Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 3 2016

 TOPICO PRINCIPAL | ORA UN SER KERI MURI

Con pa Trata cu Tristeza

Con pa Trata cu Tristeza

Tin hopi conseho disponibel riba e topico aki. Sinembargo, no ta tur ta practico. Por ehempel, tin hende ta bisa cu bo no mester yora of expresa bo sintimentonan mes. Otronan ta bisa cu bo mester haci net lo contrario y saca afo tur loke bo ta sinti. Bijbel ta duna un punto di bista mas balansa, un cu estudionan recien ta apoya.

Hende di algun cultura ta haya cu no ta pas pa hende homber yora. Pero nos mester tin berguensa pa yora den publico? Expertonan riba tereno di salud mental ta reconoce cu ta normal pa nos yora ora nos ta tristo. Y esey, cu tempo, lo yuda bo sigui padilanti a pesar di e perdida di un ser keri. Pero si bo tene bo tristeza aden, bo por haci mas daño na bo mes. Bijbel no ta apoya e idea cu ta malo pa yora ni cu hende homber no tin mag di yora di tristeza. Corda riba Hesus. Aunke e tabatin poder pa resucita hende, toch el a yora ora su amigo stima Lazaro a muri.—Juan 11:33-35.

Hopi biaha, e dolor di perde un ser keri por inclui sintimentonan di rabia, specialmente ora e ser keri fayece inespera. Tin hopi motibo pakico nan por sinti nan mes asina. Por ehempel, esey por ta e caso ora cu un hende cu bo respeta bisa bo algo sin pensa y cu ta hurt bo. Un homber di Sur Africa cu yama Mike a bisa: “Mi tabatin apenas 14 aña tempo mi tata a fayece. Na su entiero, e pastoor anglicano a bisa cu Dios tin mester di bon hende den cielo y pesey el a tum’e. * Esey a duna mi rabia pasobra nos echt tabatin mester di nos tata. Despues di 63 aña, ainda mi ta sinti e dolor.”

Awor, kico si bo tin sintimento di culpa? Esey por ta e caso specialmente ora un persona fayece inesperadamente. E famia of amigo di e difunto por pensa: Ken sa cu e no por ta na bida aworaki si solamente mi a haci tal y tal cos. Of kisas e ultimo biaha cu boso tabata hunto, boso tabatin un discusion. Esaki por laga bo sinti hasta mas culpabel.

Si rabia y sintimento di culpa ta molestia bo, ta importante pa bo no tene e emocionnan ey aden. Mas bien, papia cu un amigo cu lo scucha bo y sigura bo cu ta normal pa bo tin e sintimentonan ey ora bo perde un ser keri. Bijbel ta recorda nos: “Un amigo ta stima tur ora bay, y un ruman ta naci pa tempo di adversidad.”—Proverbionan 17:17.

E mihor Amigo cu un hende por tin den e momentonan ey ta nos Creador, Jehova Dios. Desahoga bo mes cerca dje pasobra “e ta interesa den [bo].” (1 Pedro 5:7) Ademas, e ta priminti nos cu tur hende cu haci esey lo haya consuelo mediante “e paz di Dios cu ta surpasa tur comprondemento.” (Filipensenan 4:6, 7) Anto laga Dios yuda bo recupera di e dolor pa medio di e consuelo di su Palabra, Bijbel. Bo por traha un lista di texto cu ta duna consuelo. (Wak e  cuadro.) Bo por hasta memorisa algun di nan. Ora bo medita  riba e textonan aki, nan por yuda bo, specialmente ora bo ta bo so of ora bo no por drumi bon.—Isaias 57:15.

Recientemente, un homber di 40 aña, cu nos lo yama Jack, a perde su esposa stima debi na cancer. Jack ta bisa cu tin biaha e ta sintie hopi su so, pero oracion a yud’e hopi. El a bisa: “Ora mi resa na Jehova, nunca mi ta sinti mi mi so. Hopi biaha mi ta lanta den anochi y mi no por pega soño mas. Despues cu mi lesa un parti di e Scritura y medita riba dje, y tambe desahoga mi mes den oracion, mi ta sinti un paz mas aya di normal y mi mente y curason ta trankil. Esey ta pone cu mi por drumi atrobe.”

Un hoben cu yama Vanessa a perde su mama pa motibo di enfermedad. Vanessa tambe a mira cu oracion ta yuda. El a bisa: “Den e momentonan di mas dificil, mi tabata djis menciona e nomber di Dios y yora sin stop. Jehova tabata scucha mi oracionnan, y semper el a duna mi e forsa cu mi tabatin mester.”

Algun specialista ta conseha esnan cu ta lucha cu tristeza pa yuda otro hende of pa haci trabou boluntario pa comunidad. Esey por alivia e persona su dolor y dun’e goso atrobe. (Echonan 20:35) Hopi cristian cu ta tristo a ripara cu nan ta haya consuelo ora nan yuda otro hende.—2 Corintionan 1:3, 4.

^ par. 5 Esey no ta un siñansa di Bijbel. Bijbel ta mustra cu tin tres motibo pakico hende ta muri.—Eclesiastes 9:11; Juan 8:44; Romanonan 5:12.