Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia (Edicion di Estudio)  |  January 2014

Adora Jehova, e Rey di Eternidad

Adora Jehova, e Rey di Eternidad

“Na e Rey di eternidad ... sea honor y gloria pa tur eternidad.”1 TIM. 1:17.

1, 2. (a) Ken ta “e Rey di eternidad”, y dicon e titulo ey ta na su luga? (Wak e prome plachi.) (b) Kico ta atrae nos na e manera cu Jehova ta goberna nos?

REY SOBHUZA II di Suazilandia a goberna pa casi 61 aña. Esey ta un record impresionante pa un monarca den nos tempo. Pero pa impresionante cu e duracion di Rey Sobhuza su gobernacion por tabata, tin un rey kende su reinado no tin limite, ya cu su bida no ta cortico manera di hende. Bijbel ta yam’e “e Rey di ­eternidad.” (1 Tim. 1:17) E unico Rey cu merece e titulo aki ta Jehova Dios. Bijbel ta bisa cu e “ta Rey pa semper y semper.”Sal. 10:16.

2 E tempo largo cu Dios tin como Rey ta haci su gobernacion completamente distinto for di esun di cualkier hende. Pero loke mas ta atrae nos na Jehova ta su manera di goberna. Un rey cu a goberna 40 aña riba Israel di antiguedad a alaba Jehova cu e palabranan aki: “SEÑOR ta yen di compasion y gracia, kende no ta rabia lihe, y ta abunda den misericordia. SEÑOR a establece su trono den e cielonan; y su reino ta goberna riba tur cos.” (Sal. 103:8, 19) Jehova no ta solamente nos Rey, e ta nos Tata tambe; nos amoroso Tata celestial. Esaki ta lanta dos pregunta: Den ki sentido Jehova ta manera un Tata? Y desde e rebelion den Eden, con Jehova a demostra cu keto bay e ta Rey di universo? E contestanan riba e preguntanan aki lo motiva nos pa hala mas cerca Jehova y sirbie cu henter nos curason.

 E REY DI ETERNIDAD TA CREA UN FAMIA UNIVERSAL

3. Ken tabata e prome miembro di Jehova su famia universal, y ken mas a ser crea como “yiu” di Dios?

3 Jehova lo mester tabata hopi contento ora el a crea su prome Yiu! E no a trat’e manera un ciudadano inferior. Al contrario, el a stim’e manera un Yiu y a invit’e pa participa den e obra gososo di crea otro ciudadanonan perfecto. (Col. 1:15-17) Nan a inclui miyones di angel. Bijbel ta bisa cu e angelnan aki ta sirbi Jehova cu alegria y “ta haci su boluntad.” Y Jehova ta honra nan yamando nan su “yiu hombernan.” Nan ta parti di Su famia universal.Sal. 103:20-22; Job 38:7.

4. Con hende a bira parti di Jehova su famia universal?

4 Despues cu Jehova a crea e tera, el a haci su famia universal mas grandi. Con? Wel, despues cu Jehova a prepara e tera manera un cas bunita cu por sostene su mes, el a yega na e culminacion di su obranan terenal: E prome homber, Adam, cu el a crea den Su imagen. Esey tabata e cherry riba e bolo. (Gen. 1:26-28) Como e Creador, Jehova a spera cu Adam lo a obedec’e. Manera un Tata, Jehova a dun’e tur instruccion cu amor y bondad. Y e instruccionnan ey sigur no a kita hende su libertad innecesariamente.Lesa Genesis 2:15-17.

5. Kico Jehova a haci pa yena e tera cu su yiunan humano?

5 Distinto for di hopi rey humano, Jehova ta trata su ciudadanonan manera miembronan di su famia. E tin asina tanto confianza den nan cu gustosamente e ta encarga nan cu responsabilidad. Por ehempel, el a duna Adam autoridad riba otro criaturanan y hasta a encarg’e cu e tarea di duna e bestianan nomber, un tarea agradabel pero cu no tabata facil. (Gen. 1:26; 2:19, 20) Ademas, Dios no a crea miyones di hende perfecto pa biba riba tera. Mas bien, el a dicidi di crea un muher perfecto pa Adam, esta, Eva. (Gen. 2:21, 22) Anto el a duna e pareha aki e oportunidad di yena e tera cu nan yiunan. Bou di condicionnan ideal, hende gradualmente lo a extende e fronteranan di Paradijs te ora henter e planeta lo a bira un hardin bunita. Hunto cu e angelnan den cielo, hende e ora ey lo por a adora Jehova pa semper como parti di su famia universal. Jehova di berdad a demostra su amor di Tata ora el a duna Adam cu Eva e maraviyoso speransa ey pa futuro.

