Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2014

Sirbi Jehova Prome cu e Dianan Malo Bin

Sirbi Jehova Prome cu e Dianan Malo Bin

“Corda ... riba bo Creador.”ECL. 12:1.

1, 2. (a) Ki conseho Jehova a inspira Salomon pa duna hobennan? (b) Dicon cristiannan di 50 y pico aña, y mas grandi, tambe lo mester ta interesa den e conseho di Salomon?

JEHOVA a inspira Rey Salomon pa bisa hobennan: “Corda ... riba bo Creador den e dianan di bo hubentud, prome cu e dianan malo bin.” Kico e tabata kiermen cu “e dianan malo”? Esaki ta referi na e dianan di biehes. Salomon a uza palabranan poetico pa describi e dificultadnan di biehes: man cu ta tembla, pia cu ta nenga, djente cu ta cay, wowo cu ta bira scur, horea cu no ta tende bon, cabey blanco y lomba dobla. Un hende no tin nodi warda te ora e yega na e etapa ey di su bida p’e cuminsa sirbi Jehova.Lesa Eclesiastes 12:1-5.

2 Hopi cristian di 50 y pico aña, y mas grandi, ainda tin basta energia. Kisas nan tin un poco cabey blanco, pero probablemente nan salud no ta dje malo ey manera Salomon a describi. Acaso e cristiannan mas grandi aki por beneficia di e conseho inspira cu Salomon a duna hobennan, esta, di ‘corda riba nan  Creador’? Kico exactamente e conseho ey ta nifica?

3. Kico ta nifica ‘corda riba bo Creador’?

3 Podise nos tin basta aña ta sirbi Jehova, pero de bes en cuando ta bon pa nos para keto un rato y pensa riba con magnifico nos Creador ta. Bida ta masha ­impresionante. E diseño di creacion ta asina complica cu hende no por comprond’e completamente. Jehova a traha un variedad asina grandi di cosnan maraviyoso cu tin masha hopi manera cu nos por disfruta di bida. Ora nos medita riba e creacion di Jehova, nos ta haya mas aprecio pa su amor, su sabiduria y su poder. (Sal. 143:5) Pero ‘corda riba nos Creador’ ta nifica tambe cu nos ta reflexiona riba nos obligacionnan pa cu ne. Ora nos medita riba e cosnan ey, nos ta bira mas determina pa demostra nos gratitud na nos Creador y haci tur loke nos por den su sirbishi tanten cu nos ta na bida.Ecl. 12:13.

OPORTUNIDADNAN UNICO ORA NOS TA MAS GRANDI

4. Ki pregunta cristiannan cu tin hopi aña di experencia por haci nan mes, y dicon?

4 Si bo tin hopi aña di experencia como adulto, haci bo mes e pregunta importante aki: ‘Kico lo mi haci cu mi bida awor, mientras cu ainda mi tin forsa y energia?’ Como un cristian cu experencia, bo tin oportunidadnan cu otro hende no tin. Por ehempel, bo por siña rumannan mas jong loke bo a siña for di Jehova. Bo por comparti cu otro hende e experencianan maraviyoso cu bo tabatin den bo sirbishi na Dios y asina fortalece nan fe. Rey David a pidi Dios dun’e oportunidad pa haci esey. El a skirbi: “O Dios, bo a siña mi for di mi hubentud ... Y hasta ora mi bira bieu, cu cabey blanco, o Dios, no bandona mi, te ora mi declara bo poder na e generacion aki, bo poder na tur esnan cu ta bin.”Sal. 71:17, 18.

5. Con cristiannan di un poco mas edad por comparti loke nan a siña cu esnan mas jong?

5 Con lo bo por comparti e sabiduria cu bo a haya a traves di añanan? Kisas bo por invita rumannan mas jong na bo cas pa nan por tin un poco asociacion edificante. Of bo por pidi nan traha hunto cu bo den sirbishi di veld y laga nan mira con bo ta disfruta di bo sirbishi na Jehova. Eliu di antiguedad a bisa: “Edad mester papia, y cantidad di aña mester declara sabiduria.” (Job 32:7) Apostel Pablo a urgi muhernan cristian pa anima otro hende mediante nan ehempel y palabra. El a skirbi: ‘Muhernan di mas edad mester ta maestra di loke ta bon.’Tito 2:3.

