Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 4 2017

Ta importante pa papia habri cu otro y di antemano

Kico pa Haci Ora un Ser Keri Tin un Maleza Terminal

Kico pa Haci Ora un Ser Keri Tin un Maleza Terminal

DOREEN a keda sorprendi ora dokter a diagnostica su casa, Wesley, di apenas 54 aña di edad, cu un tumor celebral hopi agresivo. * Dokter a dun’e solamente algun luna di bida. Doreen ta corda: “Mi no por a kere loke mi a tende. Mi a keda tur turdi pa simannan largo. Mi a sinti manera cu ta cu otro hende esey a sosode y no cu nos. Mi no tabata prepara pa esey.”

Lamentablemente, e manera cu Doreen a reacciona ta normal. Tur hende por haya un maleza terminal na cualkier momento. E cos bon ta cu hopi hende di buena gana ta tuma e responsabilidad di cuida un ser keri cu tin un maleza terminal. Pero esey no ta nada facil. Kico miembronan di famia por haci pa consola y cuida nan ser keri cu ta den fase terminal? Con miembronan di famia cu ta duna cuido por trata cu e diferente emocionnan cu nan lo experencia durante e periodo di e pashent su maleza? Segun cu morto di e persona ta acerca, kico nan por verwacht? Pero prome, ban wak dicon e echo cu nan tin cu cuida un persona cu ta den fase terminal ta un reto awe.

UN PROBLEMA COMUN

Hopi cos a cambia debi na ciencia medico. Mas o menos un siglo pasa, hasta den paisnan mas desaroya, hende tabata biba hopi menos aña. Hende tabata muri facilmente debi na malezanan contagioso of accidente. Masha poco hende por a yega un hospital, y mayoria di biaha ta miembronan di famia mes tabata cuida nan y hende tabata muri na cas.

Awe, avancenan riba tereno di medicina ta laga dokternan uza tratamentonan fuerte contra maleza pa alarga bida. Hende cu antes lo a muri rapidamente di un cierto maleza por biba varios  aña mas awe. Sinembargo, esey no ta nifica cu nan lo cura. Hopi biaha, e pashentnan ta sufri di maleza asina severo cu nan no por cuida nan mes. E tarea di cuida hende malo a bira mas complica y agotador.

Como resultado, mas y mas hende ta muri na hospital en bes di na cas. Hopi hende awe no sa di e proceso di morto, y masha poco hende a yega di mira un hende muri. Pues, miedo di loke ta desconoci por stroba un hende di cuida un miembro di famia cu ta malo. Kico por yud’e?

PLANIA DI ANTEMANO

Manera nos a mira den e caso di Doreen, hopi hende ta keda kibra ora dokter diagnostica un ser keri cu un maleza terminal. Pues ta normal cu lo bo sinti emocionnan fuerte manera ansiedad, miedo y tristeza. Kico por yuda bo prepara pa cuida un ser keri? Un fiel sirbidor di Dios a pidie: “Siña nos conta nos dianan, pa nos por presenta na bo un curason yen di sabiduria.” (Salmo 90:12) Si, pidi Jehova Dios pa e siña bo con pa “conta [bo] dianan” na un manera sabi pa bo por uza e ultimo dianan cu a keda bo cu bo ser keri na e mihor manera posibel.

Esaki ta rekeri bon planificacion. Si bo ser keri por comunica ainda y ta dispuesto pa papia tocante e asunto, lo ta sabi pa puntr’e ken mester tuma decision p’e ora cu e mes no por haci esey mas. Combersacionnan habri tocante si e kier ser reanima, si e kier bay hospital of si e kier haya cierto tratamentonan por minimisa mal comprondemento y sintimento di culpa di parti di miembronan di famia kendenan ta haya nan obliga di tuma decision pa un pashent incapacita. Si e pashent y su famia combersa habri cu otro y di antemano, e famia lo por enfoca riba dunamento di cuido durante e maleza. Bijbel ta bisa: “Pa falta di conseho plannan ta fracasa.”—Proverbionan 15:22.

KI YUDANSA BO POR DUNA?

