Sigui pa e contenido

Sigui pa e di dos menu

Sigui pa e index

Testigonan di Jehova

Papiamento (Aruba)

E Toren di Vigilancia  |  Num. 2 2017

 TOPICO PRINCIPAL | LO BO ACEPTA DIOS SU REGALO DI MAS GRANDI?

Dios Su Regalo di Mas Grandi—Kico Ta Haci Esaki Asina Special?

Dios Su Regalo di Mas Grandi—Kico Ta Haci Esaki Asina Special?

Kico ta haci un regalo hopi special pa bo? Tin cuater factor cu por hunga un rol: (1) ken a duna bo e regalo, (2) dicon el a duna bo e, (3) kico e persona a sacrifica pa e duna bo e regalo y (4) si e regalo a satisface un necesidad cu bo tabatin. Ora nos pensa riba e cuater factornan aki, nos por haya mas aprecio pa e rescate: Dios su regalo di mas grandi.

KEN A DUNA NOS E REGALO?

Un regalo por ta masha special pa nos pasobra nos a hay’e di un hende cu tin autoridad of un hende cu nos ta respeta hopi. Anto maske tin otro regalo cu no ta costa dje hopi ey, nos ta balora nan pasobra nos a haya nan di un famia stima of di un bon amigo. Esaki tabata e caso cu e regalo cu Russell a duna Jordan, menciona den e articulo anterior. Kico esaki tin di haber cu e regalo di e rescate?

Na prome luga, Bijbel ta bisa cu “Dios a manda su Yiu unigenito na mundo pa nos por haya bida pa medio di dje.” (1 Juan 4:9) Esey ta haci e regalo aki masha special pasobra niun hende no tin mas autoridad cu Dios. Relaciona cu Dios, un salmista Hebreo a bisa: “Abo, kende su nomber ta Jehova, abo so ta e Haltisimo riba henter Tera.” (Salmo 83:18, NW) Pues, nos no por haya un regalo for di un ser mas importante cu Dios.

Di dos, Dios ta “nos Tata.” (Isaias 63:16) Con asina? E ta esun cu a duna nos bida. Ademas, e ta percura pa nos lealmente, mescos cu un bon tata ta percura pa su yiunan. Ora Dios tabata papiando cu su pueblo den pasado, el a yama nan Efraim, y a bisa nan: “Ta Efraim ta mi yiu homber stima? E ta mi yiu faborito? ... Mi curason ta anhela na dje; siguramente lo mi tin misericordia di dje.” (Jeremias 31:20) Dios ta pensa mescos di su sirbidornan awe. E no ta solamente nos Creador todopoderoso sino tambe nos Tata y Amigo leal. Esey sigur ta haci su regalonan mas valioso ainda.

 DICON EL A DUNA NOS E REGALO?

Loke por haci un regalo masha special tambe ta ora e hende cu a duna nos e, no a dun’e pasobra e tabata obliga pa duna nos algo, sino pasobra e ta stima nos. Un hende cu ta duna di curason no ta verwacht di haya nada a cambio.

Dios a duna nos su Yiu pasobra e ta stima nos. Bijbel ta bisa: “Pa medio di esaki Dios a revela e amor cu e tin pa nos: Dios a manda su Yiu unigenito.” Cu ki proposito? “Pa nos por haya bida pa medio di dje.” (1 Juan 4:9) Dios tabata obliga pa haci esey? Absolutamente cu no! “E rescate cu Cristo Hesus a paga” ta un muestra di Dios su “bondad inmereci.”Romanonan 3:24.

Dicon Dios su regalo ta un muestra di “bondad inmereci”? Bijbel ta splica: “Dios a demostra su amor pa nos di e manera aki: Cristo a muri pa nos mientras cu nos tabata pecador ainda.” (Romanonan 5:8) Motiva pa su gran amor, Dios a yuda hende debil, desampara y pecador. Nos no merece e amor ey ni nunca nos lo no por paga Dios bek. Su regalo ta e muestra di amor di mas grandi den historia.

KICO TABATA E SACRIFICIO?

Un regalo por ta masha special tambe pasobra e persona cu a duna nos e a haci un gran sacrificio. Ora un persona ta dispuesto pa duna nos algo cu ta di gran balor p’e, nos ta balora e regalo ey pa motibo di e sacrificio cu el a haci.

Dios “a duna su Yiu unigenito.” (Juan 3:16) El a duna nos e persona cu mas e ta stima. Durante e miles di miyones di añanan cu Dios tabata crea e universo, Hesus a traha na su lado y a bira Dios “su delicia.” (Proverbionan 8:30) Hesus ta Dios su “Yiu stima” y “e imagen di e Dios invisibel.” (Colosensenan 1:13-15) Nunca no tabatin dos persona cu un amistad mas cera cu otro.

Pero Dios “no a spaar ni su mes Yiu.” (Romanonan 8:32) Jehova a duna nos lo mihor cu e tin. Ningun regalo no a cost’e mas cu esey.

E REGALO TA SATISFACE UN NECESIDAD URGENTE

Un regalo por ta masha special tambe pasobra e ta satisface un necesidad cu nos tin, kisas un necesidad urgente. Por ehempel, lo bo no keda masha agradecido si un hende, di su propio boluntad, paga pa un tratamento medico cu bo mes no por afford y cu lo por salba bo bida? E regalo ey sin duda lo ta hopi precioso, no ta berdad?

Bijbel ta bisa: “Mescos cu den Adam tur ta muri, asina tambe den Cristo tur lo haya bida.” (1 Corintionan 15:22) Como descendiente di Adam, nos tur ta “muri”, y nos no por scapa di maleza y morto ni nos no por reconcilia nos mes cu Dios y keda sin culpa dilanti dje. Y como simpel sernan humano, nos no por duna nos mes ni otro hende “bida.” Bijbel ta bisa: “Di ningun manera un hende por redimi su ruman, ni paga Dios placa di rescate p’e ... E lo no por paga p’e nunca.” (Salmo 49:7, 8) Nos tin mester di yudansa urgente pasobra nos no por paga e prijs di e rescate. Riba nos mes, nos lo no logra nada.

Pa motibo di Jehova su gran amor, di buena gana el a paga pa e “tratamento” cu nos tin mester pa salba nos bida, y el a haci esey mediante Hesus. Con e rescate ta logra esaki? Bijbel ta bisa: “E sanger di Hesus, su Yiu, ta limpia nos di tur pica.” Si, fe den e sanger cu Hesus a drama ta habri caminda  pa nos haya pordon pa nos picanan y bida eterno. (1 Juan 1:7; 5:13) Y con e rescate lo beneficia nos sernan keri cu a muri? Bijbel ta bisa: “Ya cu morto a bin pa medio di un hende, resureccion di e mortonan tambe ta bin pa medio di un hende [Hesus].”—1 Corintionan 15:21. *

E sacrificio di Hesus ta e regalo di mas grandi den historia pasobra ta e ser di mas halto a duna nos e debi na su gran amor. Ningun persona no a yega di haci un sacrificio mas grandi pa nos cu Jehova Dios. No tin ningun otro regalo cu ta satisface nos necesidad di mas grandi, esta, di ser libra di pica y morto. Si, e rescate ta un regalo unico.

 

^ par. 19 Pa mas informacion tocante Dios su proposito di resucita e mortonan, wak capitulo 7 di e buki Kico Bijbel Ta Siña Realmente? publica pa testigonan di Jehova. Tambe e ta disponibel riba www.jw.org/jw-paa.

Mas Informacion

Hala Serca Yehova

“El A Stima Nos Prome”

Kico e declaracion ‘Dios ta amor’ ta nifica realmente?