Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2014

Jehova—Nos Mihor Amigo

Jehova—Nos Mihor Amigo

“[Abraham] a ser yama ‘amigo di Jehova.’”SANT. 2:23.

1. Kico nos por haci debi cu nos a ser crea segun e imagen di Dios?

“E MUCHA ey ta mescos cu su tata (of, mama).” Esaki ta un expresion cu hopi bes hende sa uza pa indica cu un mucha ta parce su mayornan of ta refleha cierto caracteristica di nan. Y esey no ta nada straño pasobra tur yiu ta hereda algo di nan tata y nan mama. Jehova, nos Tata celestial, ta e Dunador di bida. (Sal. 36:9) Como su yiunan riba tera, nos tambe ta refleha cierto caracteristicanan di dje te na cierto grado. Por ehempel, debi cu nos a ser crea segun su imagen, nos por rasona, saca conclusion, cera y mantene amistad cu otro persona.Gen. 1:26.

2. Con bin Jehova por bira nos mihor Amigo?

2 Jehova por ta nos mihor Amigo. Un amistad asina por ta posibel debi na Dios su amor pa nos y nos fe den dje y den su Yiu. Hesus a bisa: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.” (Juan 3:16) Nos tin ehempel di hopi persona cu tabatin bon relacion cu Jehova. Laga nos wak kico nos por siña for di dos di nan.

“MI AMIGO ABRAHAM”

3, 4. Dicon Abraham su amistad cu Jehova tabata distinto for di e relacion cu su descendientenan tabatin cu Jehova?

3 Jehova a referi na Abraham, e patriarca y tata di e Israelitanan, como “mi amigo.” (Isa. 41:8) Na 2 Cronicanan 20:7 tambe  Bijbel ta yama Abraham amigo di Dios. Con bin e homber fiel ey por tabatin un bon relacion asina cu su Creador? Esey ta pasobra Abraham a pone fe den Jehova.Gen. 15:6; lesa Santiago 2:21-23.

4 Na principio, Abraham su descendientenan, kendenan a bira e nacion di Israel di antiguedad, tambe tabatin Jehova como nan Tata y Amigo. Pero lamentablemente, nan a perde nan amistad cu Dios. Con bin? Esey ta pasobra nan no a sigui pone fe den e promesanan di Jehova.

5, 6. (a) Con bin Jehova a bira bo Amigo? (b) Ki preguntanan nos mester haci nos mes?

5 Mas bo siña conoce Jehova, mas bo fe den dje ta aumenta y mas bo ta stim’e. Laga nos ban bek na e tempo cu bo a compronde cu Dios ta un Persona real, esta, un persona cu bo por cera un amistad intimo cu ne. Bo a haya sa tambe cu nos tur a nace den pica debi na e desobediencia di Adam. Y bo a compronde cu humanidad en general ta aleha for di Dios. (Col. 1:21) Despues bo a compronde cu nos amoroso Tata celestial no ta un persona cu ta leu for di nos y cu no ta interesa den nos. Y ora nos a siña cu Jehova a sacrifica su Yiu pa nos y a pone fe den e sacrificio ey, nos a cuminsa cultiva un amistad cu Dios.

6 Segun cu nos ta reflexiona riba tur loke nos a siña di Jehova, nos mester puntra nos mes: ‘Mi amistad cu Dios ta birando mas estrecho? Mi ta confia plenamente den mi Amigo stima, Jehova? Mi amor p’e ta aumentando mas y mas?’ Un otro persona di pasado cu tabatin un bon amistad cu Jehova tabata Gideon. Laga nos wak kico nos por siña for di su excelente ehempel pa nos por imit’e.

‘JEHOVA TA PAZ’

7-9. (a) Ki experencia remarcabel Gideon tabatin, y kico tabata resultado di esey? (Wak e prome plachi.) (b) Con nos por bira amigo di Jehova?

