Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 5 2016

 IMITA NAN FE | DAVID

“E Bataya Ta di SEÑOR”

“E Bataya Ta di SEÑOR”

DAVID a cera su curpa pa e soldaatnan cu tabata core pasa banda di dje no dal e. Nan tabata morto spanta segun cu nan tabata huy for di e campo di bataya. Ta kico a duna nan asina tanto miedo? Bes tras bes, David lo mester tabata tende nan ripiti nomber di un homber. E homber ey cu un estatura hopi halto tabata para den e vaye.

E homber tabata Goliat. David por a mira dicon e soldaatnan tabatin miedo di dje; e tabata hopi grandi. Hasta sin su armadura impresionante, kisas e tabata pisa mas cu dos homber hunto. Pero e tabata bon arma, un guerero experencia y hopi fuerte. Na bos halto Goliat a reta e soldaatnan Israelita. Imagina con su stem duro tabata resona meymey di e seronan mientras cu e tabata reta e ehercito di Israel y nan Rey, Saul. Goliat a puntra si tabatin cualkier homber cu kier a bin bringa contra dje y caba cu e guera.—1 Samuel 17:4-10.

E Israelitanan a cobardia. Rey Saul tambe a cobardia. David a bin compronde cu e situacion ey tabata asina pa un luna caba. E dos ehercitonan, esun di e Filisteonan y esun di e Israelitanan, a keda den un posicion di confrontacion cu no tabata bay niun caminda segun cu dia tras dia Goliat tabata reta nan. E situacion aki a molestia David. Tabata un berguensa pa mira e Rey di Israel y su soldaatnan, incluso tres di David su ruman hombernan mas grandi, tembla di miedo. Pa David, Goliat tabata haci mas cu djis humilia e ehercito di Israel, e tabata insulta Jehova, e Dios di Israel. Pero kico David, un simpel hoben, por a haci? Y awe, kico nos por siña for di David su fe?—1 Samuel 17:11-14.

“UNGIE, PASOBRA ESAKI T’E”

Ban wak kico a sosode lunanan prome. Anochi tabata cera segun cu David tabata cuida e carnenan di su tata den e seronan banda di Betlehem. E tabata un mucha homber inteligente, cu cabey cora, bunita wowo y bon tipo. Den su tempo liber, e tabata toca harpa. Mas e tabata practica, mas mihor e tabata bira. Ademas, el a ser conmovi pa canta tocante Dios su bunita creacion. Pero riba e anochi ey, su tata a manda yam’e y bis’e bin mesora.—1 Samuel 16:12.

David a bin haya su tata, Isai, ta papia cu un homber di edad. Tabata e fiel profeta Samuel. Jehova a mand’e ungi un di e yiu hombernan di Isai pa bira e siguiente rey di Israel. Samuel ya a mira e shete ruman hombernan mas grandi di David, pero Jehova a bisa Samuel bon cla cu E no a scoge niun di nan. Pero ora David a yega, Jehova a bisa Samuel: “Ungie, pasobra esaki t’e.” Dilanti di tur David su ruman hombernan, Samuel a habri un cacho cu tabata yena cu azeta special y a basha un tiki riba David su cabes. Despues di e anochi ey, su bida a cambia por completo. Bijbel ta bisa: “E spirito di SEÑOR a bin cu poder riba David for di e dia ey padilanti.”—1 Samuel 16:1, 5-11, 13.

Humildemente David a reconoce cu ta Jehova a yud’e mata bestia salbahe

Acaso David a bira ambicioso y kier a bira rey pa caba? No, gustosamente el a warda pa e spirito di Jehova gui’e y pa lag’e sa ki tempo lo e mester  a asumi su responsabilidadnan. Mientrastanto, el a sigui cu su humilde trabou di pastorea e tou. E mester tabatin hopi dedicacion y curashi pa cumpli cu e trabou ey. Na dos ocasion bestia feroz a ataca e tou di carne di su tata; e prome biaha, un leon y despues un beer. David no a purba di defende e carnenan di leu y djis core cu e leon y e beer, sino di biaha el a bringa cu nan pa defende e carnenan indefenso aki. Na tur dos ocasion, ta e so a mata e bestianan salbahe aki.—1 Samuel 17:34-36; Isaias 31:4.

Cu tempo, Rey Saul a tende di David su bon reputacion y a manda yam’e. Aunke ainda Saul tabata un guerero poderoso, el a perde Jehova su aprobacion pasobra el a rebeldia contra instruccion di Dios. Como cu Jehova a kita su spirito for di dje, hopi biaha un mal spirito tabata molesti’e; e tabata haya atake di rabia, tabata desconfia y violento. Ora Saul tabatin mal beis, e unico cos cu por a calm’e tabata musica. Algun di e hombernan di Saul a tende cu David tabata un bon musico y cu e tabata bringa bon. Pesey el a manda yama David, y no a dura mucho cu el a bira Saul su musico y cargado di arma.—1 Samuel 15:26-29; 16:14-23.

