Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2014

“Laga Bo Reino Bin”—Pero Ki Dia?

“Laga Bo Reino Bin”—Pero Ki Dia?

“Ora boso mira tur e cosnan aki, boso por ta sigur cu e Yiu di hende ta cerca, si, [dilanti] di porta.”—MAT. 24:33.

1, 2. (a) Kico por ciega nos? (b) Kico nos sa tocante e Reino di Dios?

MANERA kisas bo a ripara, ora un cos pasa, no ta tur testigo ocular ta corda e mesun detayenan tocante e suceso. Mescos tambe, un persona cu caba di tende for di su dokter cu e ta hopi malo, despues tin dificultad pa corda kico precies e dokter a bis’e. Of tin biaha, un persona no por haya su yabi of su bril, mientras cu nan ta su dilanti. Dicon e cosnan aki ta pasa? Expertonan ta bisa cu esaki ta sosode ora un hende ta purba di haci varios cos pareu. Su mente ta mucho ocupa, y esey ta pone cu e ta bira manera ciego y no ta ripara cos of e ta lubida cos. Aparentemente, nos celebro por concentra riba un solo cos alabes.

2 Awe tambe, hopi hende ta manera ciego pa loke ta pasando den mundo. Kisas nan ta admiti cu mundo a cambia hopi for di loke e tabata na aña 1914, pero nan no ta mira kico ta e berdadero motibo tras di e sucesonan aki. Como studiantenan di Bijbel, nos sa cu den un sentido e Reino di Dios a bin na 1914 ora cu Dios a haci Hesus Rey den cielo. Pero tambe nos sa cu e oracion “Laga bo Reino bin. Laga bo boluntad sosode, mescos cu den cielo, tambe riba tera” no a ser contesta completamente ainda. (Mat. 6:10) Esey lo sosode ora cu Dios  pone un fin na e mundo malbado aki. Ta e ora ey e boluntad di Dios por sosode riba tera mescos cu den cielo.

3. Kico nos estudio di Bijbel ta yuda nos mira?

3 Como cu nos ta studia e Palabra di Dios regularmente, nos por mira cu profecianan ta cumpliendo aworaki. Ki un contraste grandi esey ta cu hende en general! Nan ta asina ocupa cu nan bida y actividadnan cu nan no ta mira e evidencia cu Cristo ta na mando for di 1914 y cu pronto lo e destrui e mundo malbado aki. Pero pensa riba e pregunta aki: Si bo tin varios decada ta sirbi Dios, bo a keda mes consciente y interesa den e nificacion di nos tempo manera kisas bo tabata hopi aña pasa? Hasta si bo no tin hopi tempo cu bo a bira un Testigo, riba kico bo ta enfoca? Sea loke sea ta bo contesta, un cos nos sa sigur: Pronto Dios su Rey ungi lo tuma paso pa laga e boluntad di Dios sosode completamente riba tera. Laga nos analisa tres motibo importante dicon nos ta sigur di esaki.

E COREDONAN DI CABAY A YEGA

4, 5. (a) Kico Hesus ta haciendo for di 1914? (Wak e prome plachi.) (b) Kico e tres coredonan di cabay cu ta sigui Hesus ta representa, y con e profecia aki a cumpli?

4 Na aña 1914, Hesucristo a ricibi su corona celestial, es decir, el a bira Rey di e Reino di Dios. E profecia na Revelacion capitulo 6 a describi Hesus sinta riba un cabay blanco. Asina cu el a bira Rey, el a sali bay pa completa su victoria riba e mundo malbado di Satanas. (Lesa Revelacion 6:1, 2.) E profecia a indica cu despues cu e Reino di Dios a cuminsa goberna, e situacion na mundo lo bay atras rapidamente. Guera, scarsedad di cuminda, maleza y otro causanan di morto lo tuma luga mas cu nunca prome. Den e profecia, e desasternan ey ta ser representa pa tres coredo di cabay cu a cuminsa core net tras di Hesucristo.Rev. 6:3-8.

