Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 5 2017

Hunto cu mi casa, Tabitha, den e trabou di predica

 Bijbel Ta Cambia Bida Di Hende

Pa Ami, Dios No Tabata Existi

Pa Ami, Dios No Tabata Existi
  • NACI NA AÑA: 1974

  • PAIS NATAL: REPUBLICA DEMOCRATICO DI ALEMANIA

  • SU PASADO: ATEISTA

MI PASADO

Mi a nace den un pueblito na Saksen, un estado cu e tempo ey tabata parti di Republica Democratico di Alemania of Oost Alemania. E ambiente na cas tabata yen di cariño y amor, y mi mayornan a siña mi norma- y balornan moral. Oost Alemania tabata un pais comunista, pues mayoria di habitante na Saksen no tabata haya religion importante. Y pa ami, Dios no tabata existi. Dos creencia cu tabatin influencia riba e prome 18 añanan di mi bida tabata comunismo y ateismo.

Dicon mi tabata interesa den comunismo? Pasobra mi tabata gusta e idea cu tur hende ta igual. Ademas, mi a kere cu tur propiedad mester a ser reparti na un manera husto, como cu esaki lo a trece un igualdad entre rico y pober. Pues mi a bira parti di un organisacion comunista pa hobennan. Tempo mi tabatin 14 aña, mi a pasa hopi tempo ta traha riba un proyecto di medioambiente pa recycle papel. E pueblito di Aue tabata asina agradecido pa mi esfuersonan cu e autoridadnan eynan a duna mi un premio. Aunke mi tabata jong, mi a conoce algun politico renombra di Oost Alemania. Mi a sinti cu mi tabatin bon metanan y un futuro briyante.

Diripiente full mi bida a cambia. Na 1989, e Muraya di Berlin a cay y tambe e bloke comunista di Oost Europa. Un cos a hiba na otro. No a dura mucho cu mi a ripara cu hopi inhusticia tabata sosode na Oost Alemania. Por ehempel, hende cu no ta apoya comunismo tabata haya trato inferior. Con esey tabata posibel? Nos como comunista no tabata kere cu tur hende ta igual? Comunismo tabata djis un ilusion? Tur esakinan a duna mi ansiedad.

Pues mi a cambia mi metanan y a cuminsa enfoca riba musica y arte. Como cu mi por a studia na un scol di musica cu e oportunidad pa sigui studia na un universidad, mi tabatin e deseo di bira un musico y pintor. Ademas, mi a stop di biba segun tur e norma- y balornan moral cu mi mayornan a siña mi tempo mi tabata chikito. Awor loke tabata mas importante pa mi tabata pa mi disfruta di bida; esey a encera entre otro cu mi tabatin varios mucha muher pareu. Pero musica,  pintamento y mi manera liberal di biba no a kita mi ansiedad. Hasta e plachinan cu mi tabata pinta a refleha esey. Kico futuro tabatin pa mi? Y kico tabata e proposito di bida?

Ora cu finalmente mi a haya contesta pa mi preguntanan, mi a keda asombra. Un dia na e scol di musica, mi tabata sinta cu un grupo di studiante y tabata combersa tocante futuro. Un di e studiantenan tabata Mandy, * un testigo di Jehova. E anochi ey el a duna mi bon conseho. El a bisa: “Andreas, si bo kier haya contesta pa bo preguntanan tocante bida y futuro, analisa loke Bijbel ta bisa.”

Mi no tabata completamente convenci pero mi a dicidi di busca den Bijbel pa mi haya contesta. Mandy a manda mi lesa Daniel capitulo 2, y loke cu mi a lesa eynan a laga mi keda babuca. E profecia aki ta describi un serie di poder mundial, gobiernonan cu lo tin un gran impacto te den nos tempo. Mandy a mustra mi otro profecianan den Bijbel cu ta papia tocante futuro. Porfin mi tabata hayando contesta pa mi preguntanan! Pero ken a skirbi e profecianan ey, y ken por a pronostica futuro asina exacto? Ta posibel cu Dios ta existi toch?

BIJBEL A CAMBIA MI BIDA

Mandy a pone mi den contacto cu Horst cu Angelika, un pareha Testigo cu a yuda mi compronde Bijbel mihor. Di biaha mi a ripara cu testigonan di Jehova ta e unico organisacion religioso cu semper ta uza y ta hala atencion na Dios su nomber, Jehova. (Revelacion 4:11; Mateo 6:9) Mi a siña cu Jehova ta duna humanidad e speransa di biba pa semper den un paradijs riba Tera. Salmo 37:9 ta bisa: “Esnan cu spera riba SEÑOR lo hereda e Tera.” Mi a gusta cu e speransa aki ta pa tur hende cu ta haci esfuerso pa biba segun e norma- y balornan moral di Dios cu nos ta haya den Bijbel.

Sinembargo, no tabata facil pa mi cambia y biba na harmonia cu loke Bijbel ta bisa. Mi mester a bira humilde pasobra mi exito como musico y pintor a pone mi bira orguyoso. Ademas, no tabata facil pa mi a bandona mi bida inmoral. Mi ta hopi agradecido cu Jehova ta tene pasenshi, ta demostra misericordia y ta compronde pa hende cu ta haci esfuerso pa pone na practica loke Bijbel ta siña!

Comunismo y ateismo a forma mi den e prome 18 añanan di mi bida, pero desde e tempo ey padilanti, Bijbel a transforma mi bida. Loke mi a siña di Bijbel a baha mi ansiedad tocante futuro y a duna mi un proposito den bida. Na 1993, mi a batisa como un testigo di Jehova, y na 2000, mi a casa cu Tabitha, un ruman muher celoso. Nos ta uza mas tanto di nos tempo posibel pa yuda otro hende conoce Bijbel. Hopi hende cu nos topa tin un pasado comunista y ateista mescos cu ami tabatin. Mi ta sinti un satisfaccion profundo ora mi mustra nan con nan por conoce Jehova.

E BENEFICIONAN

Ora mi a cuminsa asocia cu testigonan di Jehova pa prome biaha, mi mayornan a spanta. Desde e tempo ey, nan a mira e efecto positivo cu e Testigonan tabatin riba mi. Esta contento mi ta cu awor nan ta lesa Bijbel y ta asisti na e reunionnan di testigonan di Jehova!

Ami cu Tabitha tin un dushi matrimonio pasobra nos ta purba di sigui e conseho cu nos ta haya den Bijbel pa parehanan casa. Por ehempel, nos ta sigui e conseho pa keda fiel na otro y esey ta sigui fortalece nos matrimonio.—Hebreonan 13:4.

Mi no tin ansiedad di bida ni miedo tocante futuro mas. Mi ta sinti mi parti di un hermandad mundial, un famia cu ta disfruta di berdadero paz y union. Den e famia aki, nos ta trata otro igual. Esey ta algo cu mi tabata kier henter mi bida.

^ par. 12 A cambia su nomber.