Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2014

Tuma Decisionnan Sabi den Bo Hubentud

Tuma Decisionnan Sabi den Bo Hubentud

‘Tanto yoncuman como birgen, alaba e nomber di Jehova.’SAL. 148:12, 13.

1. Ki experencia maraviyoso hopi hoben cristian ta disfruta di dje actualmente?

NOS ta bibando den un tempo historico. For di tur nacion, miyones di hende ta acudiendo na adoracion berdadero. Esey ta algo nunca bisto. (Rev. 7:9, 10) Hopi hoben ta gosa di experencianan emocionante segun cu nan ta yuda hende compronde e berdadnan cu tin den Bijbel, berdadnan cu por salba nan bida. (Rev. 22:17) Algun di e hobennan aki ta studia Bijbel cu hende y ta yuda nan drecha e calidad di nan bida. Otro hobennan, yen di entusiasmo, ta siña un idioma nobo pa nan por predica e bon noticia den teritorionan di otro idioma. (Sal. 110:3; Isa. 52:7) Con abo por haya mas satisfaccion den e trabou aki cu e pueblo di Jehova ta haciendo?

2. Con e ehempel di Timoteo ta mustra cu Jehova ta dispuesto pa confia hobennan cu responsabilidad? (Wak e prome plachi.)

2 Como hoben, bo por tuma decisionnan awor cu despues por habri porta pa oportunidadnan maraviyoso den e sirbishi di Jehova. Un ehempel di esaki ta Timoteo di Listra. Ta bisto cu el a tuma decision sabi cu a habri caminda pa e bira un misionero ora e tabatin rond di 20 aña. (Echo. 16:1-3) Kisas djis un par di luna despues di esey, apostel Pablo a pidi Timoteo p’e bay yuda e congregacion nobo na Tesalonica, caminda nan tabata  persigui e rumannan violentamente. Pablo a hay’e obliga ta bay for di eynan, pero e tabatin confianza cu Timoteo lo a fortalece e rumannan. (Echo. 17:5-15; 1 Tes. 3:1, 2, 6) Bo por imagina con emociona Timoteo lo tabata ora el a ricibi e tarea ey!

E DECISION DI MAS IMPORTANTE CU BO POR TUMA

3. Cua ta e decision di mas importante cu bo por tuma den bida, y ki ora lo bo por tum’e?

3 E tempo pa tuma decision importante ta awor: den bo hubentud. Pero tin un decision cu ta esun di mas importante cu tur. Cua esey ta? Esey ta bo decision di sirbi Jehova. Ki ora ta e mihor momento pa tuma e decision ey? Jehova ta bisa: “Corda ... riba bo Creador den e dianan di bo ­hubentud.” (Ecl. 12:1) E unico manera aceptabel pa “corda” riba Jehova ta di sirbie cu henter bo curason. (Deu. 10:12) Esey ta e ­decision di mas importante cu bo por tuma. Lo e influencia e resto di bo bida.Sal. 71:5.

4. Cua decisionnan importante lo tin un efecto riba e manera cu bo ta sirbi Dios?

4 Claro cu bo decision pa sirbi Jehova no ta e unico decision cu lo influencia bo futuro. Lo bo tin cu dicidi tambe si bo kier casa, cu ken bo kier casa y con lo bo kier gana bo pan di cada dia. Esakinan ta decisionnan importante, pero lo ta sabi di bo parti pa dicidi prome si bo kier sirbi Jehova cu henter bo curason of no. (Deu. 30:19, 20) Dicon? Pasobra tur e decisionnan ey tin di haci cu otro y tin efecto riba otro. Loke bo dicidi tocante matrimonio y trabou lo tin efecto riba e manera cu bo ta sirbi Dios. (Compara cu Lucas 14:16-20.) Di otro banda, bo deseo di sirbi Dios lo tin efecto riba e decisionnan cu bo ta tuma relaciona cu matrimonio y trabou. Pues, dicidi prome riba e cosnan di mas importante.Flp. 1:10.

KICO LO BO HACI DEN BO HUBENTUD?

5, 6. Duna un ehempel cu ta mustra con ora bo tuma e decisionnan corecto, esey por habri porta pa oportunidadnan maraviyoso den e sirbishi di Jehova. (Wak tambe e articulo “Un Decision Cu Mi A Tuma na Mucha”, den e revista aki.)

