Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 5 2017

 TOPICO PRINCIPAL | ANGEL—KICO BIJBEL TA BISA DI NAN?

Con Angel Por Yuda Bo?

Con Angel Por Yuda Bo?

E angelnan fiel na Dios ta hopi interesa den hende, y nan ta masha activo den cumpli cu e boluntad di Jehova. Ora Dios a crea Tera, e angelnan tabata “canta hunto, y tur e yiu hombernan di Dios tabata grita di alegria.” (Job 38:4, 7) A traves di historia, angelnan tabatin “masha gana di compronde” profecia relaciona cu sucesonan cu lo tuma luga riba Tera den futuro.—1 Pedro 1:11, 12.

Bijbel ta mustra cu pa e boluntad di Dios por a cumpli, na cierto ocasion angelnan a proteha sirbidornan di Dios te na un cierto grado. (Salmo 34:7) Por ehempel:

  • Ora Jehova a destrui e stadnan malbado di Sodoma y Gomora, angel a yuda e homber husto Lot y su famia huy.—Genesis 19:1, 15-26.

  • Den Babilonia di antiguedad, ora tres hoben Hebreo a ser condena pa muri den un forno sumamente cayente, Dios “a manda su angel y a libra su sirbidornan.”—Daniel 3:19-28.

  • Despues cu e homber husto Daniel a pasa anochi den un cueba cu leonnan hambra, el a bisa cu el a sobrevivi pasobra “Dios a manda su angel y a cera boca di e leonnan.”—Daniel 6:16, 22.

A traves di historia, angel a yuda hende cu tabata fiel na Dios

ANGEL A YUDA E CRISTIANNAN DI PROME SIGLO

Ora tabata necesario, angel di Dios a yuda e prome cristiannan pa e boluntad di Jehova por a cumpli. Por ehempel:

  • Un angel a habri porta di un prizon y a instrui e apostelnan cu tabata encarcela eynan pa nan sigui predica den e tempel.—Echonan 5:17-21.

  • Un angel a bisa Felipe, un predicador, pa e bay na e caminda di desierto cu ta pasa entre Jerusalem y Gaza pa predica na un Etiope cu a bay Jerusalem pa adora Dios.—Echonan 8:26-33.

  • Ora tabata Dios su tempo pa hende cu no ta hudiu bira cristian, den un vision, un angel a aparece na Cornelio, e oficial di ehercito Romano, y a instru’e pa manda bisa apostel Pedro pa bin su cas.—Echonan 10:3-5.

  • Ora apostel Pedro tabata encarcela, un angel a aparece na dje y a sac’e for di prizon.—Echonan 12:1-11.

 CON ANGEL POR YUDA BO?

No tin prueba cu awe Dios ta uza angel pa yuda hende na maneranan milagroso manera tabata e caso den tempo di Bijbel. Pero, relaciona cu nos tempo, Hesus a bisa: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.” (Mateo 24:14) Bo tabata sa cu e discipelnan di Cristo ta haciendo e trabou aki bou di supervision di e angelnan?

Angel ta yuda declara e bon noticia den henter e Tera

E buki di Revelacion ta indica cu e angelnan lo ta sumamente ocupa den e trabou di yuda hende rond mundo pa siña di Jehova Dios y di su proposito pa humanidad. Apostel Juan a skirbi: “Mi a mira un otro angel ta bula meymey di cielo, y e tabata declara bon noticia eterno na esnan cu ta biba riba Tera, na tur nacion, tribu, idioma y pueblo, y e tabata bisa na bos halto: ‘Teme Dios y dun’e gloria, pasobra e ora di su huicio a yega! Pesey, adora Esun cu a traha cielo, Tera, lama y fuentenan di awa!’” (Revelacion 14:6, 7) Hopi relato den nos tempo ta duna prueba cu angel ta apoya e trabou di predica e Reino rond mundo. Anto ora un pecador arepenti y bolbe na Jehova, “tin goso entre e angelnan di Dios.”—Lucas 15:10.

Kico lo sosode ora e trabou di predica termina? E ora ey, e “ehercitonan [di angel] den cielo” hunto cu Hesucristo, e Rey di reynan, lo bringa den e guera di “e gran dia di Dios, e Todopoderoso”, cu yama Armagedon. (Revelacion 16:14-16; 19:14-16) Angelnan poderoso lo ehecuta huicio divino ora Señor Hesus “trece venganza riba esnan cu ... no ta obedece e bon noticia tocante nos Señor Hesus.”—2 Tesalonicensenan 1:7, 8.

Bo por ta sigur anto cu e angelnan ta hopi interesa den bo y den e bienestar di hende cu kier sirbi Jehova. Manera nos a mira, varios biaha Jehova a uza angel pa fortalece y proteha su fiel sirbidornan riba Tera.—Hebreonan 1:14.

Pues, cada un di nos tin cu tuma un decision importante. Nos lo scucha y obedece e bon noticia cu ta ser predica riba henter e Tera awe? Testigonan di Jehova den bo area lo ta contento pa yuda bo beneficia di e yudansa di Dios su angelnan poderoso cu ta interesa den bo.

 

Mas Informacion

DIOS TIN BON NOTICIA PA NOS!

Con Bo Por Hala Cerca Dios?

E les aki ta duna contesta pa e preguntanan: Dios ta scucha tur oracion y con nos mester haci oracion? Y e les ta mustra kico mas nos por haci pa hala cerca Dios.

E TOREN DI VIGILANCIA

Visionnan Tocante Esnan Cu Ta Biba den Cielo

Kico e Scritura ta revela tocante Jehova, Hesus y e angelnan fiel?