Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 5 2016

 TOPICO PRINCIPAL | UNDA BO POR HAYA CONSUELO?

Consuelo den Tempo Dificil

Consuelo den Tempo Dificil

Problema ta bin den diferente manera. Nos no por papia tocante tur dificultad, pero laga nos analisa e cuater ehempelnan cu nos a menciona anteriormente. Ban wak con hende cu a enfrenta problemanan hopi distinto a logra haya berdadero consuelo cerca Dios.

ORA BO PERDE TRABOU

“Mi a siña pa acepta cualkier tipo di trabou, y nos a baha tur gasto innecesario.”—Jonathan

Seth * ta corda: “Ami cu mi casa a perde trabou na mesun tempo. Durante dos aña largo, nos tabata biba di loke nos tabata haya di nos famia, y nos tabata tuma algun job aki aya. Como resultado, mi casa Priscilla a bira deprimi, y mi tabata sinti cu mi no tabata sirbi pa nada.”

Seth a sigui conta: “Con nos a deal cu e situacion? Wel, Priscilla semper tabata corda riba e palabranan di Mateo 6:34. Eynan Hesus a bisa cu nos no mester ta ansha pa e dia di mañan, pasobra cada dia tin su mes inkietudnan. Y su oracionnan di curason a dun’e forsa pa sigui padilanti. Den mi caso, Salmo 55:22 a duna mi consuelo. Mescos cu e salmista, mi a tira mi carga riba Jehova, y mi a mira cu el a sostene mi. Aunke cu awor mi tin trabou, nos ta hiba un bida simpel di acuerdo cu e conseho di Hesus na Mateo 6:20 pa 22. Riba tur cos, nos a hala mas cerca Dios y mas cerca di otro.”

Jonathan a confesa: “Mi a haya miedo di loke lo pasa den futuro ora nos negoshi chikito di famia a bay bancarota. Debi na un crisis economico, 20 aña di trabou duro a bay perdi. Ami cu mi casa a cuminsa discuti tocante placa. Nos no tabata por a ni cumpra cos cu un credit card, pasobra nos tabatin miedo cu e compania di e credit card lo a rechasa e compra.”

Jonathan a sigui conta: “Pero Dios su Palabra y su spirito a yuda nos tuma bon decision. Mi a siña pa acepta cualkier tipo di trabou, y nos a baha tur gasto innecesario. Como testigonan di Jehova, nos a haya sosten di nos rumannan tambe. Nan a anima nos y a duna nos un man ora e situacion a bira hopi dificil.”

 ORA UN MATRIMONIO KIBRA

Raquel ta corda: “Ora mi casa a bay laga mi diripiente, esey a hurt mi basta, y el a pone mi rabia. Y mi a haya un tristeza inmenso. Pero mi a hala cerca Dios, y el a consola mi. E paz di Dios ta proteha mi curason ora mi ta haci oracion diariamente. Y ta parce mi cu el a drecha mi curason kibra.”

Raquel a agrega: “Y danki na su Palabra, Bijbel, mi por a vence sintimentonan di rabia y rencor. Mi a tuma e palabranan di apostel Pablo na Romanonan 12:21 na pecho: ‘No laga malo vence bo, ma sigui vence malo cu bon.’”

“Tin un tempo pa djis acepta loke a pasa ... Awor mi tin meta nobo den bida.”—Raquel

El a sigui bisa: “Un bon amigo a yuda mi mira cu mi tabatin cu sigui padilanti. El a lesa Eclesiastes 3:6 pa mi, y bondadosamente el a bisa mi cu tin un tempo pa djis acepta loke a pasa. E conseho ey no tabata facil, pero e tabata loke mi tabatin mester. Awor mi tin meta nobo den bida.”

Elizabeth a bisa: “Ora bo matrimonio kibra, bo tin mester di sosten. Mi tabatin un amiga stima cu dia tras dia tabata duna mi e sosten ey. El a yora cu mi, consola mi y a laga mi sinti stima en bes di rechasa. Mi ta sigur cu Jehova a uz’e pa cura mi heridanan emocional.”