Specialmente hobennan por siña hopi for di e ehempel di fe di David. Tuma nota cu el a pasa su tempo liber ta haci cosnan cu a hal’e mas cerca Jehova. Ademas, cu pasenshi el a desaroya habilidadnan cu despues lo a yud’e den su trabou. Pero riba tur cos, el a sigui guia di e spirito di Jehova. Esta un excelente ehempel pa nos!—Eclesiastes 12:1.

“NO LAGA CURASON DI NINGUN HENDE DESMAYA PA SU CAUSA”

Tempo David tabata sirbi Saul, hopi biaha David tabata bay cas pa pastorea e carnenan, tin biaha pa periodonan largo. Ta durante un di periodonan aki Isai a manda David pa wak con ta bay cu su tres ruman hombernan mas grandi cu tabata den e ehercito di Saul. David a obedece su tata y a bay na e Vaye di Ela cu yen di provision pa nan. Ora el a yega, pa su sorpresa el a haya e dos ehercitonan den e confrontacion describi na comienso di e articulo aki. E dos ehercitonan tabata riba un sero, cada un na un banda di e vaye.—1 Samuel 17:1-3, 15-19.

Pa David, e situacion aki tabata inaceptabel. Con e ehercito di e Dios bibo, Jehova, por a huy di miedo pa un simpel homber pagano? David a mira cu Goliat su desafio tabata un insulto directo contra Jehova. Pesey, David a cuminsa urgi e soldaatnan pa caba cu Goliat. No a dura mucho cu David su ruman homber di mas grandi, Eliab, a tende loke David tabata bisa. El a zundra David y a acus’e di a bin djis pa haci cos di caweta y wak con e bataya tabata bay. Pero David a contest’e: “Kico mi a haci awor? No tabata djis un pregunta mi a haci?” Despues, cu hopi curashi el a sigui bisa cu mester a vence Goliat. Un hende a conta Rey Saul esey, y el a ordena pa trece David cerca dje.—1 Samuel 17:23-31.

David a bisa e Rey e palabranan animador aki: “No laga curason di ningun hende desmaya pa su causa.” Sin duda, Saul y su hombernan tabata desanima pa motibo di Goliat. Probablemente, nan a  haci e fout di compara nan mes cu e gigante ey y a pensa cu apenas nan lo a yega na su zij of pecho. Tambe nan lo a pensa cu e gigante bon arma ey lo a derota nan facilmente. Pero David, si, no a pensa asina. Manera nos lo wak, el a mira e problema for di un otro angulo. Pues el a ofrece pa e mes bringa contra Goliat.—1 Samuel 17:32.

Saul no tabata kier. El a bisa: “Bo no ta capaz pa bay contra e Filisteo aki pa bringa cu ne; abo ta un hoben [of, “mucha”, BPK] ainda, ma e ta un guerero for di su hubentud.” Acaso David tabata un mucha? No, pero e tabata mustra hopi jong y no tabatin suficiente edad pa ta den ehercito. E tempo ey David lo tabatin rond di 20 aña, y ya caba e tabata conoci pa su curashi.—1 Samuel 16:18; 17:33.

Pa Saul por a trankilisa, David a cont’e con el a mata e leon y e beer. Ta gaba e tabata gaba? No. David tabata sa con el a logra bringa contra nan. El a bisa: “E SEÑOR, kende a libra mi for di gara di leon y for di gara di beer, e lo libra mi for di man di e Filisteo aki.” Saul a acepta y a bisa David: “Bay, y cu SEÑOR sea cu bo.”—1 Samuel 17:37.

Lo bo kier tin fe manera David? Tuma nota cu David su fe no tabata basa simplemente riba un soño. E tabatin fe den Dios debi na loke el a siña di Dios y loke el a experencia. E tabata sa cu Jehova ta stima y proteha su sirbidornan y ta cumpli cu tur su promesanan. Si nos tambe kier cultiva fe manera David, nos mester sigui siña tocante e Dios cu Bijbel ta papia di dje. Segun cu nos ta aplica loke nos ta siña, nos lo haya bon resultado, y esey lo fortalece nos fe.—Hebreonan 11:1.

“SEÑOR LO ENTREGA BO DEN MI MAN”

Na prome instante, Saul tabata kier pa David bisti e armadura di Rey. E tabata parce esun di Goliat, traha di koper y cu probablemente a inclui un corasa cu tabatin algo manera scama di metal riba dje. David a purba di move y bira cu e armadura grandi y pisa bisti, pero el a realisa cu esey lo a strob’e. E no tabata un soldaat, pues e no a custumbra di bisti un armadura, specialmente no esun di Saul, kende tabata e homber di mas halto na Israel. (1 Samuel 9:2) David a kita tur cos pone abou y a scoge pa keda cu e paña bisti cu e tabata custumbra cu ne, esta, paña di un wardador di carne cu tabata ekipa pa proteha su tou.—1 Samuel 17:38-40.