LOKE BO POR HACI PA YUDA OTRO HENDE

6. Dicon nos tin mester di rumannan cu tin hopi aña di experencia?

6 Si bo ta un cristian cu experencia, tin hopi cos cu bo por haci pa yuda otro rumannan. Pensa un rato riba e cosnan cu bo ta compronde awor cu bo no tabata sa un 30 of 40 aña pasa. Bo sa con pa aplica principionan di Bijbel den varios situacion den bida. Sin duda, bo tin e habilidad di touch curason di hende cu e berdad di Bijbel. Si bo ta un anciano, bo sa con pa yuda rumannan cu a tuma un paso robes. (Gal. 6:1) Kisas bo a siña con pa supervisa actividadnan di congregacion, departamentonan di asamblea of construccion di Salon di Reino. Of bo sa con pa anima dokternan pa uza tratamento cu no ta rekeri uzo di sanger. Hasta si bo no tin hopi tempo den e berdad, bo tin experencia di bida, y esaki ta algo valioso. Por ehempel, bo a cria yiu? Esey ta un cos cu sigur a yuda bo desaroya habilidadnan hopi util. Cristiannan di mas edad por ta di gran balor pa e pueblo di Jehova pasobra nan por siña, guia y fortalece e rumannan.Lesa Job 12:12.

7. Ki entrenamento util cristiannan di mas edad por duna esnan mas jong?

 7 Den ki manera mas lo bo por uza bo habilidadnan pa yuda otro rumannan? Kisas bo por mustra esnan mas jong con pa cuminsa y dirigi un estudio di Bijbel. Si bo ta un ruman muher, lo bo por yuda mamanan jong siña con pa keda activo den e sirbishi di Jehova mientras cu nan ta cuida nan yiunan chikito. Si bo ta un ruman homber, lo bo por siña e mucha hombernan con pa duna parti cu entusiasmo y con nan por ta mas efectivo como predicador di e bon noticia. Lo bo por mustra nan con bo ta anima rumannan di edad avansa ora bo bishita nan. Hasta si bo no tin e forsa manera antes, bo tin bon oportunidad pa entrena e rumannan mas jong. E Palabra di Dios ta bisa: “Gloria di hende jong ta nan forsa, y honor di hende bieu ta nan cabey blanco.”—Prov. 20:29.

SIRBI CAMINDA TIN MESTER DI MAS PREDICADOR

8. Kico apostel Pablo a haci ora el a bira mas grandi?

8 Apostel Pablo a keda hopi ocupa den e sirbishi di Jehova hasta ora el a bira mas grandi. Pa ora el a sali for di prizon na Roma, rond di aña 61 di prome siglo, el a sirbi como misionero pa basta aña caba y a pasa den hopi prueba. Lo e por a scoge pa hiba un bida mas trankil y sigui predica na Roma. (2 Cor. 11:23-27) E rumannan na Roma sigur lo a keda hopi contento si el a keda cerca nan y apoya nan. Pero Pablo a mira cu den otro pais tabatin hopi mas necesidad di predicador. Pues, el a dicidi di reanuda su actividad como misionero. Hunto cu Timoteo y Tito, el a bay Efeso, despues nan a sigui pa Creta y probablemente pa Macedonia. (1 Tim. 1:3; Tito 1:5) Nos no sa si el a bishita Spaña, pero e tabatin plan di bay eynan si.Rom. 15:24, 28.

9. Ki tempo Pedro a muda pa bay sirbi caminda tabatin mas necesidad di predicador? (Wak e prome plachi.)

9 Apostel Pedro kisas tabatin riba 50 aña ora el a bay biba caminda tabatin mas necesidad di predicador. Con nos por sa? Wel, si e tabatin casi e mesun edad cu Hesus, of si e tabata un poco mas bieu, esey a nifica cu ora el a reuni cu e otro apostelnan na Jerusalem na aña 49, lo e tabatin rond di 50 aña. (Echo. 15:7) Poco tempo despues di e reunion ey, Pedro a bay biba na Babilonia, muy probablemente pa predica na e cantidad grandi di Hudiu cu tabatin den e area ey. (Gal. 2:9) E tabata biba eynan ora el a skirbi su prome carta inspira, rond di aña 62. (1 Ped. 5:13) No ta facil pa bay biba na un otro pais, pero Pedro no a laga e echo cu su edad a subi strob’e di experencia e goso di sirbi Jehova plenamente.