5 Unabes bo a dicidi cu bo ta sirbi Jehova, busca pa sa kico e kier pa bo haci, y e ora ey bo por dicidi con lo bo sirbie. Un ruman Japones a skirbi: “Un biaha, tempo cu mi tabatin 14 aña, mi tabata den sirbishi ta predica cu un anciano y el a ripara cu mi no tabata gusta sirbishi dje hopi ey. Na un manera suave el a bisa mi: ‘Yuichiro, bay cas. Sinta na bo lessenaar y pensa bon riba loke Jehova a haci pa bo.’ M’a haci manera el a bisa mi. M’a sigui pensa y haci oracion pa varios dia. Pocopoco, mi actitud a cambia. No a dura hopi cu m’a realisa cu mi tabata disfruta di sirbi Jehova. Mi tabata gusta lesa tocante e misioneronan, y m’a cuminsa pensa riba un manera pa haci mas pa Jehova.”

6 Yuichiro a sigui conta: “M’a cuminsa tuma cierto decision cu algun dia lo a yuda mi sirbi Jehova den un otro pais. Por ehempel, mi a dicidi di bay un les di Ingles. Ora m’a caba scol, m’a scoge trabou part-time, dunando les di Ingles, ya asina mi por a traha pionero. Ora mi tabatin 20 aña, mi a cuminsa siña e idioma di Mongolia y a haya chens di bishita un grupo di publicador di e idioma ey. Dos aña despues, na 2007, m’a bishita Mongolia. M’a bay predica cu algun di e pioneronan eynan y a mira cu hopi hende tabata busca e berdad. E ora ey m’a haya gana di bay biba eynan pa yuda. M’a bay bek Japon pa regla mi cosnan, y for di april 2008, mi ta trahando pionero na Mongolia. Bida no ta facil akinan. Pero e hendenan ta aceptando e bon noticia, y mi por yuda nan hala cerca Jehova. Mi ta haya cu loke mi a scoge ta e mihor manera di biba.”

7. Cua ta algun decision cu cada un di nos mester tuma pa nos mes, y kico nos por siña for di Moises?

 7 Cada hende mester dicidi pa nan mes con nan lo uza nan bida como un testigo di Jehova. (Jos. 24:15) Nos no por bisa bo si bo mester casa ni cu ken bo mester casa. Tampoco nos no por bisa bo ki trabou bo mester scoge. Lo bo scoge un trabou cu bo no tin mester di hopi scol p’e? Algun di boso, hobennan, ta biba den barionan pober; otronan ta biba den areanan rico. Boso personalidad, habilidad, educacion, interes y metanan spiritual ta hopi diferente for di otro. Boso bida probablemente ta hopi diferente for di otro, mescos cu Moises su bida tabata hopi diferente for di bida di e otro hobennan Hebreo na Egipto di antiguedad. Como yiu di e yiu muher di Farao, Moises tabata rico, mientras cu e hobennan Hebreo tabata catibo. (Exo. 1:13, 14; Echo. 7:21, 22) Mescos cu abo, nan tabata biba den un tempo historico. (Exo. 19:4-6) Pero cada un di nan mester a dicidi kico nan kier a haci cu nan bida. Moises a tuma e decision corecto.Lesa Hebreonan 11:24-27.

8. Unda hobennan por haya yudansa pa tuma bon decision?

8 Jehova ta yuda bo tuma decision sabi den bo hubentud. Con e ta haci esey? Wel, e ta duna bo conseho den forma di principionan di Bijbel cu bo por uza den cualkier circunstancia. (Sal. 32:8) Anto si bo no sa sigur con pa aplica e principionan aki den bo bida, bo por pidi bo mayornan cristian of e ancianonan di congregacion pa yuda bo. (Prov. 1:8, 9) Laga nos analisa tres principio biblico cu por yuda bo tuma decision sabi cu lo tin un bon efecto riba bo futuro.

TRES PRINCIPIO BIBLICO CU POR YUDA BO TUMA BON DECISION

9. (a) Con Jehova ta mustra dignidad na nos? (b) Con lo bo beneficia si bo ‘busca prome e Reino’?