YIUNAN REBELDE TA RECHASA DIOS COMO NAN REY

6. (a) Con e rebelion den e famia di Dios a cuminsa? (b) Dicon nos sa cu e rebelion ey no a nifica cu Jehova a perde su autoridad como Soberano?

6 Lamentablemente, Adam cu Eva no tabata satisfecho cu Jehova como nan Gobernante soberano. Nan a prefera di sigui Satanas, un angel cu a rebela contra Dios. (Gen. 3:1-6) E decision aki a resulta den dolor, sufrimento y morto pa nan y pa nan yiunan. (Gen. 3:16-19; Rom. 5:12) Na e momento ey Dios no tabatin niun ciudadano mas riba tera cu tabata obedec’e. Acaso esaki a nifica cu Dios no tabatin control mas riba tera y cu el a stop di eherce su poder como Soberano di tera y su habitantenan? Claro cu no! El a eherce su autoridad ora el a saca Adam cu Eva for di e Hofi di Eden y a pone dos kerubin vigila e entrada pa nan no drenta bek. (Gen. 3:23, 24) Na e mesun tempo, Dios a demostra su amor di Tata ora el a duna e siguransa cu lo e cumpli cu su proposito di tin un famia universal cu ta consisti di tanto angel como hende fiel. El a priminti cu un “simia”, of descendiente, di Adam lo destrui Satanas y elimina e daño cu e pica di Adam a causa.Lesa Genesis 3:15.

7, 8. (a) Con malo e situacion a bira den tempo di Noe? (b) Kico Jehova a haci pa limpia e tera y pa proteha e famia humano?

 7 Den e siglonan cu a sigui tabatin hende, manera Abel cu Enok, cu a scoge pa keda leal na Jehova. Pero mayoria di hende a rechasa Jehova como nan Tata y Rey. Ya pa e tempo di Noe, “tera tabata yen di violencia.” (Gen. 6:11) Acaso esaki a nifica cu Jehova no tabatin control mas riba asuntonan di tera? Kico Bijbel ta bisa?

8 Bijbel ta bisa cu Jehova a duna Noe instruccion detaya pa traha un arca inmenso cu lo a salba Noe cu su famia. Tambe Dios a demostra su gran amor pa henter e famia humano ora el a encarga Noe pa sirbi como “un predicador di husticia.” (2 Ped. 2:5) Sin duda, Noe a haci un yamada riba e hendenan pa nan arepenti, y el a spierta nan pa e binidero destruccion, pero nan no a haci caso. Pa hopi aña, Noe cu su famia a biba den un mundo violento y sumamente inmoral. Jehova, manera un Tata amoroso, a proteha y bendiciona e ocho almanan fiel ey. Ora Jehova a trece e Diluvio, el a elimina e hendenan rebelde y e angelnan malbado. Asina el a demostra cu definitivamente e tabatin control riba asuntonan di tera.Gen. 7:17-24.

Jehova semper a eherce su poder como Rey di universo (Wak paragraf 6, 8, 10, 12, 17)

JEHOVA SU GOBERNACION DESPUES DI DILUVIO

9. Ki oportunidad Jehova a duna humanidad despues di Diluvio?

9 Ora Noe cu su famia a sali for di e arca, dal nan prome pasonan riba e tera limpi y hole e aire fresco, nan lo mester tabata hopi agradecido na Jehova cu el a cuida nan y proteha nan. Di biaha Noe a traha un altar y a ofrece sacrificio pa rindi adoracion na Jehova. Dios a bendiciona Noe cu su famia y a duna nan e instruccion pa ‘sea fructifero y pa multiplica y yena tera.’ (Gen. 8:20–9:1) Un biaha mas, humanidad tabatin e oportunidad di uni den adoracion na Jehova y yena e tera.

10. (a) Na unda y con hende a bolbe rebela contra Jehova despues di Diluvio? (b) Ki accion Jehova a tuma pa haci sigur cu su boluntad ta sosode?

