Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 4 2016

E Mihor Comparacion Cu Bo Por Haci den Bo Bida

E Mihor Comparacion Cu Bo Por Haci den Bo Bida

BO TA considera bo mes un cristian? Si ta asina, bo ta un di e mas cu dos mil miyon hendenan cu ta bisa cu nan ta siguidor di Cristo. Awe tin miles di religion cu ta yama nan mes cristian, pero nan no tin e mesun punto di bista y ta siña doctrinanan cu ta contradeci otro. Pues, bo creencianan kisas ta hopi diferente for di otro hende cu ta yama nan mes cristian. Ta importa realmente kico bo ta kere aden? Si! Specialmente si bo kier practica e cristianismo cu Bijbel ta papia di dje.

E prome siguidornan di Hesucristo a bira conoci como “cristian.” (Echonan 11:26) No tabatin mester di otro nomber pa identifica nan, ya cu ta solamente un fe cristian tabatin. E cristiannan tabata uni y a sigui e siñansa- y instruccionnan di e Fundador di cristianismo, esta, Hesucristo. Kico di bo misa? Bo ta kere cu e ta siña loke Cristo a siña y loke e prome siguidornan di Cristo tabata kere aden? Con bo por sa sigur? Ta un manera so tin pa haya sa: uza Bijbel pa haci un comparacion.

 Pensa riba esaki: Hesucristo tabatin hopi respet pa e Scritura pasobra el a mir’e como e Palabra di Dios. El a condena hende cu a desvia for di siñansa di Bijbel djis pa sigui tras di tradicion di hende. (Marco 7:9-13) Cu tur siguransa nos por bisa cu e berdadero siguidornan di Cristo lo a basa nan creencianan riba Bijbel. Pues ta bon pa cada cristian puntra su mes: E siñansanan di mi religion ta di acuerdo cu Bijbel? Pa contesta e pregunta ey, compara loke bo religion ta siña cu loke Bijbel realmente ta bisa.

Hesus a bisa cu nos adoracion na Dios mester ta basa riba berdad, y e berdad ey ta den Bijbel. (Juan 4:24; 17:17) Y apostel Pablo a bisa cu pa nos haya salbacion, nos mester haya “conocemento exacto di e berdad.” (1 Timoteo 2:4) Pues ta importante pa nos basa nos creencia riba un conocemento exacto di e berdadnan cu tin den Bijbel, ya cu ta nos salbacion ta den wega.

CON NOS POR COMPARA NOS CREENCIANAN CU BIJBEL?

Nos ta invita bo pa lesa e seis preguntanan cu tin den e articulo aki y wak ki contesta Bijbel ta duna pa nan. Busca e textonan cu ta cita den bo mes Bijbel, lesa nan y pensa riba e contestanan. Despues, puntra bo mes: E siñansanan di mi religion ta di acuerdo cu loke Bijbel ta bisa?

E analisis breve aki por yuda bo haci e mihor comparacion cu bo por haci den bo bida. Bo ta dispuesto pa compara otro siñansanan di bo misa cu loke Bijbel ta bisa? Gustosamente testigonan di Jehova lo kier yuda bo analisa e berdadnan di Bijbel. Bo por pidi un Testigo un curso di Bijbel gratis, of bo por bishita nos website, jw.org.