7 Hues Gideon a sirbi Jehova durante un tempo dificil despues cu e nacion di Israel a drenta e Tera Priminti. Huesnan capitulo 6 ta conta cu un angel di Jehova a bishita Gideon na Ofra. E tempo ey, nan bisiñanan, esta e Madianitanan, tabata un berdadero menasa pa Israel. Pesey, Gideon no tabata bati trigo den aire liber pero den baki-di-pers-wendruif; asina, tabata facil p’e core sconde e trigo valioso. Gideon a keda sorprendi ora e angel a aparece na dje y a yam’e “guerero balente.” Pesey, Gideon a puntra e angel si Jehova, kende a saca e Israelitanan for di Egipto, realmente lo a bay yuda nan atrobe. Papiando den nomber di e Creador, e angel a priminti Gideon cu Jehova lo a yud’e.

8 Gideon tabata kier sa con lo e por a “libra Israel for di man di Madian.” El a haya un contesta cla: “Siguramente lo mi ta cu bo, y lo bo derota Madian comosifuera ta un homber so.” (Hues. 6:11-16) Sin duda, Gideon lo tabata kier sa con esey lo a tuma luga precies, y pesey el a pidi Dios un señal. For di e combersacion aki nos por compronde cu Gideon no a duda ningun momento so cu Jehova ta un Persona real.

9 Loke a sosode despues a fortalece Gideon su fe y a hal’e mas cerca Dios. Gideon a prepara un cuminda y a sirbi e angel. E angel a cende un candela milagrosamente cu e punta di su garoti y a kima e cuminda completamente. E ora ey, Gideon a compronde cu en berdad ta Jehova a manda e angel. Pesey, tur spanta Gideon a sclama: “Ay, SEÑOR Dios! Pasobra awor mi a mira e angel di SEÑOR cara-cara.” (Hues. 6:17-22) E experencia ey a afecta Gideon su amistad cu Jehova? Di ningun manera! Al contrario, esaki a pone Gideon sintie na paz cu Dios. Nos por compronde esaki for di e nomber cu Gideon a duna e altar cu el a traha na e sitio ey; el a yam’e  “Jehovah-shalom” (NW), cu ta nifica ‘Jehova Ta Paz.’ (Lesa Huesnan 6:23, 24.) Si nos ta medita riba loke Jehova ta haci pa nos tur dia, nos ta realisa cu e ta un berdadero Amigo. Y si nos ta haci oracion regularmente na Dios, mas nos ta sinti nos na paz cu ne y nos amistad cu ne lo bira mas fuerte.

KEN POR ‘BIBA DEN E TABERNAKEL DI JEHOVA’?

10. Segun Salmo 15:3 y 5, kico ta algun rekisito cu nos tin cu cumpli cu ne pa nos por ta amigo di Jehova?

10 Sinembargo, pa nos por bira amigo di Jehova, tin cierto rekisitonan cu nos tin cu cumpli cu ne. Salmo 15 ta un cantica den cua David a indica kico nos tin cu cumpli cu ne pa nos por ‘biba den e tabernakel di Jehova’, esta, pa nos por ta amigo di Dios. (Sal. 15:1) Laga nos enfoca riba dos di e rekisitonan ey: Nos mester evita calumnia y nos mester comporta nos mes na un manera honesto den tur cos. David a bisa cu un persona cu kier biba den e tabernakel di Jehova no mester “calumnia cu su lenga” ni “acepta placa pasa bou di mesa contra hende inocente.”Sal. 15:3, 5.

11. Dicon nos mester evita calumnia?

11 Den un otro salmo, David a duna e spiertamento aki: “Warda bo lenga di maldad.” (Sal. 34:13) Si nos no sigui e conseho aki, nos ta daña nos relacion cu nos Tata celestial. De echo, calumnia ta un marca di identificacion di Satanas, Jehova su gran enemigo. E palabra “Diabel” ta deriva for di un palabra Griego cu ta nifica “calumniador.” Pues, pa nos por tin un bon relacion cu Jehova, nos mester wak bon kico nos ta bisa di otro hende. Nos mester wak specialmente nos actitud pa cu ruman hombernan nombra den congregacion.Lesa Hebreonan 13:17; Judas 8.

12, 13. (a) Dicon nos mester ta honesto den tur cos? (b) Ki efecto nos honestidad por tin riba otro hende?