10 Pero e Diluvio no a elimina imperfeccion, y ainda hende tabatin cu lucha contra e influencia invisibel di Satanas y di e angelnan rebelde. No a tarda hopi cu hende a bolbe rebela contra e bon gobernacion di Jehova. Un di esnan cu a opone Jehova tabata Nimrod, un bisanieto di Noe. Bijbel ta bisa cu Nimrod tabata “un jaagdo poderoso dilanti di SEÑOR [“cu a opone Jehova”, NW].” El a traha stadnan grandi, manera por ehempel Babel, y a haci su mes un rey “na tera di Sinar.” (Gen. 10:8-12) Ki accion e Rey di eternidad lo a tuma contra e rey rebelde aki cu a opone Su proposito di “yena tera”? Wel, Dios a bruha e hendenan su idioma pa nan no compronde otro. Esey a pone e ciudadanonan di Nimrod bira frustra, y nan a plama “for di eynan riba superficie di henter tera.” Ora nan a bay, nan a hiba nan religion falso y nan sistema di gobernacion humano hunto cu nan.Gen. 11:1-9.

11. Con Jehova a demostra lealtad na su amigo Abraham?

11 Hopi hende a cuminsa adora dios falso despues di Diluvio. Pero asina mes tabatin algun homber fiel cu a sigui adora Jehova. Un di nan tabata Abraham. E tabatin un bida comodo den e stad Ur. Pero toch el a obedece Jehova, bandona e stad y bay biba den tent pa hopi aña. (Gen. 11:31; Heb. 11:8, 9) Durante e tempo cu Abraham tabata muda di un luga pa otro, el a hay’e hopi biaha rondona pa reynan humano. Hopi di nan tabata biba den stadnan proteha pa muraya. Pero Jehova tabata Esun cu a proteha Abraham cu su famia. Un escritor di salmo a declara lo siguiente tocante  e proteccion ey cu Jehova a duna manera un Tata: “[Dios] no a permiti ningun hende oprimi nan; el a reprende reynan pa nan motibo.” (Sal. 105:13, 14) Jehova tabata leal na su amigo Abraham y pesey a primintie: “Reynan lo sali for di bo.”Gen. 17:6; Sant. 2:23.

12. Con Jehova a demostra su poder como Soberano riba Egipto, y con esaki a yuda su pueblo?

12 Dios a priminti tanto Abraham su yiu, Isaak, como su nieto, Jacob, cu lo e bendiciona nan y cu nan descendientenan lo bira rey. (Gen. 26:3-5; 35:11) Pero prome cu e descendientenan di Jacob a produci rey, nan a bira catibo na Egipto. Acaso esey a nifica cu Jehova lo no a cumpli cu su promesa of cu el a stop di eherce su poder como Soberano di tera? No! Na su debido tempo, Jehova a demostra su poder como Soberano y a mustra cu e tabatin hopi mas autoridad cu e farao cabesura. E Israelitanan a pone fe den Jehova, y el a libra nan na un manera maraviyoso ora el a laga nan pasa door di Lama Cora. Tabata bisto cu Jehova keto bay tabata e Gobernante di universo, y manera un Tata cu ta stima su yiunan, el a uza su gran poder pa proteha su pueblo.Lesa Exodo 14:13, 14.

JEHOVA TA BIRA REY DI ISRAEL

13, 14. (a) Kico e Israelitanan a declara den cantica tocante Jehova su reinado? (b) Kico Dios a priminti David?

13 Asina cu Jehova a libra e Israelitanan milagrosamente for di Egipto, nan a canta un cantica di victoria y alabanza na Jehova. Nos ta haya e cantica ey na Exodo capitulo 15. Na versiculo 18, e ta bisa: “SEÑOR lo reina pa semper y semper.” Jehova en berdad a bira Rey riba e nacion nobo ey. Pero e Israelitanan no a keda satisfecho cu Jehova como nan Gobernante invisibel. Un 400 aña despues cu nan a sali for di Egipto, nan a pidi Dios pa duna nan un rey humano, manera e nacionnan pagano rond di nan tabatin. (1 Sam. 8:5) Maske nan a haya rey humano, Jehova tabata Rey keto bay, y esey a bira bisto durante e reinado di David, e di dos rey humano di Israel.

