elias a bis’e: “Mira, bo yiu ta bibo”? E viuda a contesta Elias: “Awor mi sa cu bo ta un homber di Dios, y cu e palabra di SEÑOR den bo boca ta berdad.”1 Rey. 17:22-24.

E relato na 1 Reynan capitulo 17 no ta bisa nada mas tocante e viuda aki. Pero, mirando cu Hesus a papia bon di e viuda aki, nos por conclui cu e señora aki lo a pasa resto di su bida sirbiendo Jehova fielmente. (Luc. 4:25, 26) Su relato ta siña nos cu Dios ta bendiciona hende cu ta yuda Su sirbidornan. (Mat. 25:34-40) E ta duna prueba tambe cu Dios ta percura pa esnan cu ta keda leal na dje hasta den situacion hopi dificil. (Mat. 6:25-34) Es mas, e relato aki ta mustra cu Jehova tin e deseo y e poder pa resucita e mortonan. (Echo. 24:15) Esakinan sigur ta motibonan excelente pa nos keda corda e viuda di Sarepta.