9 Busca prome e Reino y e husticia di Dios. (Lesa Mateo 6:19-21, 24-26, 31-34.) Jehova ta mustra dignidad na nos door di duna nos boluntad liber. Bo mes por dicidi kico bo ta haci cu bo tempo. E no ta bisa bo cuanto tempo di bo hubentud bo mester dedica na e trabou di predica. Pero Hesus a siña nos cu ta importante pa busca prome e Reino. E manera cu bo ta pone na practica loke Hesus a bisa lo duna bo hopi oportunidad pa demostra bo amor pa Jehova, bo interes den bo prohimo y bo gratitud pa e speransa di bida eterno. Bo decisionnan relaciona cu matrimonio y trabou ta demostra cu bo ta mas preocupa tocante bo necesidadnan material, of nan ta revela cu bo ta busca prome e Reino y e husticia di Dios?

10. Kico a haci Hesus feliz, y kico abo mester haci pa bo ta feliz?

10 Sirbi otro hende pa bo ta feliz. (Lesa Echonan 20:20, 21, 24, 35.) Esey ta un principio basico di bida cu Hesus a siña nos. E mes tabata un persona hopi feliz pasobra el a biba segun e principio ey. El a haci e boluntad di su Tata, en bes di loke e mes tabata desea, y a sirbi otro hende door di comparti e bon noticia cu nan. (Luc. 10:21; Juan 4:34) Podise bo mes tambe a yega di sinti e felicidad ey ora bo a yuda otro hende. Pues, ora bo tin cu tuma decision grandi den bida, lo bo haci bo mes feliz—y tambe Jehova Dios—si bo basa nan riba e principionan cu Hesus a siña hende.—Prov. 27:11.

11. Dicon Baruk a perde su goso, y ki conseho Jehova a dun’e?

11 Nos felicidad di mas grandi ta bin di sirbi Jehova. (Prov. 16:20) Aparentemente, Baruk, secretario di Jeremias, a lubida esey. Dado momento, e no tabata disfruta di e sirbishi di Jehova mas. Jehova a bis’e: “Bo ta busca cosnan grandi pa bo mes? No busca eseynan; pasobra mira, mi ta bay trece desaster riba tur carni, ... ma lo mi duna bo bo bida como botin, na tur luga cu bo bay.” (Jer. 45:3, 5) Kico bo ta kere lo a haci Baruk feliz: haci loke e tabata  kier y perde su bida, of haci loke Jehova tabata kier y sobrevivi e destruccion di Jerusalem?Sant. 1:12.

12. Ki decision Ramiro a tuma cu a yud’e hiba un bida feliz?

12 Un ruman homber cu ta sintie feliz sirbiendo otro hende ta Ramiro. El a conta: “Mi ta bin di un famia pober cu ta biba den un pueblito den e Seronan di Andes. Pues, ora mi ruman homber mas grandi a ofrece pa paga pa mi bay universidad, esey tabata un gran oportunidad. Pero net mi a batisa como testigo di Jehova, y mi a ricibi un otro oferta: Un pionero a invita mi pa bay predica hunto cu ne den un stad chikito. Mi a bay eynan, siña pela cabey y a habri un barberia pa cria mi mes. Hopi hende den e stad ey tabata acepta estudio di Bijbel. Despues, mi a bay un congregacion di idioma indigena cu nan a caba di forma. Mi tin awor 10 aña den sirbishi di tempo completo, y ningun otro profesion lo por a duna mi e goso cu mi ta sinti ora mi ta yuda hende studia Bijbel den nan mes idioma.”

Ramiro ta sirbi Jehova for di su hubentud, y e ta felis (Wak paragraf 12)

13. Dicon ta bon pa sirbi Jehova plenamente den bo hubentud?

13 Sirbi Jehova cu goso den bo hubentud. (Lesa Eclesiastes 12:1.) No pensa cu bo mester tin un bon trabou prome cu bo por cuminsa sirbi Jehova plenamente. E mihor tempo pa cuminsa ta den bo hubentud. Dicon? Pasobra hopi hoben tin masha poco responsabilidad di famia y nan tin e salud y energia pa acepta asignacionnan dificil. Kico lo bo tin gana di haci pa Jehova den bo hubentud? Kisas bo tin meta di traha pionero, of lo bo kier predica na hende di otro idioma. Podise bo por sirbi mas tanto den bo congregacion actual. Sea loke sea ta bo meta den e sirbishi di Dios, lo bo tin cu haya un manera pa gana bo pan di cada dia. Puntra bo mes: ‘Ki trabou lo mi scoge, y cuanto scol lo mi mester pa esey?’

 CON BO POR UZA PRINCIPIO BIBLICO PA TUMA DECISION SABI?

