Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 3 2016

 TOPICO PRINCIPAL | ORA UN SER KERI MURI

E Mortonan Lo Bolbe Biba

E Mortonan Lo Bolbe Biba

Gail, cu a ser menciona anteriormente, ta duda cu un dia lo e supera e dolor di a perde su esposo, Rob. Pero e ta ansioso pa mir’e atrobe den e mundo nobo cu Dios a priminti. Gail a bisa: “Mi texto faborito ta Revelacion 21:3 y 4.” E texto ey ta bisa en parte: “Dios mes lo ta hunto cu nan. Y lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.”

Gail a sigui bisa: “E promesa aki ta bisa tur cos. Mi ta echt sinti pa hende cu a perde un ser keri den morto pero cu no sa di e speransa cu nan por bolbe mira nan atrobe.” Gail ta demostra cu e ta kere loke Bijbel ta bisa y ta dedica un promedio di 70 ora tur luna na predica e bon noticia, esta, e promesa di Dios cu den futuro “lo no tin morto mas.”

Job tabata sigur cu lo e bolbe biba

Kisas esey ta parce manera un soño pa bo. Pero considera e ehempel di un homber cu yama Job. E tabatin un maleza grave. (Job 2:7) Aunke Job tabata asina malo cu e kier a muri, toch e tabatin fe den e poder di Dios pa lant’e for di morto y pa e biba riba Tera. Cu confianza, Job a bisa: “O cu bo lo a sconde mi den Seol [of, graf] ... Abo lo yama, y ami lo contesta bo; lo bo anhela na e obra di bo mannan.” (Job 14:13, 15) Job tabatin confianza cu su Dios lo sinti su falta y lo anhela pa lant’e bek for di morto.

Pronto, ora Dios transforma Tera den un paradijs, lo e haci esey, tanto pa Job como pa hopi hende mas. (Lucas 23:42, 43) Bijbel ta confirma na Echonan 24:15 cu “lo bay tin un resureccion.” Hesus a sigura nos: “No keda asombra pa loke mi a caba di bisa, pasobra lo yega e ora cu tur esnan cu ta den graf lo tende su stem y lo sali afo.” (Juan 5:28, 29) Job lo mira cumplimento di e promesa ey. Ademas, lo e tin e speransa di recobra e “vigor di su hubentud” y pa semper su cuero lo keda “mas suave cu esun di mucha.” (Job 33:24, 25) Esey lo ta e caso tambe pa tur hende cu pone fe den Dios su promesa di un resureccion aki riba Tera.

Si bo a perde un ser keri den morto, e informacion cu nos a trata kisas lo no kita bo tristeza completamente. Pero si bo medita riba e promesanan di Dios cu tin den Bijbel, bo por haya berdadero speransa y e forsa pa sigui padilanti.—1 Tesalonicensenan 4:13.

Bo kier haya mas informacion tocante con pa trata cu tristeza? Of kisas bo ta puntra bo mes: Dicon Dios ta permiti maldad y sufrimento? Pa haya contesta practico di Bijbel cu ta duna consuelo, bishita nos website, jw.org.

Mas Informacion

E TOREN DI VIGILANCIA

Kico Ta Sosode ora un Hende Muri?

Bijbel ta papia di ocho persona cu a resucita. Kico nan a experencia ora cu nan a muri?