Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 4 2017

Praslin, Seychelles, caminda general Gordon a haya su Hofi di Eden na 1881

Paradijs Riba Tera​—⁠Fantasia of Realidad?

Paradijs Riba Tera​—⁠Fantasia of Realidad?

Paradijs! Foyetonan di biahe cu ta masha colorido ta duna nos gana di bula bay un “paradijs” leu caminda nos por relaha y lubida tur nos problemanan. Pero nos sa di experencia cu ora nos regresa cas, realidad ta spera nos y nada no a echt cambia.

A pesar di esey, hende ta fascina cu e idea di paradijs. Nos no por evita di pensa: Acaso “paradijs” ta djis un dushi fantasia? Si ta asina, dicon nos ta dje fascina ey cu ne? Paradijs por bira realidad algun dia?

E IDEA DI PARADIJS DEN DIFERENTE CULTURA

A traves di siglonan, hende tabata hopi interesa den e idea di un paradijs. Pa hopi hende, nan interes a lanta debi cu Bijbel ta haci mencion di “un hofi parti pariba, na Eden.” Kico a haci e hofi ey asina atractivo? E relato ta conta nos cu for di suela Jehova Dios “a haci nace tur palo cu ta agradabel pa bista y bon pa cuminda.” E hofi ey tabata un luga agradabel y bon, y e cos di mas interesante tabata “e palo di bida meymey di e hofi.”—Genesis 2:8, 9.

E relato na Genesis ta menciona tambe cuater riu cu tabata sali for di e hofi. Te awe, nos conoce dos di e riunan ey: Tigris (of Hidekel) y Eufrates. (Genesis 2:10-14) E dos riunan ey ta pasa caminda awe ta Irak—cu un tempo tabata parti di Persia di antiguedad—y ta termina den Golfo Persico.

Pesey no ta straño cu e idea di paradijs riba Tera ta un parti importante di e herencia cultural di Persia. Por ehempel, den e Museo di Arte di Filadelfia, na Pennsylvania, Merca, tin un tapijt di Persia di siglo 16 y den e diseño tin un hofi yen di flor y palo rondona pa un muraya. E palabra Perso pa “hofi rondona pa muraya” ta nifica tambe “paradijs”, y e escena riba e tapijt ta cuadra cu e descripcion di e Hofi di Eden como un luga bunita y yen di mata.

De echo, hopi idioma y cultura rond mundo tin cuentanan tocante paradijs. Segun cu hende a plama bay na tur parti di Tera, nan a bay cu diferente version di e relato original cu, despues di siglonan, a mescla cu e creencia- y leyendanan di e luga local. Te cu awe, hende, sin pensa dos bes, ta describi luganan hopi bunita como un paradijs.

E BUSKEDA PA PARADIJS

Algun explorador a yega di bisa cu nan a haya e paradijs perdi. Por ehempel, na 1881, Charles Gordon, un general di ehercito di Inglatera, a bishita e Islanan Seychelles. E tabata asina impresiona cu e bunitesa y abundancia di mata di e Vallée de Mai, un luga cu awor ta riba lista di World Heritage, cu el a yam’e Hofi di Eden. Durante siglo 15, e nabegante Italiano Christoffel Columbus a pensa cu e tabata cerca di descubri e Hofi di Eden ora el a yega e isla Hispañola, cu awor ta forma Republica Dominicana y Haiti.

Mapping Paradise, un buki moderno di historia, tin detaye di mas cu 190 mapa antiguo, y hopi di nan ta mustra Adam cu Eva den Eden. Por ehempel, tin un mapa straño basa riba un copia di siglo 13 di e manuscrito di Beatus di Liébana. Te ariba di e mapa tin un rectangulo of vierhoek chikito cu paradijs net meymey y djeynan ta sali cuater riu, yama “Tigris”, “Eufrates”, “Pison” y “Gihon”; cada riu ta bay na un di e skinanan di e rectangulo. Supuestamente esey ta representa con cristianismo a plama na tur cuater skina di mundo. E tipo di plachinan ey ta mustra cu aunke hende no sa unda e Paradijs original tabata, toch semper nan a keda interesa den e idea di e paradijs ey.

John Milton, un poeta Ingles di siglo 17, ta conoci pa su poema Paradise Lost (E Paradijs Perdi), basa riba e relato den Genesis tocante e pica di  Adam y e echo cu Dios a sac’e for di Eden. Den e poema aki, Milton a hala atencion na e promesa cu hende lo bolbe haya chens di biba pa semper riba Tera. El a skirbi: “E ora ey henter e Tera lo ta un paradijs.” Mas despues, Milton a skirbi un di dos parti titula: Paradise Regained (E Paradijs Recobra).

UN CONCEPTO NOBO

Ta bisto cu e concepto di un paradijs riba Tera cu no ta existi mas ta un idea cu ta core manera un liña cora durante historia humano. Pero dicon hende awor no ta papia mas di esey? Basicamente ta pasobra, manera Mapping Paradise ta splica, “teologonan ... deliberadamente a bira lomba pa e asunto di unda paradijs tabata situa.”

Hopi baido di misa ta siña cu finalmente nan ta bay cielo, y no un paradijs riba Tera. Pero Bijbel ta bisa na Salmo 37:29: “E hustonan lo hereda e Tera, y lo biba den dje pa semper.” Como cu nos mundo awe no ta nada parecido na un paradijs, con nos por tin sigur cu e promesa aki lo cumpli algun dia? *

TERA LO TA UN PARADIJS

Jehova Dios, kende a crea e Paradijs original, a priminti cu lo e bolbe haci e Tera un paradijs. Con lo e haci esey? Corda cu Hesus a siña nos pa pidi den oracion: “Laga bo Reino bin. Laga bo boluntad sosode, mescos cu den cielo, tambe riba Tera.” (Mateo 6:10) E Reino ey ta un gobierno mundial den man di Hesucristo cu lo reemplasa tur gobierno humano. (Daniel 2:44) Bou di gobernacion di e Reino ey, Dios lo cumpli cu su boluntad di transforma e Tera den un paradijs.

Hopi tempo pasa, profeta Isaias a describi, bou di inspiracion di Dios, e condicionnan cu lo existi den e Paradijs priminti, caminda tur e problemanan y conflictonan cu ta pone hende sufri awe lo no t’ey mas. (Isaias 11:6-9; 35:5-7; 65:21-23) Nos ta anima bo pa tuma djis un par di minuut pa lesa e textonan ey den bo propio Bijbel. Esey lo yuda bo haya un idea di loke Dios ta bay haci pa hende cu ta obedec’ele. E hendenan cu lo biba e tempo ey lo tin dos cos cu Adam a perde: bida den un paradijs y e aprobacion di Dios.—Revelacion 21:3.

Dicon nos por tin sigur cu e speransa di cu Tera lo bira un paradijs ta un realidad y no un fantasia? Pasobra Bijbel ta bisa nos: “E cielonan ta e cielonan di SEÑOR, ma Tera el a duna na e yiunan di hende.” E speransa di Paradijs ta un promesa cu “Dios, kende no por gaña, a priminti hopi tempo pasa.” (Salmo 115:16; Tito 1:2) Esta un bunita speransa Bijbel ta duna nos: bida eterno den Paradijs!

^ par. 15 Ta interesante tambe cu den Coran, na versiculo 105 di sura 21, E Profetanan (Al-Anbiya’) ta bisa: “Esnan husto entre Mi sirbidornan lo hereda e Tera.”