14. Kico bo tin cu tene cuidou cu ne ora bo ta plania pa futuro?

14 E tres principionan di Bijbel cu nos a considera por yuda bo dicidi ki tipo di trabou lo ta bon pa bo. Casi sigur bo mentornan na scol of cierto departamento di gobierno sa ki trabou tin disponibel den bo area of caminda bo kier bay sirbi. Nan informacion por ta util, pero bo tin cu tene cuidou. Hende cu no ta stima Jehova lo por trata di sembra amor pa mundo den bo curason. (1 Juan 2:15-17) Segun cu bo ta considera e cosnan cu mundo ta ofrece, no lubida cu bo curason por gaña bo facilmente.Lesa Proverbionan 14:15; Jer. 17:9.

15, 16. Ken por duna bo bon conseho tocante trabou?

15 Unabes bo sa ki tipo di trabou bo por haya, bo mester di bon conseho. (Prov. 1:5) Ken por yuda bo uza principio biblico pa evalua bo opcionnan di trabou? Scucha e hendenan cu stima Jehova, cu stima bo y cu conoce abo y bo circunstancianan bon. Nan lo yuda bo ser honesto cu bo mes y analisa bo aptitudnan (kico ta bo talentonan) y bo motivacion (kico realmente bo kier haci). Loke nan bisa bo kisas lo yuda bo reevalua bo metanan. Si bo mayornan ta stima Jehova, esey por ta un gran yudansa pa bo. Ademas, e ancianonan di bo congregacion ta hombernan cu experencia cu por duna bo bon conseho. Bo por papia tambe cu e pioneronan y e superintendentenan biahero. Puntra nan dicon nan a dicidi di drenta sirbishi di tempo completo. Con nan a cuminsa traha pionero, y con nan ta cria nan mes? Ki satisfaccion nan ta haya for di nan sirbishi?—Prov. 15:22.

16 E rumannan cu realmente conoce bo bon por duna bo conseho sabi. Por ehempel, supone cu e motibo principal pakico bo kier stop di bay scol secundario y cuminsa traha pionero ta pasobra bo tin cu traha duro na scol y bo no ta gusta esey. Un persona cu ta stima bo kisas ta mira bon cla dicon bo kier kita for di scol, y e por yuda bo compronde cu si bo persevera y caba scol, bo ta siña pa no entrega facilmente. Anto esey ta un cualidad necesario si bo kier sirbi Jehova plenamente.Sal. 141:5; Prov. 6:6-10.

17. Ki tipo di trabou nos mester evita?

17 Tur hende cu ta sirbi Jehova lo haya nan cu peligernan spiritual, es decir, situacionnan cu por debilita nan fe y aleha nan for di Jehova. (1 Cor. 15:33; Col. 2:8) Pero algun tipo di trabou por ta mas peligroso pa bo fe cu otro. Tin ruman a perde nan fe despues cu nan a scoge cierto tipo di trabou. Kisas bo conoce algun di nan. (1 Tim. 1:19) Lo ta sabi anto pa evita cualkier tipo di trabou cu lo por daña bo amistad cu Jehova.—Prov. 22:3.

GOSA DI E PRIVILEGIO DI TA UN HOBEN CRISTIAN

18, 19. Kico bo por haci si bo no tin e deseo di sirbi Jehova?

18 Si bo a cultiva e deseo di sirbi Jehova den bo curason, gosa di e oportunidadnan cu bo tin bo dilanti como un sirbidor di Dios hoben. Tuma decisionnan cu lo yuda bo sirbi Jehova cu goso den e tempo emocionante aki.Sal. 148:12, 13.

19 Di otro banda, kico bo mester haci si bo no tin e deseo di sirbi Jehova? Sigui haci esfuerso pa bo fe den Jehova bira mas fuerte. No entrega! Despues cu apostel Pablo a describi e esfuerso cu el a haci pa sigui un rumbo cu Dios lo a bendiciona, el a skirbi: “Si den cualkier sentido boso ta pensa di otro manera, Dios lo revela e actitud corecto na boso. En todo caso, te asina leu cu nos a progresa, laga nos sigui cana na un manera ordena den e mesun caminda aki.” (Flp. 3:15, 16) Sigui medita riba Dios su amor y su conseho sabi. Jehova ta esun cu por yuda bo tuma decision sabi den bo hubentud. Ningun hende por duna bo mihor conseho cu Jehova.