Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 4 2016

Un Mundo sin Violencia Ta Posibel?

Un Mundo sin Violencia Ta Posibel?

Abo of un miembro di bo famia a yega di bira victima di violencia? Bo tin motibo pa pensa cu un dia lo bo bira victima? Un organisacion a yega di bisa cu violencia ta “un problema di salubridad publico rond mundo cu ta sigui aumenta.” Wak algun ehempel.

ABUSO SEXUAL Y VIOLENCIA DOMESTICO: Nacionnan Uni a raporta cu “un di cada tres hende muher a yega di bira victima di maltrato fisico of abuso sexual na man di un partner na dado momento den su bida.” Lamentablemente, “segun calculo, rond mundo, un di cada cinco hende muher lo bira victima di violacion of intento di violacion.”

CRIMINALIDAD RIBA CAYA: Segun informe, tin mas cu 30.000 gang violento activo na Merca. Na Latino America, mas o menos un di cada tres persona a bira victima di crimen violento.

ASESINATO: Segun calculo, casi mey miyon hende a ser asesina durante 2012; esey ta mas cu e cantidad di hende cu a ser mata den guera. Sur Africa y Centro America tin e promedio di asesinato di mas halto; esey ta mas cu cuater biaha e promedio di rond mundo. Den un aña so, mas cu 100.000 hende a ser asesina na Latino America, y mas o menos 50.000 hende a ser asesina na Brazil so. Tin un solucion duradero pa violencia?

HENDE POR CABA CU VIOLENCIA?

Dicon tin asina tanto violencia? Tin hopi motibo, entre otro, desigualdad social y economico cu ta causa tension, desprecio pa bida di hende, mal uzo di alcohol y droga, mucha cu for di chikito ta ser exponi na comportacion violento di adultonan y e echo cu criminalnan violento aparentemente no ta haya castigo pa nan mal echonan.

Nos mester admiti si cu na algun parti di mundo hende a logra reduci violencia. Den e ultimo decada, e cantidad di asesinato den e stad São Paulo, Brazil, cu tin miyones di habitante, a baha cu 80 porciento. Asina mes, tin hopi crimen violento den e ciudad, y e cantidad di asesinato ta mas o menos 10 di cada 100.000 habitante. Kico anto lo caba cu violencia unabes pa semper?

E solucion duradero pa violencia ta encera e actitud y comportacion di hende. Pa hende violento cambia, nan mester deshaci di caracteristicanan manera orguyo, golosidad y egoismo y reemplasa nan cu amor, respet y interes den otro hende.

Kico por motiva un hende pa haci cambionan drastico asina? Pensa riba loke Bijbel ta siña:

  • “Amor pa Dios ta nifica cu nos ta cumpli cu su mandamentonan.”—1 Juan 5:3.

  • “E temor di SEÑOR ta pa odia maldad.”—Proverbionan 8:13.

Amor pa Dios y e temor di desagrad’e ta asina fuerte cu nan por motiva hasta un persona violento pa cambia su bida, no djis superficialmente, pero te na e punto di cambia henter su personalidad. Di berdad esaki ta posibel?

 Tuma por ehempel Alex, * kende a pasa 19 aña den prizon na Brazil pa varios acto di violencia. Na aña 2000, el a bira un testigo di Jehova despues cu el a tuma un curso di Bijbel cerca e Testigonan. Di berdad el cambia su comportacion violento? Si, y ta duel e pa tur e mal cosnan cu el a haci. El a bisa: “M’a bin stima Dios como cu el a laga mi sinti cu di berdad el a pordona mi. Gratitud y amor pa Jehova a yuda mi cambia mi comportacion.”

Cesar, cu tambe ta di Brazil, tabata envolvi den ladronicia y atraco arma. Esey tabata su estilo di bida pa 15 aña largo. Kico a pon’e cambia? Wel, tempo cu e tabata den prizon, testigonan di Jehova a tuma contacto cu ne, y e tambe a tuma un curso di Bijbel. Cesar a bisa: “Pa prome biaha mi a haya un proposito den bida. M’a siña stima Dios. Tambe m’a siña pa mi tin temor p’e, esta, un temor saludabel pa no bolbe haci loke ta malo y haci Jehova tristo. Mi no kier tabata malagradecido pa e bondad cu el a mustra na mi. E amor y temor ey a motiva mi pa cambia.”

Siña kico bo mester haci pa bo por biba den un mundo sin violencia

Kico e experencianan aki ta mustra nos? Cu Bijbel tin e poder pa transforma bida di hende por completo y cambia nan manera di pensa. (Efesionan 4:23) Alex, menciona anteriormente, a agrega: “Loke m’a siña for di Bijbel tabata manera un baño cu awa limpi cu pocopoco a purifica mi di tur mi mal pensamentonan. Nunca mi a imagina mi cu lo mi por a logra esey.” Si, ora nos yena nos mente cu e mensahe puro di Bijbel, nos por kita tur mancha di maldad. E Palabra di Dios tin e poder pa purifica nos di e manera ey. (Efesionan 5:26) Como resultado, hende cruel y egoista por cambia y bira hende amabel y pacifico. (Romanonan 12:18) Ora nan aplica principionan biblico, nan lo tin paz den nan bida.—Isaias 48:18.

Mas cu ocho miyon testigo di Jehova den 240 pais a haya sa kico ta e secreto pa caba cu violencia. Hende di tur rasa, nivel social y background a siña pa stima y teme Dios, y tambe pa stima otro hende y biba na paz cu otro manera un famia mundial. (1 Pedro 4:8) Nan ta prueba palpabel cu un mundo sin violencia ta posibel.

UN MUNDO SIN VIOLENCIA TA CERCA

Bijbel ta priminti cu dentro di poco Dios lo limpia e Tera y caba cu violencia. E mundo violento di awe lo hay’e cu Dios su “dia di huicio y di destruccion di hende malbado.” (2 Pedro 3:5-7) Hende violento lo no pone otro hende sufri mas. Con nos por ta sigur cu Dios kier interveni y caba cu violencia?

Bijbel ta bisa cu Dios “ta odia hende cu ta gusta violencia.” (Salmo 11:5) E Creador stima paz y husticia. (Salmo 33:5; 37:28) Pesey lo e no tolera hende violento pa semper.

Si, un mundo nobo caminda lo reina paz ta dilanti porta. (Salmo 37:11; 72:14) Lo bo kier siña kico bo mester haci pa por biba den e mundo sin violencia ey?

^ par. 14 A cambia e nombernan.