Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 5 2016

 BIJBEL TA CAMBIA BIDA DI HENDE

Mi Tabata Amarga y Violento

Mi Tabata Amarga y Violento
  • NACI NA AÑA: 1974

  • PAIS NATAL: MEXICO

  • SU PASADO: ADOLESCENTE VIOLENTO Y TABATA GUSTA BRINGA

MI PASADO:

Mi a nace na Ciudad Mante, un region bunita den e estado di Tamaulipas, Mexico. Por lo general, e habitantenan di e stad ta amabel y generoso. Pero lamentablemente, debi na crimen organisa, e area tabata hopi peligroso.

Mi ta e di dos di cuater ruman homber. Mi mayornan a batisa mi den iglesia catolico, y mas despues mi a forma parti di e koor di parokia. Mi kier a agrada Dios pasobra mi tabatin miedo pa e husga mi y kima mi pa semper den fierno.

Tempo mi tabatin cinco aña, mi tata a bay laga nos. Esey a haci mi hopi dolor y a laga un bashi den mi curason. Nos tabata stim’e masha hopi, y pesey mi no por a compronde ta dicon el a bandona nos. Mi mama tabatin cu traha hopi ora pa e por a cria ami cu mi tres ruman hombernan.

Mi a probecha di e situacion y a keda sin bay scol pa asina mi por a asocia cu muchanan mas grandi. Nan a siña mi papia palabra malo, huma, horta y bringa cu mokete. Como cu mi tabata gusta domina otro hende, mi a siña box, lucha libre, arte marcial y tambe con pa uza arma. Mi a bira un adolescente violento. Hopi biaha mi tabata envolvi den tiroteo, y varios biaha mi a keda tur na sanger y casi morto benta riba caya. Mi tabata causa mi mama hopi dolor ora e tabata haya mi den e situacion ey y den pura mester a hiba mi hospital.

Tempo mi tabatin 16 aña, un di mi amigonan di infancia cu yama Jorge a bin na nos cas. El a bisa nos cu e ta un testigo di Jehova y cu e kier a comparti un mensahe importante cu nos. El a cuminsa splica nos su creencianan y a uza Bijbel pa haci esey. Nunca mi a lesa Bijbel, y mi tabata fascina pa siña tocante Dios su nomber y su proposito. Jorge a ofrece nos un curso di Bijbel, y nos a acepta.

BIJBEL A CAMBIA MI BIDA:

Mi a sinti un gran alivio ora mi a siña cu fierno no ta un siñansa di Bijbel. (Salmo 146:4; Eclesiastes 9:5) Unabes mi a siña esey, mi no tabatin miedo mas di Dios. Mas bien, mi a cuminsa mir’e como un Tata cu ta stima su yiunan y cu kier lo mihor pa nan.

 Segun cu mi tabata siña mas durante mi curso di Bijbel, mi a mira e necesidad pa haci cambio den mi personalidad. Mi mester a cultiva humildad y stop di acudi na violencia. E conseho na 1 Corintionan 15:33 a yuda mi. E ta bisa cu “mal compania ta daña bon custumber.” Mi a realisa cu si mi kier a transforma mi personalidad, mi mester a stop di asocia cu hende cu tabatin mal influencia riba mi. Pues mi a cambia mi amigonan di antes pa miembronan di e berdadero congregacion cristian; hende cu no tabata resolve nan desacuerdonan cu mokete of otro forma di violencia, pero cu principionan di Bijbel.

Un otro texto cu tabatin un efecto riba mi ta esun di Romanonan 12:17 te cu 19. E ta bisa: “No paga malo cu malo ... Si ta posibel, te asina leu cu ta depende di boso, keda na paz cu tur hende. No tuma venganza, ... pasobra ta para skirbi: ‘“Venganza ta di mi; ami lo paga bek”, Jehova ta bisa.’” Mi a bin acepta cu Jehova lo atende cu inhusticia na su mes manera y na su mes tempo. Pocopoco mi a cambia mi estilo di bida violento.

Nunca lo mi lubida loke a pasa cu mi un anochi ora mi tabata bay cas. Un grupo di hoben di un gang rival di antes a ataca mi, y e lider di e grupo a dal mi den mi lomba y a grita: “Defende bo mes awor.” Na e momento ey, mi a haci un oracion cortico na Jehova y a pidie yuda mi controla mi mes. Aunke mi tabatin hopi gana di defende mi mes, mi a logra scapa. E siguiente dia, mi a topa e lider di e gang ora e tabata su so. Mi sanger a herbe den mi curpa, pero den silencio mi a bolbe pidi Jehova yuda mi controla mi mes. Pa mi sorpresa, e hoben a cana bin cerca mi y a bisa: “Pordona mi pa loke a pasa ayera nochi. Berdad ta cu lo mi tin gana di ta manera bo. Mi kier studia Bijbel.” Mi tabata hopi contento cu mi por a domina mi rabia. Danki na esey, el a cuminsa un curso di Bijbel.

Lamentablemente, e resto di mi famia no a sigui studia Bijbel e tempo ey. Pero mi a tuma un decision firme pa sigui studia y no laga nada ni niun hende stroba mi. Mi tabata sa cu asociacion riba un base regular cu e pueblo di Dios lo a cura mi heridanan emocional y duna mi e famia cu mi tabatin mester. Mi a sigui haci progreso, y na 1991, mi a batisa como testigo di Jehova.

E BENEFICIONAN:

Mi tabata un persona amarga, violento y cu tabata gusta domina otro hende. Pero e Palabra di Dios a transforma mi bida por completo. Pa e ultimo 23 añanan, mi tin e privilegio di sirbi como un predicador di tempo completo y ta comparti e mensahe biblico di paz cu ken cu kier scucha.

Pa un tempo, mi a haci trabou boluntario na e sucursal di testigonan di Jehova na Mexico. Eynan mi a conoce Claudia, un mucha muher cristian yen di energia, y nos a casa na 1999. Mi ta hopi agradecido na Jehova cu el a bendiciona mi cu un fiel compañera.

Nos a sirbi den un congregacion di Idioma di Seña di Mexico y tabata yuda hende sordo siña tocante Jehova. Mas despues, nos a ser invita pa muda bay Belize pa siña hende tocante Bijbel. Aunke nos bida ta mucho mas simpel akinan, nos tin tur loke nos mester pa ta feliz. Nos lo no cambi’e pa nada.

Cu tempo, mi mama a bolbe sigui un curso di Bijbel y a batisa. Ademas, awor mi ruman homber mas grandi, su casa y nan yiunan tambe ta testigo di Jehova. Algun di mi amigonan di antes cu kende mi a comparti e mensahe di Reino tambe ta sirbi Jehova.

Ta tristo pa bisa cu algun miembro di mi famia a muri debi cu nan no a cambia nan caracter violento. Si mi a sigui e caminda ey, probablemente mi tambe lo a muri. Mi ta agradecido na Jehova cu el a hala mi cerca dje y su sirbidornan, kendenan cu bondad y pasenshi a siña mi pa aplica principionan biblico den mi bida.