5 Manera e profecia a indica, guera a “kita paz for di riba tera.” Esaki a sosode maske hopi nacion a priminti di ­coopera cu otro y mantene paz. Desaroyonan mundial di ultimo tempo a demostra cu Prome Guera Mundial tabata apenas e prome di e tantisimo gueranan grandi cu a tuma luga. Y aunke hende a haci hopi progreso economico y cientifico desde 1914, scarsedad di cuminda ta sigui di ta un di e cosnan cu por causa conflicto y guera rond mundo. Ademas, ken por nenga cu tur tipo di maleza, desaster natural y otro tragedia ta caba cu bida di miyones di hende tur aña. E sucesonan aki ta mas peligroso, ta tuma luga cu mas frecuencia y ta mata mas hende cu nunca prome den historia humano. Abo ta tuma na pecho loke esaki ta nifica?

Segun cu e coredonan di cabay ta core, e situacion na mundo ta bira pio (Wak paragraf 4, 5)

6. Ken a tuma nota cu profecia di Bijbel tabata cumpli, y esaki a motiva nan pa haci kico?

6 E comienso di Prome Guera Mundial y e epidemia di grip Spaño a kita e atencion di hopi hende di tal manera cu nan no a realisa kico tabata e berdadero motibo tras di e sucesonan ey. Pero cristiannan ungi si tabata spera ansiosamente pa “e tempo stipula di e nacionnan” termina na aña 1914. (Luc. 21:24) Nan no tabata sa precies con esey lo a sosode, pero loke si nan tabata sa ta cu na 1914 un suceso importante lo a tuma luga relaciona cu e Reino di Dios. Asina cu nan a compronde con profecia di Bijbel a cumpli, nan a anuncia cu curashi cu e gobernacion di Dios a cuminsa. Nan esfuerso pa proclama e Reino a resulta den persecucion intenso. E echo cu e persecucion aki a tuma luga den hopi nacion tabata riba su mes caba un cumplimento di profecia. Durante e decadanan cu a sigui, enemigo di e  Reino a uza ley, decreto, violencia, castigo di prizon y hasta sentencia di morto pa purba di para e trabou di predica.Sal. 94:20; Rev. 12:15.

7. Dicon mayoria di hende no ta mira kico tin tras di loke ta tumando luga den mundo awe?

7 Siendo cu tin asina tanto evidencia cu e Reino di Dios ta gobernando caba den cielo, dicon mayoria di hende no ta acepta loke esaki ta nifica? Dicon nan no por mira cu e sucesonan mundial ta cumpliendo cu profecia di Bijbel, precies manera e pueblo di Dios tin basta aña ta predica? Acaso nan ta concentra solamente riba loke nan por mira cu nan wowo? (2 Cor. 5:7) Of nan ta asina preocupa cu asuntonan humano cu nan no ta mira loke Dios ta haciendo? (Mat. 24:37-39) Of ta e idea- y metanan di e mundo di Satanas ta kita nan tino for di loke ta tumando luga? (2 Cor. 4:4) Anos mester tin fe y tambe e habilidad di mira mas aya di loke tin djis nos dilanti pa nos por compronde loke e Reino di Dios ta haciendo. Anos ta hopi contento cu nos por mira kico tin tras di tur loke ta tumando luga.

MALDAD TA BAYENDO DI MALO PA PEOR

8-10. (a) Con 2 Timoteo 3:1-5 ta cumpliendo? (b) Dicon nos por bisa cu maldad ta bayendo di malo pa pio?

8 Tin un di dos motibo pakico nos sa cu lo no dura hopi mas prome cu e Reino di Dios cuminsa goberna e tera: Awe tin mas maldad cu nunca den e mundo aki, y e ta bira pio. Durante casi 100 aña, nos a mira e profecia di 2 Timoteo 3:1-5 cumpli. Y un cos ta sigur, e caracteristicanan describi den e profecia ey tambe a bira pio, ta tuma luga cu mas frecuencia y a plama na tur parti di mundo. Abo tambe ta mira esey? Laga nos considera algun ehempel cu ta demostra esaki.Lesa 2 Timoteo 3:1, 13.

