Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 2 2016

 TOPICO PRINCIPAL

Dicon Hesus A Sufri y Muri?

Dicon Hesus A Sufri y Muri?

“Pa medio di un hende [Adam] pica a drenta mundo, y morto pa medio di pica.”—Romanonan 5:12

Imagina bo cu un persona ta puntra bo si bo kier biba pa semper, kico lo bo contesta? Hopi hende probablemente lo bisa cu nan kier biba pa semper, pero nan no ta kere cu esey ta posibel. Kisas nan lo bisa cu morto ta parti di bida, y cu esey ta e resultado final di nos existencia.

Awor, supone cu nan lo puntra bo si bo ta cla pa muri, kico lo bo contesta? Normalmente, mayoria di hende lo contesta cu nan no kier muri. Kico esaki ta mustra nos? Aunke cu nos ta enfrenta situacionnan dificil, nos tin e deseo natural pa biba. Bijbel ta mustra cu Dios a crea hende cu e deseo pa biba. E ta bisa: “El a pone eternidad den nan curason.”—Eclesiastes 3:11.

Sinembargo, e realidad ta cu hende no ta biba pa semper. Pues, kico a bay robes? Ademas, Dios a haci algo pa soluciona e problema? Bijbel su contesta ta un animacion pa nos, y e tin di haber cu e motibo pakico Hesus mester a sufri y muri.

KICO A BAY ROBES?

E prome tres capitulonan di e buki di Genesis ta conta nos cu Dios a duna e prome pareha humano, Adam cu Eva, e oportunidad pa biba pa semper. Y Dios a bisa nan kico nan tin cu haci pa haya bida eterno. Despues e relato ta mustra cu nan a desobedece Dios y a perde e oportunidad ey. Tin hende ta pensa cu e relato aki no ta real, cu e ta djis un storia. Pero mescos cu e Evangelionan, tur cos ta mustra cu e buki di Genesis ta contene un registro di historia confiabel. *

Kico tabata e resultado di e desobediencia di Adam? Bijbel ta contesta na e manera aki: “Pa medio di un hende [Adam] pica a drenta mundo, y morto pa medio di pica, y asina morto a pasa pa tur hende pasobra nan tur a peca.” (Romanonan 5:12) Adam a peca ora el a desobedece Dios. Pues, el a perde e oportunidad pa biba pa semper, y cu tempo el a muri. Como su descendiente, nos a hereda imperfeccion. E resultado di esey ta cu nos ta bira malo, bieu y nos ta muri. E splicacion aki ta di acuerdo cu loke cientificonan a descubri tocante e manera cu yiunan ta hereda cierto caracteristicanan for di  nan mayornan. Pero Dios a haci algo pa soluciona e problema?

LOKE DIOS A HACI

Dios a haci areglo pa haya bek, of cumpra, loke Adam a perde pa su descendientenan, esta, e oportunidad pa biba pa semper. Con Dios a logra esey?

Bijbel ta bisa na Romanonan 6:23: “E salario cu pica ta paga ta morto.” Esaki ta nifica cu morto ta consecuencia di pica. Adam a peca, pues el a muri. Asina tambe, nos ta peca y pesey nos ta muri. Nos a nace cu e condicion pecaminoso ey aunke cu esey no tabata nos fout. Pesey, bondadosamente Dios a manda su Yiu, Hesus, pa paga “e salario [di] pica” pa nos. Con el a haci esey?

E morto di Hesus a haci posibel pa nos biba feliz y pa semper

Ta debi na e desobediencia di Adam, un homber perfecto, nos a hereda pica y morto. Pesey, mester tabatin un homber perfecto cu a keda obediente te na morto pa libra nos di pica y morto. Bijbel ta splic’e na e manera aki: “Mescos cu mediante desobediencia di esun hende ey hopi a bira pecador, asina tambe mediante obediencia di esun persona aki hopi lo bira husto.” (Romanonan 5:19) Hesus tabata “esun persona aki.” El a bandona cielo, bira un homber perfecto * y a muri pa nos. Como resultado, ta posibel pa nos haya un posicion aproba dilanti di Dios y pa haya e speransa di biba pa semper.

