Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  February 2014

Pregunta di Lector

Pregunta di Lector

Ki motibo e Hudiunan di prome siglo tabatin pa ta “den expectativa” pa yegada di e Mesias?

Den tempo di Juan Bautista, “e pueblo tabata den expectativa di Cristo, y nan tur tabata rasona den nan curason tocante Juan: ‘Acaso e ta e Cristo?’” (Luc. 3:15) Dicon e Hudiunan tabata spera e Mesias den e tempo ey? Wel, tin varios motibo.

Pa di prome, despues cu Hesus a nace, Jehova a manda un angel cerca algun wardador di carne cu tabata cuidando nan tounan den cunucu den bisindario di Betlehem. E angel a bisa nan: “Awe den e stad di David a nace esun cu lo ta boso Salbador, kende ta Cristo, e Señor.” (Luc. 2:8-11) Despues di esey, “un multitud di angel” a join ‘e angel ey, y hunto nan tabata alaba Dios y bisa: * “Gloria na Dios cu ta den cielo, y paz riba tera entre hende cu e ta aproba.”’Luc. 2:13, 14.

E noticia ey sigur a haci un gran impacto riba e humilde wardadornan ey. Mesora nan a sali rumbo pa Betlehem, y ora nan a haya Jose y Maria y a mira Hesus, e yiu chikito, “nan a conta loke e angel a bisa nan tocante e yiu aki.” “Tur hende cu a tende e cosnan cu e wardadornan di carne a conta nan a keda asombra.” (Luc. 2:17, 18) E expresion “tur hende cu a tende” ta laga nos compronde cu e wardadornan a conta mas hende, fuera di Jose cu Maria, e noticia tocante Cristo. Anto tanto na caminda pa bay cas bek como ora nan a yega nan pueblo, e wardadornan a sigui “glorifica Dios y alab’e pa tur loke nan a tende y mira, precies manera el a laga nan sa.” (Luc. 2:20) No tin duda, e wardadornan ey no a tene e bon noticia tocante Cristo pa nan mes!

Di dos motibo ta loke a pasa ora Maria a hiba su prome yiu homber, Hesus, Jerusalem pa present’e na Jehova, manera e Ley di Moises ta manda. Na e ocasion ey, profeta Ana a “cuminsa gradici Dios y papia tocante e mucha cu tur esnan cu tabata spera e liberacion di Jerusalem.” (Luc. 2:36-38; Exo. 13:12) Asina e noticia tocante e yegada di e Mesias a sigui plama.

E di tres motibo tin di haber cu ‘algun astrologo di Oriente cu a bin Jerusalem’ mas despues. Nan a puntra: “Na unda esun cu a nace como rey di e Hudiunan ta? Pasobra nos a mira su strea ora nos tabata na Oriente, y nos a bin pa rindi homenahe na dje.” (Mat. 2:1, 2) Ora “Rey Herodes y henter Jerusalem a tende esaki, nan a bira tur aribabou. Y el a reuni tur sacerdote principal y escriba di e pueblo y a  cuminsa puntra nan na unda e Cristo lo mester a nace.” (Mat. 2:3, 4) Pues, hopi hende a haya e noticia cu e Mesias, cu e Hudiunan tabata spera, a yega! *

E texto di Lucas 3:15, cu nos a cita anteriormente, ta indica cu algun Hudiu a pensa cu ta Juan Bautista tabata e Cristo. Pero Juan mes a descarta e idea ey, bisando: “Esun cu ta bin despues di mi ta mas fuerte cu mi, y mi no ta digno di kita su sandalia. E lo batisa boso cu spirito santo y cu candela.” (Mat. 3:11) Juan su comentario sin duda a haci e Hudiunan mas ansioso pa yegada di e Mesias.

Awor, por ta posibel cu e Hudiunan di prome siglo a uza e profecia di 70 siman, cu ta registra na Daniel 9:24-27, pa calcula na ki tempo e Mesias lo a yega? Kisas, pero nos no por confirma esey. Echo ta cu den tempo di Hesus tabatin hopi interpretacion contradictorio encuanto e 70 simannan ey, y niun di nan no ta cuadra cu nos comprondemento actual. *

Por ehempel, e Esenenan, ampliamente conoci como un secta hudiu, tabata siña hende cu despues di un periodo di casi 490 aña dos Mesias lo a presenta. Pero nos no sa sigur si e Esenenan a uza e profecia di Daniel pa yega na e calculacion ey. Hasta si esey tabata e caso, ta dificil pa kere cu e ideanan di un grupo asina, esta, un grupo cu tabata isola nan mes for di comunidad, por tabatin asina tanto influencia riba e Hudiunan.

Durante siglo 2 despues di Cristo, algun Hudiu tabata kere cu e 70 simannan tabata referi na e periodo for di destruccion di e prome tempel na aña 607 prome cu Cristo te na destruccion di e di dos tempel na aña 70 di prome siglo. Otronan tabata kere cu e profecia ey a cumpli den siglo 2 prome cu Cristo, durante e epoca di e Macabeonan. Pues, no tabatin un sistema pa a calcula e 70 simannan ey cu tur e Hudiunan tabata di acuerdo cu ne.

Si e hendenan den prome siglo a compronde e profecia di 70 siman corectamente, muy probablemente e apostelnan y otro cristiannan di prome siglo lo a uza e profecia aki pa proba cu ta Hesucristo ta e Mesias priminti y cu el a yega precies na e tempo stipula. Pero nos no tin prueba cu e cristiannan di prome siglo a haci esey.

Ata aki un otro factor pa tene cuenta cu ne: Varios biaha, e escritornan di Evangelio a referi na cierto profecianan den e Scritura Hebreo cu a cumpli den Hesucristo. (Mat. 1:22, 23; 2:13-15; 4:13-16) Sinembargo, ni un di nan no a uza e profecia di 70 siman en conexion cu Hesus.

Pues como resumen, nos por bisa: Nos no sa sigur cu e hendenan den tempo di Hesus a compronde e profecia di 70 siman corectamente. No obstante, e Evangelionan ta duna otro motibonan valido pakico e hendenan tabata “den expectativa” pa yegada di e Mesias.

^ par. 4 Tuma nota cu Bijbel no ta bisa cu e angelnan tabata canta na Hesus su nacemento pero cu nan tabata alaba Dios.

^ par. 7 Kisas bo ta puntra: ‘Con bin e astrologonan a relaciona e “strea” cu nan a mira den Oriente cu e nacemento di e “rey di e Hudiunan”?’ Acaso nan a tende e noticia tocante Hesus su nacemento ora nan tabata biaha den Israel?

^ par. 9 Pa un splicacion di nos comprondemento actual tocante e profecia di 70 siman, wak Presta Atencion na e Profecia di Daniel!, capitulo 11.