Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 3 2016

 TOPICO PRINCIPAL | ORA UN SER KERI MURI

Consola Esnan Cu Ta Tristo

Consola Esnan Cu Ta Tristo

Bo a yega di haya bo mes den un situacion unda cu bo no sa con pa yuda un persona cu a perde un ser keri? Tin biaha nos no ta sigur kico pa bisa of haci, pues al final nos no ta bisa ni haci nada. Pero tin algun cos practico cu nos por haci.

Hopi biaha, e unico cos cu e persona tin mester ta pa bo ta hunto cu ne y bis’e cu ta duel bo pa su perdida. Den hopi cultura, un bon manera pa bo mustra cu bo ta interesa den e persona ta ora bo pone man riba su schouder, dun’e un brasa fuerte of djis primi su man pa e sa cu bo ta sinti p’e. Si e persona kier papia, scuch’e cu atencion. Ademas, haci algo pa e famia. Kisas bo por yuda e persona cu ta tristo cu algo cu e no por haci na e momento ey, manera cushina, wak pa su yiunan of yuda cu e preparacionnan pa e entiero si e ta desea esey. Bo yudansa por tin mas efecto cu cualkier cos cu bo por bisa.

Cu tempo, bo por papia tocante e difunto, kisas mencionando algun di su bon cualidadnan of experencianan alegre. Esey por pone un smile riba cara di e persona cu a perde un ser keri. Esey ta loke a pasa cu Pam, kende a perde su esposo Ian seis aña pasa. El a bisa: “Tin biaha hende ta conta mi tocante  cosnan bon cu Ian a haci cu nunca mi no tabata sa di nan, y esey ta laga mi sinti mi bon.”

Algun experto ta bisa cu hopi hende ta haya basta yudansa net despues di morto di nan ser keri, pero despues di un tempo, ora nan amigonan bolbe na nan rutina, nan ta lubida loke e persona ey tin mester. Pesey, haci esfuerso pa bo tuma contacto regularmente cu un amigo despues di morto di su ser keri. * Nan lo aprecia esaki pasobra nan ta haya oportunidad pa desahoga nan mes y haya alivio pa nan tristeza.

Considera e ehempel di Kaori, di Japon. El a keda hopi down despues cu el a perde su mama den morto y apenas 15 luna despues, su ruman muher grandi tambe a fayece. Afortunadamente, el a ricibi yudansa continuo di su bon amigonan. Un di nan tabata Ritsuko, kende tabata hopi mas grandi cu ne. Ritsuko a ofrec’e pa bira su bon amiga. Kaori a bisa: “Pa ta franco, mi no tabata gusta e idea ey mucho. Mi no tabata kier pa niun hende tuma e luga di mi mama, y mi tabata pensa cu niun hende no por a haci esey tampoco. Pero, e manera cu Ritsuko tabata trata mi a pone mi bira mas pega cu ne. Tur siman nos tabata bay predica y bay e reunionnan cristian hunto. E tabata invita mi pa bay bebe te cerca dje, e tabata trece cuminda pa mi y hopi biaha e tabata skirbi mi carta y manda carchi pa mi. E actitud positivo di Mama Ritsuko tabatin bon influencia riba mi.”

Ya a pasa 12 aña cu mama di Kaori a fayece, y awe Kaori cu su esposo ta dedica gran parti di nan tempo na e trabou di predica. Kaori a bisa: “Ainda Mama Ritsuko ta sigui mustra interes den mi. Ora mi bay bek caminda mi tabata biba, semper mi ta bishit’e y pasa ratonan hopi ameno cu ne.”

Un otro ehempel di un persona cu a haya yudansa continuo di otro hende ta Poli, un testigo di Jehova na Chipre. E tabatin un esposo amabel cu yama Sozos, kende a pone un bon ehempel como un wardador cristian. Sozos tabata invita huerfano y viuda na nan cas pa nan come y pasa tempo hunto cu nan. (Santiago 1:27) Lamentablemente, na edad di 53 aña, Sozos a fayece debi na un tumor celebral. Poli a bisa: “Mi a perde mi fiel casa cu kende mi tabatin 33 aña casa.”

Busca maneranan practico pa yuda esnan cu a perde un ser keri

Despues di entiero, Poli a muda bay Canada cu su yiu di mas chikito, Daniel, kende tabatin 15 aña. Eynan, nan a cuminsa reuni cu un congregacion di testigonan di Jehova. Poli ta corda: “E rumannan di mi congregacion nobo no tabatin niun idea di loke nos a pasa aden y nos circunstancianan dificil. Pero esey no a stroba nan di acerca nos y duna nos consuelo cu nan palabranan bunita y yudansa practico. E yudansa ey a bin net na ora, specialmente e tempo ey cu mi yiu tabatin mas mester di su tata. E rumannan cu ta dirigi e congregacion a mustra hopi interes den Daniel. Specialmente un di nan a haci sigur pa invita Daniel ora e tabata asocia cu otro ruman of ora e tabata bay hunga bala.” Awe, tanto Poli como Daniel ta bon y feliz.

Sin duda, tin varios manera cu nos por ofrece yudansa practico y consuelo na esnan cu a perde un ser keri. Bijbel tambe ta duna consuelo; e ta duna un bunita speransa pa futuro.

^ par. 6 Algun hende a hasta marca e fecha di fayecimento riba un kalender como recordatorio pa asina nan por duna consuelo na nan amigo ora esaki ta necesario, sea riba e fecha of e dianan rond di e fecha.