12 Sirbidornan di Jehova ta conoci pa nan honestidad. Apostel Pablo a skirbi: “Sigui haci oracion pa nos, pasobra nos tin e confianza cu nos tin un consenshi limpi, y nos kier comporta nos mes na un manera honesto den tur cos.” (Heb. 13:18) Como cu nos ta determina pa “comporta nos mes na un manera honesto den tur cos”, nos no ta probecha di nos rumannan den fe. Por ehempel, si tin un ruman ta traha pa nos, nos ta percura pa nos trat’e honestamente y pag’e manera nos a palabra cu ne. Debi cu nos ta cristian, nos ta trata nos trahadornan y tur otro hende honestamente. Y si nos ta traha pa un compañero cristian, nos no ta probecha di e ruman, exigiendo p’e duna nos un trato preferencial.

13 Hopi bes hende cu no ta testigo di Jehova ta expresa nan aprecio pa nos honestidad. Por ehempel, un director di un compania grandi di construccion a ripara cu testigonan ta cumpli cu nan palabra. El a bisa: “Semper boso ta cumpli cu loke boso a priminti.” (Sal. 15:4) Un conducta asina ta yuda nos mantene nos amistad cu Jehova. Es mas, e ta duna alabanza na nos amoroso Tata celestial.

YUDA OTRO HENDE BIRA AMIGO DI JEHOVA

Nos ta yuda otro hende bira amigo di Jehova (Wak paragraf 14, 15)

14, 15. Con nos por yuda hende cu nos topa den sirbishi bira amigo di Jehova?

14 Aunke varios hende cu nos ta topa den sirbishi ta kere cu Dios ta existi, hopi di nan no ta consider’e como nan mihor Amigo. Con nos por yuda nan? Wak e instruccionnan cu Hesus a duna 70 di su discipelnan ora el a manda nan bay predica dos dos: “Unda cu boso drenta un cas, bisa  prome: ‘Paz sea cu e cas aki.’ Y si tin un amigo di paz eynan, boso paz lo keda riba dje. Ma si no tin, boso paz lo bin bek cerca boso.” (Luc. 10:5, 6) Si nos ta amigabel, nos por atrae hende na e berdad. Ora nos topa hende cu ta trata nos malo den sirbishi, nos amabilidad por pone cu e ta calma y ta mas dispuesto pa tende nos otro biaha.

15 Ora nos topa hende hopi religioso of cu ta sigui tradicionnan religioso falso, nos ta keda amigabel y demostra un actitud pacifico. Nos ta extende un bonbini caluroso na tur hende cu ta asisti na nos reunionnan, specialmente na esnan cu no ta contento cu e mundo di awe y cu kier siña mas tocante e Dios cu nos ta adora. Articulonan di e serie “Bijbel Ta Cambia Bida di Hende” ta contene bunita ehempel di personanan asina.

TRAHANDO HUNTO CU NOS MIHOR AMIGO

16. Den ki sentido nos por ta Jehova su amigo y tambe su “compañero di trabou”?

16 Hopi bes, hende cu ta traha hunto ta bira bon amigo di otro. Tur hende cu ta dedica na Jehova tin e privilegio di ser considera como su amigo y su “compañero di trabou.” (Lesa 1 Corintionan 3:9.) Segun cu nos ta participa den e trabou di predica y di haci discipel, nos ta siña mas di e maraviyoso cualidadnan di nos Tata celestial. Nos ta mira tambe con su spirito santo ta yuda nos cumpli cu nos asignacion di predica e bon noticia.

17. Den ki manera e alimento spiritual cu nos ta ricibi na nos asamblea- y congresonan ta demostra cu Jehova ta nos Amigo?

