Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 2 2016

 TOPICO PRINCIPAL | DICON HESUS A SUFRI Y MURI?

Di Berdad Esey A Sosode?

Di Berdad Esey A Sosode?

Den lente di aña 33, nan a ehecuta Hesus di Nazaret. El a ser acusa falsamente di rebelion, maltrata cruelmente y claba na un staca. El a pasa den dolornan insoportabel prome cu el a muri. Pero Dios a lant’e for di morto, y 40 dia despues Hesus a bay cielo.

Nos por haya e relato extraordinario aki den e cuater Evangelionan di e Scritura Griego Cristian, conoci como e Testament Nobo. E relatonan ey realmente a sosode? Esaki ta un pregunta serio y importante. Si nan no a sosode, e ora ey e fe cristian ta sin balor y e speransa di bida eterno den Paradijs lo ta djis un soño. (1 Corintionan 15:14) Di otro banda, si e relatonan ey realmente a sosode, e ora ey lo tin un futuro briyante pa humanidad. Y abo tambe por ta parti di dje. Pero, e relatonan den e Evangelio ta djis un storia of nan a sosode di berdad?

KI EVIDENCIA TIN?

Contrario na leyendanan, loke tin den e Evangelionan ta completamente exacto hasta den e detayenan di mas chikito. Por ehempel, nos por haya hopi nomber di luganan cu te awe ainda ta existi. Algun historiador a confirma cu e personanan cu nos ta haya den e Evangelionan realmente a existi.—Lucas 3:1, 2, 23.

 Otro historiadornan di prome y di dos siglo tambe a haci mencion di Hesus. * E manera cu nan a describi su morto den e Evangelionan ta cuadra cu e metodo cu Romanonan tabata uza pa ehecuta hende den e tempo ey. Ademas, e relatonan ta skirbi na un manera franco y ta basa riba echo, hasta nan a skirbi e erornan di algun di Hesus su discipelnan. (Mateo 26:56; Lucas 22:24-26; Juan 18:10, 11) Tur e factornan aki ta indica cu e escritornan di e Evangelionan tabata honesto y exacto den loke nan a skirbi tocante Hesus.

KICO NOS POR BISA DI E RESURECCION DI HESUS?

Aunke mayoria di hende ta kere cu Hesus a biba y muri, algun ta duda cu el a resucita. Hasta su apostelnan no a kere e prome informenan cu Hesus a resucita. (Lucas 24:11) Sinembargo, e duda ey a kita ora cu nan y e otro discipelnan a mira Hesus na varios ocasion despues cu el a resucita. Ademas, na un ocasion tabatin mas cu 500 testigo ocular presente.—1 Corintionan 15:6.

Maske cu e discipelnan a core riesgo di ser aresta y mata, toch nan a mustra curashi ora cu nan a proclama tocante Hesus su resureccion, hasta na esnan cu a ehecut’e. (Echonan 4:1-3, 10, 19, 20; 5:27-32) Acaso e discipelnan lo tabatin curashi si nan no tabata sigur cu Hesus realmente a resucita? En realidad, e resureccion di Hesus ta e motibo dicon cristianismo tabatin un impacto asina grandi riba humanidad tanto di antes como di awe.

E relatonan di e morto y resureccion di Hesus cu nos ta haya den e Evangelionan tin tur caracteristica di un historia confiabel. Ora bo tuma tempo pa lesa nan, lo bo keda convenci cu di berdad e relatonan aki a sosode. Y si bo compronde pakico nan a tuma luga, lo bo bira mas convenci ainda. E siguiente articulo lo splica esey.

^ par. 7 Tacito, kende a nace rond di aña 55 despues di Cristo a skirbi: “Cristo, for di kende e nomber [cristian] a bin, a haya pena di morto durante e reinado di Tiberio na man di un di nos procuradornan, Poncio Pilato.” Suetonio (prome siglo), e historiador Hudiu Josefo (prome siglo) y Plinio e Menor, gobernador di Bitinia (comienso di siglo dos) tambe a haci mencion di Hesus.