David tabatin su staf, of baston, di wardador, su tas y su slinger. Kisas un slinger no a parce mucho cos, pero en realidad, e tabata un arma poderoso. E tabata ideal pa un wardador pasobra e tabata traha di un saco di paña of cuero cu dos strep pega na dje. E tirado di slinger tabata hinca un piedra den e pida cuero of paña. Despues, e tabata draai e slinger hopi duro mes na halto y tabata laga un di e strepnan los pa e piedra sali cu un velocidad halto y bay dal e victima. E arma aki tabata asina ideal cu tin biaha un ehercito tabatin soldaat cu tabata uza slinger.

David tabata cla y a haci lihe pa enfrenta su enemigo. Imagina bo con el a haci oracion sin stop mientras e tabata buk canto di e riu seco pa coy cinco piedra lizo. Despues el sali na careda pa bay na e campo di bataya.

Kico Goliat a pensa ora el a mir’e? E relato ta bisa: “El a menospreci’e, pasobra e tabata un hoben ainda, cu cabey cora, y di nechi apariencia.” Goliat a grita: “Ta cacho mi ta, cu bo ta bin cu palo riba mi?” Parce cu el a mira e staf di David pero no e slinger. El a maldiciona David den nomber di e diosnan Filisteo y a hura cu lo el a duna e parhanan di cielo y e bestianan di mondi e curpa di David.—1 Samuel 17:41-44.

Te awe, David su contesta firme ta un excelente ehempel di fe. Djis imagina con e hoben aki ta grita Goliat bek: “Bo ta bin riba mi cu spada, cu lansa y cu jabalina, ma ami ta bin riba bo den e nomber di e SEÑOR di ehercitonan, e Dios di e ehercitonan di Israel, kende bo a reta.” David tabata sa cu forsa y arma di hende no tabata mucho importante. Goliat a falta respet pa Jehova, y Dios lo no a keda sin tuma medida contra dje. Manera David a bisa: “E bataya ta di SEÑOR.”—1 Samuel 17:45-47.

David no tabata ciego, e por a mira Goliat su tamaño y arma. Sinembargo, David no a laga esey  intimid’e. E no a haci e fout cu Saul y su ehercito a haci: e no a compara su mes cu Goliat. En bes di esey, el a compara Goliat cu Jehova. Cu un estatura di casi tres meter, Goliat tabata hopi mas halto y grandi cu cualkier homber, pero e no tabata nada na comparacion cu e Soberano di universo. Pues, mescos cu cualkier hende, e tabata djis manera un insecto, y Jehova tabata cla pa extermin’e.

David a hinca man den su tas pa coy un piedra y a core bay contra su enemigo. El a pone e piedra den e slinger y draai e hopi duro mes na halto. Goliat, cu su cargado di escudo dilanti dje, tabata bin mas y mas cerca di David. Goliat su estatura lo tabata un desbentaha p’e. Como cu su cargado di escudo tabata di estatura normal, casi e no por a hisa e escudo suficiente halto pa proteha e gigante su cabes. Y ta net eynan David a mik.—1 Samuel 17:41.

David a mira cu hasta un gigante no ta nada compara cu Jehova Dios

David a laga e piedra los. Imagina e silencio cu lo a reina segun cu e piedra tabata bula pa bay dal su victima. Sin duda, Jehova lo a haci sigur cu David no tabatin nodi tira niun piedra mas. E piedra a dal Goliat y a bora drenta den su frenta. E gigante a cay boca abou na suela. Casi sigur su cargado di escudo lo a haya miedo y core bay na careda. David a yega cerca di Goliat, coy su spada y kap su cabes kita afo.—1 Samuel 17:48-51.

Finalmente, Saul y su soldaatnan a haya curashi, y cu un grito di guera nan a sali bay contra e Filisteonan. E bataya a caba net manera David a bisa Goliat cu lo el a caba: “SEÑOR ... lo entrega boso den nos man.”—1 Samuel 17:47, 52, 53.

Awe, e sirbidornan di Dios no ta bringa den guera. E tempo ey a pasa. (Mateo 26:52) Pero, nos tin cu imita e fe di David si. Mescos cu ne, Jehova mester ta real pa nos, y e ta e unico Dios cu nos mester sirbi y respeta. Tin biaha, nos por sinti nos chikito na comparacion cu nos problemanan, pero nan ta chikito compara cu Jehova su poder ilimita. Si nos scoge Jehova como nos Dios y pone fe den dje mescos cu David, e ora ey niun reto ni niun problema no tin nodi intimida nos. No tin nada cu e poder di Jehova no por vence.