10, 11. Conta e experencia di un ruman di mas edad cu a bay sirbi caminda tin mas necesidad di predicador.

10 Awe, hopi cristian di 50 y pico aña, y mas grandi, ta ripara cu nan circunstancianan di bida a cambia y cu nan por sirbi Jehova na maneranan nobo. Algun a bay biba caminda tin mas necesidad di predicador. Esey ta loke Robert cu su esposa a haci. El a conta: “Ami cu mi casa tabatin rond di 55 aña ora cu nos a realisa cuanto oportunidad tabatin nos dilanti. Nos unico yiu no tabata na cas mas y nos mayornan a muri y laga un herencia chikito pa nos. Mi a calcula cu si nos bende nos cas, nos lo por a caba di paga e hypotheek y keda cu suficiente placa pa biba di dje te ora mi cuminsa cobra mi pensioen. Nos a tende cu hopi hende na Bolivia tabata acepta estudio di Bijbel y cu costo di bida den e pais ey tabata abou. Pues, nos a dicidi di bay biba eynan. Pero no tabata facil pa adapta na nos ambiente nobo. Tur cos tabata completamente diferente for di loke nos a custumbra cu ne na Norte America. Pero nos a  haya un bon recompensa pa tur nos esfuerso.”

11 Robert a sigui conta: “Awor henter nos bida ta draai rond di actividadnan di congregacion. Algun di e hendenan cu nos a studia Bijbel cu ne a batisa. Nos a studia cu un famia pober cu ta biba den un pueblito un poco leu. Pero tur siman, e famia ey ta bin stad pa e reunionnan a pesar cu e biahe ta dificil. Bo por imagina con contento nos ta ora nos ta mira e progreso di e famia ey? Y e yiu mayo hasta a cuminsa traha pionero!”

E NECESIDAD CU TIN DEN TERITORIO DI OTRO IDIOMA

12, 13. Despues cu Brian a baha cu pensioen, kico e cu su esposa a haci?

12 Congregacionnan y gruponan di otro idioma por beneficia masha hopi di e ehempel di rumannan di mas edad. Ademas, e tipo di teritorionan ey por ta masha dushi pa traha aden. Por ehempel, Brian di Inglatera a skirbi cu despues cu el a baha cu pensioen cu 65 aña di edad, e cu su esposa a sinti cu nan bida a bira laf. El a conta: “Nos yiunan no tabata na cas mas, y masha poco biaha nos tabata haya hende interesa cu nos por a studia Bijbel cu ne. Un dia m’a topa un yoncuman Chines cu tabata haci investigacion na e universidad local. El a acepta un invitacion pa asisti na nos reunion, y mi a cuminsa studia Bijbel cu ne. Despues di algun siman, el a cuminsa bin cu un colega Chines. Dos siman despues, el a bin cu un di tres colega y despues cu un di cuater.

13 Ora cu un di cinco colega Chines a pidi un estudio di Bijbel, mi a pensa: ‘No ta pasobra mi tin 65 aña mi tin cu baha cu pensioen for di e sirbishi di Jehova.’ Pues, mi a puntra mi esposa, cu ta dos aña mas jong cu mi, si lo e kier a siña Chines. Nos a uza un curso di idioma riba cassette pa siña Chines. Esey tabata dies aña pasa. E predicacion den teritorio di otro idioma a laga nos sinti nos jong atrobe. Te asina leu, nos a studia Bijbel cu 112 Chines! Mayoria di nan a yega di bin reunion. Un di nan ta sirbi awor como pionero den congregacion.”