14 David a trece e arca di pacto sagrado Jerusalem. Riba e dia di alegria ey, e levitanan a canta un cantica di alabanza cu tabatin un declaracion remarcabel cu ta  para skirbi na 1 Cronicanan 16:31 [NW]: “Laga nan bisa entre e nacionnan: ‘Jehova mes a bira rey!’” Kisas un hende ta puntra: ‘Mirando cu Jehova ta e Rey di eternidad, den ki sentido el a bira Rey na e tempo ey?’ Jehova ta bira Rey ora e demostra su autoridad como Soberano of ora e asigna un persona pa represent’e pa un cierto tempo of pa trata cu un situacion specifico. Ta hopi importante pa nos compronde cu ta den e sentido aki Jehova ta bira Rey. E aspecto aki di su reinado ta trece beneficio di largo alcance. Prome cu David a muri, Jehova a primintie cu su reinado lo sigui pa tempo indefini: “Lo mi lanta bo descendiente despues di bo, cu lo sali for di bo, y lo mi establece su reino.” (2 Sam. 7:12, 13) E promesa aki a cumpli ora cu e “descendiente”, of yiu, di David ey a aparece mas cu 1.000 aña despues. Ken e tabata, y ki ora el a bira Rey?

JEHOVA TA SCOGE UN REY NOBO

15, 16. Ki ora Jehova a ungi Hesus como futuro Rey, y kico Hesus a haci pa prepara pa su Reino mientras cu e tabata riba tera?

15 Na aña 29 di prome siglo, Juan Bautista a cuminsa predica cu “e Reino di cielo a yega cerca.” (Mat. 3:2) Ora Juan a batisa Hesus, Jehova a ungi Hesus como e Mesias priminti y e futuro Rey di e Reino di Dios. Jehova a expresa su amor di Tata pa Hesus cu e palabranan: “Esaki ta mi Yiu stima, esun cu tin mi aprobacion.”Mat. 3:17.

16 Hesus a duna gloria na su Tata durante tur su añanan di sirbishi riba tera. (Juan 17:4) El a haci esaki ora el a predica tocante e Reino di Dios. (Luc. 4:43) El a hasta siña su siguidornan pidi pa e Reino ey bin. (Mat. 6:10) Como e futuro Rey, Hesus por a bisa su opositornan: “E Reino di Dios ta meymey di boso.” (Luc. 17:21) Mas despues, riba e anochi prome cu su morto, el a cera cu su apostelnan ‘un pacto pa un reino.’ Esaki a nifica cu algun di su fiel siguidornan lo a bira rey hunto cu ne den e Reino di Dios.Lesa Lucas 22:28-30.

17. Den ki manera limita Hesus a cuminsa goberna na aña 33, pero riba kico e mester a warda?

17 Na ki tempo Hesus lo a cuminsa goberna como Rey di e Reino di Dios? E no por a haci esey mesora. E siguiente merdia mes nan a ehecuta Hesus y su siguidornan a plama for di otro. (Juan 16:32) Pero, mescos cu prome cu e tempo ey, Jehova keto bay tabatin pleno control riba e situacion. Riba e di tres dia, el a resucita su Yiu, y dia di Pentecoste di aña 33, Hesus a cuminsa goberna riba e congregacion cristian di rumannan ungi. (Col. 1:13) Pero, como e “descendiente” priminti di David, toch Hesus mester a warda pa ricibi pleno poder como rey riba tera. Jehova a bisa su Yiu: “Sinta na mi man drechi, te ora mi haci bo enemigonan un banki pa bo pianan.”Sal. 110:1.

ADORA E REY DI ETERNIDAD

18, 19. Kico nos ta sinti nos motiva pa haci, y kico nos lo siña den e siguiente articulo?

18 Pa miles di aña, angel y hende a rebela contra e gobernacion di Jehova. Pero nunca Jehova no a keda sin eherce su poder como Soberano; semper el a mantene pleno control. Como un Tata amoroso, el a proteha y cuida su ciudadanonan leal manera Noe, Abraham y David. Acaso esaki no ta motiva bo pa obedec’e como nos Rey y hala mas cerca dje?

19 Pero kisas nos ta puntra nos mes: Con Jehova a bira Rey den nos tempo? Con nos por demostra cu nos ta ciudadanonan leal di e Reino di Jehova y bira yiunan perfecto di su famia universal? Kico nos kiermen ora nos ta pidi pa e Reino di Dios bin? Nos ta haya contesta riba e preguntanan aki den e siguiente articulo.