Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 6 2016

Ooievaar

Siña for di e Parhanan

Siña for di e Parhanan

“Puntra ... e parhanan di cielo, y laga nan conta bo. Ken den tur esakinan no sa cu ta e man di SEÑOR a haci esaki?”—Job 12:7, 9.

MAS cu 3.000 aña pasa, e patriarca Job a realisa cu e parhanan por siña nos hopi di e obranan di Dios. Nan ta bon ehempel pa uza den ilustracion y comparacion. Bijbel ta referi varios bes na parha, y hopi biaha, e referencianan aki ta siña nos lesnan importante tocante bida y nos relacion cu Dios. Ban wak algun ehempel.

CAMINDA SOUCHI TA TRAHA NEISHI

Souchi

E habitantenan di Jerusalem tabata conoce souchi. Hopi biaha, souchi ta traha nan neishi na rand di dak di edificio. Algun di e parhanan aki tabata traha nan neishi den e tempel di Salomon. Probablemente, e souchinan ey a haya cu e area di tempel tabata un luga safe, caminda nan por a cuida nan yiuchinan sin nada pa stroba nan.

E compositor di Salmo 84, kende tabata un di e yiunan di Core cu a sirbi na e tempel un siman cada seis luna, a tuma nota di e neishinan ey den e area di tempel. E tabata desea di ta manera e souchi cu tabatin un hogar permanente den e cas di Jehova. Pesey el a bisa: “Ki dushi ta bo luganan di biba, o SEÑOR di ehercitonan! Mi alma ta anhela, si, ta antoha pa e pationan di SEÑOR ... Hasta mofi a haya un cas, y zwarchi [of, souchi] un neishi pa su mes, caminda e por pone su yiunan, esta, bo altarnan, o SEÑOR di ehercitonan, mi Rey y mi Dios.” (Salmo 84:1-3) Nos y nos yiunan tambe ta anhela pa reuni regularmente cu e pueblo di Dios? Nos ta aprecia e echo cu nos por haci esey?—Salmo 26:8, 12.

E OOIEVAAR SA KI TEMPO E MESTER MIGRA

Profeta Jeremias a skirbi: “Ooievaar cu ta bula na cielo conoce su temporadanan.” Sin duda, e tabata sa con ooievaar tabata bula pasa riba e Tera Priminti. Na final di lente, hende a yega di conta mas cu 300.000 ooievaar blanco cu ta bula for di Africa pa noord di Europa, pasando riba e Vaye di Jordan. Nan holoshi biologico ta pone nan regresa na nan luga di origen, caminda nan sa haya yiu den zomer. Mescos cu otro parha cu ta migra, nan “sa ki tempo nan mester bin.”—Jeremias 8:7.

Collins Atlas of Bird Migration ta bisa: “Loke ta maraviyoso di migracion [di parha] ta e echo cu e ta algo den nan instinto.” Jehova Dios a hinca den instinto di parha cu ta migra e saber pa nan sa den ki temporada di aña nan mester migra, pero el a duna hende e capacidad di discerni e temporadanan y e tempo cu nos ta biba aden. (Lucas 12:54-56) Na contraste cu ooievaar cu tin instinto, nos mester di conocemento di Dios pa nos por discerni e nificacion di e cosnan cu ta tumando luga den nos tempo. E Israelitanan den tempo di Jeremias no a mira e importancia di compronde e nificacion di e cosnan cu tabata tuma luga den nan tempo. Dios a bisa kico tabata nan problema:  “Nan a rechasa e palabra di SEÑOR; anto ki sorto di sabiduria nan tin?”—Jeremias 8:9.

Awe nos tin suficiente prueba cu nos ta bibando den loke Bijbel ta yama “e ultimo dianan.” (2 Timoteo 3:1-5) Abo ta imita e ooievaar y discerni den ki “temporada” nos ta bibando?