9 Compara loke hende tabata haya scandaloso den decada di 1940 of di 1950 cu loke ta tuma luga awe na trabou, den mundo di entretenimento, deporte y moda. Violencia y inmoralidad extremo ta cos di tur dia. Hende ta competi cu otro pa wak ken ta mas feroz, mas inmoral of mas cruel cu otro. Programanan di television cu pa hopi hende tabata inaceptabel den decada di 1950, awor ta ser considera  apropia pa sinta wak como famia. Y hopi hende a ripara cu homosexualnan tin gran influencia riba mundo di entretenimento y di moda y ta promove nan estilo di bida publicamente. Nos ta hopi agradecido cu nos si sa kico Dios ta pensa di e cosnan aki.Lesa Judas 14, 15.

10 Nos por compara tambe loke hende tabata considera comportacion rebelde di hobennan den decada di 1950 cu loke hobennan ta haci awe. Por ehempel, den e tempo aya, e preocupacion di mayornan tabata si nan yiunan ta huma, bebe of balia na un manera indecente. Awe a bira masha normal pa tende noticianan spantoso manera lo siguiente: Un alumno di 15 aña ta mik cu su arma riba su compañeronan di klas y ta mata 2 y herida 13. Un grupo di teenager burachi ta mata un mucha muher di 9 aña cruelmente y ta maltrata su tata y su primo. Segun un otro informe, hobennan den un pais di Asia ta responsabel pa mitar di tur e crimennan cu a tuma luga durante e ultimo dies añanan. Ta ken por nenga cu awe cosnan ta bayendo di malo pa pio?

11. Dicon hopi hende no ta realisa cu cosnan ta bayendo di malo pa pio?

11 Apostel Pedro a indica corectamente “cu den e ultimo dianan lo tin hacido di bofon cu ta actua segun nan propio deseonan y cu ta bisa den forma di cherche: ‘El a priminti cu lo e bin, pero unda su binida a keda? Figura bo, for di dia cu nos antepasadonan a bay sosega, tur cos ta sigui exactamente manera nan tabata for di cuminsamento di creacion.’” (2 Ped. 3:3, 4) Kico lo por ta e motibo cu algun hende ta reacciona asina? Parce cu mas nos custumbra di mira algo, menos atencion nos ta presta na dje. Por ehempel, si e actitud y moralidad di hende en general bay atras pocopoco durante un periodo largo, kisas nos lo no ripara esey mes. Pero si e comportacion di un bon amigo cambia di un dia pa otro, esey lo shock nos. Pero esaki no ta kita cu e manera gradual cu normanan moral ta bay atras ta peligroso.

12, 13. (a) Dicon anos no mester laga e cosnan cu ta tuma luga den mundo desanima nos? (b) Kico lo yuda nos persevera den e ultimo dianan “dificil pa trata cu ne” aki?

12 Apostel Pablo a spierta nos cu e ultimo dianan lo ta “dificil pa trata cu ne.” (2 Tim. 3:1) Pero nan lo no ta imposibel pa trata cu ne, pues nos no tin nodo di sconde pa realidad. Cu yudansa di Jehova, di su spirito y di e congregacion cristian, nos por vence cualkier decepcion of miedo cu nos por tin. Nos por keda fiel. “Nos a ricibi e poder cu ta surpasa esun di hende, esta, e poder cu ta bin di Dios, no di nos mes.”2 Cor. 4:7-10.

13 Ta bon pa tuma nota cu Pablo a introduci e profecia tocante e ultimo dianan bisando “sa esaki.” E palabranan ey ta un garantia cu e profecia aki lo cumpli sigur. Nos no tin duda cu e mundo malbado aki lo sigui bay di malo pa pio, te ora cu Jehova interveni pa pone un fin na dje. Nos a siña for di historia cu ora norma moral bay hopi atras den un sociedad of nacion, esaki ta hiba nan na colapso total. Pero nunca prome den historia, henter e mundo a bira asina inmoral. Hopi hende kisas no ta haci caso di loke esey ta nifica, pero e desaroyo unico aki cu ta tumando luga for di aña 1914 mester convence nos cu pronto e Reino di Dios lo tuma paso decisivo pa caba cu maldad.

E GENERACION AKI LO NO CABA NA NADA

14-16. Kico ta e di tres motibo pakico nos ta kere cu e Reino di Dios lo “bin” pronto?