E MOTIBO CU HESUS MESTER A SUFRI Y MURI

Pues, dicon tabata necesario pa Hesus muri? Dios Todopoderoso no por a djis saca un decreto pa e descendientenan di Adam por a biba pa semper? Dios sigur tabatin e autoridad pa haci esey. Pero esey lo a bay contra e ley cu el a stipula, esta, cu e salario di pica ta morto. E ley aki no ta un regla insignificante cu por ser kita of cambia ora ta cumbini. Dios su ley ta esencial pa berdadero husticia.—Salmo 37:28.

Si Dios a pone su ley un banda den e situacion aki, hende lo por a puntra nan mes si Dios lo haci mescos den otro situacionnan. Por ehempel,  Dios lo ta husto ora e dicidi ken lo bin na remarca pa haya bida eterno? Lo bo por confia cu e lo cumpli cu su promesanan? E echo cu Dios semper ta mantene su mes na su leynan ora di percura salbacion pa humanidad ta duna nos e siguransa cu semper lo e haci loke ta corecto.

Pa medio di Hesus su morto, Dios a haci posibel pa nos por biba pa semper den Paradijs riba Tera. Tuma nota di loke Hesus a bisa na Juan 3:16: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.” Pues, Hesus su morto no solamente ta un muestra di Dios su husticia pero, specialmente, di su gran amor cu e tin pa hende.

Sinembargo, dicon Hesus mester a sufri y muri un morto asina doloroso manera e Evangelionan ta describi? Wel, debi cu Hesus a keda fiel bou di prueba severo, el a demostra un bes y pa semper cu Diabel su acusacion contra hende, esta, cu hende no ta keda fiel bou di prueba, no ta berdad. (Job 2:4, 5) E acusacion ey lo por a parce berdad despues cu Satanas a pone Adam peca contra Dios. Pero Hesus, kende tabatin un bida perfecto mescos cu Adam, a keda obediente a pesar di hopi sufrimento. (1 Corintionan 15:45) Pues, el a demostra cu Adam tambe por a scoge pa obedece Dios. Door di persevera bou di prueba, Hesus a laga un ehempel pa nos sigui. (1 Pedro 2:21) Y Dios a recompensa su Yiu pa su obediencia perfecto ora el a dun’e bida inmortal den cielo.

CON ABO POR BENEFICIA DI LOKE HESUS A HACI?

Manera nos a mira, e morto di Hesus di berdad a sosode. Esey kiermen cu nos por biba pa semper. Pesey, nos ta bolbe haci e pregunta: Abo lo kier biba pa semper? Hesus a bisa kico nos mester haci pa logra esey: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.”—Juan 17:3.

E editornan di e revista aki ta invita bo pa siña mas tocante Jehova, e Dios berdadero, y su Yiu, Hesucristo. Testigonan di Jehova den bo area lo ta contento pa yuda bo. Pa mas informacion bishita nos website, www.jw.org/jw-paa.

^ par. 8 Wak “Carácter histórico de Génesis”, den Perspicacia para comprender las Escrituras, Volumen 1, pagina 1017, publica pa testigonan di Jehova.

^ par. 13 Ora Dios a transferi e bida di su Yiu for di cielo den e matriz di Maria, Hesus a ser concebi. Y e spirito santo di Dios a proteha Hesus pa e no hereda imperfeccion di Maria.—Lucas 1:31, 35.

Mas Informacion

CONMEMORACION

Dicon Recorda e Morto di Hesus?

Testigonan di Jehova ta invita bo pa bo reuni cu nan pa e ocasion tan importante aki. Lo bo haya sa con e bida y morto di Hesus por beneficia bo.

Kico Bijbel Ta Siña Realmente?

Dios Su Regalo di Mas Grandi—E Rescate

Kico ta e rescate? Con abo por beneficia di dje?