17 Mas nos participa den e trabou di haci discipel, mas estrecho nos amistad cu Jehova ta bira. Por ehempel, nos ta mira con Jehova ta evita cu opositornan ta para e trabou. Pensa riba e ultimo añanan. Bo no ta mira bon cla con Dios ta guia nos? Nos ta keda asombra di e manera cu e ta sigui percura cuminda spiritual na abundancia pa nos. Nos asamblea- y congresonan ta demostra cu nos amoroso Tata ta compronde kico ta nos problemanan y kico nos tin mester. Den un carta cu un famia a expresa nan aprecio pa un congreso, nan a skirbi: “E programa a conmove nos curason. Nos a sinti cuanto Jehova ta stima cada un di nos y cu e kier pa nos tin exito.” Despues cu un pareha casa di Alemania a asisti na un congreso special na Irlanda, nan a expresa nan aprecio pa e manera caluroso cu e rumannan a ricibi nan y trata nan eynan. Ademas, nan a bisa: “Pero e personanan cu mas nos ta gradici ta Jehova y su Rey Hesucristo. Nan a invita nos pa forma parti di un pueblo cu realmente ta uni. E pueblo di Jehova no ta djis papia tocante union; nos ta disfruta di esaki tur dia. Nos experencianan en  conexion cu e congreso na Dublin semper lo recorda nos cu nos tin e precioso privilegio di por sirbi nos gran Dios hunto cu boso tur.”

AMIGONAN TA COMUNICA CU OTRO

18. Ki preguntanan relaciona cu nos comunicacion cu Jehova nos mester haci nos mes?

18 Un amistad ta bira mas estrecho ora tin bon comunicacion. Awendia, hende ta uza rednan social y mensahenan via telefon celular masha hopi pa comunica. Pero con ta bayendo cu nos comunicacion cu Jehova, nos mihor Amigo? Ta berdad cu e ta “scucha oracion.” (Sal. 65:2) Pero cuanto biaha nos ta tuma iniciativa pa papia cu ne?

19. Kico por yuda nos si nos tin dificultad pa habri nos curason pa nos Tata celestial?

19 Algun sirbidor di Dios tin problema pa habri nan curason y expresa nan emocionnan di mas profundo. Sinembargo, ta esey ta loke Jehova kier pa nos haci ora nos ta haci oracion. (Sal. 119:145; Lam. 3:41) Si nos tin dificultad pa expresa nos sintimentonan, tin yudansa pa nos. Pablo a bisa e cristiannan na Roma: ‘Pasobra nos no sa kico nos mester pidi den oracion, e spirito mes ta boga pa nos ora nos ta keha sin expresa palabra. Ma esun cu ta rista curason sa kico e spirito kier, pasobra e spirito ta boga di acuerdo cu e boluntad di Dios pa e santonan.’ (Rom. 8:26, 27) Si nos ta medita riba e palabranan registra den e bukinan di Bijbel manera Job, Salmo y Proverbionan, nos ta siña expresa nos sintimentonan di mas profundo na Jehova.

20, 21. Ki consuelo e palabranan di Pablo na Filipensenan 4:6 y 7 ta duna nos?

20 Ora nos haya nos cu situacionnan angustioso, laga nos haci caso di e conseho cu Pablo a duna e Filipensenan. El a bisa nan: “No sea ansha tocante nada; mas bien, den tur cos, pa medio di oracion y suplica hunto cu gradicimento, laga Dios sa kico ta boso peticionnan.” Ora nos tin un bon comunicacion asina cu nos mihor Amigo, nos por haya berdadero consuelo pasobra Pablo a sigui bisa: “E paz di Dios cu ta surpasa tur comprondemento lo proteha boso curason y boso mente pa medio di Cristo Hesus.” (Flp. 4:6, 7) Laga nos semper ta agradecido pa e “paz di Dios” cu realmente ta proteha nos curason y mente.

Con oracion ta fortalece nos amistad cu Dios? (Wak paragraf 21)

21 Oracion ta yuda nos cultiva un amistad cu Jehova. Pues, laga nos “haci oracion constantemente.” (1 Tes. 5:17) E articulo aki tambe ta yuda nos fortalece e bunita amistad cu nos tin cu Dios y nos determinacion pa cumpli cu su rekisitonan. Ademas, laga nos tuma tempo pa medita riba e bendicionnan cu nos ta disfruta di dje pasobra Jehova realmente ta nos Tata, nos Dios y nos Amigo.