14 Cosnan cu a pasa den e pueblo di Dios ta un di tres motibo pakico nos por  tin sigur cu e fin ta cerca. Por ehempel, prome cu e Reino di Dios a cuminsa goberna den cielo, un grupo di ruman ungi tabata sirbi Dios diligentemente. Kico nan a haci ora cu na 1914 profecia no a cumpli manera nan a spera? Mayoria di nan a sigui sirbi Jehova fielmente y a mantene nan integridad bou di prueba y persecucion. A traves di añanan, mayoria di e unginan ey—si no ta tur—a keda fiel te na fin di nan bida riba tera.

15 Hesus a bisa den su profecia detaya tocante e ultimo dianan di e mundo di Satanas: “E generacion aki lo no caba na nada prome cu tur e cosnan aki tuma luga.” (Lesa Mateo 24:33-35.) Nos ta compronde cu “e generacion aki” cu Hesus a menciona ta inclui dos grupo di cristian ungi. E prome grupo tabata presente na 1914 y a compronde di biaha cu Cristo a cuminsa goberna como Rey e aña ey. E rumannan cu a forma e grupo aki no tabata simplemente na bida na 1914, sino tambe nan a ser ungi cu spirito santo e aña ey of mas prome.Rom. 8:14-17.

16 Tur e cristiannan di e di dos grupo inclui den “e generacion aki” a ser ungi cu spirito santo durante e periodo cu esnan di e prome grupo ainda tabata na bida riba tera. Pues, no ta tur persona ungi awe ta ser inclui den “e generacion aki” cu Hesus a papia di dje. Awe, e unginan den e di dos grupo ta birando basta bieu. Pero e palabranan di Hesus na Mateo 24:34 ta duna nos e siguransa cu henter ‘e generacion aki lo no caba na nada’ prome cu nan mira e cuminsamento di e tribulacion grandi. Esaki mester convence nos mas ainda cu pronto e Rey di e Reino di Dios lo destrui e malbadonan y trece un husto mundo nobo.2 Ped. 3:13.

PRONTO CRISTO LO COMPLETA SU VICTORIA

17. Kico e evidencia cu nos a analisa ta yuda nos compronde?

17 Kico e tres evidencianan cu nos a analisa ta yuda nos compronde? Hesus a spierta nos cu nos no sa—ni lo no sa—e dia y ora cu e fin ta bin. (Mat. 24:36; 25:13) Pero manera Pablo a bisa, nos por sa si “den ki tempo” esey lo ta. (Lesa Romanonan 13:11.) Nos sa cu nos ta den e ultimo dianan. Si nos presta atencion na profecianan di Bijbel y na loke Jehova Dios y Hesucristo ta haciendo, nos no por keda sin mira e evidencia convencente cu en berdad e fin di e mundo malbado aki ta hopi cerca.

18. Kico lo pasa cu e hendenan cu ta nenga di acepta Hesucristo como nan Rey?

18 Pronto, e hendenan cu ta nenga di acepta e autoridad di Hesucristo, Esun cu ta coriendo e cabay blanco, lo haya nan obliga ta admiti cu nan tabata robes. Nan lo no mira un salida. Ora esey sosode, hopi di nan lo sclama morto spanta: “Ken por soport’e?” (Rev. 6:15-17) Wel, Revelacion capitulo 7 ta contesta e pregunta aki. E dia ey, ta e unginan hunto cu e cristiannan cu tin e speransa di biba pa semper riba tera lo por “soport’e” pasobra nan tin e aprobacion di Dios. Un poco despues di esey, “un multitud grandi” di e otro carnenan lo sobrevivi e tribulacion grandi.Rev. 7:9, 13-15.

19. Como un di e personanan cu tin sigur cu e fin ta cerca, kico bo ta spera ansiosamente riba dje?

19 Si nos sigui presta atencion na e profecianan di Bijbel cu ta cumpliendo den nos tempo, e mundo di Satanas lo no haya chens di kita nos atencion. Tampoco nos lo no keda sin mira kico tin tras di e sucesonan mundial di nos tempo. Pronto Cristo lo completa su victoria y destrui e mundo malbado aki durante e guera husto di Armagedon. (Rev. 19:11, 19-21) Djis imagina con feliz nos lo ta despues di esey.Rev. 20:1-3, 6; 21:3, 4.