Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 5 2017

 TOPICO PRINCIPAL | ANGEL—KICO BIJBEL TA BISA DI NAN?

Angel Por Influencia Bo Bida?

Angel Por Influencia Bo Bida?

Riba un diadomingo merdia, Kenneth cu Filomena, kendenan ta biba na Corsou, a bay bishita un pareha cu nan tabata studia Bijbel cu ne.

Kenneth a conta: “Ora nos a yega, e cas tabata full cera y e auto no tabat’ey. Pero algo a bisa mi pa yama e señora na telefon.”

E señora a contesta e yamada y a bisa cu su casa tabata na trabou. Pero, asina cu el a mira cu Kenneth cu Filomena tabata eynan, el a invita nan pa drenta paden.

Asina cu e señora a habri porta, nan a ripara cu e tabata yora. Kenneth a haci un oracion pa cuminsa cu e les di Bijbel, pero e señora a bolbe cuminsa yora. Pues Kenneth cu Filomena a puntr’e ta kico a pas’e.

E señora a splica cu e atardi ey mes e kier a mata su curpa, y e tabata skirbiendo un carta pa su casa ora Kenneth a yama. E señora a bisa nan cu e ta sufri di depresion, pues nan a lesa algun texto di Bijbel pa consol’e. E animacion ey a salba bida di e señora.

Kenneth a bisa: “Nos a gradici Jehova * cu el a laga nos yuda e señora desespera aki, y specialmente pasobra el a motiva nos, kisas mediante un angel of spirito santo, pa yama e señora na telefon.”

Kenneth cu Filomena por pensa cu ta Dios a interveni, sea pa medio di angel of pa medio di su spirito santo, of su forsa activo? Of Kenneth su yamada tabata djis pa casualidad?

Nos no por bisa sigur. Pero nos sa si cu Dios ta uza su angelnan pa yuda hende den sentido spiritual. Por ehempel, Bijbel ta bisa cu Dios a uza un angel pa guia e evangelisado cristian Felipe pa bay cerca un oficial Etiope cu tabata busca yudansa spiritual.—Echonan 8:26-31.

Varios religion ta promove e creencia cu ta existi criaturanan spiritual sobrenatural y cu algun di nan ta criaturanan bondadoso cu ta cumpli cu e boluntad di Dios of cu ta angel wardador cu ta proteha nos. Hopi hende no solamente ta kere cu angel ta existi sino cu nan ta influencia nos bida tambe. Pero, tambe tin hopi otro hende cu no ta kere mes den angel.

Angel ta existi di berdad? Si ta asina, di unda nan a bin? Kico Bijbel ta bisa di angel? Nan por influencia bo bida? Ban wak e contestanan pa e preguntanan ey.

^ par. 8 Bijbel ta bisa cu Dios su nomber ta Jehova.—Revelacion 4:11.