Normalmente, e tarea principal di e persona cu ta duna cuido ta di consola. E persona cu ta muriendo mester sa cu bo ta stim’e y cu e no ta su so. Con bo por haci esey? Lesa algo p’e of canta cantica cu e ta gusta y cu ta anim’e. Hopi hende ta sinti nan bon ora un miembro di famia tene nan man y papia na un manera suave cu nan.

Ademas, ta bon pa bishitantenan bisa ken nan ta. Segun un rapport: “Parce cu e ultimo sentido di e cinco sentidonan cu un [pashent] ta perde ta su oido. E por sigui tende hopi bon maske e ta parce na soño, pues no bisa nada den su presencia cu lo bo no bisa ora e ta lanta.”

 Si ta posibel, haci oracion hunto. Bijbel ta bisa cu na un ocasion, apostel Pablo y su compañeronan tabata bou di presion intenso y tabata hasta teme pa nan bida. Kico nan a haci? Pablo a pidi su amigonan: “Boso tambe por yuda pa medio di boso oracionnan ferviente pa nos.” (2 Corintionan 1:8-11) Den situacionnan cu por causa hopi stress y durante maleza grave, ta masha importante pa haci oracion di curason.

ACEPTA E REALIDAD

E simpel echo cu bo sa cu bo ser keri lo fayece por angustia bo. Y esey no ta nada straño, pasobra morto no ta algo natural. Dios no a crea nos pa acepta morto como un parti normal di bida. (Romanonan 5:12) E Palabra di Dios ta yama morto un “enemigo.” (1 Corintionan 15:26) Pesey ta di compronde, y ta hasta algo normal, cu bo no kier pensa tocante morto di un ser keri.

Sinembargo, ora miembronan di famia tin un idea di kico por sosode, esey por calma nan y yuda nan enfoca riba haci cosnan mas comodo posibel pa e persona cu ta malo. Algun di e sintomanan cu por presenta ta ser menciona den e cuadro “ E Ultimo Simannan di Bida.” Claro cu no ta tur loke e cuadro ta menciona lo sosode cu tur pashent, y kisas nan lo no sosode den e mesun secuencia. Pero mayoria di pashent ta experencia por lo menos algun di e sintomanan ey.

Despues di morto di un ser keri, lo ta sabi pa papia cu un bon amigo cu a yega di ofrece pa yuda. Kisas mester trankilisa esnan cu ta duna cuido y miembronan di famia door di recorda nan cu nan ser keri su prueba a pasa y cu e no ta sufri mas. Na un manera amoroso, e Creador ta sigura nos cu “e mortonan no sa nada.”—Eclesiastes 9:5.

E MIHOR PERSONA CU POR CUIDA NOS

Nos por siña pa no rechasa yudansa di otro hende

Ta masha importante pa nos confia den Dios, no solamente durante e maleza terminal di un miembro di famia sino tambe durante e tristeza cu ta bin despues di su morto. Dios por consola bo mediante palabra di otro hende y mediante nan yudansa. Doreen a bisa: “Mi a siña pa no rechasa yudansa. De echo, nos no a spera di haya asina tanto yudansa. Ami cu mi casa tabatin sigur cu ta Jehova ta esun cu a bisa nos: ‘Mi t’aki pa yuda boso pasa den e cos aki.’ Lo mi no lubida esey nunca mas.”

Si, Jehova Dios ta e mihor Persona cu por cuida nos. Como Esun cu a crea nos, e ta compronde nos dolor y tristeza. E por y kier duna nos e yudansa y animacion necesario pa nos por trata cu e situacion. Mihor ainda, el a priminti cu pronto lo e elimina morto unabes y pa semper y resucita e miles di miyones di hendenan cu ta den su memoria. (Juan 5:28, 29; Revelacion 21:3, 4) Anto e tempo ey, tur hende lo por ripiti e palabranan di apostel Pablo, kende a bisa: “Morto, unda bo victoria ta? Morto, unda bo puy ta?”—1 Corintionan 15:55.

^ par. 2 A cambia e nombernan.

Mas Informacion

E TOREN DI VIGILANCIA

Dicon Cos Malo Ta Pasa cu Bon Hende?

Bijbel ta indica e fuente di tres causa di sufrimento humano.