Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 2 2016

Si Bo Haci Caso di Spiertamento, Bo Por Salba Bo Bida

Si Bo Haci Caso di Spiertamento, Bo Por Salba Bo Bida

DIA 26 di december 2004, un temblor di un magnitud di 9,1 a sacudi e isla Simeulue cu ta keda noordwest di Sumatra, Indonesia. E hendenan cu tabata para na costa a mira cu e nivel di lama tabata bahando mas cu normal. Mesora, tur hende a cuminsa core bay na e seronan. Segun cu nan tabata core nan tabata grita den nan idioma “Smong! Smong!” cu ta nifica tsunami. Den menos cu 30 minuut, olanan grandi a dal e costa y a subi tera destruyendo mayoria di cas y pueblonan.

E Isla Simeulue tabata e prome area cu e tsunami devastador ey a dal. Sinembargo, di e 78.000 habitante di e isla, solamente 7 hende a perde nan bida. Dicon asina poco hende a muri? * Un dicho cu e habitantenan di e isla a uza tabata: “Si tin un temblor fuerte y e lama ta bay for di e costa, core bay na e seronan, pasobra e lama lo bin bek lihe cu hopi forsa.” Experencianan di pasado a yuda e hendenan di Simeulue reconoce ki ora un tsunami ta bin door di observa e cambio di lama. Debi cu nan a haci caso di spiertamento, nan por a scapa nan bida.

Bijbel ta papia di un desaster cu ta acercando, un “tribulacion grandi manera no a yega di sosode nunca, for di principio di mundo te awor, y cu lo no sosode nunca mas tampoco.” (Mateo 24:21) Pero esaki no kiermen cu hende iresponsabel of sucesonan catastrofico di naturaleza lo caba cu planeta Tera, pasobra e proposito di Dios ta pa e Tera permanece pa semper. (Eclesiastes 1:4) Mas bien, mediante e binidero tribulacion, Dios lo “caba cu esnan cu ta caba cu e Tera.” Esey lo ta fin di tur maldad y sufrimento. (Revelacion 11:18; Proverbionan 2:22) Esta un bendicion esey lo ta!

Ademas, contrario na tsunami, temblor of erupcion di volcan, e destruccion binidero lo no caba cu bida di hende inocente. Bijbel ta bisa cu “Dios ta amor”, y Dios, kende su nomber ta Jehova, ta priminti cu “e hustonan lo hereda e Tera, y lo biba den dje pa semper.” (1 Juan 4:8; Salmo 37:29) Pero, con abo por sobrevivi e gran tribulacion y asina disfruta di e promesanan di Dios? Esey ta door di haci caso di e señalnan di spiertamento.

SEA ALERTA NA E CAMBIONAN CU TA TUMANDO LUGA ROND MUNDO

Nos no por bisa ki dia e fin di tur maldad y sufrimento lo bin, pasobra Hesus a bisa: “Pa loke ta e dia y ora ey, ningun hende no sa, ni e angelnan di cielo ni e Yiu, sino e Tata so.” Asina mes, Hesus ta anima nos pa “keda vigila.” (Mateo 24:36; 25:13) Pero, vigila kico? Bijbel ta describi con mundo lo ta prome cu Dios trece e fin. Mescos cu e cambio diripiente di e nivel di lama a spierta e habitantenan di Simeulue cu un tsunami tabata biniendo, asina tambe e cambionan drastico di sucesonan  mundial lo spierta nos cu e fin ta cerca. E cuadro den e articulo aki ta mustra algun cambionan drastico cu Bijbel ta papia di dje.

Ta berdad cu algun di e sucesonan aki a sosode den pasado na un cierto grado. Pero Hesus a bisa cu ora nos mira “tur e cosnan aki”, nos lo sa cu e fin ta hopi cerca. (Mateo 24:33) Puntra bo mes: Ki tempo den historia tur e cosnan describi (1) a sosode na un escala mundial, (2) a tuma luga na e mesun tempo y (3) a desaroya na un escala nunca bisto? Ta bisto cu nos ta bibando den e tempo ey.

UN MUESTRA DI DIOS SU AMOR

Un ex-presidente di Merca a yega di bisa: “Sistemanan cu ta spierta hende adelanta ... ta salba bida di hende.” Despues di e tsunami di aña 2004, autoridadnan a instala un sistema cu por alerta hende di un posibel tsunami den e areanan afecta pa preveni cu den futuro hopi hende lo por perde nan bida. Asina tambe, Dios a percura pa hende haya sa di antemano ki ora e fin ta bin. Bijbel a profetisa: “E bon noticia aki di e Reino lo ser predica den henter e Tera habita, como testimonio pa tur nacion, anto e fin lo yega.”—Mateo 24:14.

Aña pasa so, testigonan di Jehova a dedica mas cu 1,9 mil miyon ora na predicacion di e bon noticia den 240 pais, y den mas cu 700 idioma. E trabou aki kisas ta un prueba grandi cu e fin ta cerca. Motiva pa amor pa nan prohimo, testigonan di Jehova ta haci tur nan esfuerso pa spierta otro hende cu Dios su dia di huicio ta acercando rapidamente. (Mateo 22:39) E echo cu bo por beneficia di e informacion aki ta un prueba cu Dios ta stima bo. Corda, “[Dios] no ta desea pa ningun hende ser destrui, ma e ta desea pa tur haya chens di arepenti.” (2 Pedro 3:9) Abo lo haci caso di Dios su amor y presta atencion na e spiertamentonan cu e ta duna?

 BUSCA UN LUGA DI REFUGIO

Corda cu ora e habitantenan na costa di Simeulue a wak e nivel di lama baha, nan a huy bay na luganan mas halto caminda tabata mas safe. Nan no a warda pa wak ki ora e lama lo subi tera, y e decision ey a salba nan bida. Pues, pa sobrevivi e binidero tribulacion, abo tambe, na moda di papia, tin cu huy bay na un luga halto prome cu ta laat. Con nos por haci esey? Bou di inspiracion, profeta Isaias a skirbi tocante un invitacion conmovedor na tur hende durante “e ultimo dianan”, esta, e tempo cu nos ta bibando aden awor. E ta bisa: “Ban, laga nos subi bay na e sero di SEÑOR ... pa e siña nos tocante di su camindanan, y pa nos cana den su bereanan.”—Isaias 2:2, 3.

Ora bo ta riba top di un sero, bo por tin un mihor bista y bo ta mas safe. Di igual manera, miyones di hende rond mundo a haci cambionan positivo den nan bida pasobra nan a siña conoce Dios su camindanan pa medio di Bijbel. (2 Timoteo 3:16, 17) Debi cu nan a haci esey, nan a cuminsa “cana den [Dios] su bereanan” y disfruta di su aprobacion y proteccion.

Abo lo acepta e invitacion ey y beneficia di e proteccion amoroso di Dios durante e dianan dificil aki? Nos ta anima bo pa analisa e pruebanan biblico tocante “e ultimo dianan” cu tin den e cuadro di e articulo aki. Testigonan di Jehova den bo area lo ta contento pa yuda bo haya un mihor comprondemento di e textonan den e cuadro y con pa aplica nan. Of bo por haya contesta pa bo preguntanan riba nos website, www.jw.org/jw-paa. Bay na LOKE BIJBEL TA SIÑA > PREGUNTA CU BIJBEL TA CONTESTA.

^ par. 3 E tsunami aki a cobra bida di mas cu 220.000 persona. E tabata un di e tsunaminan di mas desastroso den historia.