DEN TEMPO DI MALEZA OF EDAD AVANSA

“Ora mi caba di resa, mi ta sinti con Dios su spirito ta duna mi forsa.”—Luis

Luis, kende nos a menciona den e prome articulo di e serie aki, tin un problema serio di curason, y na dos ocasion el a hera muri. Awor, e mester haya oxigeno 16 ora pa dia. El a bisa: “Constantemente mi ta haci oracion na Jehova. Anto ora mi caba di resa, mi ta sinti con Dios su spirito ta duna mi forsa. Oracion ta duna mi e curashi pa sigui padilanti pasobra mi tin fe den dje y mi sa cu e ta cuida mi.”

Petra, kende tin 80 y pico aña, a bisa: “Tin asina tanto cos cu mi kier haci, pero mi no por. Ta duro pa mira con tiki tiki mi forsa ta baha. Mi ta sinti mi cansa, y mi tin cu depende riba remedi. Hopi biaha mi ta corda con Hesus a pidi su Tata pa laga cierto dificultadnan pasa, si esey tabata posibel. Pero Jehova a duna Hesus forsa, y Jehova ta fortalece ami tambe. Oracion ta mi terapia diario.  Ora mi caba di papia cu Dios, mi ta sinti mi mucho mas mihor.”—Mateo 26:39.

Julian, kende ta sufri di multiple sclerosis pa mas cu 30 aña caba, tin e mesun sintimento. El a bisa: “Mi a cambia mi stoel di ehecutivo pa un rolstoel, pero si bo wak bon mi bida ta mihor aworaki pasobra mi ta completamente dedica na sirbi otro hende. Duna di bo mes na otronan por alivia bo sufrimento, y Jehova ta cumpli cu su promesa di fortalece nos ora nos tin mester di esey. Mescos cu apostel Pablo, mi por bisa sinceramente: ‘Pa tur cos mi tin forsa pa medio di esun cu ta duna mi poder.’”—Filipensenan 4:13.

ORA BO PERDE UN SER KERI

Antonio ta corda: “Na prome instante, mi no por a kere cu mi tata a fayece den un accidente di trafico. Esey tabata hopi inhusto; e tabata djis un peaton. Pero mi no por a haci nada. E tabata den coma pa cinco dia prome cu el a fayece. Di un of otro manera, mi a logra keda sin yora dilanti di mi mama, pero ora mi tabata mi so, mi tabata na yoramento. M’a keda puntra mi mes: Dicon? Dicon?”

Antonio a sigui conta: “Durante e dianan doloroso ey, mi a keda pidi Jehova pa yuda mi tene mi emocionnan bou di control y pa duna mi paz mental. Y pocopoco mi a sinti mi mas trankil. Mi a corda cu cualkier un di nos por haya nos cu ‘tempo y suceso imprevisto.’ Ya cu Dios no por gaña, mi ta sigur cu lo mi mira mi tata atrobe den e resureccion.”—Eclesiastes 9:11, NW; Juan 11:25; Tito 1:2.

“Aunke e accidente di avion a kita bida di nos yiu homber, ainda nos tin grato recuerdo di tempo cu nos a pasa hunto cu otro.”—Robert

Robert, kende nos a menciona den e prome articulo, tin mesun pensamento. El a bisa: “Ora ami cu mi casa a haci oracion na Jehova, nos a experencia e paz mental cu Filipensenan 4:6 y 7 ta papia di dje. E paz interno aki a yuda nos papia cu e reporteronan tocante nos speransa di resureccion. Aunke e accidente di avion a kita bida di nos yiu homber, ainda nos tin grato recuerdo di tempo cu nos a pasa hunto cu otro. Nos ta purba di enfoca riba eseynan.”

Robert a agrega: “Ora nos rumannan cristian a bisa nos cu nan a mira con trankil nos a papia tocante nos fe na television, nos tabata bisa nan cu esey sin duda tabata danki na e tantisimo oracionnan cu nan a haci pa nos. Mi ta sigur cu Jehova tabata sostene nos mediante nan palabranan di consuelo.”

Manera e ehempelnan ey ta mustra, Dios ta duna consuelo na hende cu ta pasa den varios problema y reto. Kico di abo? Sin importa ki problema bo por haya den bida, tin consuelo disponibel cu por yuda bo trata cu tempo dificil. * Pues pakico no busca yudansa cerca Jehova? E ta e “Dios di tur consuelo.”—2 Corintionan 1:3.

^ par. 5 A cambia algun nomber den e articulo.

^ par. 23 Si bo ta desea di haya yudansa pa hala cerca Dios y haya su consuelo, tuma contacto cu e testigonan di Jehova den bo area of skirbi un di nos sucursalnan.