Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 4 2017

E Tetragramaton, e nomber sagrado di Dios, Jehova, na letter Hebreo, di drechi pa robes

E Letter Hebreo di Mas Chikito Ta Duna Nos un Garantia Poderoso

E Letter Hebreo di Mas Chikito Ta Duna Nos un Garantia Poderoso

Di berdad nos por confia cu Dios lo cumpli cu tur su promesanan? Hesus tabata convenci di esey, y su siñansanan a yuda fortalece e fe di su oyentenan. Pensa un rato riba e ilustracion cu el a duna den su Sermon Riba Sero, menciona na Mateo 5:18: “Di berdad mi ta bisa boso cu cielo y Tera tin mas chens di caba na nada cu un letter di mas chikito of pida di un letter di Ley caba na nada sin cu tur loke tin para skirbi den dje sosode.”

E letter di mas chikito di e alfabet Hebreo ta י (yod), y esey ta e prome letter di e Tetragramaton, e nomber sagrado di Dios, Jehova. * Den bista di e escriba- y fariseonan, no solamente e palabra- y letternan di e Ley di Dios tabata sumamente importante, sino hasta cada “pida di un letter.”

Hesus a bisa cu tin mas chens pa cielo y Tera caba na nada cu un detaye di mas chikito di e Ley keda sin cumpli. Sinembargo, e Scritura ta sigura nos cu e cielo y e Tera literal lo existi pa semper. (Salmo 78:69) Pues ora Hesus a duna e comentario remarcabel aki, e kier a duna di compronde cu ni e detaye di mas chikito di e Ley lo no keda sin cumpli.

Acaso Jehova ta preocupa cu detayenan chikito? Claro cu si! Tuma nota di lo siguiente: Dios a bisa e Israelitanan cu nan no mester a kibra ni un weso di e lamchi di e Pasco Hudiu. (Exodo 12:46) Kisas esey ta parce un detaye chikito. Acaso nan a compronde dicon nan no mester a kibra ni un weso? Probablemente cu no. Pero Jehova Dios si tabata sa cu e detaye aki tabata un profecia cu lo a cumpli relaciona cu e Mesias, esta, cu nan lo no a kibra ni un di su wesonan ora e muri riba e staca di tormento.—Salmo 34:20; Juan 19:31-33, 36.

Kico e palabranan di Hesus ta siña nos? Nos tambe por tin pleno confianza cu tur e promesanan di Jehova Dios lo cumpli sigur te den e ultimo detaye. Esta un garantia poderoso e letter Hebreo di mas chikito ta duna nos!

^ par. 3 E letter di mas chikito di e alfabet Griego ta iota y e ta parce e letter Hebreo י (yod). E Ley di Moises tabata skirbi originalmente na Hebreo y a ser uza na e idioma ey. Pesey, ora Hesus a menciona e palabranan “un pida di un letter”, e tabata referi probablemente na e letter Hebreo י (yod).