E AGUILA TA WAK LEU DEN DISTANCIA

Aguila

Aguila ta ser menciona hopi bes den Bijbel, y tabata comun pa mir’e den e Tera Priminti. For di su neishi na halto den baranca, e aguila “ta vigila e prooi” y “su wowonan ta mira esaki di leu.” (Job 39:27-29) Su bista ta asina bon cu aparentemente e por wak un coneu cu ta 1 kilometer leu.

Mescos cu aguila por wak di leu, Jehova por wak leu den futuro. Pues, Jehova Dios a bisa cu e ta esun cu “ta declara e fin for di principio, y for di temponan antiguo, cosnan cu no a wordo haci ainda.” (Isaias 46:10) Ora nos aplica conseho di Jehova, nos por beneficia di su capacidad di wak den futuro y su sabiduria sin igual.—Isaias 48:17, 18.

Ademas, Bijbel ta compara hende cu ta confia den Dios cu aguila, bisando: “Esnan cu spera riba SEÑOR lo haya forsa renoba; nan lo bula bay ariba cu hala manera aguila.” (Isaias 40:31) Ora un aguila ta bula, e ta probecha di e columnanan di aire cayente cu ta subi bay laira. Ora e haya un di e columnanan aki, e ta span su halanan y keda draai den e columna pa asina e por zweef, y e ta subi bay mas y mas halto. E aguila no ta depende riba su mes forsa pa bula bay halto y zweef distancianan largo. Di mes manera, hende cu ta confia den Jehova por tin sigur cu lo e cumpli cu su promesa di duna nan “e poder cu ta surpasa esun di hende.”—2 Corintionan 4:7, 8.

“UN GALIÑA TA HALA SU PUYITONAN HUNTO BOU DI SU HALANAN”

Galiña cu puyito

Poco prome cu Hesus su morto, el a para pa wak e stad capital di e Hudiunan, hala un rosea profundo y bisa: “Jerusalem, Jerusalem, abo cu a mata e profetanan y cu a piedra esnan cu Dios a manda cerca bo. Cuanto biaha mi kier a hala bo yiunan hunto manera un galiña ta hala su puyitonan hunto bou di su halanan! Ma boso no tabata kier.”—Mateo 23:37.

Un di e instintonan di mas fuerte cu parha tin ta e deseo pa proteha nan yiunan. Parhanan cu ta traha nan neishi riba tera, manera por ehempel galiña di cas, mester ta alerta pa cualkier peliger. Ma si e galiña mira un warawara ta bula rond riba nan, e ta dal un grito skerpi, span su halanan y su puyitonan ta core bin cerca dje pa haya proteccion bou di su halanan. Ademas, eynan e puyitonan por haya sombra for di e higra di solo y sconde pa awasero pisa. Di mes manera, Hesus kier a duna e habitantenan di Jerusalem proteccion y refugio den sentido spiritual. Awe, Hesus ta invita nos pa bin cerca dje ya asina nos por haya alivio y proteccion di e carga- y ansiedadnan di nos bida diario.—Mateo 11:28, 29.

En berdad, nos por siña hopi for di e parhanan aki. Segun cu bo ta observa nan, purba di corda e comparacionnan den Bijbel cu ta papia di nan. Laga e souchi yuda bo aprecia Jehova su cas di adoracion. Confia cu Jehova por duna bo forsa cu por laga bo subi bay halto manera aguila. Ademas, acudi na Hesus p’e por yuda bo haya berdadnan spiritual cu lo proteha bo manera un galiña ta proteha su yiunan bou di su halanan. Y laga e ooievaar yuda bo mira e importancia di compronde e nificacion di e cosnan cu ta tumando luga den nos tempo.

Mas Informacion

DIOS TIN BON NOTICIA PA NOS!

Con Bo Por Hala Cerca Dios?

E les aki ta duna contesta pa e preguntanan: Dios ta scucha tur oracion y con nos mester haci oracion? Y e les ta mustra kico mas nos por haci pa hala cerca Dios.