Kisas ainda bo por haci mas den e sirbishi di Jehova (Wak paragraf 12, 13)

DISFRUTA DI LOKE BO POR HACI

14. Kico cristiannan di mas edad no mester lubida, y con e ehempel di Pablo por ta un animacion pa nan?

14 Aunke hopi ruman di 50 y pico aña  tin bon oportunidad pa participa den maneranan nobo di sirbi Jehova, no ta tur por hacie. Algun di nan tin problema cu salud, y otronan tin cu cuida nan mayornan di edad of yiunan cu ta depende di nan. No lubida cu Jehova ta aprecia tur loke bo por haci den su sirbishi. Pues, en bes di sinti bo malo pasobra tin cosnan cu bo no por haci, disfruta di loke bo por haci. Pensa riba e ehempel di apostel Pablo. Pa varios aña e tabata preso den su cas y no por a sigui haci su biahenan di misionero. Pero ki ora cu un hende a bishit’e, el a papia cu nan tocante e Scritura y a fortalece nan fe.Echo. 28:16, 30, 31.

15. Dicon rumannan di edad ta realmente valioso?

15 Jehova ta aprecia tambe loke rumannan di edad avansa por haci den su sirbishi. Aunke Salomon a indica cu “e dianan malo” no ta e mihor etapa di bida, Jehova ta aprecia loke cristiannan di edad avansa ta logra haci pa alab’e. (Luc. 21:2-4) E congregacionnan tambe ta aprecia e bunita ehempel di fe y perseverancia cu e rumannan di edad aki ta demostra.

16. (a) Menciona algun privilegio cu Ana probablemente no por a disfruta di dje. (b) Pero kico si Ana por a haci pa adora Dios?

16 Den Bijbel nos ta lesa di un señora di edad avansa cu tabata yama Ana, kende a sigui alaba Jehova fielmente den su biehes. E tabata viuda y tabatin 84 aña di edad tempo cu Hesus a nace. Probablemente e no a biba suficiente largo pa bira un discipel di Hesus ni pa ser ungi cu spirito santo ni pa bay predica e bon noticia di Reino. Pero Ana a disfruta di e cosnan cu si e por a haci. Por ehempel, tur mainta y tur anochi e tabata bay na e patio di e tempel. Y segun cu e sacerdote tabata ofrece ciencia na Jehova, Ana, hunto cu e multitud di hende presente eynan, tabata haci oracion silenciosamente durante mas o menos mey ora. Bijbel ta bisa cu “nunca e no tabata falta tempel y tabata rindi sirbishi sagrado di dia y anochi.” (Luc. 2:36, 37) Un di e biahanan cu e tabata na tempel, el a mira Hesus como baby y a cuminsa “papia tocante e mucha cu tur esnan cu tabata spera e liberacion di Jerusalem.”Luc. 2:38.

17. Con nos lo por yuda rumannan di edad avansa, of esnan cu ta malo, participa den adoracion berdadero?

17 Awe, nos mester ta atento pa yuda rumannan di edad avansa of esnan cu ta malo. Tin hopi ruman hende grandi cu lo tin masha gana di ta hunto cu nos na reunion of na asamblea, pero cu no por asisti. Con e congregacion por yuda? Na algun luga, nan a haci posibel pa e rumannan ey scucha e reunionnan via di telefon. Na otro luga, kisas esaki no ta posibel. Hasta si cristiannan di edad no por bay reunion, toch nan por yuda apoya adoracion berdadero. Por ehempel, nan por pidi den oracion pa cos por bay bon cu e congregacion.Lesa Salmo 92:13, 14.

18, 19. (a) Con cristiannan di edad avansa por anima otro rumannan? (b) Ken por tuma na pecho e conseho pa “corda ... riba bo Creador”?

18 Kisas rumannan di edad avansa no ta realisa cuanto nan ta anima e otro rumannan. Wak e ehempel di Ana. Pa hopi aña, e tabata bay e tempel fielmente. Probablemente e no a realisa cu su ehempel y su amor pa Jehova lo a ser inclui den Bijbel y cu siglonan despues ainda e ta anima otro hende. Asina tambe, bo rumannan nunca lo lubida bo amor pa Jehova. Pues, no ta un sorpresa cu e Palabra di Dios ta bisa: “Cabey blanco ta un corona di gloria; den e caminda di husticia e ta wordo haya.”—Prov. 16:31.

19 Tin un limite na loke nos tur por haci den e sirbishi di Jehova. Pero laga esnan entre nos cu ainda tin un poco forsa y energia tuma na pecho e palabranan inspira aki: “Corda ... riba bo Creador ... prome cu e dianan malo bin.”Ecl. 12:1.